ಧರ್ಮಗಳು ಸಮಾಜದ ಸೌಂದರ್ಯ ಹೆಚ್ಚಿಸುತ್ತವೆ: ಫಾ. ಜೋಸ್ ಪ್ರಕಾಶ

ಲಿಂಗಸುಗೂರು: ದೇಶದಲ್ಲಿ ವಿವಿಧ ಧರ್ಮಗಳಿದ್ದು, ಅವು ಸಮಾಜದ ಸೌಂದರ್ಯವನ್ನು ಹೆಚ್ಚಿಸುತ್ತವೆ. ಧರ್ಮಗಳ ಆಚರಣೆ ಮತ್ತು ಪ್ರಾರ್ಥನಾ ವಿಧಾನಗಳು ವಿಭಿನ್ನವಾಗಿದ್ದರೂ ಅವುಗಳ ಮೂಲ ಉದ್ದೇಶ ಮಾನವೀಯತೆ ಹಾಗೂ ಸಮಾಜದ ಒಳಿತಾಗಿದೆ ಎಂದು ಲೂರ್ದು ಮಾತೆ ಚರ್ಚ್‌ನ ಧರ್ಮಗುರು ವಂ. ಫಾ. ಜೋಸ್ ಪ್ರಕಾಶ ಹೇಳಿದರು.

ಪಟ್ಟಣದ ವಿಜಯ ಮಹಾಂತೇಶ್ವರ ಶಾಖಾ ಮಠದಲ್ಲಿ ಜಮೀಯತ್ ಉಲಮಾ ವತಿಯಿಂದ ಆಯೋಜಿಸಿದ್ದ ಸರ್ವ ಧರ್ಮ ಭಾವೈಕ್ಯ ಸಮಾವೇಶದಲ್ಲಿ ಮಾತನಾಡಿದ ಅವರು, ಧರ್ಮಕ್ಕಿಂತ ಮಾನವೀಯತೆ ದೊಡ್ಡದು. ಪ್ರತಿಯೊಬ್ಬರೂ ಪರಸ್ಪರ ಪ್ರೀತಿ, ಗೌರವದಿಂದ ಬದುಕಬೇಕು. ಪರರನ್ನು ತಮ್ಮಂತೆಯೇ ಪ್ರೀತಿಸಿದಾಗ ಮಾತ್ರ ಉತ್ತಮ ಸಮಾಜ ನಿರ್ಮಾಣ ಸಾಧ್ಯ ಎಂದರು.

ಮುರಘೇಂದ್ರ ಶಿವಯೋಗಿಗಳು ಮಾತನಾಡಿ, ಧರ್ಮ ಅಮೃತಕ್ಕೆ ಸಮಾನ. ಧರ್ಮದ ತತ್ವಗಳನ್ನು ಜೀವನದಲ್ಲಿ ಅಳವಡಿಸಿಕೊಂಡಾಗ ಮಾನವರಲ್ಲಿ ಪ್ರೀತಿ, ಕರುಣೆ ಹಾಗೂ ಮಾನವೀಯ ಗುಣಗಳು ಬೆಳೆಯುತ್ತವೆ ಎಂದರು.

ಸಮಿಉಲ್ಲಾ ಸಾಹೇಬ ಉತ್ತರ ಕನ್ನಡ ಮಾತನಾಡಿ, ಯಾವುದೇ ಧರ್ಮವೂ ದ್ವೇಷ ಅಥವಾ ಸಂಘರ್ಷವನ್ನು ಬೋಧಿಸುವುದಿಲ್ಲ. ಎಲ್ಲರೂ ಸಹಬಾಳ್ವೆಯಿಂದ ಬದುಕಬೇಕೆಂದು ಧರ್ಮಗಳು ಸಾರುತ್ತವೆ. ದೇವಸ್ಥಾನ, ಮಠ, ಮಸೀದಿ ಹಾಗೂ ಚರ್ಚ್‌ಗಳಿಗೆ ಪರಸ್ಪರ ಭೇಟಿ ನೀಡುವ ಮೂಲಕ ಧಾರ್ಮಿಕ ಸಾಮರಸ್ಯ ಬೆಳೆಸಬೇಕು. ಇದರಿಂದ ಭಾವೈಕ್ಯ ಭಾರತದ ನಿರ್ಮಾಣ ಸಾಧ್ಯವಾಗುತ್ತದೆ ಎಂದರು.

ಮೌಲಾನಾ ಮೊಹಮ್ಮದ್ ಸಿರಾಜುದ್ದೀನ್ ಸಾಹೇಬ ಖಾಸ್ಮಿ, ಸಿದ್ದಲಿಂಗ ಸ್ವಾಮೀಜಿ, ಮುಫ್ತಿ ಸೈಯದ್ ಹಸನ್ ಝೀಶಾನ್ ಸಾಹೇಬ ಖಾಸ್ಮಿ, ಮೌಲಾನಾ ಸೈಯದ್ ಖೈಸರ್ ಸಾಹೇಬ ಹಾಗೂ ಮುಫ್ತಿ ಸೈಯದ್ ಯೂನುಸ್ ಖಾಸ್ಮಿ ಸೇರಿದಂತೆ ವಿವಿಧ ಧರ್ಮಗಳ ಮುಖಂಡರು ಉಪಸ್ಥಿತರಿದ್ದರು.