FIFA World Cup | ಫೋಲಾರಿನ್ ಬಾಲೊಗನ್ ಅವಳಿ ಗೋಲು : ಪರಾಗ್ವೆ ತಂಡದ ವಿರುದ್ಧ ಅಮೆರಿಕಕ್ಕೆ ಭರ್ಜರಿ ಜಯ

ಲಾಸ್ ಏಂಜಲೀಸ್, ಜೂ.13: ಸ್ಟ್ರೈಕರ್ ಫೋಲಾರಿನ್ ಬಾಲೊಗನ್ ಗಳಿಸಿದ ಅವಳಿ ಗೋಲುಗಳ ನೆರವಿನಿಂದ ಆತಿಥೇಯ ಅಮೆರಿಕ ಫುಟ್ಬಾಲ್ ತಂಡವು ಫಿಫಾ ವಿಶ್ವಕಪ್ ಟೂರ್ನಿಯಲ್ಲಿ ಶನಿವಾರ ನಡೆದ ‘ಡಿ’ ಗುಂಪಿನ ತನ್ನ ಮೊದಲ ಪಂದ್ಯದಲ್ಲಿ ಪರಾಗ್ವೆ ತಂಡವನ್ನು 4-1 ಅಂತರದಿಂದ ಮಣಿಸಿ ಶುಭಾರಂಭ ಮಾಡಿದೆ.

ಸೋಫಿ ಸ್ಟೇಡಿಯಂನಲ್ಲಿ ಶುಕ್ರವಾರ ಕಿಕ್ಕಿರಿದು ನೆರೆದಿದ್ದ ತವರು ಪ್ರೇಕ್ಷಕರ ಸಮ್ಮುಖದಲ್ಲಿ ಅಮೆರಿಕ ಏಳನೇ ನಿಮಿಷದಲ್ಲಿ 1-0 ಮುನ್ನಡೆ ಸಾಧಿಸಿತು. ಪರಾಗ್ವೆ ತಂಡದ ಮಿಡ್ ಫೀಲ್ಡರ್ ಡ್ಯಾಮಿಯನ್ ಬೊಬಾಡಿಲ್ಲಾ ಅವರು ಅಜಾಗರೂಕತೆಯಿಂದ ಚೆಂಡನ್ನು ತನ್ನದೇ ತಂಡದ ಗೋಲು ಪೆಟ್ಟಿಗೆಯೊಳಗೆ ಒದ್ದರು. ಆಗ ಅಮೆರಿಕ ತಂಡ ಆರಂಭಿಕ ಮುನ್ನಡೆ ಪಡೆಯಿತು.

ಈ ಆರಂಭಿಕ ಗೋಲು ಅಮೆರಿಕ ತಂಡಕ್ಕೆ ದಕ್ಷಿಣ ಅಮೆರಿಕದ ಎದುರಾಳಿ ಪರಾಗ್ವೆಗೆ ನಿರಂತರ ಒತ್ತಡ ಹೇರಲು ನೆರವಾಯಿತು. ಅಮೆರಿಕದ ದಾಳಿಯ ಭೀತಿಯನ್ನು ಎದುರಿಸುವಲ್ಲಿ ಪರಾಗ್ವೆ ತಂಡ ವಿಫಲವಾಯಿತು. ಮೊದಲಾರ್ಧಕ್ಕೂ ಮೊದಲೇ ಬಾಲೊಗನ್‌ಗೆ ಎರಡು ಗೋಲು ಬಿಟ್ಟುಕೊಟ್ಟಿತು.

ಬಾಲೊಗನ್ 31ನೇ ನಿಮಿಷದಲ್ಲಿ ಗೋಲು ಗಳಿಸಿ ಅಮೆರಿಕದ ಮುನ್ನಡೆಯನ್ನು ದ್ವಿಗುಣಗೊಳಿಸಿದರು. ಮೊದಲಾರ್ಧಕ್ಕೂ ಮೊದಲೇ 45ನೇ ನಿಮಿಷದಲ್ಲಿ ಮತ್ತೊಂದು ಗೋಲು ಗಳಿಸಿದರು. ಬಾಲೊಗನ್ ಅವರ ಎರಡು ಗೋಲಿನ ನೆರವಿನಿಂದ ಅಮೆರಿಕ ತಂಡವು ಮೊದಲಾರ್ಧದ ಅಂತ್ಯಕ್ಕೆ 3-0 ಮುನ್ನಡೆ ಪಡೆಯಿತು. ಬಾಲೊಗನ್ ಈ ಗೋಲಿನ ಮೂಲಕ ಅಮೆರಿಕದ ಫುಟ್ಬಾಲ್ ಇತಿಹಾಸದ ಪುಟದಲ್ಲಿ ಸ್ಥಾನ ಪಡೆದರು. 1930ರ ನಂತರ ಒಂದೇ ವಿಶ್ವಕಪ್ ಪಂದ್ಯದಲ್ಲಿ ಒಂದಕ್ಕಿಂತ ಹೆಚ್ಚು ಗೋಲು ಗಳಿಸಿದ ಅಮೆರಿಕದ ಎರಡನೇ ಆಟಗಾರನೆಂಬ ಹಿರಿಮೆಗೆ ಪಾತ್ರರಾದರು.

ಪರಾಗ್ವೆ ತಂಡದ ಬದಲಿ ಆಟಗಾರ ಮೌರಿಸಿಯೊ 74ನೇ ನಿಮಿಷದಲ್ಲಿ ಗೋಲು ಗಳಿಸಿ ಅಮೆರಿಕದ ಮುನ್ನಡೆಗೆ ಸ್ವಲ್ಪ ಕಡಿವಾಣ ಹಾಕಿದರು. ಆದರೆ ಪರಾಗ್ವೆ ತಂಡ ಪುಟಿದೇಳಲು ಇದು ಸಾಕಾಗಲಿಲ್ಲ.

ಜಿಯೋವಾನಿ ರೇನಾ 98ನೇ ನಿಮಿಷದಲ್ಲಿ ಗೋಲು ಗಳಿಸಿ ಅಮೆರಿಕಕ್ಕೆ 4-1 ಮುನ್ನಡೆ ಒದಗಿಸಿಕೊಟ್ಟರು. ಈ ಗೆಲುವಿನ ಮೂಲಕ ಅಮೆರಿಕ ತಂಡವು ಮೂರಂಕವನ್ನು ಖಚಿತಪಡಿಸಿತು. ‘ಡಿ’ ಗುಂಪಿನಲ್ಲಿ ಅಗ್ರ ಸ್ಥಾನ ಪಡೆಯಿತು.

ಪ್ರಸಕ್ತ ಪಂದ್ಯದಲ್ಲಿ ಅಮೆರಿಕ ತಂಡವು ಆಕ್ರಮಣಕಾರಿ ಆಟಕ್ಕೆ ಒತ್ತು ನೀಡಿತು. 2022ರಲ್ಲಿ ಖತರ್‌ನಲ್ಲಿ ನಡೆದಿದ್ದ ವಿಶ್ವಕಪ್‌ನ ನಾಲ್ಕು ಪಂದ್ಯಗಳಲ್ಲಿ ಅಮೆರಿಕ ತಂಡವು ಕೇವಲ ಮೂರು ಗೋಲು ಗಳಿಸಲಷ್ಟೇ ಶಕ್ತವಾಯಿತು. ಪರಾಗ್ವೆ ವಿರುದ್ಧ ಒಂದೇ ಪಂದ್ಯದಲ್ಲಿ ನಾಲ್ಕು ಗೋಲು ಗಳಿಸಿ ತನ್ನ ಹಿಂದಿನ ದಾಖಲೆಯನ್ನು ಮುರಿಯಿತು.

ವಿಶ್ವಕಪ್ ಇತಿಹಾಸದಲ್ಲಿ ಮೂರನೇ ವೇಗದ ಗೋಲು ಗಳಿಸಿದ ಅಮೆರಿಕ

ಪರಾಗ್ವೆ ತಂಡದ ವಿರುದ್ಧ ಫಿಫಾ ವಿಶ್ವಕಪ್ ಟೂರ್ನಿಯ ತನ್ನ ಆರಂಭಿಕ ಪಂದ್ಯದಲ್ಲಿ 4-1 ಗೋಲುಗಳಿಂದ ಜಯ ಸಾಧಿಸಿದ ಅಮೆರಿಕ ತಂಡ ಉತ್ತಮ ಆರಂಭ ಪಡೆದಿದೆ. ವಿಶ್ವಕಪ್‌ನ ತನ್ನ ಮೊದಲ ಪಂದ್ಯದಲ್ಲಿ ಮೂರನೇ ಅತಿ ವೇಗದಲ್ಲಿ ಗೋಲು ಗಳಿಸಿದ ಆತಿಥೇಯ ತಂಡವೆಂಬ ಕೀರ್ತಿಗೆ ಭಾಜನವಾಗಿದೆ.

ಆತಿಥೇಯ ದೇಶವಾಗಿ 1938ರಲ್ಲಿ ಫ್ರಾನ್ಸ್ ಹಾಗೂ 2006ರಲ್ಲಿ ಜರ್ಮನಿ ತಂಡ ವಿಶ್ವಕಪ್‌ನ ಆರಂಭಿಕ ಪಂದ್ಯದಲ್ಲಿ ವೇಗವಾಗಿ ಗೋಲು ಗಳಿಸಿದ್ದವು.

ಸೋಫಿ ಸ್ಟೇಡಿಯಂನಲ್ಲಿ ಶುಕ್ರವಾರ ನಡೆದ ಪಂದ್ಯದಲ್ಲಿ ಅಮೆರಿಕ ತಂಡವು 70,492 ಪ್ರೇಕ್ಷಕರ ಸಮ್ಮುಖದಲ್ಲಿ ಏಳನೇ ನಿಮಿಷದಲ್ಲಿ 1-0 ಮುನ್ನಡೆ ಪಡೆಯಿತು. ವೆಸ್ಟನ್ ಮೆಕನ್ನಿ ಅಪಾಯಕಾರಿ ಚೆಂಡನ್ನು ಪೆನಾಲ್ಟಿ ಏರಿಯಾಕ್ಕೆ ತಲುಪಿಸಿ ಪರಾಗ್ವೆ ಡಿಫೆಂಡರ್ ಡ್ಯಾಮಿಯನ್ ಬೊಬಾಡಿಲ್ಲಾ ತಪ್ಪೆಸಗುವಂತೆ ಮಾಡಿದರು. ಒತ್ತಡಕ್ಕೆ ಸಿಲುಕಿದ ಬೊಬಾಡಿಲ್ಲಾ ತನ್ನದೇ ತಂಡದ ಗೋಲು ಪೆಟ್ಟಿಗೆಗೆ ಚೆಂಡನ್ನು ತಲುಪಿಸಿ ಅಮೆರಿಕಕ್ಕೆ ಮುನ್ನಡೆ ಒದಗಿಸಿಕೊಟ್ಟರು.

ಇದೊಂದು ಸ್ವಯಂ ಗೋಲು ಆಗಿದ್ದು, ಅಮೆರಿಕ ಆಟಗಾರನು ಗೋಲು ಗಳಿಸದೆ ಇದ್ದರೂ ಇದನ್ನು ಐತಿಹಾಸಿಕ ದಾಖಲೆಯಾಗಿ ಪರಿಗಣಿಸಲಾಗುತ್ತದೆ. ಈ ಗೋಲು ಅಮೆರಿಕಕ್ಕೆ ಆರಂಭಿಕ ಮೇಲುಗೈ ಒದಗಿಸಿಕೊಟ್ಟಿದೆ.

ಏಳನೇ ನಿಮಿಷದಲ್ಲಿ ಮುನ್ನಡೆ ಪಡೆದ ಅಮೆರಿಕ ತಂಡವು ವಿಶ್ವಕಪ್‌ನ ಅಪರೂಪದ ದಾಖಲೆಗೆ ಪಾತ್ರವಾಯಿತು.

ವಿಶ್ವಕಪ್‌ನ ತನ್ನ ಮೊದಲ ಪಂದ್ಯದಲ್ಲಿ ಕೇವಲ ಎರಡು ಆತಿಥೇಯ ದೇಶಗಳು ಮಾತ್ರ ವೇಗದ ಗೋಲು ಗಳಿಸಿವೆ.

1938ರಲ್ಲಿ ಬೆಲ್ಜಿಯಂ ತಂಡದ ವಿರುದ್ಧ ಫ್ರಾನ್ಸ್ ತಂಡವು 1ನೇ ನಿಮಿಷದಲ್ಲಿ ಗೋಲು ಗಳಿಸಿತ್ತು. 2006ರಲ್ಲಿ ಕೋಸ್ಟಾರಿಕಾ ತಂಡದ ವಿರುದ್ಧ ಜರ್ಮನಿ ತಂಡವು ಆರನೇ ನಿಮಿಷದಲ್ಲಿ ಗೋಲು ದಾಖಲಿಸಿತ್ತು. ಈ ವರ್ಷದ ವಿಶ್ವಕಪ್‌ನ ಉದ್ಘಾಟನಾ ಪಂದ್ಯದಲ್ಲಿ ದಕ್ಷಿಣ ಆಫ್ರಿಕಾದ ವಿರುದ್ಧ ಮೆಕ್ಸಿಕೊ ತಂಡದ ಜೂಲಿಯನ್ ಕ್ವಿನೋನ್ಸ್ 9ನೇ ನಿಮಿಷದಲ್ಲಿ ಗೋಲು ಗಳಿಸಿದ್ದರು.

1938ರ ವಿಶ್ವಕಪ್‌ನಲ್ಲಿ ಬೆಲ್ಜಿಯಂ ವಿರುದ್ಧ ಫ್ರಾನ್ಸ್ ತಂಡ ಮೊದಲ ನಿಮಿಷದಲ್ಲಿ ಗಳಿಸಿರುವ ಗೋಲು ಆತಿಥೇಯ ದೇಶ ತನ್ನ ಆರಂಭಿಕ ಪಂದ್ಯವೊಂದರಲ್ಲಿ ಗಳಿಸಿರುವ ವೇಗದ ಗೋಲಾಗಿ ಉಳಿದುಕೊಂಡಿದೆ.

2006ರಲ್ಲಿ ಜರ್ಮನಿ ತಂಡವು ಕೋಸ್ಟಾರಿಕೊ ವಿರುದ್ಧದ ತನ್ನ ಆರಂಭಿಕ ವಿಶ್ವಕಪ್ ಪಂದ್ಯದಲ್ಲಿ ಫಿಲಿಪ್ ಲಾಮ್ ಆರನೇ ನಿಮಿಷದಲ್ಲಿ ಗಳಿಸಿದ ಗೋಲಿನ ನೆರವಿನಿಂದ 1-0 ಮುನ್ನಡೆ ಪಡೆದಿತ್ತು. ಎರಡು ದಶಕಗಳಿಂದ ಈ ದಾಖಲೆ ಭದ್ರವಾಗಿ ಉಳಿದಿದೆ.

ಅಮೆರಿಕ ತಂಡ ಜರ್ಮನಿ ತಂಡದ ದಾಖಲೆಯನ್ನು ಮುರಿದಿಲ್ಲ, ಆದರೆ ಜರ್ಮನಿಯ ನಂತರ ಆರಂಭಿಕ ಪಂದ್ಯದಲ್ಲಿ ವೇಗದ ಗೋಲು ಗಳಿಸಿದ ಎರಡನೇ ಆತಿಥೇಯ ದೇಶವಾಗಿದೆ.

ದಕ್ಷಿಣ ಆಫ್ರಿಕಾದ ವಿರುದ್ಧ ಗುರುವಾರ ನಡೆದ ವಿಶ್ವಕಪ್‌ನ ಮೊತ್ತ ಮೊದಲ ಪಂದ್ಯದಲ್ಲಿ ಮೆಕ್ಸಿಕೊದ ಜೂಲಿಯನ್ ಕ್ವಿನೋನ್ಸ್ ಅವರು 9ನೇ ನಿಮಿಷದಲ್ಲಿ ಗೋಲು ಖಾತೆ ತೆರೆದಿದ್ದರು.

ತನ್ನ ಆರಂಭಿಕ ವಿಶ್ವಕಪ್ ಪಂದ್ಯಗಳಲ್ಲಿ ಆತಿಥೇಯ ದೇಶಗಳು ವೇಗವಾಗಿ ಗಳಿಸಿದ ಗೋಲುಗಳ ಸಾರ್ವಕಾಲಿಕ ಪಟ್ಟಿಯಲ್ಲಿ ಮೆಕ್ಸಿಕೊ ತಂಡದ ಗೋಲು ನಾಲ್ಕನೇ ಸ್ಥಾನದಲ್ಲಿದೆ.

ಅಮೆರಿಕ-ಪರಾಗ್ವೆ ಪಂದ್ಯದಲ್ಲಿ ಮೊದಲ ತಪ್ಪು ಗುರುತಿಸಿದ ವಿಎಆರ್ ರೆಫರಲ್ ಸಿಸ್ಟಮ್

ಪರಾಗ್ವೆ ತಂಡದ ವಿರುದ್ಧ ಸೋಫಿ ಕ್ರೀಡಾಂಗಣದಲ್ಲಿ 4-1 ಅಂತರದಿಂದ ಜಯಶಾಲಿಯಾಗಿರುವ ಅಮೆರಿಕ ತಂಡವು ತನ್ನ ಅಭಿಯಾನ ಆರಂಭಿಸಿದೆ. ಆದರೆ,ಈ ಪಂದ್ಯವು ವಿಎಆರ್ ಮೂಲಕ ಎಲ್ಲರ ನೆನಪಿನಲ್ಲಿ ಉಳಿಯುವಂತಾಗಿದೆ.

ಪಂದ್ಯದ ದ್ವಿತೀಯಾರ್ಧದಲ್ಲಿ ಡಚ್ ರೆಫರಿ ಡ್ಯಾನಿ ಮಕ್ಕೆಲಿ ಅವರು ಪರಾಗ್ವೆ ತಂಡದ ನಾಯಕ ಮಿಗುಯೆಲ್ ಅಲ್ಮಿರಾನ್ ಅವರನ್ನು ಫೌಲ್ ಮಾಡಿದ್ದಾರೆಂಬ ಕಾರಣಕ್ಕೆ ಅಮೆರಿಕದ ಹಿರಿಯ ಡಿಫೆಂಡರ್ ಟಿಮ್ ರೀಮ್‌ಗೆ ಹಳದಿ ಕಾರ್ಡ್ ನೀಡಿದರು. ಫ್ರೀ ಕಿಕ್ ತೆಗೆದುಕೊಂಡ ನಂತರವೂ ವಿಎಆರ್ ಸಿಸ್ಟಮ್ ಅನ್ನು ಅಳವಡಿಸಿದಾಗ ಕ್ರೀಡಾಂಗಣದಲ್ಲಿ ಗೊಂದಲ ಏರ್ಪಟ್ಟಿತು.

ರೆಫರಿ ಮೆಕ್ಕೆಲಿ ಅವರು ಪಿಚ್ ಬದಿಯ ಮಾನಿಟರ್‌ನಲ್ಲಿ ದೃಶ್ಯಗಳನ್ನು ಪರಿಶೀಲಿಸಿದರು. ರಿಪ್ಲೇಯನ್ನು ಪರಿಶೀಲಿಸಿದ ನಂತರ ರೆಫರಿ ತಮ್ಮ ಆರಂಭಿಕ ತೀರ್ಪನ್ನು ರದ್ದುಗೊಳಿಸಿದರು. ರೀಮ್‌ಗೆ ನೀಡಿದ್ದ ಹಳದಿ ಕಾರ್ಡನ್ನು ಹಿಂಪಡೆದರು.

ವಿಎಆರ್ ಸಿಸ್ಟಮ್‌ನ ಮೂಲಕ ರೆಫರಿ ತೀರ್ಪು ಸರಿಪಡಿಸಿರುವ ನಿರ್ಧಾರವು ಫಿಫಾ ವಿಶ್ವಕಪ್ ಇತಿಹಾಸದಲ್ಲಿ ಇದೇ ಮೊದಲು. ಪಂದ್ಯಾವಳಿಯ ಪರಿಷ್ಕೃತ ಪರಿಶೀಲನಾ ನಿಯಮಗಳ ಅಡಿಯಲ್ಲಿ ತಪ್ಪನ್ನು ಸರಿಪಡಿಸಲು ವಿಎಆರ್ ಅನ್ನು ಬಳಸಲಾಗಿದೆ.

ಫಿಫಾದ ರೆಫರಿಂಗ್ ಮುಖ್ಯಸ್ಥ ಕೊಲಿನಾ ಅವರು ಈ ಹಿಂದೆ ವಿಎಆರ್‌ನ ವಿಸ್ತೃತ ಬಳಕೆಗೆ ಅನುಮತಿ ನೀಡಿದ್ದರು.

ಕೆನಡಾ, ಬೋಸ್ನಿಯಾ-ಹೆರ್ಜೆಗೋವಿನಾ ಪಂದ್ಯ ಡ್ರಾ

ಬದಲಿ ಆಟಗಾರ ಸಿಲ್ ಲಾರಿನ್ 78ನೇ ನಿಮಿಷದಲ್ಲಿ ಗಳಿಸಿದ ಗೋಲಿನ ನೆರವಿನಿಂದ ಮರಳಿ ಹೋರಾಟ ನೀಡಿದ ಸಹ ಆತಿಥ್ಯ ದೇಶ ಕೆನಡಾ ತಾನಾಡಿದ ಮೂರನೇ ವಿಶ್ವಕಪ್ ಪಂದ್ಯದಲ್ಲಿ ಮೊದಲ ಅಂಕ ಸಂಪಾದಿಸಿ ಇತಿಹಾಸ ನಿರ್ಮಿಸಿತು. ತವರು ಮೈದಾನದಲ್ಲಿ ಮೊದಲ ಬಾರಿ ಈ ಸಾಧನೆ ತೋರಿದೆ.

ಶುಕ್ರವಾರ ಬೋಸ್ನಿಯಾ-ಹೆರ್ಜೆಗೋವಿನಾ ನಡುವಿನ ‘ಬಿ’ ಗುಂಪಿನ ಪಂದ್ಯದ ವೇಳೆ ಕೆನಡಾ ಈ ಸಾಧನೆ ಮಾಡಿದೆ.ಈ ಪಂದ್ಯವು 1-1ರಿಂದ ಡ್ರಾನಲ್ಲಿ ಕೊನೆಗೊಂಡಿದೆ.

21ನೇ ನಿಮಿಷದಲ್ಲಿ ಗೋಲು ಗಳಿಸಿದ ಜೊವೊ ಲುಕಿಕ್ ಅವರು ಬೋಸ್ನಿಯಾಕ್ಕೆ 1-0 ಮುನ್ನಡೆ ಒದಗಿಸಿಕೊಟ್ಟರು.

ಪ್ರೇಕ್ಷಕರ ಭಾರೀ ಬೆಂಬಲದೊಂದಿಗೆ ಪ್ರತಿಷ್ಠಿತ ಸಿಎನ್‌ಟವರ್‌ನ ಬಿಎಂಒ ಸ್ಟೇಡಿಯಂನಲ್ಲಿ ಆಡಿದ ಕೆನಡಾ ತಂಡದ ಪರವಾಗಿ ಲಾರಿನ್ ಅವರು ಪ್ರೊಮಿಸ್ ಡೇವಿಡ್ ನೀಡಿದ್ದ ಪಾಸ್ ನೆರವಿನಿಂದ 78ನೇ ನಿಮಿಷದಲ್ಲಿ ಗೋಲು ಗಳಿಸಿ ಸ್ಕೋರನ್ನು ಸಮಬಲಗೊಳಿಸಿದರು.

ಕೆನಡಾ ತಂಡವು ವಿಶ್ವಕಪ್‌ನಲ್ಲಿ ಗಳಿಸಿದ ಎರಡನೇ ಗೋಲು ಇದಾಗಿದೆ. ಮೆಕ್ಸಿಕೊದಲ್ಲಿ 1986ರಲ್ಲಿ ನಡೆದಿದ್ದ ವಿಶ್ವಕಪ್‌ನಲ್ಲಿ ತನ್ನ ಎಲ್ಲ ಮೂರು ಪಂದ್ಯಗಳನ್ನು ಸೋತಿದ್ದ ಕೆನಡಾ ತಂಡವು ಖತರ್‌ನಲ್ಲಿ ನಾಲ್ಕು ವರ್ಷಗಳ ಹಿಂದೆ ಇದೇ ರೀತಿಯ ಪ್ರದರ್ಶನ ಪುನರಾವರ್ತಿಸಿತ್ತು.

ಕೆನಡಾ ತಂಡವು ತನ್ನ ಕೊನೆಯ ಎರಡು ಗ್ರೂಪ್ ಪಂದ್ಯಗಳನ್ನು ಜೂನ್ 18ರಂದು ಖತರ್ ವಿರುದ್ಧ ಹಾಗೂ ಜೂನ್ 24ರಂದು ಸ್ವಿಟ್ಸರ್‌ಲ್ಯಾಂಡ್ ವಿರುದ್ಧ ವ್ಯಾಂಕೋವರ್‌ನಲ್ಲಿ ಆಡಲಿದೆ.

ಪಂದ್ಯದ ಹೆಚ್ಚಿನ ಅವಧಿಯಲ್ಲಿ ಮುನ್ನಡೆ ಸಾಧಿಸಿದ್ದರೂ ಈ ಸೋಲಿನಿಂದಾಗಿ ಬೋಸ್ನಿಯಾ ನಿರಾಶೆ ಅನುಭವಿಸಿತು.