ಗರಿಷ್ಠ ವಿಕೆಟ್ ಪಡೆದ ಇಂಗ್ಲೆಂಡ್ ಸ್ಪಿನ್ನರ್ ಆದ ಆದಿಲ್ ರಶೀದ್

ಲಂಡನ್: ಇಂಗ್ಲೆಂಡ್ ಸ್ಪಿನ್ನರ್ ಆದಿಲ್ ರಶೀದ್ ಕ್ರಿಕೆಟ್ ದಂತಕತೆ ಗ್ರೇಮ್ ಸ್ವಾನ್‌ರನ್ನು ಹಿಂದಿಕ್ಕಿ ಅತಿ ಹೆಚ್ಚು ಅಂತರ್‌ರಾಷ್ಟ್ರೀಯ ವಿಕೆಟ್‌ಗಳನ್ನು ಪಡೆದ ಇಂಗ್ಲೆಂಡ್ ಸ್ಪಿನ್ ಬೌಲರ್ ಆಗಿ ಹೊರಹೊಮ್ಮಿದ್ದಾರೆ.

ಸ್ವಾನ್ 410 ವಿಕೆಟ್‌ಗಳನ್ನು ಗಳಿಸಿದ್ದಾರೆ. ರವಿವಾರ ನಡೆದ ವೆಸ್ಟ್ ಇಂಡೀಸ್ ವಿರುದ್ಧದ ಎರಡನೇ ಏಕದಿನ ಪಂದ್ಯದಲ್ಲಿ ರಶೀದ್ ನಾಲ್ಕು ವಿಕೆಟ್‌ಗಳನ್ನು ಗಳಿಸಿದ್ದು, ಅವರು ಪಡೆದಿರುವ ಒಟ್ಟು ವಿಕೆಟ್‌ಗಳ ಸಂಖ್ಯೆ 412ಕ್ಕೆ ಏರಿದೆ.

ರವಿವಾರ ತನ್ನ 10 ಓವರ್‌ ಗಳ ದಾಳಿಯಲ್ಲಿ ರಶೀದ್ 63 ರನ್‌ಗಳನ್ನು ಕೊಟ್ಟು ಬ್ರಾಂಡನ್ ಕಿಂಗ್, ಶಿಮ್ರಾನ್ ಹೆಟ್ಮಯರ್, ಗುಡಕೇಶ್ ಮೋಟೀ ಮತ್ತು ಅಲ್ಝಾರಿ ಜೋಸೆಫ್‌ರ ವಿಕೆಟ್‌ಗಳನ್ನು ಉರುಳಿಸಿದ್ದಾರೆ. ಇದು ಏಕದಿನ ಕ್ರಿಕೆಟ್‌ನಲ್ಲಿ ರಶೀದ್ ನಾಲ್ಕು ಅಥವಾ ನಾಲ್ಕಕ್ಕಿಂತ ಹೆಚ್ಚಿನ ವಿಕೆಟ್‌ಗಳನ್ನು ಪಡೆದಿರುವುದು 12ನೇ ಬಾರಿಯಾಗಿದೆ.

ವೆಸ್ಟ್ ಇಂಡೀಸ್ 47.4 ಓವರ್‌ಗಳಲ್ಲಿ 308 ರನ್‌ಗಳಿಗೆ ಆಲೌಟಾಗಿದೆ. ರಶೀದ್ 294 ಪಂದ್ಯಗಳಲ್ಲಿ ಈ ಸಾಧನೆ ಮಾಡಿದ್ದಾರೆ.