ದೇಶದ 100ನೇ ಗ್ರ್ಯಾಂಡ್‌ಮಾಸ್ಟರ್ ಆಗಿ ಹೊರಹೊಮ್ಮಿದ ಚೆಸ್ ಪಟು ಅನುಜ್ ಶ್ರೀವಾತ್ರಿ
ಹೊಸದಿಲ್ಲಿ: ಭಾರತೀಯರು ದೀಪಾವಳಿಯಲ್ಲಿ ದೀಪಗಳನ್ನು ಬೆಳಗಿಸುವ ತಯಾರಿಯಲ್ಲಿದ್ದಾಗ ಫಿಲಿಪ್ಪೀನ್ಸ್‌ನಲ್ಲಿ ಮಧ್ಯಪ್ರದೇಶದ ಚೆಸ್ ಪಟು ಅನುಜ್ ಶ್ರೀವಾತ್ರಿ ದೇಶದ 100ನೇ ಗ್ರ್ಯಾಂಡ್‌ಮಾಸ್ಟರ್ ಆಗಿ ಹೊರಹೊಮ್ಮಿದ್ದಾರೆ. ಈ ಸಾಧನೆ ಮಾಡಿದ ತನ್ನ ರಾಜ್ಯದ ಮೊದಲ ಚೆಸ್ ಪಟು ಎನಿಸಿಕೊಂಡರು.
ರವಿವಾರ ಏಳನೇ ಆವೃತ್ತಿಯ ಏಸಿಯನ್ ಪ್ಲಸ್ ವೈಯಕ್ತಿಕ ಓಪನ್ ಚೆಸ್ ಚಾಂಪಿಯನ್‌ಶಿಪ್ ಗೆದ್ದಿರುವ ಅನುಜ್ ಅವರು ಗ್ರ್ಯಾಂಡ್‌ಮಾಸ್ಟರ್ ಗೌರವ ಪಡೆದರು. ತನ್ನ ಮೊದಲ ಗೇಮ್ ಸೋತ ನಂತರ ಅನುಜ್ ಅವರು ಉಳಿದ ಎಂಟು ಸುತ್ತುಗಳನ್ನು ಗೆದ್ದುಕೊಂಡು ಏಳಂಕವನ್ನು ಪಡೆದರು. ಕೊನೆಯ ಎರಡು ಸುತ್ತು ಗೆದ್ದ ನಂತರ ಪ್ರತಿಸ್ಪರ್ಧಿ ವಿಯೆಟ್ನಾಂನ ಗುಯೆನ್‌ಹಾವೊ ಅವರನ್ನು ಹಿಂದಿಕ್ಕಿದರು. ಈ ಗೆಲುವಿನ ಮೂಲಕ ನೇರವಾಗಿ ಗ್ರ್ಯಾಂಡ್‌ಮಾಸ್ಟರ್ ಗೌರವ ಪಡೆದರು.
ಭಾರತವು 1987ರ ನಂತರ ಈ ತನಕ 99 ಗ್ರ್ಯಾಂಡ್‌ಮಾಸ್ಟರ್‌ಗಳನ್ನು ಕಂಡಿದೆ. ಇವರಲ್ಲಿ ಮಧ್ಯಪ್ರದೇಶದಿಂದ ಯಾರೂ ಇರಲಿಲ್ಲ. ಈ ಸ್ಮರಣೀಯ ಕ್ಷಣಕ್ಕಾಗಿ 22ರ ಹರೆಯದ ಕಟ್ನಿ ನಿವಾಸಿ ಅನುಜ್ ಕಾರ್ಪೋರೇಟ್ ಹುದ್ದೆಯನ್ನು ತಿರಸ್ಕರಿಸಿದ್ದರು.
‘‘ನನಗೀಗ ಅತ್ಯಂತ ನಿರಾಳತೆಯ ಭಾವನೆ ಉಂಟಾಗಿದೆ. ದೀರ್ಘ ಸಮಯದಿಂದ ಜಿಎಂ ಗೌರವಕ್ಕಾಗಿ ಪ್ರಯತ್ನಿಸುತ್ತಿದ್ದೆ. ಹಲವಾರು ಬಾರಿ ನನ್ನ ಜಿಎಂ ಮಾನದಂಡಗಳು ತಪ್ಪಿಹೋಗಿದ್ದವು. ಕನಿಷ್ಠ ನಾಲ್ಕರಿಂದ ಐದು ಬಾರಿ ನಿಜವಾಗಿಯೂ ಹತ್ತಿರವಾಗಿದ್ದೆ. ಆದರೆ ಅದು ಕೈತಪ್ಪಿ ಹೋಗಿದೆ. ಇದೀಗ ಆ ಪ್ರಶಸ್ತಿ ಲಭಿಸಿದೆ’’ ಎಂದು ಅನುಜ್ ಹೇಳಿದ್ದಾರೆ.
ಅನುಜ್ ಅವರ ತಂದೆ ಅಶೋಕ್ ಕುಮಾರ್ ರೈಲ್ವೆ ಶಾಲೆಯಲ್ಲಿ ವಿಜ್ಞಾನ ಶಿಕ್ಷಕರಾಗಿದ್ದರೆ, ತಾಯಿ ಮನೋರಮಾ ಮಧ್ಯ ಪ್ರದೇಶದ ಸರಕಾರಿ ಶಾಲೆಯ ಶಿಕ್ಷಕಿಯಾಗಿದ್ದಾರೆ. ತನ್ನ ತಂದೆಯ ಮೂಲಕ ಚೆಸ್‌ನತ್ತ ಅನುಜ್ ಆಸಕ್ತಿ ಬೆಳೆಸಿಕೊಂಡು.
