ಅಂಗನವಾಡಿಗಳು ಮತ್ತು ಸರಕಾರಿ ಶಾಲೆಗಳ ದುರವಸ್ಥೆ

ಸಮಾಜದ ಬಡ, ಕೆಳ ಮಧ್ಯಮ ವರ್ಗಗಳ ಮಕ್ಕಳ ಭವಿಷ್ಯದ ಹಿತ ದೃಷ್ಟಿಯಿಂದ ಆರಂಭವಾದ ಅಂಗನವಾಡಿಗಳಲ್ಲಿ ಅಕ್ಷರ ಕಲಿಕೆಯ ಜೊತೆಗೆ ಆಹಾರವನ್ನೂ ನೀಡಿ ಆರೋಗ್ಯ ರಕ್ಷಣೆಗೂ ಆದ್ಯತೆಯನ್ನು ನೀಡಲಾಗಿದೆ. ಆದರೂ ಅನೇಕ ಅಂಗನವಾಡಿಗಳಲ್ಲಿ ಸುರಕ್ಷಿತವಾದ ಆಹಾರ ಸಿಗುತ್ತಿಲ್ಲ ಎಂಬ ದೂರುಗಳು ಬರುತ್ತಲೇ ಇವೆ. ಅಂಗನವಾಡಿಗಳಿಗೆ ಪೂರೈಸುವ ಆಹಾರ ಸಾಮಗ್ರಿಗಳ ದುರುಪಯೋಗ ಆಗುತ್ತಿದೆ ಎಂಬ ಸುದ್ದಿಗಳು ವರದಿಯಾಗುತ್ತಲೇ ಇವೆ. ಇವೆಲ್ಲವುಗಳ ಜೊತೆಗೆ ಅನೇಕ ಅಂಗನವಾಡಿಗಳಿಗೆ ಸ್ವಂತ ಕಟ್ಟಡಗಳಿಲ್ಲ. ಬಾಡಿಗೆ ಕಟ್ಟಡದಲ್ಲಿ ಇವು ನಡೆಯುತ್ತಿರುವುದರಿಂದ ಮತ್ತೊಂದು ತೊಂದರೆಗೆ ಸಿಲುಕಿವೆ. ಸರಕಾರದಿಂದ ಬರುವ ಬಾಡಿಗೆ ಹಣ ತಡವಾಗುತ್ತಿರುವುದರಿಂದ ಕೆಲವು ಕಡೆ ಕಟ್ಟಡಗಳ ಮಾಲಕರು ಅಂಗನವಾಡಿಗಳನ್ನು ಖಾಲಿ ಮಾಡಿಸುತ್ತಿರುವ ಉದಾಹರಣೆಗಳೂ ಇವೆ.

ರಾಜ್ಯದಲ್ಲಿ ಒಟ್ಟು 69,923 ಅಂಗನವಾಡಿ ಕೇಂದ್ರಗಳಿವೆ. ಇವುಗಳಲ್ಲಿ 13,164 ಅಂಗನವಾಡಿಗಳು ಖಾಸಗಿ ಬಾಡಿಗೆ ಕಟ್ಟಡದಲ್ಲಿ ಕಾರ್ಯನಿರ್ವಹಿಸುತ್ತಿವೆ. ಇಂಥ ಅಂಗನವಾಡಿ ಕೇಂದ್ರಗಳಿಗೆ ಸರಕಾರದಿಂದ ನಿಗದಿತ ಮೊತ್ತದ ಬಾಡಿಗೆಯನ್ನು ನೀಡಲಾಗುತ್ತಿದೆ. ಆದರೆ ಸರಕಾರದಿಂದ ಬರಬೇಕಾದ ಅನುದಾನ ಸಕಾಲದಲ್ಲಿ ಬರುವುದಿಲ್ಲ. 2-3 ತಿಂಗಳು ತಡವಾಗಿ ಅನುದಾನ ಬರುವುದರಿಂದ ಅಂಗನವಾಡಿ ಕಾರ್ಯಕರ್ತೆಯರಿಗೆ ಕಟ್ಟಡದ ಮಾಲಕರು ಕಿರಿಕಿರಿ ಮಾಡುತ್ತಾರೆ. ಕೆಲವು ಕಡೆ ಅಂಗನವಾಡಿ ಕಾರ್ಯಕರ್ತೆಯರು ಬಾಡಿಗೆ ಮೊತ್ತವನ್ನು ತಮ್ಮ ಕೈಯಿಂದ ಪಾವತಿ ಮಾಡಿ ಇಕ್ಕಟ್ಟಿನಿಂದ ಪಾರಾಗುತ್ತಾರೆ. ಎಲ್ಲರಿಗೂ ಬಾಡಿಗೆ ಪಾವತಿ ಮಾಡುವಷ್ಟು ಅನುಕೂಲಗಳಿರುವುದಿಲ್ಲ. ಅಂಥ ಕಡೆ ಅಂಗನವಾಡಿಗಳ ಕಾರ್ಯ ಚಟುವಟಿಕೆಗಳು ಸ್ಥಗಿತಗೊಳ್ಳುತ್ತವೆ. ಇದು ಆಗಾಗ ಪುನರಾವರ್ತನೆ ಆಗುತ್ತಲೇ ಇರುತ್ತದೆ.

ಕಳೆದ ಮೂರು ತಿಂಗಳಿಂದ ಅಂಗನವಾಡಿಗಳಿಗೆ ನೀಡುವ ಅನುದಾನ ಬಿಡುಗಡೆಯಾಗಿಲ್ಲ. ಸರಕಾರದ ಹಣಕಾಸಿನ ಬಿಕ್ಕಟ್ಟಿನ ಪರಿಣಾಮವಾಗಿ ವೃದ್ಧಾಪ್ಯ ವೇತನ, ಅಂಗವಿಕಲರ ಪಿಂಚಣಿ, ಹಲವು ಸರಕಾರಿ ಅನುದಾನಿತ ಸಂಸ್ಥೆಗಳ ಸಿಬ್ಬಂದಿಯ ಸಂಬಳ ಪಾವತಿಯಾಗಿಲ್ಲ. ಅದೇ ರೀತಿ ಅಂಗನವಾಡಿಗಳ ಬಾಡಿಗೆ ಅನುದಾನವನ್ನೂ ಬಿಡುಗಡೆ ಮಾಡಿಲ್ಲ. ಕೆಲವು ಕಡೆ ಅಂಗನವಾಡಿ ಕಾರ್ಯಕರ್ತೆಯರ ಪರಿಸ್ಥಿತಿಯನ್ನು ನೋಡಿ ಕಟ್ಟಡದ ಮಾಲಕರು ಬಾಡಿಗೆ ಹಣಕ್ಕಾಗಿ ಒತ್ತಡ ಹೇರುತ್ತಿಲ್ಲ. ಒಂದೆರಡು ತಿಂಗಳಾದರೆ ಅಡ್ಡಿಯಿಲ್ಲ. ಆದರೆ 3-4 ತಿಂಗಳು ಅನುದಾನ ಬರದಿದ್ದರೆ ಯಾವ ಕಟ್ಟಡ ಮಾಲಕರೂ ಸುಮ್ಮನಿರಲಾರರು. ಇದರಿಂದ ಅಂಗನವಾಡಿ ಕಾರ್ಯಕರ್ತೆಯರಿಗೆ ಮಾನಸಿಕ ಹಿಂಸೆಯಾಗುತ್ತದೆ. ಸರಕಾರದ ನಿರ್ಲಕ್ಷ್ಯ ಧೋರಣೆಯಿಂದ ಅಂಗನವಾಡಿಗಳ ಕಾರ್ಯ ಚಟುವಟಿಕೆಗಳಿಗೆ ತೊಂದರೆ ಯಾಗಿದೆ.

ಉತ್ತಮ ಉದ್ದೇಶವನ್ನಿಟ್ಟುಕೊಂಡು ಸರಕಾರ ಅಂಗನವಾಡಿ ಕೇಂದ್ರಗಳನ್ನು ಆರಂಭಿಸಿದೆ. ಆದರೆ ಈಗಿರುವ ಅಂಗನವಾಡಿಗಳು ಸರಿಯಾಗಿ ಕಾರ್ಯ ನಿರ್ವಹಿಸುತ್ತಿಲ್ಲ . ಮೊದಲು ಅವುಗಳ ಅಭಿವೃದ್ಧಿ ಗೆ ಆದ್ಯತೆಯನ್ನು ನೀಡಬೇಕು. ಅದನ್ನು ಬಿಟ್ಟು ಹೊಸ ಅಂಗನವಾಡಿಗಳನ್ನು ಆರಂಭಿಸಲು ಸರಕಾರ ವಿಶೇಷ ಆಸಕ್ತಿಯನ್ನು ತೋರಿಸುತ್ತಿದೆ. ರಾಜ್ಯದ ಯಾವುದೇ ಅಂಗನವಾಡಿ ಕೇಂದ್ರ ಬಾಡಿಗೆ ಕಟ್ಟಡದಲ್ಲಿ ನಡೆಯಬಾರದು. ಅದಕ್ಕಾಗಿ ಸರಕಾರ ಅಂಗನವಾಡಿಗಳಿಗೆ ಸ್ವಂತದ ಕಟ್ಟಡ ನಿರ್ಮಿಸಿಕೊಡುವುದು ಅಗತ್ಯವಾಗಿದೆ.

ಬಾಡಿಗೆ ಕಟ್ಟಡಗಳಲ್ಲಿ ನಡೆಯುವ ಅಂಗನವಾಡಿ ಕೇಂದ್ರಗಳ ಬಾಡಿಗೆ ಹಣಕ್ಕಾಗಿ ಅಂಗನವಾಡಿ ಕಾರ್ಯಕರ್ತೆಯರು ಸರಕಾರದ ಬಳಿ ಅಂಗಲಾಚುವ ಪರಿಸ್ಥಿತಿ ಬರಬಾರದು. ಸರಕಾರ ಪ್ರತೀ ತಿಂಗಳು ಅಂಗನವಾಡಿಗಳ ಅನುದಾನವನ್ನು ತಾನಾಗಿ ಪಾವತಿ ಮಾಡಬೇಕು. ಅಲ್ಲದೆ ರಾಜ್ಯದ ಬಹುತೇಕ ಅಂಗನವಾಡಿಗಳು ಮೂಲಭೂತ ಸೌಕರ್ಯಗಳಿಲ್ಲದೆ ತೊಂದರೆಗೊಳಗಾಗಿವೆ. ಅವುಗಳಿಗೆ ಮೂಲ ಸೌಕರ್ಯಗಳನ್ನು ಒದಗಿಸಲು ಸರಕಾರ ಸಮಗ್ರವಾದ ಯೋಜನೆಯೊಂದನ್ನು ರೂಪಿಸುವುದು ಅಗತ್ಯವಾಗಿದೆ.

ರಾಜ್ಯದ ಬಹುತೇಕ ಪ್ರಾಥಮಿಕ ಶಾಲೆಗಳಂತೆ ಅನೇಕ ಅಂಗನವಾಡಿಗಳಲ್ಲಿ ಶೌಚಾಲಯಗಳಿಲ್ಲ. ನಾವು ಮಕ್ಕಳು ಓದಿ ಒಳ್ಳೆಯ ಅಂಕಗಳನ್ನು ಗಳಿಸಲಿ ಎಂದು ಬಯಸುತ್ತೇವೆ. ಆದರೆ ಶಿಕ್ಷಣದ ಗುಣಮಟ್ಟದ ಜೊತೆಗೆ ಪುಟ್ಟ ಮಕ್ಕಳು ಕಲಿಯುವ ಪರಿಸರ ಹೇಗಿದೆ ಎಂಬುದರತ್ತ ಗಮನವನ್ನು ಕೊಡಬೇಕು. ಪ್ರತಿಯೊಂದು ಶಾಲೆ ಮತ್ತು ಅಂಗನವಾಡಿಗಳಲ್ಲಿ ಶುದ್ಧ ಕುಡಿಯುವ ನೀರು, ಸುರಕ್ಷಿತ ಕಟ್ಟಡ, ಹಾಗೂ ಶೌಚಾಲಯಗಳು ಕಡ್ಡಾಯವಾಗಿ ಇರಲೇಬೇಕೆಂಬುದು ಮೊದಲ ಆದ್ಯತೆಯಾಗಿರಬೇಕು. ಸರ್ವ ಶಿಕ್ಷಾ ಅಭಿಯಾನ ನೈರ್ಮಲ್ಯಕ್ಕೆ ಒತ್ತು ನೀಡಿತ್ತು. ಆದರೂ ಈ ಅಭಿಯಾನ ಜಾರಿಗೆ ಬಂದು ಒಂದೂವರೆ ದಶಕ ಕಳೆದರೂ ಬಹುತೇಕ ಶಾಲೆಗಳಲ್ಲಿ ನೈರ್ಮಲ್ಯ ಹದಗೆಟ್ಟಿರುವುದು ಎಲ್ಲರಿಗೂ ಗೊತ್ತಿರುವ ಸಂಗತಿಯಾಗಿದೆ.

ಸರಕಾರಿ ಶಾಲೆಗಳಲ್ಲಿ ವ್ಯಾಸಂಗ ಮಾಡುವ ಬಹುತೇಕ ಹೆಣ್ಣು ಮಕ್ಕಳು ಶೌಚಾಲಯ ಇಲ್ಲ ಎಂಬ ಕಾರಣಕ್ಕಾಗಿ ಶಾಲೆಯನ್ನೇ ಬಿಟ್ಟಿರುವ ಉದಾಹರಣೆಗಳಿವೆ. ತಾಸುಗಟ್ಟಲೆ ಮೂತ್ರವನ್ನು ಹಿಡಿದಿಡುವುದರಿಂದ ಸೋಂಕುಗಳು ಉಂಟಾಗುತ್ತವೆ. ಗ್ರಾಮೀಣ ಪ್ರದೇಶದ ಮಕ್ಕಳ ಪರಿಸ್ಥಿತಿ ಇನ್ನೂ ಯಾತನಾಮಯವಾಗಿದೆ. ಮೈಲುಗಟ್ಟಲೆ ಕಾಲ್ನಡಿಗೆಯಲ್ಲಿ ಬರುವ ಹಳ್ಳಿಗಾಡಿನ ಮಕ್ಕಳಿಗೆ ಶಾಲೆಗಳಲ್ಲಿ ಕುಡಿಯಲು ಹನಿ ನೀರು ಸಿಗುವುದಿಲ್ಲ ಎಂದರೆ ಅಕ್ಷರ ಕಲಿಯಲು ಮನಸ್ಸಾದರೂ ಹೇಗೆ ಬರುತ್ತದೆ?

ಸರಕಾರಿ ಶಾಲಾ ಪರಿಸರದಲ್ಲಿ ಈಗಾಗಲೇ ಇರುವ ಶೌಚಾಲಯಗಳಲ್ಲಿ ಎಷ್ಟು ಶೌಚಾಲಯಗಳು ಬಳಕೆಗೆ ಯೋಗ್ಯವಾಗಿವೆ? ಅವುಗಳ ಸಮರ್ಪಕ ನಿರ್ವಹಣೆ ಯಾಕೆ ಸಾಧ್ಯವಾಗುತ್ತಿಲ್ಲ? ಈ ಬಗ್ಗೆ ಸರಕಾರ ಗಮನ ಹರಿಸಬೇಕು. ಶುದ್ಧ ಕುಡಿಯುವ ನೀರು, ಶುದ್ಧ ಪರಿಸರ, ಶೌಚಾಲಯ ಹೊಂದುವುದು ಮಕ್ಕಳ ಮೂಲಭೂತ ಹಕ್ಕು.ಸರಕಾರ ಅದನ್ನೆಂದೂ ನಿರ್ಲಕ್ಷಿಸಬಾರದು.