ಚೀನಾ ಓಪನ್ : 7ನೇ ಬಾರಿ ಪ್ರಶಸ್ತಿ ಗೆದ್ದು ದಾಖಲೆ ನಿರ್ಮಿಸಿದ ಜೊಕೊವಿಕ್

ಬೀಜಿಂಗ್: ದಾಖಲೆಯ ಏಳನೇ ಬಾರಿ ಚೀನಾ ಓಪನ್ ಪ್ರಶಸ್ತಿ ಜಯಿಸಿದ ನೊವಾಕ್ ಜೊಕೊವಿಕ್ ತನ್ನ ಎಟಿಪಿ ಸಿಂಗಲ್ಸ್ ಪ್ರಶಸ್ತಿಯ ಸಂಖ್ಯೆಯನ್ನು 102ಕ್ಕೆ ಏರಿಸಿದರು. ಈ ಮೂಲಕ ರೋಜರ್ ಫೆಡರರ್ ದಾಖಲೆ ಮುರಿಯುವತ್ತ ಹೆಜ್ಜೆ ಇಟ್ಟರು.

ಮಂಗಳವಾರ ನಡೆದ ಪುರುಷರ ಸಿಂಗಲ್ಸ್ ಫೈನಲ್‌ನಲ್ಲಿ ಆಸ್ಟ್ರೇಲಿಯದ ಅಲೆಕ್ಸ್ ಡಿ ಮಿನೌರ್ ಗಾಯಗೊಂಡು ನಿವೃತ್ತಿಯಾದ ಹಿನ್ನೆಲೆಯಲ್ಲಿ ಆರನೇ ಶ್ರೇಯಾಂಕದ ಜೊಕೊವಿಕ್ ಟ್ರೋಫಿ ಎತ್ತಿ ಹಿಡಿದರು. ತನ್ನ ಎಡ ತೊಡೆಗೆ ಬ್ಯಾಂಡೇಜ್ ಹಾಕಿಕೊಂಡು ಆಡಿದ ಐದನೇ ಶ್ರೇಯಾಂಕದ ಡಿಮಿನೌರ್ ಗಾಯಾಳು ನಿವೃತ್ತಿಯಾದಾಗ ಜೊಕೊವಿಕ್ 7-6(3), 0-1 ಮುನ್ನಡೆಯಲ್ಲಿದ್ದರು.

ಈ ಫಲಿತಾಂಶದ ಮೂಲಕ ಜೊಕೊವಿಕ್ ಚೀನಾ ಓಪನ್‌ನಲ್ಲಿ ಆಡಿರುವ ಎಲ್ಲ 34 ಪಂದ್ಯಗಳನ್ನು ಜಯಿಸಿ ಅಜೇಯ ದಾಖಲೆಯನ್ನು ಕಾಯ್ದುಕೊಂಡರು. ಟೂರ್ನಮೆಂಟ್‌ನಲ್ಲಿ ತನ್ನ ಏಳನೇ ಪ್ರಶಸ್ತಿಯನ್ನು ಜಯಿಸಿದರು. 39ರ ವಯಸ್ಸಿನ ಜೊಕೊವಿಕ್ ಸತತ 21ನೇ ವರ್ಷ ಕನಿಷ್ಠ ಒಂದು ಸಿಂಗಲ್ಸ್ ಪ್ರಶಸ್ತಿ ಗೆಲ್ಲುತ್ತಾ ಬಂದಿದ್ದು, ಇದು ಅವರ ವೃತ್ತಿಜೀವನದ ಅಸಾಮಾನ್ಯ ಸಾಧನೆಯಾಗಿದೆ.

ಜೊಕೊವಿಕ್ ಇದೀಗ 102 ಎಟಿಪಿ ಪ್ರಶಸ್ತಿಗಳನ್ನು ಜಯಿಸಿದ್ದಾರೆ. ಫೆಡರರ್‌ಗಿಂತ(103 ಪ್ರಶಸ್ತಿ)ಒಂದು ಪ್ರಶಸ್ತಿ ಹಿಂದಿದ್ದಾರೆ. ಜಿಮ್ಮಿ ಕೊನರ್ಸ್ ಮುಕ್ತ ಯುಗದ ದಾಖಲೆ(109)ಸರಿಗಟ್ಟಲು ಏಳು ಪ್ರಶಸ್ತಿಗಳನ್ನು ಗೆಲ್ಲಬೇಕಾಗಿದೆ.

ಮೊದಲ ಸೆಟ್‌ನಲ್ಲಿ ಡಿಮಿನೌರ್ ಆಕ್ರಮಣಕಾರಿ ಗ್ರೌಂಡ್‌ಸ್ಟ್ರೋಕ್‌ಗಳ ಮೂಲಕ ಎರಡು ಬ್ರೇಕ್‌ಪಾಯಿಂಟ್ಸ್ ಉಳಿಸಿದರು. ಆಸ್ಟ್ರೇಲಿಯ ಆಟಗಾರ ಟೈ-ಬ್ರೇಕ್‌ನಲ್ಲಿ ಅನಗತ್ಯ ತಪ್ಪೆಸಗಿದ ಕಾರಣ ಸರ್ಬಿಯ ಆಟಗಾರ 7-3 ಅಂತರದಿಂದ ಮೊದಲ ಸೆಟ್ಟನ್ನು ಗೆದ್ದುಕೊಂಡರು.

ಮೊದಲ ಸೆಟ್‌ನ ನಂತರ ಉಭಯ ಆಟಗಾರರು ವೈದ್ಯಕೀಯ ಉಪಚಾರ ಪಡೆದರು. ಡಿ ಮಿನೌರ್‌ಗೆ ಪಂದ್ಯದಲ್ಲಿ ಮುಂದುವರಿಯಲು ಸಾಧ್ಯವಾಗಲಿಲ್ಲ.

‘‘ಎಲ್ಲ ನೆಚ್ಚಿನ ಅಭಿಮಾನಿಗಳಿಗೆ ಕ್ಷಮೆ ಕೋರಲು ಬಯಸುವೆ. ನಾನು ಪಂದ್ಯಕ್ಕೆ ಈ ರೀತಿ ಅಂತ್ಯಹಾಡಲು ಬಯಸಿರಲಿಲ್ಲ. ಮುಂದಿನ ವರ್ಷ ನಿಮ್ಮನ್ನು ನೋಡುವೆ’’ ಎಂದು ಟ್ರೋಫಿ ಸ್ವೀಕಾರ ಸಮಾರಂಭದಲ್ಲಿ ಡಿ ಮಿನೌರ್ ಹೇಳಿದ್ದಾರೆ.

ಜೊಕೊವಿಕ್ ಪ್ರಶಸ್ತಿಯ ಹಾದಿಯಲ್ಲಿ ಟಾಪ್-10 ಎದುರಾಳಿಗಳ ವಿರುದ್ಧ ಸತತ ಮೂರು ಗೆಲುವು ದಾಖಲಿಸಿದರು. ಸೆಮಿ ಫೈನಲ್‌ನಲ್ಲಿ ಡೇನಿಯಲ್ ಮೆಡ್ವೆಡೆವ್‌ರನ್ನು ಮಣಿಸುವ ಮೊದಲು ಕ್ವಾರ್ಟರ್ ಫೈನಲ್‌ನಲ್ಲಿ ಅಲೆಕ್ಸಾಂಡರ್ ಝ್ವೆರೆವ್‌ರನ್ನು ಮಣಿಸಿದರು.

ಹ್ಯೂಬರ್ಟ್ ಹರ್ಕಾಝ್ ಸೆಮಿ ಫೈನಲ್‌ನಲ್ಲಿ ಗಾಯಗೊಂಡು ನಿವೃತ್ತಿಯಾದ ಕಾರಣ ಡಿ ಮಿನೌರ್ ಫೈನಲ್‌ಗೆ ತಲುಪಿದ್ದರು. ಫೆಬ್ರವರಿಯಲ್ಲಿ ರೊಟರ್‌ಡಮ್‌ನಲ್ಲಿ ಪ್ರಶಸ್ತಿಯನ್ನು ಜಯಿಸಿದ್ದ ಡಿಮಿನೌರ್ ಚೀನಾ ಓಪನ್‌ನಲ್ಲಿ ತನ್ನ ಚೊಚ್ಚಲ ಪ್ರಶಸ್ತಿ ಹಾಗೂ ಈ ವರ್ಷ ಎರಡನೇ ಪ್ರಶಸ್ತಿ ಗೆಲ್ಲುವ ವಿಶ್ವಾಸದಲ್ಲಿದ್ದರು.

ಜೊಕೊವಿಕ್ ಈ ವರ್ಷ ಆಸ್ಟ್ರೇಲಿಯನ್ ಓಪನ್‌ನಲ್ಲಿ ಫೈನಲ್‌ಗೆ ತಲುಪಿದ್ದರು. ಆದರೆ ಕಾರ್ಲೊಸ್ ಅಲ್ಕರಾಝ್‌ಗೆ ಸೋತಿದ್ದರು.