FIFA World Cup 2026 | ಜಪಾನ್‌ ನ ಬಿಗಿ ರಕ್ಷಣಾತ್ಮಕ ಆಟ; ನೆದರ್ಲ್ಯಾಂಡ್ಸ್ ವಿರುದ್ಧದ ಪಂದ್ಯ ಡ್ರಾ

ಆರ್ಲಿಂಗ್ಟನ್ (ಟೆಕ್ಸಾಸ್), ಜೂ.15: ಫಿಫಾ ವಿಶ್ವಕಪ್‌ನ ‘ಗ್ರೂಪ್ F’ ಪಂದ್ಯದಲ್ಲಿ ಜಪಾನ್ ತಂಡವು ನೆದರ್ಲ್ಯಾಂಡ್ಸ್ ವಿರುದ್ಧ ಬಿಗಿ ರಕ್ಷಣಾತ್ಮಕ ಆಟದ ಮೂಲಕ ಗಮನ ಸೆಳೆಯಿತು. ಎರಡು ಬಾರಿ ಹಿನ್ನಡೆಯಲ್ಲಿದ್ದರೂ ಅದ್ಭುತ ಮರುಹೋರಾಟ ನಡೆಸಿದ ಜಪಾನ್ 2–2 ಗೋಲುಗಳ ಡ್ರಾ ಸಾಧಿಸಿ ಅಮೂಲ್ಯ ಅಂಕ ಗಳಿಸಿತು.

ಜಪಾನ್‌ ನ ಸಂಘಟಿತ ರಕ್ಷಣಾ ತಂತ್ರದಿಂದಾಗಿ ಮೊದಲಾರ್ಧದಲ್ಲಿ ಗೋಲು ಗಳಿಸಲು ಸಾಧ್ಯವಾಗದೆ ನೆದರ್ಲ್ಯಾಂಡ್ಸ್ ಪರದಾಡಿತು. ಆದರೆ 51ನೇ ನಿಮಿಷದಲ್ಲಿ ರಿಯಾನ್ ಗ್ರಾವೆನ್‌ಬರ್ಚ್ ನೀಡಿದ ಅದ್ಭುತ ಕ್ರಾಸ್ ಅನ್ನು ನಾಯಕ ವರ್ಜಿಲ್ ವ್ಯಾನ್ ಡೈಕ್ ಹೆಡರ್ ಮೂಲಕ ಗೋಲಾಗಿ ಪರಿವರ್ತಿಸಿ ತಂಡಕ್ಕೆ ಮುನ್ನಡೆ ತಂದುಕೊಟ್ಟರು.

ಆದರೆ ಜಪಾನ್ ಶೀಘ್ರವೇ ತಿರುಗೇಟು ನೀಡಿತು. ಗೋಲು ಬಿದ್ದ ಆರು ನಿಮಿಷಗಳಲ್ಲೇ ಕೈಟೊ ನಕಮುರಾ ಸಮಬಲ ಸಾಧಿಸಿದರು. ಪೆನಾಲ್ಟಿ ಬಾಕ್ಸ್‌ ನ ಹೊರಗಿನಿಂದ ಅವರು ಬಾರಿಸಿದ ತೀವ್ರಗತಿಯ ಲೋ–ಶಾಟ್ ನೇರವಾಗಿ ಗುರಿ ಸೇರಿತು.

64ನೇ ನಿಮಿಷದಲ್ಲಿ ಕ್ರೈಸೆನ್ಸಿಯೊ ಸಮ್ಮರ್ವಿಲ್ಲೆ ಅವರ ಅದ್ಭುತ ಸ್ಟ್ರೈಕ್ ನೆದರ್ಲ್ಯಾಂಡ್ಸ್‌ಗೆ ಮತ್ತೊಮ್ಮೆ ಮುನ್ನಡೆ ತಂದುಕೊಟ್ಟಿತು. ಇದರಿಂದ ನೆದರ್ಲ್ಯಾಂಡ್ಸ್ ಗೆಲುವಿನತ್ತ ಹೆಜ್ಜೆಯಿಟ್ಟಂತಾಯಿತು.

ಆದರೆ ಜಪಾನ್ ಮತ್ತೆ ಪ್ರಬಲ ಮರುಹೋರಾಟ ನಡೆಸಿತು. ಪಂದ್ಯ ಮುಗಿಯಲು ಎರಡು ನಿಮಿಷಗಳು ಬಾಕಿ ಇರುವಾಗ ಕಾರ್ನರ್ ಕಿಕ್‌ ನಿಂದ ಬಂದ ಚೆಂಡಿಗೆ ಕೋಕಿ ಒಗಾವಾ ಅವರು ಹೆಡರ್ ಮಾಡಿದರು. ಗೋಲ್‌ಪೋಸ್ಟ್‌ ಕಡೆಗೆ ಸಾಗಿದ ಚೆಂಡು ದೈಚಿ ಕಮಾಡ ಅವರಿಗೆ ತಾಗಿ ಗೋಲಾಗಿ ಪರಿವರ್ತನೆಯಾಗಿದ್ದು, ಜಪಾನ್‌ಗೆ ಸಮಬಲ ತಂದುಕೊಟ್ಟಿತು.

‘ಗ್ರೂಪ್ F’ನ ಮತ್ತೊಂದು ಪಂದ್ಯದಲ್ಲಿ ರವಿವಾರ ಮಾಂಟೆರಿಯಲ್ಲಿ ಸ್ವೀಡನ್ ಮತ್ತು ಟುನೀಶಿಯಾ ತಂಡಗಳು ಮುಖಾಮುಖಿಯಾಗಲಿವೆ. ಜೂನ್ 20ರಂದು ನಡೆಯಲಿರುವ ಮುಂದಿನ ಪಂದ್ಯಗಳಲ್ಲಿ ನೆದರ್ಲ್ಯಾಂಡ್ಸ್ ತಂಡವು ಹ್ಯೂಸ್ಟನ್‌ನಲ್ಲಿ ಸ್ವೀಡನ್ ವಿರುದ್ಧ ಆಡಲಿದ್ದು, ಜಪಾನ್ ತಂಡವು ಮಾಂಟೆರಿಯಲ್ಲಿ ಟುನೀಶಿಯಾವನ್ನು ಎದುರಿಸಲಿದೆ.