ಜಾಗತೀಕರಣ, ಉದಾರೀಕರಣ, ಖಾಸಗೀಕರಣದ ನೀತಿಗಳಿಂದಾಗಿ ಪ್ರಭುತ್ವ ಇನ್ನಷ್ಟು ಹಿಂಸಾತ್ಮಕವಾಗಿದೆ : ವೇಣುಗೋಪಾಲ

ಸಿಂಧನೂರು: ಶೋಷಿತರು, ಬಡವರು, ಆದಿವಾಸಿಗಳು ಸಂವಿಧಾನಾತ್ಮಕ ಹಕ್ಕುಗಳನ್ನು ಕೇಳಿದವರನ್ನೇ ಪ್ರಭುತ್ವ ದಮನಿಸುತ್ತದೆ. ಅದು ತನಗೆ ಬೇಕಾದಂತೆ ಒಪ್ಪಿತ ಅಭಿಪ್ರಾಯವನ್ನು ನಿರೀಕ್ಷಿಸುತ್ತದೆ. ತನ್ನ ದಮನಕಾಂಡದ ಮೂಲಕ ದುರ್ಬಲ ವರ್ಗಗಳ ಮೇಲೆ ಸವಾರಿ ಮಾಡುತ್ತಿದೆ ಎಂದು ಹೈದರಾಬಾದ್‌ನ ಹೋರಾಟಗಾರ ವೇಣುಗೋಪಾಲ ಕಳವಳ ವ್ಯಕ್ತಪಡಿಸಿದರು.

ನಗರದ ಸತ್ಯಾ ಗಾರ್ಡನ್‌ನಲ್ಲಿ ಲಡಾಯಿ ಪ್ರಕಾಶನ ಗದಗ, ಕವಿ ಪ್ರಕಾಶ ಕವಲಕ್ಕಿ, ಚಿತ್ತಾರ ಕಲಾ ಬಳಗ ಧಾರವಾಡ ಹಾಗೂ ಮೇ ಸಾಹಿತ್ಯ ಮೇಳ ಬಳಗ ಸಿಂಧನೂರು ಸಹಯೋಗದಲ್ಲಿ ಆಯೋಜಿಸಿದ್ದ ಮೆದಿಕಿನಾಳ ಭೂ ಹೋರಾಟ ನೆನಪಿನ ವೇದಿಕೆಯಲ್ಲಿ ಶನಿವಾರ ಹಮ್ಮಿಕೊಂಡಿದ್ದ ‘ಅಸಮಾನ ಭಾರತ ಸಮಾನತೆಗಾಗಿ ಸಂಘರ್ಷ ಅಂದು-ಇಂದು’ ಎಂಬ ಘೋಷವಾಕ್ಯದ 11ನೇ ಮೇ ಸಾಹಿತ್ಯ ಮೇಳದಲ್ಲಿ 'ದಮನದ ಸ್ವರೂಪಗಳು' ಗೋಷ್ಠಿಯಲ್ಲಿ ಅವರು ಮಾತನಾಡಿದರು.

ಪ್ರಭುತ್ವ ಬಯಸಿದರೆ ಸಾಂವಿಧಾನಿಕ ಹಕ್ಕುಗಳನ್ನು ಇಲ್ಲವಾಗಿಸುವ ಶಕ್ತಿ ಹೊಂದಿದೆ. ಅದರ ದಮನಕಾರಿ ನೀತಿಗಳು ಒಂದು ರೀತಿಯಲ್ಲಿ ಇಲ್ಲ, ಸರ್ವ ವ್ಯಾಪಿಯಾಗಿವೆ. ಸರ್ಕಾರದ ದಮನಕಾರಿ ನೀತಿಗಳು, ಬಡವರು, ಕಾರ್ಮಿಕರು ಹಾಗೂ ದುಡಿಯುವ ವರ್ಗದ ಮೇಲೆ ನಡೆಯುತ್ತಿರುವ ಅನ್ಯಾಯಗಳನ್ನು ಪ್ರಶ್ನಿಸುವ ಮಾನವ ಹಕ್ಕು ಹೋರಾಟಗಾರರು ಹಾಗೂ ಚಳವಳಿಗಾರರ ಮೇಲೆ ಯುಎಪಿಎದಂತಹ ಸುಳ್ಳು ಪ್ರಕರಣ ದಾಖಲಿಸಿ ಜೈಲಿಗೆ ತಳ್ಳಲಾಗುತ್ತಿದೆ. ತಮ್ಮನ್ನು ಕಾಡಿನಿಂದ ಒಕ್ಕಲೆಬ್ಬಿಸದಂತೆ ಪ್ರತಿರೋಧ ಒಡ್ಡಿದ ಕಾರಣಕ್ಕೆ ದೇಶದ ಹಲವು ಕಡೆ ಪ್ರಭುತ್ವವು ಮುಗ್ದ ಆದಿವಾಸಿಗಳ ಮೇಲೆ ದಮನಕಾಂಡ ಮುಂದುವರಿಸಿದೆ. ಜಾಗತೀಕರಣ, ಉದಾರೀಕರಣ ಹಾಗೂ ಖಾಸಗೀಕರಣದ ನೀತಿಗಳಿಂದಾಗಿ ಪ್ರಭುತ್ವ ಇನ್ನಷ್ಟು ಹಿಂಸಾತ್ಮಕವಾಗಿದ್ದು, ತನ್ನ ವಿರುದ್ಧ ದನಿ ಎತ್ತುವವರನ್ನು ಸಾರಾಸಗಟಾಗಿ ದಮನಿಸುತ್ತಿದೆ. ಶಾಸಕಾಂಗ ಹಾಗೂ ನ್ಯಾಯಾಂಗಗಳು ಪ್ರಭುತ್ವದ ಭಾಗವಾಗಿರುವುದರಿಂದ ಅನ್ಯಾಯಕ್ಕೊಳಗಾದವರಿಗೆ ನ್ಯಾಯ ಸಿಗುವುದು ಪ್ರಶ್ನಾರ್ಹವಾಗಿದೆ ಎಂದು ಹೇಳಿದರು.

ಬಹುತ್ವ ಭಾರತದಲ್ಲಿ ಏಕ ಸಂಸ್ಕೃತಿಯನ್ನು ಹೇರಲಾಗುತ್ತಿದೆ : ಡಾ.ಜೆ.ಎಸ್.ಪಾಟೀಲ್

ಚಿಂತಕ ಡಾ.ಜೆ.ಎಸ್.ಪಾಟೀಲ್ ‘ಸಾಂಸ್ಕೃತಿಕ ರಾಜಕಾರಣ’ ವಿಷಯದ ಕುರಿತು ಮಾತನಾಡಿ, ಭಾರತದ ಪ್ರಭುತ್ವ ಸರ್ವಾಧಿಕಾರದತ್ತ ಹೊರಟಿದೆ. ಏಕ ಸಂಸ್ಕೃತಿಯನ್ನು ಹೇರಲು ಬಲಪಂಥೀಯ ಸಂಘಟನೆಗಳು ಟೊಂಕಕಟ್ಟಿ ನಿಂತಿದ್ದು, ಅದಕ್ಕೆ ಕಳೆದ 2014ರಿಂದ ಇಲ್ಲಿಯವರೆಗೆ ಕೇಂದ್ರದಲ್ಲಿ ಅಧಿಕಾರದಲ್ಲಿ ಬಿಜೆಪಿ ಸರ್ಕಾರ ಬಹಿರಂಗ ಬೆಂಬಲ ನೀಡುತ್ತಿದೆ. ಬಹುತ್ವ ಭಾರತದಲ್ಲಿ ಏಕ ಸಂಸ್ಕೃತಿಯನ್ನು ಹೇರಲಾಗುತ್ತಿದೆ. ಇಂತಹ ಜನವಿರೋಧಿ ಸಾಂಸ್ಕೃತಿಕ ರಾಜಕಾರಣ ಅತ್ಯಂತ ಅಪಾಯಕಾರಿ. ಕಳೆದ ಹಲವು ದಶಕಗಳಿಂದ ಶೇ.100ರಲ್ಲಿ ಶೇ.3 ರಿಂದ 5 ಪ್ರತಿಶತ ಜನಸಂಖ್ಯೆಯ ಸಂಸ್ಕೃತಿಯನ್ನು ಉಳಿದ ಜನರ ಮೇಲೆ ಹೇರಲಾಗುತ್ತಿದೆ. ಇತ್ತೀಚಿನ ದಿನಗಳಲ್ಲಿ ಸಾಂಸ್ಕೃತಿಕತೆ ಹೆಸರಿನಲ್ಲಿ ಸಾಂಸ್ಕೃತಿಕ ಅರಾಜಕತೆ, ದಬ್ಬಾಳಿಕೆ ನಡೆಸಲಾಗುತ್ತಿದೆ. ಪುರೋಹಿತಶಾಹಿ ಶಕ್ತಿಗಳ ಮೂಲಕ ಸಂಸ್ಕೃತಿಯ ಹೆಸರಿನಲ್ಲಿ ಕಾರ್ಪೋರೇಟ್ ಬಂಡವಾಳಶಾಹಿಗಳು ಮಾರುಕಟ್ಟೆಯನ್ನು ಆಪೋಶನ ತೆಗೆದುಕೊಂಡು ಲೂಟಿ ಹೊಡೆಯುತ್ತಿವೆ. ಕಳೆದ ಮೂರ್ನಾಲ್ಕು ದಶಕಗಳ ಹಿಂದೆ ಅಷ್ಟೊಂದು ಜನಜನಿತವಲ್ಲದ ಆಚರಣೆಯಲ್ಲಿ ಇಲ್ಲದವುಗಳನ್ನು ವ್ಯಾಪಾರಕ್ಕಾಗಿ ಮುನ್ನೆಲೆಗೆ ತಂದು ಜನರನ್ನು ಭಾವನಾತ್ಮಕವಾಗಿ ದಿಕ್ಕು ತಪ್ಪಿಸಲಾಗುತ್ತಿದೆ ಎಂದು ಹೇಳಿದರು.

ಶಾಂತಿ ಬೇಕು ಎಂದು ಪ್ರತಿಪಾದಿಸುವವರನ್ನು ಅನುಮಾನದಿಂದ ನೋಡಲಾಗುತ್ತಿದೆ : ನವೀನ್ ಸೂರಿಂಜೆ

ಪತ್ರಕರ್ತ ಹಾಗೂ ಸಾಮಾಜಿಕ ಹೋರಾಟಗಾರ ನವೀನ್ ಸೂರಿಂಜೆ ‘ಸಾಂಸ್ಕೃತಿಕ ರಾಜಕಾರಣ’ ವಿಷಯದ ಕುರಿತು ಮಾತನಾಡಿ, ಯುದ್ಧ ಬೇಡ, ಶಾಂತಿ ಬೇಕು ಎಂದು ಪ್ರತಿಪಾದಿಸುವವರನ್ನು ಅನುಮಾನದಿಂದ ನೋಡುವುದಲ್ಲದೇ, ಅವರನ್ನು ದೇಶದ್ರೋಹಿಗಳು ಎನ್ನುವಂತೆ ಮಾಧ್ಯಮಗಳು ಬಿಂಬಿಸುತ್ತವೆ. ಕವಿತೆಯೊಂದನ್ನು ಬರೆದ ಕಾರಣಕ್ಕೆ ಮಂಗಳೂರಿನ ವಿದ್ಯಾರ್ಥಿನಿಯೊಬ್ಬರ ಮೇಲೆ ಬಲಪಂಥೀಯ ಸಂಘಟನೆಯವರು ಪೊಲೀಸ್ ಠಾಣೆಯಲ್ಲಿ ಕೇಸ್‌ ದಾಖಲಿಸಿ, ಕೊನೆಗೆ ಏನೆಲ್ಲಾ ಸರ್ಕಸ್‌ಗಳು ನಡೆದು ಬಿಜೆಪಿಯ ಜಿಲ್ಲಾಧ್ಯಕ್ಷನ ಮುಂದೆ ಬಹಿರಂಗವಾಗಿ ಕ್ಷಮೆ ಕೇಳಬೇಕು ಎಂದು ಆಗ್ರಹಿಸುತ್ತಾರೆ. ಇದರರ್ಥ ಏನು ? ನೈತಿಕ ಜವಾಬ್ದಾರಿ ಇಲ್ಲದ ಮಾಧ್ಯಮಗಳೂ ಈ ಬಗ್ಗೆ ಇನ್ನಿಲ್ಲದ ಕಥೆ ಕಟ್ಟಿ ತುತ್ತೂರಿ ಊದುತ್ತವೆ ಎಂದು ಸೂರಿಂಜೆ ಅಸಮಾಧಾನ ವ್ಯಕ್ತಪಡಿಸಿದರು.

ಈ ಗೋಷ್ಠಿಯಲ್ಲಿ ಮಂಜುನಾಥ ಗಾಂಧಿನಗರ, ವಿಜಯಲಕ್ಷ್ಮೀ ಗುರಿಕಾರ, ಚೆನ್ನು ಕಟ್ಟಿಮನಿ, ರಮೇಶ ಕೋಳೂರು, ಡಿ.ಎಂ.ಬಡಿಗೇರ್ ಇದ್ದರು.