ರೆಡ್ಡಿ ಅಕ್ರಮ ಗಣಿಗಾರಿಕೆ: ಶಿಕ್ಷೆಯೆಂಬ ಅಣಕ

ಕೆಳಗಿನ ► ಪ್ಲೇ ಬಟನ್ ಕ್ಲಿಕ್ ಮಾಡಿ ಸಂಪಾದಕೀಯದ ಆಡಿಯೋ ಆಲಿಸಿ

ಓಬಳಾಪುರಂ ಮೈನಿಂಗ್ ಕಂಪೆನಿ(ಒಎಂಸಿ) ಹಗರಣಕ್ಕೆ ಸಂಬಂಧಿಸಿ ಮಾಜಿ ಸಚಿವ, ಹಾಲಿ ಶಾಸಕ ಗಾಲಿ ಜನಾರ್ದನ ರೆಡ್ಡಿಗೆ ಏಳು ವರ್ಷ ಜೈಲು ಶಿಕ್ಷೆಯಾಗಿದೆ. ಸುಮಾರು 13 ವರ್ಷಗಳ ಸುದೀರ್ಘ ವಿಚಾರಣೆಯ ಬಳಿಕ, ಈ ತೀರ್ಪು ಹೊರಬಿದ್ದಿದೆ. ಜನಾರ್ದನ ರೆಡ್ಡಿಯ ಹಗರಣದ ವ್ಯಾಪ್ತಿ ಅತ್ಯಂತ ವಿಶಾಲವಾದುದು. ಅವರು ಕನ್ನಡ ನಾಡಿಗೆ ಮಾಡಿರುವ ಹಾನಿಯ ಅಗಾಧತೆಗೆ ಹೋಲಿಸಿದರೆ ಅವರಿಗೆ ಸಿಕ್ಕಿರುವ ಶಿಕ್ಷೆ ತೀರಾ ಅಲ್ಪವಾದುದು. ಗಣಿಗಾರಿಕೆಯಲ್ಲಿ ಅವರು ನಡೆಸಿದ ಸಾಲು ಸಾಲು ಅಕ್ರಮಗಳಿಂದ ಗಳಿಸಿದ ದುಡ್ಡು ಈ ನಾಡಿನ ರಾಜಕೀಯ, ಸಾಮಾಜಿಕ ಕ್ಷೇತ್ರಗಳನ್ನು ಸಂಪೂರ್ಣವಾಗಿ ಹಾಳು ಮಾಡಿತು. ಅವರು ಬಳ್ಳಾರಿಯಲ್ಲಿ ತೋಡಿಟ್ಟ ಬೃಹತ್ ಗಣಿ ಹೊಂಡಗಳಿಂದ ಅಲ್ಲಿನ ಪರಿಸರಗಳು ಸರ್ವನಾಶವಾದರೆ, ಅವರು ಮೊಗೆದು ತೆಗೆದ ಅದಿರಿನ ಹಣ ಈ ನಾಡಿನ ರಾಜಕೀಯ ಕ್ಷೇತ್ರದ ಅಳಿದುಳಿದ ನೈತಿಕತೆಯನ್ನು ಸರ್ವನಾಶ ಮಾಡಿತು. ಇಂದು ಬಿಜೆಪಿಯು ರೆಡ್ಡಿ ಸಹೋದರರಿಂದ ಅಂತರವನ್ನು ಕಾಯ್ದುಕೊಂಡಿರಬಹುದು. ರೆಡ್ಡಿ ಸಹೋದರರು ಬಳ್ಳಾರಿಯನ್ನು ಹಿಂಡಿ ಹಿಪ್ಪೆ ಮಾಡಿ ಎಸೆದರೆ, ಈ ರೆಡ್ಡಿ ಸಹೋದರರನ್ನು ಬಿಜೆಪಿ ಬಳಸಿ ಎಸೆದಿದೆ. ಆಂಧ್ರ-ಕರ್ನಾಟಕ ಗಡಿಭಾಗದಲ್ಲಿ ರೆಡ್ಡಿಗಳು ನಡೆಸಿದ ಗಣಿಗಾರಿಕೆಯಲ್ಲಿ ಅರಣ್ಯ ಇಲಾಖೆ, ಗಣಿ ಇಲಾಖೆಗಳು ಶಾಮೀಲಾಗಿವೆ. ಇಲಾಖೆಗಳು ಶಾಮೀಲಾಗಿವೆ ಎನ್ನುವುದರ ಅರ್ಥವೇ, ಸರಕಾರ ಕೂಡ ಹಗರಣದಲ್ಲಿ ಕೈಜೋಡಿಸಿದೆೆ ಎನ್ನುವುದಾಗಿದೆ. ಆದುದರಿಂದ, ರೆಡ್ಡಿಗೆ ಏಳು ವರ್ಷ ಶಿಕ್ಷೆಯಾಗಿದೆ ಎಂದಾಕ್ಷಣ ಹಗರಣಕ್ಕೆ ಸಂಬಂಧಿಸಿ ನಾಡಿಗೆ ನ್ಯಾಯ ಸಿಕ್ಕಿತು ಎಂದು ಸಂಭ್ರಮಿಸುವಂತಿಲ್ಲ. ರೆಡ್ಡಿಯಿಂದ ಗರಿಷ್ಠ ಪ್ರಯೋಜನ ಪಡೆದ ಅಂದಿನ ಬಿಜೆಪಿ ಸರಕಾರ, ಅದರೊಳಗಿದ್ದ ರಾಜಕೀಯ ನಾಯಕರು ಈಗಲೂ ನಾಯಕರಾಗಿಯೇ ಸಮಾಜದಲ್ಲಿ ಓಡಾಡುತ್ತಿದ್ದಾರೆ. ರೆಡ್ಡಿಗಳ ಅಕ್ರಮಗಳಿಂದ ಗಾಯಗೊಂಡು ಬಿದ್ದಿರುವ ಬಳ್ಳಾರಿ ಸದ್ಯಕ್ಕಂತೂ ಚೇತರಿಸುವ ಸಾಧ್ಯತೆಗಳಿಲ್ಲ.

ರೆಡ್ಡಿ ಸಹೋದರರು ಬಳ್ಳಾರಿಯ ಮೇಲೆ ಮಾಡಿದ ಅತ್ಯಾಚಾರಗಳನ್ನು ಅಲ್ಲಿರುವ ಗಣಿ ಅವಶೇಷಗಳು ಈಗಲೂ ಬಿಕ್ಕುತ್ತಾ ನಾಡಿನ ಮುಂದಿಡುತ್ತಿವೆೆ. ಅರಣ್ಯ ಪ್ರದೇಶಗಳು ಸರ್ವ ನಾಶವಾದುದು ಮಾತ್ರವಲ್ಲ, ಗಣಿಗಾರಿಕೆಯಿಂದ ಪರಿಸರ ಸಂಪೂರ್ಣ ಚಿಂದಿಯಾದವು. ರೆಡ್ಡಿ ಸಹೋದರರು ಅಕ್ರಮ ಗಣಿಗಾರಿಕೆಯ ಮೂಲಕ ಕೋಟ್ಯಂತರ ರೂಪಾಯಿಯನ್ನು ಗಳಿಸುತ್ತಿರುವಾಗಲೇ, ಬಳ್ಳಾರಿಯ ಜನತೆ ಮೂಲಭೂತ ಸೌಕರ್ಯಗಳ ಕೊರತೆಗಳಿಂದ, ಅಪೌಷ್ಟಿಕತೆಯಿಂದ ನರಳುತ್ತಿದ್ದರು. ರೆಡ್ಡಿ ಸಹೋದರರು ಒಂದೆಡೆ ಅಕ್ರಮವಾಗಿ ಗಣಿಗಾರಿಕೆಗಳನ್ನು ನಡೆಸುತ್ತಾ ನಾಡಿಗೆ ವಂಚಿಸಿದರು. ಮಗದೊಂದೆಡೆ, ಆ ಹಣದಿಂದ ಈ ನಾಡಿನ ರಾಜಕೀಯ ಕ್ಷೇತ್ರವನ್ನು ಕೊಂಡುಕೊಂಡರು. ತಮ್ಮ ಅಕ್ರಮಗಳಿಗೆ ಪೂರಕವಾದ ಒಂದು ರಾಜಕೀಯ ವಾತಾವರಣವನ್ನು ಅವರು ಸೃಷ್ಟಿಸಿದರು. ತಮ್ಮ ಹಣ ಬಲದಿಂದ ರಾಜ್ಯ ಬಿಜೆಪಿಯ ಚುಕ್ಕಾಣಿಯನ್ನು ಕೈಗೆತ್ತಿಕೊಂಡ ಈ ರೆಡ್ಡಿ ಸಹೋದರರು, ಇಂದು ಕೇಂದ್ರವನ್ನು ಅದಾನಿ, ಅಂಬಾನಿ ನಿಯಂತ್ರಿಸುತ್ತಿರುವಂತೆಯೇ ದಶಕಗಳ ಹಿಂದೆ ರಾಜ್ಯ ಸರಕಾರವನ್ನು ಸಂಪೂರ್ಣವಾಗಿ ತಮ್ಮ ನಿಯಂತ್ರಣಕ್ಕೆ ತೆಗೆದುಕೊಂಡಿದ್ದರು. ಅಡ್ವಾಣಿ ಯುಗದಲ್ಲಿ ಸುಶ್ಮಾ ಸ್ವರಾಜ್ ಅವರ ಮುಂದೆ ಮಂಡಿಯೂರಿದ ರೆಡ್ಡಿ ಸಹೋದರರ ಚಿತ್ರವೊಂದು ಜನಪ್ರಿಯವಾಗಿ ಮಾಧ್ಯಮಗಳಲ್ಲಿ ಹರಿದಾಡುತ್ತಿತ್ತು. ರೆಡ್ಡಿ ಸಹೋದರರ ತಲೆಯ ಮೇಲಿದ್ದ ಸುಶ್ಮಾ ಸ್ವರಾಜ್ ಅವರ ಅಭಯ ಹಸ್ತವೇ ಎಲ್ಲವನ್ನೂ ವಿವರಿಸುತ್ತಿತ್ತು. ಪ್ರತೀ ವರ್ಷ ವರ ಮಹಾಲಕ್ಷ್ಮಿಯ ನೆಪದಲ್ಲಿ ಸುಶ್ಮಾ ಸ್ವರಾಜ್ ಅವರು ಬಳ್ಳಾರಿಗೆ ಆಗಮಿಸುತ್ತಿದ್ದುದೇ ರೆಡ್ಡಿ ಸಹೋದರರಿಂದ ವಸೂಲಿ ಮಾಡಿದ ಹಫ್ತಾ ಹಣವನ್ನು ದಿಲ್ಲಿಗೆ ಕೊಂಡೊಯ್ಯಲು ಎಂಬ ವದಂತಿಗಳು ಹರಡಿದ್ದವು. ಅದು ವದಂತಿಯಷ್ಟೇ ಆಗಿರಲಿಲ್ಲ.

‘ಆಪರೇಷನ್ ಕಮಲ’ ಎನ್ನುವ ಅನಿಷ್ಟಕ್ಕೆ ರಾಜ್ಯದಲ್ಲಿ ಚಾಲನೆ ದೊರಕಿದ್ದೇ ರೆಡ್ಡಿ ಸಹೋದರರಿಂದ. ಯಡಿಯೂರಪ್ಪ ಮೊದಲ ಬಾರಿಗೆ ಸರಕಾರ ರಚನೆ ಮಾಡಲು ಮುಂದಾದಾಗ ಶಾಸಕರ ಕೊರತೆಯಿದ್ದಾಗ, ಆ ಕೊರತೆಯನ್ನು ತುಂಬಿದ್ದು ರೆಡ್ಡಿ ಸಹೋದರರು ಬಳ್ಳಾರಿಯಲ್ಲಿ ಕೊಳ್ಳೆ ಹೊಡೆದ ಹಣವಾಗಿತ್ತು. ಪ್ರಜಾಸತ್ತೆಯ ಫಲಿತಾಂಶಗಳನ್ನು ರೆಡ್ಡಿ ಸಹೋದರರು ಬಹಿರಂಗವಾಗಿಯೇ ತಮ್ಮ ಹಣದಿಂದ ಕೊಂಡುಕೊಳ್ಳತೊಡಗಿದರು. ಈ ಮೂಲಕ, ಮರೆಯಲ್ಲಿ ನಿಂತು ಸರಕಾರವನ್ನು ನಿಯಂತ್ರಿಸತೊಡಗಿದರು. ಯಡಿಯೂರಪ್ಪ ಮುಖ್ಯಮಂತ್ರಿಯಾಗಿದ್ದರೂ ಅವರು ರೆಡ್ಡಿ ಸಹೋದರರ ಹಣ ಬಲಕ್ಕೆ ತಲೆಬಾಗುವುದು ಅನಿವಾರ್ಯವಾಗಿತ್ತು. ಬಳ್ಳಾರಿಯು ಶಕ್ತಿ ಕೇಂದ್ರವಾಗಿ ಬದಲಾಯಿತು. ಮುಖ್ಯಮಂತ್ರಿಯಾಗಿದ್ದಾಗ ಯಡಿಯೂರಪ್ಪ ಅವರಿಗೆ ರೆಡ್ಡಿ ಸಹೋದರರು ಉದ್ದಕ್ಕೂ ತಲೆನೋವಾದರು. ಅವರಿಗೆ ಬಿಜೆಪಿಯ ಕೇಂದ್ರ ವರಿಷ್ಠರ ಪೂರ್ಣ ಬೆಂಬಲ ಇರುವುದೇ ಇದಕ್ಕೆ ಕಾರಣವಾಗಿತ್ತು. ರೆಡ್ಡಿ ಸಹೋದರರಿಗೆ ಕಡಿವಾಣ ಹಾಕುವ ಉದ್ದೇಶದಿಂದಲೇ, ಅಡ್ವಾಣಿಯವರ ಮಾರ್ಗದರ್ಶನದಂತೆ ಲೋಕಾಯುಕ್ತ ನ್ಯಾಯಮೂರ್ತಿ ಸಂತೋಷ್ ಹೆಗ್ಡೆ ಕಾರ್ಯಾಚರಣೆಗಿಳಿದರು ಎನ್ನಲಾಗುತ್ತದೆ. ಅದೇನೇ ಇರಲಿ, ಲೋಕಾಯುಕ್ತ ವರದಿ ಹೊರಬೀಳುವಷ್ಟರಲ್ಲಿ ಕರ್ನಾಟಕದ ರಾಜಕೀಯವನ್ನು ಈ ರೆಡ್ಡಿ ಸಹೋದರರು ಬಳ್ಳಾರಿಯ ಗಣಿ ಹೊಂಡಗಳಂತೆ ಸರಿಪಡಿಸಲಾಗದಷ್ಟು ಕೆಡಿಸಿದ್ದರು. ರೆಡ್ಡಿಗಳ ಹಣಬಲವನ್ನು ಎದುರಿಸುವ ಹಾದಿಯಲ್ಲಿ ಅಂದಿನ ಮುಖ್ಯಮಂತ್ರಿ ಯಡಿಯೂರಪ್ಪ ಕೂಡ ಪರಮ ಭ್ರಷ್ಟರಾಗಿ ಬೆಳೆದು ನಿಂತರು. ರಾಜ್ಯದಲ್ಲಿ ತಿಂಗಳಿಗೊಬ್ಬ್ಬರಂತೆ ಮುಖ್ಯಮಂತ್ರಿಗಳು ಬದಲಾಗತೊಡಗಿದರು. ಎಲ್ಲ ಇಲಾಖೆಗಳಲ್ಲೂ ಭ್ರಷ್ಟಾಚಾರ ತಾಂಡವವಾಡತೊಡಗಿತು.

ಬಳ್ಳಾರಿಗಷ್ಟೇ ಅಲ್ಲ, ಇಡೀ ನಾಡಿಗೇ ರೆಡ್ಡಿ ತಂಡ ಮಾಡಿರುವ ವಂಚನೆಗೆ ಏಳು ವರ್ಷ ಜೈಲು ಶಿಕ್ಷೆ ತೀರ ಸಣ್ಣದಾಗಿದೆ. ಇದೇ ಸಂದರ್ಭದಲ್ಲಿ ರೆಡ್ಡಿಯನ್ನು ಬೆಳೆಸಿದವರು ಯಾರು? ಅವರಿಗೆ ಶಿಕ್ಷೆಯಾಗಬೇಡವೆ? ವಿವಿಧ ಇಲಾಖೆಗಳನ್ನು ವಂಚಿಸಿ ರೆಡ್ಡಿ ಸಹೋದರರಿಗೆ ಅಷ್ಟೊಂದು ಪ್ರಮಾಣದಲ್ಲಿ ಹಗರಣಗಳನ್ನು ನಡೆಸಲು ಹೇಗೆ ಸಾಧ್ಯವಾಯಿತು? ಸರಕಾರದ ಸಹಾಯವಿಲ್ಲದೆ ಹಗರಣಗಳನ್ನು ಮಾಡಲು ಸಾಧ್ಯವೆ? ಅವರೆಲ್ಲರಿಗೂ ಶಿಕ್ಷೆಯಾಗುವುದು ಬೇಡವೆ? ಬ್ರಿಟಿಷರು ಭಾರತದಿಂದ ಸಂಪತ್ತನ್ನು ದೋಚಿ ಒಯ್ದಂತೆಯೇ ಬಿಜೆಪಿಯ ದಿಲ್ಲಿ ವರಿಷ್ಠರು ಕರ್ನಾಟಕದ ಸಂಪತ್ತನ್ನು ರೆಡ್ಡಿ ಸಹೋದರರ ಮೂಲಕ ಸೂರೆಗೈದರು. ಆದರೆ ಅವರೆಲ್ಲರೂ ಇಂದಿಗೂ ರಾಷ್ಟ್ರೀಯ ನಾಯಕರಾಗಿ ಮಿಂಚುತ್ತಿದ್ದಾರೆ. ರೆಡ್ಡಿಗಳ ದುಡ್ಡಿಗೆ ತಮ್ಮನ್ನು ಮಾರಿಕೊಂಡ ಶಾಸಕರು, ಸಚಿವರು ಇಂದಿಗೂ ರಾಜ್ಯದಲ್ಲಿ ಬಿಜೆಪಿ ನಾಯಕರಾಗಿ ಓಡಾಡುತ್ತಿದ್ದಾರೆ. ಜನಾರ್ದನ ರೆಡ್ಡಿ ಬಿಜೆಪಿ ಉಂಡು ಬಳಸಿ ಎಸೆದ ಬಾಳೆಯೆಲೆ ಅಷ್ಟೇ. ಇಂದು ಆ ಬಾಳೆಯೆಲೆಯನ್ನು ಅಪರಾಧಿ ಸ್ಥಾನದಲ್ಲಿ ನಿಲ್ಲಿಸಲಾಗಿದೆ. ಅದರಲ್ಲಿ ಉಂಡು ಎದ್ದವರಿಗೆ ಎಲ್ಲಿಯವರೆಗೆ ಶಿಕ್ಷೆಯಾಗುವುದಿಲ್ಲವೋ ಅಲ್ಲಿಯವರೆಗೆ ಅಕ್ರಮ ಗಣಿಗಾರಿಕೆಗೆ ಸಂಬಂಧಿಸಿ ಅಪರಾಧಿಗಳನ್ನು ಪೂರ್ಣ ಪ್ರಮಾಣದಲ್ಲಿ ಶಿಕ್ಷಿಸಿದಂತಾಗುವುದಿಲ್ಲ. ಇಂದು ಒಬ್ಬ ರೆಡ್ಡಿ ಜೈಲು ಪಾಲಾದರೆ, ನಮ್ಮನ್ನಾಳುವವರು ನಾಳೆ ಹೊಸದಾಗಿ ನೂರು ರೆಡ್ಡಿಗಳನ್ನು ಸೃಷ್ಟಿಸುತ್ತಾರೆ, ಅಷ್ಟೇ.