Shivamogga | ದಸರಾ ಕಾರ್ಯಕ್ರಮದಲ್ಲೂ 'ವಂದೇ ಮಾತರಂ' ಗೊಂದಲ: ಕಾರ್ಯಕ್ರಮ ಬಹಿಷ್ಕರಿಸಿದ ಕಾಂಗ್ರೆಸ್ ಮುಖಂಡರು

ಶಿವಮೊಗ್ಗ: ವಂದೇ ಮಾತರಂ ಹಾಡಿನ ಗೊಂದಲ ಇದೀಗ ದಸರಾ ವೇದಿಕೆವರೆಗೂ ಬಂದಿದೆ. ದಸರಾ ಕಾರ್ಯಕ್ರಮದ ವೇದಿಕೆಯಲ್ಲಿ ವಂದೇ ಮಾತರಂ ಗೀತೆ ಪೂರ್ಣ ಹಾಡಿದ್ದಕ್ಕೆ ಕಾಂಗ್ರೆಸ್ ಮುಖಂಡರು ಆಕ್ಷೇಪಿಸಿದ ಘಟನೆ ರವಿವಾರ (ಅ.11) ನಡೆದಿದೆ.

ಶಿವಮೊಗ್ಗ ನಗರದ ಕೋಟೆ ರಸ್ತೆಯಲ್ಲಿರುವ ಶ್ರೀ ಚಂಡಿಕಾ ದುರ್ಗಾಪರಮೇಶ್ವರಿ ದೇವಸ್ಥಾನದಲ್ಲಿ ನಡೆಯುತ್ತಿದ್ದ ದಸರಾ ಕಾರ್ಯಕ್ರಮದ ವೇಳೆ ಈ ಘಟನೆ ನಡೆದಿದೆ. ಹಿರಿಯ ನಟ ಶ್ರೀನಾಥ್, ಸಂಸದ ಬಿ.ವೈ.ರಾಘವೇಂದ್ರ, ಶಾಸಕ ಚೆನ್ನಬಸಪ್ಪ ಸೇರಿದಂತೆ ಹಲವರು ದಸರಾ ಕಾರ್ಯಕ್ರಮದಲ್ಲಿದ್ದರು.

ಕಾರ್ಯಕ್ರಮದ ಆರಂಭದಲ್ಲಿ ಗಾಯಕರು ಹಿನ್ನೆಲೆ ಸಂಗೀತ ಸಹಿತ ಎರಡು ಚರಣ ವಂದೇ ಮಾತರಂ ಹಾಡಿದ್ದರು. ಹಾಡಿನ ಎರಡು ಚರಣ ಮುಗಿಯುತ್ತಿದ್ದಂತೆ ಹಿನ್ನೆಲೆ ಸಂಗೀತ ಕೊನೆಗೊಂಡಿತ್ತು. ಆದರೆ ಗಾಯಕರು ಮ್ಯೂಸಿಕ್ ಅಂತ್ಯಗೊಂಡ ಬಳಿಕವೂ ಪೂರ್ತಿ ವಂದೇ ಮಾತರಂ ಹಾಡಿದ್ದರು.

ಆದರೆ ವೇದಿಕೆಯ ಮೇಲಿದ್ದ ಕಾಂಗ್ರೆಸ್ ನಾಯಕರು ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದರು. ಶಿವಮೊಗ್ಗ ಮಹಾನಗರ ಪಾಲಿಕೆ ಆಯುಕ್ತ ಮಾಯಣ್ಣಗೌಡ ಜೊತೆ ಚರ್ಚೆ ನಡೆಸಿದ ಬಳಿಕ, 'ದಸರಾ ನೀವೇ ಮಾಡಿಕೊಳ್ಳಿ, ಚೆನ್ನಾಗಿ ನಡೆಯಲಿ' ಎಂದು ಹೊರ ನಡೆದರು. ದಸರಾ ಕಾರ್ಯಕ್ರಮ ಬಹಿಷ್ಕರಿಸಿದ ಮುಖಂಡ ವೇದಿಕೆಯಿಂದ ಹೊರ ನಡೆದರು.

ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷ ಎಚ್.ಸಿ.ಯೋಗೀಶ್, ಶಿವಮೊಗ್ಗ-ಭದ್ರಾವತಿ ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಮಧುಸೂದನ್, ಜವಳಿ ಕೈಮಗ್ಗ ನಿಗಮದ ಅಧ್ಯಕ್ಷ ಚೇತನ್ ಗೌಡ ನೇತೃತ್ವದಲ್ಲಿ ಕಾಂಗ್ರೆಸ್ ಮುಖಂಡರು ಹೊರನಡೆದರು.

ಸರಕಾರದ ಸುತ್ತೋಲೆಯನ್ನು ಧಿಕ್ಕರಿಸಿ ಪೂರ್ಣ ವಂದೇ ಮಾತರಂ ಹಾಡಿಸಲಾಗಿದೆ. ಈ ಬಾರಿ ದಸರಾದ ಉಸ್ತುವಾರಿ ಆಗಿರುವುದು ಮಹಾನಗರ ಪಾಲಿಕೆ ಕಮಿಷನರ್ ಮಾಯಣ್ಣಗೌಡ. ಅವರನ್ನು ತಕ್ಷಣ ವರ್ಗಾವಣೆ ಮಾಡಬೇಕು. ಇನ್ನು, ಸಿಎಂ ಕಾರ್ಯಕ್ರಮದಲ್ಲಿ ಇದೇ ವಂದೇ ಮಾತರಂ ವಿಚಾರಕ್ಕೆ ಶಾಸಕ ಚನ್ನಬಸಪ್ಪ ಕಾರ್ಯಕ್ರಮದಿಂದ ಹೊರ ನಡೆದಿದ್ದರು. ನಾವು ದಸರಾದ ವಿರೋಧಿಗಳಲ್ಲ. ಆದರೆ ಸರಕಾರದ ಸುತ್ತೋಲೆಗೆ ಬೆಲೆ ಕೊಡದ ಸಭೆಯಲ್ಲಿ ತಾವು ಇರುವುದಿಲ್ಲ

-ಎಚ್.ಸಿ.ಯೋಗೇಶ್, ಶಿವಮೊಗ್ಗ ಕಾಂಗ್ರೆಸ್ ಜಿಲ್ಲಾಧ್ಯಕ್ಷರು