ದೀಪಿಕಾಗೆ ಪ್ರತಿಷ್ಠಿತ ಪಾಲಿಗ್ರಾಸ್ ಮ್ಯಾಜಿಕ್ ಸ್ಕಿಲ್ ಪ್ರಶಸ್ತಿ

ಹೊಸದಿಲ್ಲಿ, ಜು. 16: ಭಾರತೀಯ ಮಹಿಳಾ ಹಾಕಿ ತಂಡದ ಫಾರ್ವರ್ಡ್ ಆಟಗಾರ್ತಿ ದೀಪಿಕಾ ಪ್ರತಿಷ್ಠಿತ ಪಾಲಿಗ್ರಾಸ್ ಮ್ಯಾಜಿಕ್ ಸ್ಕಿಲ್ ಪ್ರಶಸ್ತಿ ಗೆದ್ದಿದ್ದಾರೆ. ಕಳೆದ ಋತುವಿನ ಎಫ್‌ಐಎಚ್ ಹಾಕಿ ಪ್ರೊ ಲೀಗ್‌ನಲ್ಲಿ ನೆದರ್‌ ಲ್ಯಾಂಡ್ಸ್ ವಿರುದ್ಧ ಏಕಾಂಗಿಯಾಗಿ ಬಾರಿಸಿದ ಅಮೋಘ ಫೀಲ್ಡ್ ಗೋಲ್‌ಗಾಗಿ ಅವರಿಗೆ ಈ ಪ್ರಶಸ್ತಿ ನೀಡಲಾಗಿದೆ.

21 ವರ್ಷದ ದೀಪಿಕಾ ಭುವನೇಶ್ವರದಲ್ಲಿ ನಡೆದ ವಿಶ್ವದ ನಂಬರ ವನ್ ತಂಡ ನೆದರ್‌ ಲ್ಯಾಂಡ್ಸ್ ವಿರುದ್ಧದ ಪಂದ್ಯದ 35ನೇ ನಿಮಿಷದಲ್ಲಿ ಆ ಅಮೋಘ ಗೋಲನ್ನು ಬಾರಿಸಿದರು. ಪಂದ್ಯವು ನಿಗದಿತ ಅವಧಿಯಲ್ಲಿ 2-2ರಲ್ಲಿ ಡ್ರಾ ಆಯಿತು ಹಾಗೂ ಬಳಿಕ ನಡೆದ ಶೂಟೌಟ್‌ನಲ್ಲಿ ನೆದರ್‌ ಲ್ಯಾಂಡ್ಸ್ ಜಯ ಗಳಿಸಿತು. ಆದರೂ ಅವರ ಆ ಗೋಲು ಎಲ್ಲರ ನೆನಪಿನಲ್ಲಿ ಉಳಿಯಿತು.

ಭಾರತವು 0-2ರಿಂದ ಹಿನ್ನಡೆಯಲ್ಲಿದ್ದಾಗ, ದೀಪಿಕಾ 35ನೇ ನಿಮಿಷದಲ್ಲಿ ಎದುರಾಳಿ ತಂಡದ ರಕ್ಷಣಾ ವ್ಯೆಹವನ್ನು ಭೇದಿಸಿ ಆ ಅಮೋಘ ಗೋಲನ್ನು ಬಾರಿಸಿದರು.

ಎಫ್‌ಐಎಚ್ ಹಾಕಿ ಪ್ರೊ ಲೀಗ್‌ನಲ್ಲಿ ಬಾರಿಸಲಾಗುವ ಅತ್ಯಂತ ಸೃಜನಾತ್ಮಕ ಮತ್ತು ಕೌಶಲಭರಿತ ಗೋಲಿಗಾಗಿ ಪಾಲಿಗ್ರಾಸ್ ಮ್ಯಾಜಿಕ್ ಸ್ಕಿಲ್ ಪ್ರಶಸ್ತಿಯನ್ನು ನೀಡಲಾಗುತ್ತದೆ. ಅದನ್ನು ಜಗತ್ತಿನಾದ್ಯಂತವಿರುವ ಹಾಕಿ ಅಭಿಮಾನಿಗಳು ಮತದಾನದ ಮೂಲಕ ನಿರ್ಧರಿಸುತ್ತಾರೆ.