ನಗೋಯದಲ್ಲಿ ಏಶ್ಯನ್ ಪ್ಯಾರಾ ಗೇಮ್ಸ್‌ಗೆ ತೆರೆ; 114 ಪದಕಗಳನ್ನು ಗೆದ್ದ ಭಾರತಕ್ಕೆ ನಾಲ್ಕನೇ ಸ್ಥಾನ

ನಗೋಯ, ಅ. 24: ಏಶ್ಯನ್ ಪ್ಯಾರಾ ಗೇಮ್ಸ್‌ನ ಸಮಾರೋಪ ಸಮಾರಂಭವು ಜಪಾನ್‌ನ ನಗೋಯದ ಮಿಝುಹೊ ಪಾರ್ಕ್ ಅತ್ಲೆಟಿಕ್ಸ್ ಸ್ಟೇಡಿಯಂನಲ್ಲಿ ಶನಿವಾರ ನಡೆಯುವುದರೊಂದಿಗೆ ಒಂದು ವಾರ ಕಾಲ ನಡೆದ ಕ್ರೀಡಾಕೂಟ ಮುಕ್ತಾಯಗೊಂಡಿದೆ. ಒಟ್ಟು 114 ಪದಕಗಳನ್ನು ಗೆದ್ದ ಭಾರತವು ಸರ್ವಶ್ರೇಷ್ಠ ಪ್ರದರ್ಶನ ನೀಡಿ ಗಮನ ಸೆಳೆದಿದೆ.

ಅವಳಿ ಸ್ವರ್ಣ ಪದಕ ವಿಜೇತ ನಿಶಾದ್ ಕುಮಾರ್ ಹಾಗೂ ಮೋನಾ ಅಗರ್ವಾಲ್ ಸಮಾರಂಭದಲ್ಲಿ ಭಾರತದ ಧ್ವಜಧಾರಿಗಳಾಗಿ ಭಾಗವಹಿಸಿದರು. ಭಾರತದ ಪ್ಯಾರಾ ಅತ್ಲೀಟ್‌ಗಳು ಐತಿಹಾಸಿಕ ಗೆಲುವು, ವಿಶ್ವ ದಾಖಲೆಗಳ ಪ್ರದರ್ಶನ ಹಾಗೂ ಕ್ಲೀನ್‌ಸ್ವೀಪ್ ಸಾಧಿಸುವ ಮೂಲಕ ಗಮನ ಸೆಳೆದರು.

ಭಾರತ ತಂಡವು 30 ಚಿನ್ನ, 35 ಬೆಳ್ಳಿ ಹಾಗೂ 49 ಕಂಚಿನ ಪದಕಗಳ ಸಹಿತ ಒಟ್ಟು 114 ಪದಕಗಳನ್ನು ಗೆದ್ದು ಪದಕಪಟ್ಟಿಯಲ್ಲಿ ನಾಲ್ಕನೇ ಸ್ಥಾನ ಪಡೆದಿದೆ. ಇದರೊಂದಿಗೆ 2023ರ ಹಾಂಗ್‌ಝೌ ಗೇಮ್ಸ್‌ನಲ್ಲಿ ಅಧಿಕೃತವಾಗಿ ದಾಖಲಿಸಿದ್ದ 108 ಪದಕಗಳ ದಾಖಲೆಯನ್ನು ಮುರಿದಿದೆ.

ಜಪಾನ್‌ ನಲ್ಲಿ ಇದೇ ಮೊದಲ ಬಾರಿ ನಡೆದ ಏಶ್ಯನ್ ಪ್ಯಾರಾ ಗೇಮ್ಸ್‌ ನಲ್ಲಿ 45 ದೇಶಗಳು ಹಾಗೂ ಪ್ರದೇಶಗಳ ಸುಮಾರು 4,000 ಅತ್ಲೀಟ್‌ಗಳು ಮತ್ತು ಸಿಬ್ಬಂದಿ ಭಾಗವಹಿಸಿದ್ದರು. ಸ್ಪರ್ಧಾವಳಿಯಲ್ಲಿ 18 ಕ್ರೀಡೆಗಳು ಇದ್ದವು. ಏಳು ದಿನಗಳ ಸ್ಪರ್ಧೆಯಲ್ಲಿ 20ಕ್ಕೂ ಅಧಿಕ ವಿಶ್ವ ದಾಖಲೆಗಳು ನಿರ್ಮಾಣವಾದವು.

*ಪದಕಪಟ್ಟಿಯಲ್ಲಿ ಭಾರತಕ್ಕೆ ನಾಲ್ಕನೇ, ಚೀನಾಕ್ಕೆ ಅಗ್ರ ಸ್ಥಾನ

ಚೀನಾ 207 ಚಿನ್ನ ಸೇರಿದಂತೆ ಒಟ್ಟು 435 ಪದಕಗಳನ್ನು ಗೆದ್ದು ಪದಕಪಟ್ಟಿಯಲ್ಲಿ ಅಗ್ರ ಸ್ಥಾನ ಪಡೆದಿದೆ. ಆತಿಥೇಯ ಜಪಾನ್ ತಂಡವು 64 ಚಿನ್ನ, 60 ಬೆಳ್ಳಿ ಹಾಗೂ 62 ಕಂಚಿನ ಪದಕಗಳ ಸಹಿತ ಒಟ್ಟು 186 ಪದಕಗಳನ್ನು ಗೆದ್ದು ಎರಡನೇ ಸ್ಥಾನ ಪಡೆದಿದೆ. ಉಜ್ಬೇಕಿಸ್ತಾನ 45 ಚಿನ್ನ ಸೇರಿದಂತೆ ಒಟ್ಟು 145 ಪದಕಗಳನ್ನು ಗೆದ್ದು ಮೂರನೇ ಸ್ಥಾನ ಗಳಿಸಿದೆ.

ನಗೋಯದಲ್ಲಿ ಭಾರತವನ್ನು ಒಟ್ಟು 168 ಪ್ಯಾರಾ ಅತ್ಲೀಟ್‌ಗಳು ಪ್ರತಿನಿಧಿಸಿದ್ದರು. ತಂಡದ ಗಾತ್ರವನ್ನು ಪರಿಗಣಿಸಿದರೆ ನಾಲ್ಕನೇ ಸ್ಥಾನ ಗಳಿಸಿರುವುದು ಮಹತ್ವದ ಸಾಧನೆಯಾಗಿದೆ. ಭಾರತವು ಹಿಂದಿನ 2023ರ ಗೇಮ್ಸ್‌ ನಲ್ಲಿ 309 ಅತ್ಲೀಟ್‌ಗಳನ್ನು ಕಳುಹಿಸಿತ್ತು.

ದಾಖಲೆಯ ಪ್ರದರ್ಶನ ನೀಡಿದ ಭಾರತೀಯ ಪ್ಯಾರಾ ಅತ್ಲೀಟ್‌ಗಳಿಗೆ ರಾಷ್ಟ್ರಪತಿ ದ್ರೌಪದಿ ಮುರ್ಮು ಅಭಿನಂದನೆ ಸಲ್ಲಿಸಿದರು. ಈ ಸಾಧನೆಯು ಅತ್ಲೀಟ್‌ಗಳ ಕಠಿಣ ಪರಿಶ್ರಮ ಮತ್ತು ಸ್ವನಂಬಿಕೆಯನ್ನು ಬಿಂಬಿಸುತ್ತದೆ ಎಂದು ಅವರು ಹೇಳಿದರು.

*ಭಾರತದ ಪದಕ ಬೇಟೆಯಲ್ಲಿ ಪ್ಯಾರಾ ಅತ್ಲೀಟ್‌ ಗಳ ಕೊಡುಗೆ

ಭಾರತದ ಪದಕ ಗಳಿಕೆಯಲ್ಲಿ ಪ್ಯಾರಾ ಅತ್ಲೀಟ್‌ಗಳು ಅತಿದೊಡ್ಡ ಕೊಡುಗೆ ನೀಡಿದ್ದಾರೆ. ಅವರು 22 ಚಿನ್ನ, 19 ಬೆಳ್ಳಿ ಹಾಗೂ 24 ಕಂಚಿನ ಪದಕಗಳ ಸಹಿತ ಒಟ್ಟು 65 ಪದಕಗಳನ್ನು ಗೆದ್ದಿದ್ದಾರೆ. ಪ್ಯಾರಾ ಬ್ಯಾಡ್ಮಿಂಟನ್ ತಂಡವು ಮೂರು ಚಿನ್ನ, ಐದು ಬೆಳ್ಳಿ ಹಾಗೂ ಎಂಟು ಕಂಚಿನ ಪದಕಗಳ ಸಹಿತ ಒಟ್ಟು 16 ಪದಕಗಳನ್ನು ಗೆದ್ದುಕೊಂಡಿದೆ.

ಏಶ್ಯನ್ ಪ್ಯಾರಾ ಗೇಮ್ಸ್‌ನಲ್ಲಿ ಭಾರತವು ಈಜು ಸ್ಪರ್ಧೆಗಳಲ್ಲಿ ಮೂರು ಬೆಳ್ಳಿ ಹಾಗೂ ಎಂಟು ಕಂಚಿನ ಪದಕಗಳ ಸಹಿತ ಒಟ್ಟು 11 ಪದಕಗಳನ್ನು ಗೆದ್ದು ಮಹತ್ವದ ಸಾಧನೆ ಮಾಡಿದೆ. ಹಿಂದಿನ ಆವೃತ್ತಿಯ ಗೇಮ್ಸ್‌ ನಲ್ಲಿ ಭಾರತ ಕೇವಲ ಒಂದು ಕಂಚಿನ ಪದಕವನ್ನು ಗೆದ್ದಿತ್ತು.

ಪ್ಯಾರಾ ಟೇಬಲ್ ಟೆನಿಸ್‌ ನಲ್ಲಿ ಏಳು, ಪ್ಯಾರಾ ಆರ್ಚರಿಯಲ್ಲಿ ಆರು ಹಾಗೂ ಪ್ಯಾರಾ ಶೂಟಿಂಗ್‌ನಲ್ಲಿ ಐದು ಪದಕಗಳು ಲಭಿಸಿವೆ. ಪ್ಯಾರಾ ಜುಡೋ ಹಾಗೂ ಪ್ಯಾರಾ ಪವರ್‌ಲಿಫ್ಟಿಂಗ್‌ನಲ್ಲಿ ತಲಾ ಎರಡು ಪದಕಗಳು ಲಭಿಸಿವೆ.

*2030ರ ಏಶ್ಯನ್ ಪ್ಯಾರಾ ಗೇಮ್ಸ್‌ಗೆ ದೋಹಾ ಆತಿಥ್ಯ

ಗೇಮ್ಸ್‌ನ ಸಮಾರೋಪ ಸಮಾರಂಭದಲ್ಲಿ ಕ್ರೀಡಾಪಟುಗಳು, ಅಧಿಕಾರಿಗಳು ಹಾಗೂ ಗಣ್ಯರು ಭಾಗವಹಿಸಿದ್ದರು. ಏಶ್ಯನ್ ಪ್ಯಾರಾಲಿಂಪಿಕ್ಸ್ ಸಮಿತಿಯ ಅಧ್ಯಕ್ಷ ಮಜೀದ್ ರಶೀದ್ ಅವರು ಕ್ರೀಡಾಕೂಟ ಮುಕ್ತಾಯಗೊಂಡಿದೆ ಎಂದು ಘೋಷಿಸಿದರು.

ಏಶ್ಯನ್ ಪ್ಯಾರಾ ಗೇಮ್ಸ್‌ನ ಮೊದಲ ಆವೃತ್ತಿ 2010ರಲ್ಲಿ ಚೀನಾದ ಗ್ವಾಂಗ್‌ಝೌನಲ್ಲಿ ನಡೆದಿತ್ತು. ಐಚಿ-ನಗೋಯ ಗೇಮ್ಸ್ ಐದನೇ ಆವೃತ್ತಿಯಾಗಿದೆ. 2030ರಲ್ಲಿ ಖತರ್‌ ನ ದೋಹಾ ಆರನೇ ಆವೃತ್ತಿಯ ಏಶ್ಯನ್ ಪ್ಯಾರಾ ಗೇಮ್ಸ್‌ ಗೆ ಆತಿಥ್ಯ ವಹಿಸಲಿದೆ.