FIFA 2026 : ಆಸ್ಟ್ರಿಯಾ ವಿರುದ್ದ ಸ್ಪೇನ್ ಗೆ 3-0 ಅಂತರದ ಸುಲಭ ಜಯ

ಲಾಸ್ ಏಂಜಲೀಸ್: ವಿಶ್ವಕಪ್ ನ 32ರ ಹಂತದ ಪಂದ್ಯದಲ್ಲಿ ಸ್ಪೇನ್ ತಂಡವು ಆಸ್ಟ್ರಿಯಾವನ್ನು 3-0 ಗೋಲುಗಳ ಅಂತರದಿಂದ ಸುಲಭವಾಗಿ ಸೋಲಿಸಿ ಮುಂದಿನ ಹಂತಕ್ಕೆ ಪ್ರವೇಶಿಸಿತು. ಈ ಮೂಲಕ ಗುಂಪು ಹಂತದಲ್ಲಿ ನಿರೀಕ್ಷಿತ ಮಟ್ಟದ ಪ್ರದರ್ಶನ ನೀಡಿರದ ಸ್ಪೇನ್ ಗೆ ಈ ಗೆಲುವು ಹೆಚ್ಚಿನ ಬಲ ತಂದುಕೊಟ್ಟಿದೆ.

ಮೊದಲಾರ್ಧದ ಅಂತ್ಯದ ವೇಳೆಗೆ ಮಿಕೇಲ್ ಒಯಾರ್ಝಾಬಲ್ ಗೋಲು ದಾಖಲಿಸಿ ಸ್ಪೇನ್ ಗೆ ಮುನ್ನಡೆ ತಂದುಕೊಟ್ಟರು. ಅದರ ಬಳಿಕ ಆಸ್ಟ್ರಿಯಾಗೆ ಪಂದ್ಯಕ್ಕೆ ಮರಳುವ ಯಾವುದೇ ಅವಕಾಶ ಸಿಗಲಿಲ್ಲ.

ಪೆಡ್ರೊ ಪೊರೊ ಅವರು ಸ್ವಲ್ಪ ಸಮಯದ ಬಳಿಕ ಸಮೀಪದಿಂದ ಹೆಡರ್ ಮೂಲಕ ಗೋಲು ಗಳಿಸಿ ಸ್ಪೇನ್ ನ ಮುನ್ನಡೆಯನ್ನು ದ್ವಿಗುಣಗೊಳಿಸಿದರು. ಇದರಿಂದ ಆಸ್ಟ್ರಿಯಾದ ಪುನರಾಗಮನದ ಎಲ್ಲಾ ಭರವಸೆಗಳು ಕೊನೆಗೊಂಡವು. ನಂತರ ಮಾರ್ಕ್ ಕುಕುರೆಲ್ಲಾ ಅವರ ನಿಖರ ಕ್ರಾಸ್ ಅನ್ನು ಮಿಕೇಲ್ ಒಯಾರ್ಝಾಬಲ್ ಗೋಲಾಗಿ ಪರಿವರ್ತಿಸಿ ಸ್ಪೇನ್ ಗೆ 3-0ರ ಭರ್ಜರಿ ಜಯ ತಂದುಕೊಟ್ಟರು.

ಗುಂಪು ಹಂತದಲ್ಲಿ ಕೇಪ್ ವರ್ಡೆ ವಿರುದ್ಧ ಡ್ರಾ ಮಾಡಿಕೊಂಡಿದ್ದ ಸ್ಪೇನ್ ಟೀಕೆಗೂ ಗುರಿಯಾಗಿತ್ತು. ಆದರೆ ಈ ವಿಶ್ವಕಪ್ ನಲ್ಲಿ ಇದುವರೆಗೆ ಒಂದೇ ಒಂದು ಗೋಲನ್ನೂ ಬಿಟ್ಟುಕೊಟ್ಟಿಲ್ಲ. ಅಲ್ಲದೆ, ಸತತ 34 ಸ್ಪರ್ಧಾತ್ಮಕ ಅಂತರರಾಷ್ಟ್ರೀಯ ಪಂದ್ಯಗಳಲ್ಲಿ ಸೋಲಿಲ್ಲದೆ ಮುನ್ನಡೆಯುತ್ತಿದೆ.