ಎಥೆನಾಲ್‌ ಮಿಶ್ರಣ ವಿವಾದ : ಜನರ ಸಂದೇಹ ನಿವಾರಿಸಿ

ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣ ಪ್ರಮಾಣಕ್ಕೆ ಸಂಬಂಧಿಸಿದ ವಿಚಾರವು ಈಗ ವಿವಾದವಾಗಿ ಮಾರ್ಪಟ್ಟು, ರಾಜಕೀಯ ಕೆಸರೆರಚಾಟಕ್ಕೆ ಕಾರಣವಾಗಿದೆ. ನಿಯಮದ ಪ್ರಕಾರ ಪೆಟ್ರೋಲ್‌ನಲ್ಲಿ ಶೇ. 20ರಷ್ಟು ಮಾತ್ರ (ಇ20) ಎಥೆನಾಲ್ ಬೆರೆಸಬೇಕು. ಆದರೆ ಸರಕಾರಿ ಸ್ವಾಮ್ಯದ ತೈಲ ಕಂಪೆನಿಗಳು ಹಾಗೂ ಖಾಸಗಿ ತೈಲ ಕಂಪೆನಿಗಳು ನಿಗದಿತ ಪ್ರಮಾಣಕ್ಕಿಂತಲೂ ಹೆಚ್ಚಿಗೆ ಎಥೆನಾಲ್ ಬೆರೆಸಿದ ಪೆಟ್ರೋಲ್ ಅನ್ನು ಕರ್ನಾಟಕದಲ್ಲಿ ಮಾರಾಟ ಮಾಡುತ್ತಿರುವುದನ್ನು ರಾಜ್ಯದ ಆಹಾರ ಮತ್ತು ಗ್ರಾಹಕ ವ್ಯವಹಾರಗಳ ಇಲಾಖೆ ಪತ್ತೆಹಚ್ಚಿದೆ. ಕೇಂದ್ರ ಸರಕಾರದಿಂದ ಮಾನ್ಯತೆ ಪಡೆದ ಪ್ರಯೋಗಾಲಯಗಳೇ ಈ ಅಂಶವನ್ನು ದೃಢಪಡಿಸಿವೆ ಎಂದು ಸಚಿವ ರಿಝ್ವಾನ್ ಅರ್ಶದ್ ಸುದ್ದಿಗೋಷ್ಠಿ ಕರೆದು ಈ ಸಂಬಂಧದ ದಾಖಲೆಗಳನ್ನು ಮಾಧ್ಯಮಗಳ ಮುಂದೆ ಇರಿಸಿದ್ದಾರೆ. ಈ ಮೂಲಕ, ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣವು ನಿಗದಿತ ಪ್ರಮಾಣದಲ್ಲಿ ಇದೆಯೇ ಎಂಬ ಪ್ರಶ್ನೆಯ ಜೊತೆಗೆ ಇ20 ಪ್ರಯೋಗದ ಒಟ್ಟಾರೆ ಸಾಧಕ-ಬಾಧಕಗಳ ಬಗ್ಗೆ ದೇಶದಾದ್ಯಂತ ಚರ್ಚೆ ಬಿರುಸು ಪಡೆಯುವಂತೆ ಮಾಡಿದ್ದಾರೆ.

ಬೆಂಗಳೂರು, ಕೋಲಾರ, ಚಿಕ್ಕಬಳ್ಳಾಪುರ, ಬೆಂಗಳೂರು ಗ್ರಾಮಾಂತರ, ರಾಮನಗರ, ದಕ್ಷಿಣ ಕನ್ನಡ ಮತ್ತು ತುಮಕೂರು ಜಿಲ್ಲೆಗಳ ಆಯ್ದ 63 ಪೆಟ್ರೋಲ್ ಬಂಕ್‌ಗಳಲ್ಲಿ ಸಂಗ್ರಹಿಸಿದ ಮಾದರಿಗಳಲ್ಲಿ ಎಥೆನಾಲ್ ಪ್ರಮಾಣ ನಿಗದಿಗೊಳಿಸಿದ್ದಕ್ಕಿಂತ ಹೆಚ್ಚಿಗೆ ಇರುವುದು ಪತ್ತೆಯಾಗಿದೆ. ಎಥೆನಾಲ್ ಪ್ರಮಾಣ ಕೆಲವೆಡೆ ಶೇ. 30ಕ್ಕಿಂತ ಹೆಚ್ಚಿದೆ ಎಂದು ರಿಝ್ವಾನ್ ಹೇಳಿದ್ದಾರೆ. ಆದರೆ, ಕೇಂದ್ರ ಪೆಟ್ರೋಲಿಯಂ ಸಚಿವಾಲಯ ಇದನ್ನು ಸುತರಾಂ ಒಪ್ಪುತ್ತಿಲ್ಲ. ಸರಕಾರಿ ಸ್ವಾಮ್ಯದ ತೈಲೋತ್ಪನ್ನ ಮಾರಾಟ ಕಂಪೆನಿಗಳಾದ ಇಂಡಿಯನ್ ಆಯಿಲ್ ಕಾರ್ಪೊರೇಷನ್ ಲಿಮಿಟೆಡ್ (ಐಒಸಿಎಲ್), ಭಾರತ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (ಬಿಪಿಸಿಎಲ್) ಹಾಗೂ ಹಿಂದೂಸ್ತಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಲಿಮಿಟೆಡ್ (ಎಚ್‌ಪಿಸಿಎಲ್) ದೇಶದ ಎಲ್ಲ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಂದ 893 ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷಿಸಿವೆ. ಇದರಲ್ಲಿ ಕರ್ನಾಟಕದ 56 ಮಾದರಿಗಳು ಸಹ ಸೇರಿವೆ. ಈ ಮಾದರಿಗಳಲ್ಲಿ ಭಾರತೀಯ ಮಾನಕ ಬ್ಯೂರೊ ನಿಗದಿಪಡಿಸಿದ ಮಾನದಂಡದಂತೆ (ಐಎಸ್ 17021) ಶೇ. 19ರಿಂದ ಶೇ. 21ರಷ್ಟು ಮಾತ್ರ ಎಥೆನಾಲ್ ಇದೆ ಎಂದು ಸಚಿವಾಲಯ ವಾದಿಸಿದೆ. ಇದಕ್ಕೆ ಪೂರಕ ಎಂಬಂತೆ ತೈಲೋತ್ಪನ್ನ ಮಾರಾಟ ಕಂಪೆನಿಗಳೂ ಸ್ಪಷ್ಟನೆ ನೀಡಿ, ಎಥೆನಾಲ್ ಪ್ರಮಾಣವನ್ನು ಪತ್ತೆಹಚ್ಚಲು ಕರ್ನಾಟಕ ಸರಕಾರವು ಅನುಸರಿಸಿರುವ ತಪಾಸಣೆ ಪ್ರಕ್ರಿಯೆಯು ನಿಯಮಬದ್ಧವಾಗಿಲ್ಲ. ಮಾದರಿಗಳನ್ನು ಸಂಗ್ರಹಿಸುವಾಗ ತೈಲ ಕಂಪೆನಿಗಳ ಪ್ರತಿನಿಧಿಗಳು ಇರಲಿಲ್ಲ ಎಂದು ಹೇಳಿವೆ. ಆರೋಪ, ಸ್ಪಷ್ಟನೆ, ಸಮರ್ಥನೆಗಳು ಏನೇ ಇರಲಿ, ಜನರಲ್ಲಿ ಮೂಡಿರುವ ಸಂದೇಹವಂತೂ ಇವುಗಳಿಂದ ನಿವಾರಣೆಯಾಗಿಲ್ಲ ಎಂಬುದು ನೂರಕ್ಕೆ ನೂರರಷ್ಟು ದಿಟ.

ಕೇಂದ್ರದಲ್ಲೂ ಜನರಿಂದ ಆಯ್ಕೆಯಾದ ಸರಕಾರವೇ ಇದೆ. ರಾಜ್ಯದಲ್ಲೂ ಪ್ರಜೆಗಳು ಆರಿಸಿದ ಸರಕಾರವೇ ಇದೆ. ಆದರೆ ತದ್ವಿರುದ್ಧ ವಾದಸರಣಿ. ಯಾರ ಮಾತನ್ನು ನಂಬುವುದು ಎಂಬ ತೊಳಲಾಟಕ್ಕೆ ಜನರು ಸಿಲುಕಿದ್ದಾರೆ. ಈ ವಿಚಾರವು ಕೇಂದ್ರ ಮತ್ತು ರಾಜ್ಯ ಸರಕಾರದ ನಡುವೆ ತೀವ್ರ ಜಟಾಪಟಿಗೆ ಕಾರಣವಾಗಿದೆ. ಕಚ್ಚಾ ತೈಲದ ಮೇಲಿನ ಆಮದು ಅವಲಂಬನೆಯನ್ನು ಕಡಿಮೆ ಮಾಡುವುದು ಮತ್ತು ಮಾಲಿನ್ಯ ಪ್ರಮಾಣವನ್ನು ತಗ್ಗಿಸುವ ಉದ್ದೇಶದಿಂದ ಪೆಟ್ರೋಲ್‌ನಲ್ಲಿ ಶೇ. 20ರಷ್ಟು ಎಥೆನಾಲ್ ಮಿಶ್ರಣ ಮಾಡುವ ಯೋಜನೆಯನ್ನು ಕೇಂದ್ರ ಸರಕಾರ ಅನುಷ್ಠಾನಗೊಳಿಸಿದೆ. ಆದರೆ, ಈ ವಿಚಾರದಲ್ಲಿ ಪಾರದರ್ಶಕತೆ ಅಗತ್ಯ. ಎಥೆನಾಲ್ ಪ್ರಮಾಣವನ್ನು ಖಚಿತಪಡಿಸಿಕೊಳ್ಳಲು ಪರೀಕ್ಷೆ ಮಾಡುವುದರಲ್ಲಿ ತಪ್ಪಿಲ್ಲ. ಆದರೆ, ಈ ವಿಚಾರದಲ್ಲಿ ರಾಜಕೀಯ ಬೆರೆಸುವುದು ಬೇಡ ಎಂದು ಕೇಂದ್ರ ಸಚಿವ ಸುರೇಶ್ ಗೋಪಿ ಹೇಳಿರುವ ಮಾತು ಒಪ್ಪುವಂತಹುದು. ಆದರೆ ಮತ್ತೊಬ್ಬ ಕೇಂದ್ರ ಸಚಿವ ಪ್ರಹ್ಲಾದ್ ಜೋಶಿ ಅವರು, ಪೆಟ್ರೋಲ್‌ನಲ್ಲಿ ಎಥೆನಾಲ್ ಮಿಶ್ರಣ ಮಾಡುವುದರಿಂದ ಕಬ್ಬು ಬೆಳೆಯುವ ರೈತರಿಗೆ ಅನುಕೂಲವಾಗಲಿದೆ. ರೈತ ವಿರೋಧಿಗಳು ಸುಳ್ಳು ಮಾಹಿತಿ ನೀಡಿ ಜನರ ದಿಕ್ಕು ತಪ್ಪಿಸುತ್ತಿದ್ದಾರೆ ಎಂದು ದೂರಿರುವುದು ಎಥೆನಾಲ್ ಪ್ರಮಾಣ ಕುರಿತ ಚರ್ಚೆಯ ಹಾದಿ ತಪ್ಪಿಸುವ ಕೆಲಸವಲ್ಲದೆ ಬೇರೇನೂ ಅಲ್ಲ. ಸತ್ಯಾಂಶ ಏನು ಎಂದು ತಿಳಿಯುವ ಹಕ್ಕು ಗ್ರಾಹಕರಿಗಿದೆ. ಅದನ್ನು ಸಾಕ್ಷ್ಯಾಧಾರಗಳೊಂದಿಗೆ ಮತ್ತೊಮ್ಮೆ ಮಗದೊಮ್ಮೆ ಸ್ಪಷ್ಟಪಡಿಸಬೇಕೇ ಹೊರತು ರೈತರನ್ನು ಎತ್ತಿಕಟ್ಟುವ ಮೂಲಕ ದನಿ ಅಡಗಿಸುವಂಥ ತಂತ್ರಗಾರಿಕೆ ತರವಲ್ಲ. ಇ20 ಇಂಧನದ ಕುರಿತು ಕಳವಳ ವ್ಯಕ್ತಪಡಿಸಿದ ಪ್ರತಿಯೊಂದು ಧ್ವನಿಯನ್ನೂ ಅಡಗಿಸಲಾಗುತ್ತಿದೆ ಎಂಬ ಸಚಿವ ರಿಝ್ವಾನ್ ಹೇಳಿಕೆ ಇಲ್ಲಿ ಉಲ್ಲೇಖಾರ್ಹ.

ಈ ನಡುವೆ ಕೇರಳಂ ಸರಕಾರ ಕೂಡ ಕರ್ನಾಟಕದ ಹಾದಿ ಹಿಡಿದಿದೆ. ಇ20 ಇಂಧನ ಬಳಕೆಯಿಂದ ವಾಹನಗಳಿಗೆ ಹಾನಿ ಆಗುತ್ತಿರುವ ಕುರಿತು ಸಾರ್ವಜನಿಕರಿಂದ ದೂರುಗಳು ಬಂದಿರುವ ಹಿನ್ನೆಲೆಯಲ್ಲಿ ಪೆಟ್ರೋಲ್‌ನಲ್ಲಿ ಮಿಶ್ರಣ ಮಾಡುತ್ತಿರುವ ಎಥೆನಾಲ್ ಪ್ರಮಾಣ ಕುರಿತು ಪರೀಕ್ಷೆ ನಡೆಸಲು ಅಲ್ಲಿನ ಸರಕಾರ ನಿರ್ಧರಿಸಿದೆ. ಪೆಟ್ರೋಲ್ ಮಾದರಿಗಳನ್ನು ಸಂಗ್ರಹಿಸಿ ಪರೀಕ್ಷೆಗಾಗಿ ಸರಕಾರದ ಪ್ರಯೋಗಾಲಯಕ್ಕೆ ಕಳುಹಿಸಲಾಗುವುದು. ಹತ್ತು ದಿನಗಳ ಒಳಗೆ ಫಲಿತಾಂಶ ಹೊರಬರಲಿದೆ ಎಂದು ಕೇರಳಂ ಸಚಿವ ಅನೂಪ್ ಜೇಕಬ್ ತಿಳಿಸಿದ್ದಾರೆ. ಈ ಎರಡೂ ರಾಜ್ಯಗಳಲ್ಲಿ ಕಾಂಗ್ರೆಸ್ ನೇತೃತ್ವದ ಸರಕಾರಗಳಿವೆ ಎಂಬುದು ನಿಜವಾದರೂ ಈ ಅಂಶವನ್ನು ರಾಜಕೀಯ ದೃಷ್ಟಿಕೋನವೊಂದರಿಂದಲೇ ವಿಶ್ಲೇಷಿಸುವ ಅಗತ್ಯ ಇಲ್ಲ. ಆಡಳಿತ ಸೂತ್ರ ಹಿಡಿದ ಪಕ್ಷ ಯಾವುದಾದರೂ ಇರಲಿ, ಸತ್ಯಾಂಶ ಹೊರಬರುವುದು ಮುಖ್ಯ. ಜನರ ಹಿತರಕ್ಷಣೆ ಮುಖ್ಯ. ಎಥೆನಾಲ್ ಪ್ರಮಾಣದ ಜೊತೆಗೆ ಇ20 ಇಂಧನ ನೀತಿಯು ಇನ್ನೂ ಹಲವು ಪ್ರಶ್ನೆಗಳಿಗೆ ಉತ್ತರಿಸಬೇಕಿದೆ. ಇ20 ಬಳಕೆಯಿಂದ ವಾಹನಗಳ ಇಂಧನ ಕ್ಷಮತೆ ಮೇಲೆ ಆಗುವಂಥ ಪರಿಣಾಮ, ಇಂಜಿನ್ ಕಾರ್ಯನಿರ್ವಹಣೆ ಮತ್ತು ವಾಹನಗಳ ಬಿಡಿಭಾಗಗಳಿಗೆ ಏನಾದರೂ ಬಾಧಕ ಆಗುತ್ತದೆಯೇ ಎಂಬಿತ್ಯಾದಿ ಅಂಶಗಳ ಬಗ್ಗೆ ಜನಸಾಮಾನ್ಯರಲ್ಲಿ ಸಂದೇಹಗಳಿವೆ. ಅವುಗಳನ್ನು ವಿಶ್ವಾಸಾರ್ಹ ಪುರಾವೆಗಳೊಂದಿಗೆ ಪರಿಹರಿಸುವ ಕೆಲಸ ಆಗಬೇಕು. ವಾಹನ ನಿರ್ವಹಣಾ ವೆಚ್ಚ ದಿನೇ ದಿನೇ ಹೆಚ್ಚುತ್ತಿದೆ. ಇ20 ಅದನ್ನು ಇನ್ನಷ್ಟು ಹೊರೆಯಾಗಿಸಬಾರದು. ಪ್ರಶ್ನಿಸುವುದು ಪ್ರಜಾತಂತ್ರದ ಮೂಲಗುಣ. ಅದಕ್ಕೆ ಸ್ಪಷ್ಟವಾದ ಉತ್ತರ ನೀಡಬೇಕಾದುದು ಆಡಳಿತ ನಡೆಸುವವರ ಜವಾಬ್ದಾರಿ. ರಾಜಕೀಯ ಮೇಲಾಟಗಳನ್ನು ಮೂಲೆಗಿಟ್ಟು ಜನರಲ್ಲಿ ಮೂಡಿರುವ ಅನುಮಾನಗಳನ್ನು ನಿವಾರಿಸಬೇಕಾದುದು ಈ ಕ್ಷಣದ ತುರ್ತು. ಇದಕ್ಕೆ ಯಾವ ಪಕ್ಷವೂ ಹೊರತಲ್ಲ. ಯಾವ ಸರಕಾರವೂ ಹೊರತಲ್ಲ.