ಬಿಹಾರದ ಮುಂದಿನ ಸಿಎಂ : ಜನರ ಆಯ್ಕೆ ಯಾರು?

ಬಿಹಾರದಲ್ಲಿ ಈ ವರ್ಷದ ಕೊನೆಯಲ್ಲಿ ನಡೆಯಲಿರುವ ವಿಧಾನಸಭೆ ಚುನಾವಣೆ ಸಮೀಪಿಸುತ್ತಿದ್ದಂತೆ ರಾಜಕೀಯ ಚಟುವಟಿಕೆಗಳು ತೀವ್ರಗೊಂಡಿವೆ. ಎಲ್ಲಾ ರಾಜಕೀಯ ಪಕ್ಷಗಳು ಮತದಾರರನ್ನು ಸೆಳೆಯಲು ತಮ್ಮದೇ ಆದ ಕಾರ್ಯತಂತ್ರಗಳಲ್ಲಿ ನಿರತವಾಗಿವೆ.

ಈ ಬಿಸಿಯಾಗುತ್ತಿರುವ ಚುನಾವಣಾ ವಾತಾವರಣದ ನಡುವೆ, ಪ್ರತಿಷ್ಠಿತ ಸಮೀಕ್ಷಾ ಸಂಸ್ಥೆ ಸಿ-ವೋಟರ್ ರಾಜ್ಯದ ಮುಂದಿನ ಮುಖ್ಯಮಂತ್ರಿ ಹುದ್ದೆಗೆ ನೆಚ್ಚಿನ ಮುಖ ಯಾರು ಎಂಬ ಬಗ್ಗೆ ಒಂದು ಮಹತ್ವದ ಸಮೀಕ್ಷೆಯನ್ನು ನಡೆಸಿದೆ. ಈ ಸಮೀಕ್ಷೆಯ ಫಲಿತಾಂಶಗಳು ರಾಜಕೀಯ ವಲಯದಲ್ಲಿ ಚರ್ಚೆಗೆ ಕಾರಣವಾಗಿವೆ. ಜೊತೆಗೆ, ಮತದಾರರ ಮನೋಭಾವವನ್ನು ಸಹ ತೋರಿಸಿವೆ.

ಸಿ-ವೋಟರ್ ಈ ಸಮೀಕ್ಷೆಯನ್ನು ಜೂನ್‌ನ ಮೂರನೇ ವಾರದಲ್ಲಿ ನಡೆಸಿದೆ ಮತ್ತು ಇದೇ ವಿಷಯದ ಕುರಿತು ಕಳೆದ ನಾಲ್ಕು ತಿಂಗಳಲ್ಲಿ ನಡೆಸಲಾದ ನಾಲ್ಕನೇ ಸಮೀಕ್ಷೆ ಇದಾಗಿದೆ. ಈ ಹಿಂದೆ ಫೆಬ್ರವರಿ, ಏಪ್ರಿಲ್ ಮತ್ತು ಜೂನ್‌ನ ಮೊದಲ ವಾರದಲ್ಲಿಯೂ ಇದೇ ರೀತಿಯ ಸಮೀಕ್ಷೆಗಳನ್ನು ನಡೆಸಲಾಗಿತ್ತು. ಇದರಲ್ಲಿ ವಿವಿಧ ನಾಯಕರ ಜನಪ್ರಿಯತೆಯ ಗ್ರಾಫ್‌ನಲ್ಲಿ ಏರಿಳಿತ ಕಂಡುಬಂದಿತ್ತು.

ಇತ್ತೀಚಿನ ಸಮೀಕ್ಷೆಯ ಫಲಿತಾಂಶಗಳು ರಾಷ್ಟ್ರೀಯ ಜನತಾ ದಳದ (ಆರ್‌ಜೆಡಿ) ನಾಯಕ ತೇಜಸ್ವಿ ಯಾದವ್ ಮುಖ್ಯಮಂತ್ರಿ ಹುದ್ದೆಗೆ ಜನರ ಮೊದಲ ಆಯ್ಕೆಯಾಗಿ ಹೊರಹೊಮ್ಮಿದ್ದಾರೆ ಎಂದು ತೋರಿಸುತ್ತವೆ. ಅವರಿಗೆ ಶೇಕಡಾ 34.6 ರಷ್ಟು ಜನರ ಬೆಂಬಲ ದೊರೆತಿದೆ.

ಮತ್ತೊಂದೆಡೆ, ಹಾಲಿ ಮುಖ್ಯಮಂತ್ರಿ ಮತ್ತು ಜನತಾ ದಳ (ಯುನೈಟೆಡ್) ಮುಖ್ಯಸ್ಥ ನಿತೀಶ್ ಕುಮಾರ್ ಸಿಎಂ ಹುದ್ದೆಯ ಸ್ಪರ್ಧೆಯಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ. ಅವರಿಗೆ ಶೇಕಡಾ 17.4 ರಷ್ಟು ಜನರ ಬೆಂಬಲವಿದೆ. ಈ ಅಂಕಿ ಅಂಶವು ಕಳೆದ ಕೆಲವು ಸಮಯದಿಂದ ನಿತೀಶ್ ಕುಮಾರ್ ಅವರ ಜನಪ್ರಿಯತೆ ಸಾಕಷ್ಟು ಕಡಿಮೆಯಾಗಿದೆ ಎಂದು ತೋರಿಸುತ್ತದೆ.

ತೇಜಸ್ವಿ ಯಾದವ್ ಅವರು ಪಡೆದಿರುವ ಬೆಂಬಲ ನಿತೀಶ್ ಗೆ ಹೋಲಿಸಿದರೆ ದುಪ್ಪಟ್ಟಾಗಿದೆ. ಮೂರು ದಶಕಗಳಿಂದ ಬಿಹಾರದ ರಾಜಕೀಯದ ಕೇಂದ್ರಬಿಂದುವಾಗಿರುವ ನಿತೀಶ್ ಕುಮಾರ್ ಅವರಿಗೆ ಇದು ಆತಂಕಕಾರಿ ಸಂಕೇತ .

ಈ ಸಮೀಕ್ಷೆಯಲ್ಲಿ ಗಮನಾರ್ಹವಾದ ಮತ್ತೊಂದು ಅಂಶವೆಂದರೆ ಲೋಕ ಜನಶಕ್ತಿ ಪಕ್ಷ (ರಾಮ್ ವಿಲಾಸ್) ನಾಯಕ ಚಿರಾಗ್ ಪಾಸ್ವಾನ್ ಅವರ ಜನಪ್ರಿಯತೆಯಲ್ಲಿನ ಗಮನಾರ್ಹ ಏರಿಕೆ.

ಫೆಬ್ರವರಿ ಸಮೀಕ್ಷೆಯಲ್ಲಿ ಕೇವಲ ಶೇಕಡಾ 3.7 ರಷ್ಟು ಬೆಂಬಲ ಪಡೆದಿದ್ದ ಚಿರಾಗ್ ಪಾಸ್ವಾನ್ ಎಪ್ರಿಲ್ ಸಮೀಕ್ಷೆಯಲ್ಲಿ ಶೇಕಡಾ 5.6 ರಷ್ಟು ಬೆಂಬಲ ಗಳಿಸಿದ್ದರು. ನಂತರ ಜೂನ್ ಮೊದಲ ವಾರದಲ್ಲಿ ಇದು ಶೇಕಡಾ 10.6 ಕ್ಕೆ ತಲುಪಿತ್ತು ಮತ್ತೆ ಇದೀಗ ಮೂರನೇ ವಾರದಲ್ಲಿ 9.9ಕ್ಕೆ ಬಂದು ತಲುಪಿದೆ. ಕೇವಲ ಮೂರು ತಿಂಗಳಲ್ಲಿ ಶೇಕಡಾ ಆರರಷ್ಟು ಅವರ ಜನಪ್ರಿಯತೆ ಹೆಚ್ಚಿದೆ.

ಈ ಏರಿಕೆಯು ಯುವ ದಲಿತ ನಾಯಕನಾಗಿ ಬಿಹಾರದಲ್ಲಿ ಅವರ ಹೆಚ್ಚುತ್ತಿರುವ ಸ್ವೀಕಾರಾರ್ಹತೆಯನ್ನು ಸೂಚಿಸುತ್ತದೆ.

ಚುನಾವಣಾ ರಾಜಕೀಯದಲ್ಲಿ ಹೊಸ ಆಟಗಾರರಾಗಿ ಹೊರಹೊಮ್ಮಿರುವ ಪ್ರಶಾಂತ್ ಕಿಶೋರ್ ಕೂಡ ಈ ಸಮೀಕ್ಷೆಯಲ್ಲಿ ತಮ್ಮ ಉಪಸ್ಥಿತಿಯನ್ನು ದಾಖಲಿಸುವಲ್ಲಿ ಯಶಸ್ವಿಯಾಗಿದ್ದಾರೆ. ಅವರ ಬೆಂಬಲದ ಪ್ರಮಾಣವು ಇನ್ನೂ ತುಲನಾತ್ಮಕವಾಗಿ ಕಡಿಮೆಯಿದ್ದರೂ, ಅವರು ಸಹ ಕಳೆದ ನಾಲ್ಕು ತಿಂಗಳಲ್ಲಿ ತಮ್ಮ ಜನಪ್ರಿಯತೆಯನ್ನು ಹೆಚ್ಚಿಸಿಕೊಂಡಿದ್ದಾರೆ.

ಕಳೆದ ನಾಲ್ಕು ತಿಂಗಳ ಸಮೀಕ್ಷೆಯ ಅಂಕಿ ಅಂಶಗಳನ್ನು ಗಮನಿಸಿದರೆ, ತೇಜಸ್ವಿ ಯಾದವ್ ಸತತವಾಗಿ ಮೊದಲ ಸ್ಥಾನದಲ್ಲಿದ್ದಾರೆ. ಫೆಬ್ರವರಿಯಲ್ಲಿ ಅವರಿಗೆ ಶೇಕಡಾ 40.6 ರಷ್ಟು ಜನರ ಬೆಂಬಲವಿತ್ತು, ಇದು ಏಪ್ರಿಲ್‌ನಲ್ಲಿ ಶೇಕಡಾ 35.5 ಕ್ಕೆ ತಲುಪಿತು ಮತ್ತು ಜೂನ್‌ನ ಮೊದಲನೇ ವಾರದಲ್ಲಿ ಶೇಕಡಾ 36.9 ಕ್ಕೆ ಏರಿತ್ತು. ಇದೀಗ ಶೇಕಡಾ 34.6 ಕ್ಕೆ ಬಂದು ನಿಂತಿದೆ.

ಏರಿಳಿತ ಕಾಣುತ್ತಿದ್ದರೂ ಸತತವಾಗಿ ಒಂದನೇ ಸ್ಥಾನದಲ್ಲಿರುವುದು ಅವರ ಸ್ಥಿರ ಮತ್ತು ಹೆಚ್ಚುತ್ತಿರುವ ಜನಪ್ರಿಯತೆಯನ್ನು ತೋರಿಸುತ್ತದೆ.

ಮತ್ತೊಂದೆಡೆ, ನಿತೀಶ್ ಕುಮಾರ್ ಅವರ ಬೆಂಬಲದಲ್ಲಿ ಸತತ ಕುಸಿತ ಕಂಡುಬಂದಿದೆ. ಫೆಬ್ರವರಿಯಲ್ಲಿ ಅವರಿಗೆ ಶೇಕಡಾ 18.4 ರಷ್ಟು ಜನರ ಬೆಂಬಲವಿತ್ತು, ಇದು ಏಪ್ರಿಲ್‌ನಲ್ಲಿ ಶೇಕಡಾ 15.4 ಕ್ಕೆ ಇಳಿದು, ಈಗ ಇತ್ತೀಚಿನ ಸಮೀಕ್ಷೆಯಲ್ಲಿ ಶೇಕಡಾ 17.4 ಕ್ಕೆ ತಲುಪಿದೆ. ಈ ಕುಸಿತವು ಎನ್‌ಡಿಎ ಮೈತ್ರಿಕೂಟಕ್ಕೆ ಚಿಂತಿಸಬೇಕಾದ ವಿಷಯವಾಗಿದೆ.

ಚಿರಾಗ್ ಪಾಸ್ವಾನ್ ಈ ನಾಲ್ಕು ತಿಂಗಳಲ್ಲಿ ಅತಿ ಹೆಚ್ಚು ಪ್ರಮಾಣದಲ್ಲಿ ಬೆಂಬಲ ಹೆಚ್ಚಿಸಿಕೊಂಡಿದ್ದಾರೆ. ಫೆಬ್ರವರಿಯಲ್ಲಿ ಶೇಕಡಾ 3.7 ರೊಂದಿಗೆ ಪ್ರಾರಂಭಿಸಿ, ಅವರು ಏಪ್ರಿಲ್‌ನಲ್ಲಿ ಶೇಕಡಾ 5.8 ಕ್ಕೆ, ಜೂನ್ ಮೊದಲ ವಾರದಲ್ಲಿ ಶೇಕಡಾ 10.6 ಕ್ಕೆ ಮತ್ತು ಇದೀಗ ಶೇಕಡಾ 9.9 ಕ್ಕೆ ತಮ್ಮ ಬೆಂಬಲವನ್ನು ಹೆಚ್ಚಿಸಿಕೊಂಡಿದ್ದಾರೆ. ಯುವ ಮತದಾರರಲ್ಲಿ ಅವರ ಹಿಡಿತ ಬಲಗೊಳ್ಳುತ್ತಿದೆ ಎಂದು ಕಾಣುತ್ತಿದೆ.

ಪ್ರಶಾಂತ್ ಕಿಶೋರ್ ಗೆ, ಫೆಬ್ರವರಿಯಲ್ಲಿ ಶೇಕಡಾ 14.9 ರಷ್ಟು ಜನರ ಬೆಂಬಲವಿತ್ತು. ಇದು ಏಪ್ರಿಲ್‌ ನಲ್ಲಿ ಶೇಕಡಾ 17.2 ಕ್ಕೆ, ಜೂನ್ ಮೊದಲ ವಾರದಲ್ಲಿ ಶೇಕಡಾ 16.4 ಮತ್ತು ಈಗ ಜೂನ್‌ನಲ್ಲಿ ಶೇಕಡಾ 18.2 ಕ್ಕೆ ಏರಿದೆ. ಹೊಸ ರಾಜಕೀಯ ಪರ್ಯಾಯವಾಗಿ ಅವರು ನಿಧಾನವಾಗಿ ತಮ್ಮ ಸ್ಥಾನವನ್ನು ಭದ್ರಪಡಿಸಿಕೊಳ್ಳುತ್ತಿದ್ದಾರೆ. ಇದೀಗ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಗಿಂತಲೂ ಅವರ ಜನಪ್ರಿಯತೆ ಹೆಚ್ಚಾಗಿದೆ.

ಈ ಸಮೀಕ್ಷೆಯ ಫಲಿತಾಂಶಗಳ ನಂತರ ಬಿಹಾರದ ರಾಜಕೀಯ ವಾತಾವರಣ ಮತ್ತಷ್ಟು ಕಾವೇರಿದೆ.

ಆಡಳಿತಾರೂಢ ಎನ್‌ಡಿಎ ಮೈತ್ರಿಕೂಟವು ಲಾಲು-ರಾಬರಿ ಆಡಳಿತದ "ಜಂಗಲ್ ರಾಜ್ "ನ ಭಯವನ್ನು ತೋರಿಸಿ ತೇಜಸ್ವಿ ಯಾದವ್ ಅವರನ್ನು ತಿರಸ್ಕರಿಸುವಂತೆ ಮನವಿ ಮಾಡುತ್ತಿದ್ದರೆ, ತೇಜಸ್ವಿ ಯಾದವ್ ಕಳೆದ 20 ವರ್ಷಗಳ ನಿತೀಶ್ ಕುಮಾರ್ ಅವರ ಆಡಳಿತವನ್ನು ಪ್ರಶ್ನಿಸುತ್ತಿದ್ದಾರೆ.

ಇದರ ಜೊತೆಗೆ, ಅವರು ನಿತೀಶ್ ಕುಮಾರ್ ಅವರ ವಯಸ್ಸು, ಅನಾರೋಗ್ಯ, ರಾಜ್ಯದಲ್ಲಿ ನಿರುದ್ಯೋಗ ಮತ್ತು ಅಪರಾಧಗಳಂತಹ ವಿಷಯಗಳನ್ನು ಮುಂದಿಟ್ಟುಕೊಂಡು ಆರ್‌ಜೆಡಿ ನೇತೃತ್ವದ ಮಹಾಘಟಬಂಧನ ಸರ್ಕಾರದ ರಚನೆಗೆ ಮನವಿ ಮಾಡುತ್ತಿದ್ದಾರೆ.

ಮತ್ತೊಂದೆಡೆ, ಪ್ರಶಾಂತ್ ಕಿಶೋರ್ ನಿರಂತರವಾಗಿ ಹೊಸ ಪರ್ಯಾಯದ ಬಗ್ಗೆ ಮಾತನಾಡುತ್ತಿದ್ದಾರೆ. ಮತದಾರರನ್ನು ದೊಡ್ಡ ಬದಲಾವಣೆಗೆ ಪ್ರೇರೇಪಿಸುತ್ತಿದ್ದಾರೆ.

ಈ ನಡುವೆ, ಇತರ ರಾಜಕೀಯ ಪಕ್ಷಗಳು ಮತ್ತು ನಾಯಕರ ಹೇಳಿಕೆಗಳೂ ತೀವ್ರಗೊಂಡಿವೆ.

ಇತ್ತೀಚೆಗೆ, ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಅವರು ಬಿಹಾರ ಚುನಾವಣೆಯ ಮತದಾರರ ಪಟ್ಟಿಗೆ ಸಂಬಂಧಿಸಿದಂತೆ ಚುನಾವಣಾ ಆಯೋಗದ ಮೇಲೆ ಗಂಭೀರ ಆರೋಪಗಳನ್ನು ಮಾಡಿದ್ದಾರೆ. ಚುನಾವಣೆ ಪಟ್ಟಿ ಪರಿಷ್ಕರಣೆಯನ್ನು ಅವರು ಎನ್‌ಆರ್‌ಸಿ ರೀತಿಯ ಸಂಚು ಎಂದು ಕರೆದಿದ್ದಾರೆ.

ಮತ್ತೊಂದೆಡೆ, ತೇಜಸ್ವಿ ಯಾದವ್ ನಿರಂತರವಾಗಿ ಯುವಕರು ಮತ್ತು ವಿದ್ಯಾರ್ಥಿಗಳನ್ನು ಆಕರ್ಷಿಸಲು ಪ್ರಯತ್ನಿಸುತ್ತಿದ್ದಾರೆ. ಇತ್ತೀಚೆಗೆ ನಡೆದ ಕಾರ್ಯಕ್ರಮವೊಂದರಲ್ಲಿ, ಅವರ ಸರ್ಕಾರ ರಚನೆಯಾದರೆ ಯುವಕರಿಗೆ ಉತ್ತಮ ಉದ್ಯೋಗ ಮತ್ತು ಶಿಕ್ಷಣದ ಅವಕಾಶಗಳನ್ನು ಒದಗಿಸುವುದಾಗಿ ಹೇಳಿದ್ದಾರೆ.

ಅವರ ಸರ್ಕಾರ ಬಂದೂಕಿನ ಬದಲು ಲೇಖನಿಗಳನ್ನು ಹಂಚುತ್ತದೆ ಮತ್ತು ಮಕ್ಕಳಿಗೆ ಒಂದು ಲೋಟ ಹಾಲು ಮತ್ತು ಮೊಟ್ಟೆ ನೀಡುವ ಭರವಸೆ ನೀಡಿದೆ ಎಂದು ಅವರು ಹೇಳಿದ್ದಾರೆ. ಬಿಜೆಪಿ ನಾಯಕರು ತೇಜಸ್ವಿ ಯಾದವ್ ಅವರ ಈ ಭರವಸೆಗಳನ್ನು ಟೀಕಿಸುತ್ತಿದ್ದಾರೆ ಮತ್ತು ಅವು ಸುಳ್ಳು ಎಂದು ಹೇಳುತ್ತಿದ್ದಾರೆ. ತೇಜಸ್ವಿ ಯಾದವ್ ನೀಡಿದ ಭರವಸೆಗಳನ್ನು ಅವರು ಎಂದಿಗೂ ಈಡೇರಿಸಲು ಸಾಧ್ಯವಿಲ್ಲ ಎಂದು ಬಿಜೆಪಿ ಹೇಳಿದೆ.

ಸಿ-ವೋಟರ್‌ನ ಈ ಸಮೀಕ್ಷೆಯ ಫಲಿತಾಂಶಗಳು ಖಂಡಿತವಾಗಿಯೂ ಬಿಹಾರದ ರಾಜಕೀಯ ಪಕ್ಷಗಳು ತಮ್ಮ ಕಾರ್ಯತಂತ್ರಗಳ ಬಗ್ಗೆ ಮರುಚಿಂತನೆ ಮಾಡಲು ಕಾರಣವಾಗಲಿವೆ. ತೇಜಸ್ವಿ ಯಾದವ್ ಅವರ ನಿರಂತರವಾಗಿ ಹೆಚ್ಚುತ್ತಿರುವ ಜನಪ್ರಿಯತೆಯು ಮಹಾಘಟಬಂಧನಕ್ಕೆ ದೊಡ್ಡ ಉತ್ತೇಜನವಾಗಿದೆ.

ಚಿರಾಗ್ ಪಾಸ್ವಾನ್ ಮತ್ತು ಪ್ರಶಾಂತ್ ಕಿಶೋರ್ ಅವರಂತಹ ಹೊಸ ಆಟಗಾರರ ಪ್ರದರ್ಶನವು ಸಹ ಈ ಚುನಾವಣೆಯಲ್ಲಿ ನಿರ್ಣಾಯಕ ಪಾತ್ರವನ್ನು ವಹಿಸಬಹುದು. ಈ ಇಬ್ಬರೂ ನಾಯಕರು ತಮ್ಮ ಜನಪ್ರಿಯತೆಯನ್ನು ಚುನಾವಣಾ ಫಲಿತಾಂಶಗಳಾಗಿ ಎಷ್ಟು ಪರಿವರ್ತಿಸುತ್ತಾರೆ ಎಂಬುದನ್ನು ನೋಡಬೇಕಾಗಿದೆ.

ಸಿ-ವೋಟರ್‌ನ ಈ ಸಮೀಕ್ಷೆಯು 2025 ರ ಬಿಹಾರ ವಿಧಾನಸಭೆ ಚುನಾವಣೆಗೆ ಒಂದು ಪ್ರಮುಖ ದಿಕ್ಸೂಚಿಯಾಗಿದೆ. ತೇಜಸ್ವಿ ಯಾದವ್ ಈ ಸ್ಪರ್ಧೆಯಲ್ಲಿ ಮುಂಚೂಣಿಯಲ್ಲಿ ಕಾಣಿಸಿಕೊಂಡಿದ್ದರೂ, ರಾಜಕೀಯದಲ್ಲಿ ಯಾವುದೂ ಖಚಿತವಲ್ಲ. ಮುಂಬರುವ ತಿಂಗಳುಗಳಲ್ಲಿ ರಾಜಕೀಯ ಪಕ್ಷಗಳ ಚಟುವಟಿಕೆಗಳು ಮತ್ತು ಮತದಾರರ ಮನೋಭಾವ ಯಾವ ಕಡೆ ತಿರುಗುತ್ತದೆ ಎಂಬುದನ್ನು ನೋಡುವುದು ಅತ್ಯಂತ ಕುತೂಹಲಕಾರಿಯಾಗಿದೆ. ಸದ್ಯಕ್ಕೆ, ಈ ಸಮೀಕ್ಷೆಯು ಬಿಹಾರದ ರಾಜಕೀಯದಲ್ಲಿ ಹೊಸ ರೋಚಕತೆಯನ್ನು ಹುಟ್ಟುಹಾಕಿದೆ.