ನಾಲ್ಕನೇ ಟಿ-20: ದೀಪ್ತಿ ಶರ್ಮಾ ಆಲ್ರೌಂಡ್ ಆಟ; ದಕ್ಷಿಣ ಆಫ್ರಿಕಾ ವಿರುದ್ಧ ಭಾರತಕ್ಕೆ ರೋಚಕ ಜಯ

ಹೊಸದಿಲ್ಲಿ: ಜೋಹಾನ್ಸ್ಬರ್ಗ್ನಲ್ಲಿ ಶನಿವಾರ ನಡೆದ ನಾಲ್ಕನೇ ಮಹಿಳೆಯರ ಟಿ-20 ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾ ಕ್ರಿಕೆಟ್ ತಂಡವನ್ನು 14 ರನ್ಗಳ ಅಂತರದಿಂದ ರೋಚಕವಾಗಿ ಮಣಿಸಿರುವ ಭಾರತ ತಂಡವು ಪ್ರತಿ ಹೋರಾಟ ನೀಡಿದೆ. ಮಾತ್ರವಲ್ಲ ವೈಟ್ವಾಶ್ ಭೀತಿಯಿಂದ ಪಾರಾಗಿದೆ.

ದೀಪ್ತಿ ಶರ್ಮಾ ಔಟಾಗದೆ 36 ರನ್ ಗಳಿಸಿದ ನಂತರ ಐದು ವಿಕೆಟ್ ಗೊಂಚಲನ್ನು ಪಡೆದು ಪರಿಪೂರ್ಣ ಆಲ್ರೌಂಡ್ ಪ್ರದರ್ಶನ ನೀಡಿದರು.

ಮೊದಲು ಬ್ಯಾಟಿಂಗ್ಗೆ ಇಳಿಸಲ್ಪಟ್ಟ ಭಾರತ ತಂಡವು ಶೆಫಾಲಿ ವರ್ಮಾರನ್ನು ಅಲ್ಪ ಮೊತ್ತಕ್ಕೆ ಕಳೆದುಕೊಂಡು ಕಳಪೆ ಆರಂಭ ಪಡೆಯಿತು. ಆ ನಂತರ ಅನುಷ್ಕಾ ಶರ್ಮಾ 27 ರನ್ಗೆ ವಿಕೆಟ್ ಒಪ್ಪಿಸಿದರು.

ಭಾರತ ತಂಡವು 47 ರನ್ಗೆ ಎರಡು ವಿಕೆಟ್ ಕಳೆದುಕೊಂಡಾಗ ಇನಿಂಗ್ಸ್ಗೆ ಜೆಮಿಮಾ ರೋಡ್ರಿಗ್ಸ್(43 ರನ್, 29 ಎಸೆತ) ಬಲ ತುಂಬಿದರು. ದೀಪ್ತಿ ಆಕರ್ಷಕ 43 ರನ್ ಗಳಿಸಿದ್ದಲ್ಲದೆ, ನಾಯಕಿ ಹರ್ಮನ್ಪ್ರೀತ್ ಕೌರ್(22 ರನ್, 16 ಎಸೆತ)ಅವರೊಂದಿಗೆ ನಿರ್ಣಾಯಕ ಜೊತೆಯಾಟ ನಡೆಸಿ ಭಾರತ ತಂಡದ ಸ್ಕೋರನ್ನು 100ರ ಗಡಿ ದಾಟಿಸಿದರು.

ಭಾರತ ತಂಡವು ಉತ್ತಮ ಮೊತ್ತದತ್ತ ಚಿತ್ತ ಹರಿಸಿದ್ದಾಗಲೇ ಕ್ಷಿಪ್ರಗತಿಯಲ್ಲಿ ವಿಕೆಟ್ಗಳನ್ನು ಕಳೆದುಕೊಂಡಿತು. 122 ರನ್ಗೆ ಐದು ವಿಕೆಟ್ಗಳು ಉದುರಿದವು. ಈ ಹಂತದಲ್ಲಿ ರಿಚಾ ಘೋಷ್(ಔಟಾಗದೆ 34, 18 ಎಸೆತ)ಅವರೊಂದಿಗೆ ಕೈಜೋಡಿಸಿದ ದೀಪ್ತಿ ಶರ್ಮಾ ಔಟಾಗದೆ 34 ರನ್ ಗಳಿಸಿದ್ದಲ್ಲದೆ ಆರನೇ ವಿಕೆಟ್ಗೆ 65 ರನ್ ಜೊತೆಯಾಟ ನಡೆಸಿದರು. ಭಾರತ ತಂಡವು 20 ಓವರ್ಗಳಲ್ಲಿ ಐದು ವಿಕೆಟ್ಗಳ ನಷ್ಟಕ್ಕೆ 185 ರನ್ ಗಳಿಸುವಲ್ಲಿ ನೆರವಾದರು.

ದಕ್ಷಿಣ ಆಫ್ರಿಕಾ ತಂಡವು ಆತ್ಮವಿಶ್ವಾಸಭರಿತ ಆರಂಭ ಪಡೆದಿದ್ದು, ಸುನ್ ಲೂಸ್(40 ರನ್, 24 ಎಸೆತ)ಹಾಗೂ ತಝ್ಮಿನ್ ಬ್ರಿಟ್ಸ್(30 ರನ್, 23 ಎಸೆತ)ಆರಂಭಿಕ ಮೇಲುಗೈ ಒದಗಿಸಿದರು. ಅಗತ್ಯದ ರನ್ರೇಟ್ ಕಾಯ್ದುಕೊಳ್ಳುವ ಮೂಲಕ ಆತಿಥೇಯರು ಒಂದು ಹಂತದಲ್ಲಿ ಇನಿಂಗ್ಸ್ ಮೇಲೆ ಹಿಡಿತ ಸಾಧಿಸಿದಂತೆ ಕಂಡುಬಂದರು.

ದೀಪ್ತಿ ನಿರ್ಣಾಯಕ ಕ್ಷಣಗಳಲ್ಲಿ ಪ್ರಮುಖ ವಿಕೆಟ್ಗಳನ್ನು ಉರುಳಿಸಿದರು. ಜೊತೆಯಾಟಗಳನ್ನು ಮುರಿದು ಬ್ಯಾಟರ್ಗಳಿಗೆ ಒತ್ತಡ ಹೇರಿದರು. 19 ರನ್ಗೆ ಐದು ವಿಕೆಟ್ಗಳನ್ನು ಉರುಳಿಸಿ ಪಂದ್ಯವನ್ನು ಭಾರತದತ್ತ ವಾಲಿಸಿದರು.

ಉಳಿದ ಬೌಲರ್ಗಳ ಸಹಾಯದಿಂದ ದೀಪ್ತಿ ಅವರು ದಕ್ಷಿಣ ಆಫ್ರಿಕಾ ತಂಡವನ್ನು 9 ವಿಕೆಟ್ಗಳ ನಷ್ಟಕ್ಕೆ 171 ರನ್ಗೆ ನಿಯಂತ್ರಿಸಿದರು.

ಈ ಪಂದ್ಯದಲ್ಲಿ ಸೋತ ಹೊರತಾಗಿಯೂ ದಕ್ಷಿಣ ಆಫ್ರಿಕಾ ತಂಡವು ಸರಣಿಯಲ್ಲಿ ಈಗಲೂ 3-1 ಮುನ್ನಡೆಯಲ್ಲಿದೆ. ಭಾರತ ತಂಡ ಈ ಗೆಲುವಿನ ಮೂಲಕ ಅಂತಿಮ ಪಂದ್ಯಕ್ಕಿಂತ ಮೊದಲು ಆತ್ಮವಿಶ್ವಾಸ ಹೆಚ್ಚಿಸಿಕೊಂಡಿದೆ.