ಭಿಕ್ಷೆ ಬೇಡಿದ ಹಣದಲ್ಲಿಯೇ ಸಾಮೂಹಿಕ ವಿವಾಹ ಮಾಡಿಸುವ ಜಮುನಾ

ರಾಯಚೂರು : ಮಂಗಳಮುಖಿಯೋರ್ವರು ಐದು ವರ್ಷಗಳಿಂದ ತಮ್ಮ ಸ್ವಂತ ಖರ್ಚಿನಲ್ಲಿ ಸಾಮೂಹಿಕ ವಿವಾಹ ನಡೆಸುತ್ತಾ ಬಂದಿರುವುದು ಜಿಲ್ಲೆಯ ಸಿಂಧನೂರು ತಾಲೂಕಿನಲ್ಲಿ ನಡೆದಿದೆ.

ತಾಲೂಕಿನ ಜಮುನಾ ಎಂಬ ಮಂಗಳಮುಖಿ ಪ್ರತೀ ವರ್ಷ ಬಡ ಕುಟುಂಬಗಳನ್ನು ಗುರುತಿಸಿ, ಮದುವೆಗೆ ಬೇಕಾದ ಮಾಂಗಲ್ಯ, ಕಾಲುಂಗರ, ಬಟ್ಟೆಗಳು ಸೇರಿದಂತೆ ಎಲ್ಲವನ್ನು ಉಚಿತವಾಗಿ ನೀಡುತ್ತಿದ್ದಾರೆ. ಮದುವೆಯಾಗುವ ಜೋಡಿಯ ಕುಟುಂಬದಿಂದ ಯಾವುದೇ ಹಣವನ್ನು ಪಡೆಯದೇ ಅನ್ನದಾಸೋಹದಿಂದ ಹಿಡಿದು ಎಲ್ಲವನ್ನು ಉಚಿತವಾಗಿ ಮಾಡುತ್ತಾ ಬರಲಾಗಿದೆ. ಜಮುನಾ ಅವರಿಗೆ ಕೆಲ ಮಂಗಳಮುಖಿಯರು ಸಾಥ್ ನೀಡುತ್ತಿದ್ದಾರೆ.

ಜಮುನಾ ಅವರ ವತಿಯಿಂದ ಸಿಂಧನೂರು ತಾಲೂಕಿನ ಹೊಸಳ್ಳಿಕ್ಯಾಂಪ್‌ನ ದುರ್ಗಾಪರಮೇಶ್ವರಿ ದೇವಸ್ಥಾನದಲ್ಲಿ ಇತ್ತೀಚೆಗೆ ಐದು ಜೋಡಿಗಳ ಉಚಿತ ಸಾಮೂಹಿಕ ನಡೆಯಿತು. ಮದುವೆಯ ಧಾರ್ಮಿಕ ವಿಧಿ ವಿಧಾನಗಳನ್ನು ಜಮುನಾ ಅವರೇ ಮುಂದೆ ನಿಂತು ಮಾಡಿರುವುದು ವಿಶೇಷ. ವೆಂಕಟಗಿರಿ ಕ್ಯಾಂಪ್ ಸಿದ್ದಾಶ್ರಮದ ಸದಾನಂದ ಶರಣರು ಹಾಗು ವಧು-ವರನ ಕಡೆಯ ಕುಟುಂಬದವರು ಮದುವೆಗೆ ಸಾಕ್ಷಿಯಾಗಿ ಶುಭಹಾರೈಸಿದ್ದಾರೆ.