France ತಂಡದ ವಿಶ್ವಕಪ್ ಕನಸು ಭಗ್ನ: ಎಂಬಾಪೆ ವಿಷಾದ

ಡಲ್ಲಾಸ್, ಜು. 15: ಫ್ರಾನ್ಸ್ ತಂಡದ ವಿಶ್ವಕಪ್ ಕನಸು ಭಗ್ನವಾಗಿರುವುದಕ್ಕೆ ನಾಯಕ ಕೈಲಿಯನ್ ಎಂಬಾಪೆ ವಿಷಾದ ವ್ಯಕ್ತಪಡಿಸಿದ್ದಾರೆ. ಸ್ಪೇನ್ ವಿರುದ್ಧ ತಮ್ಮ ತಂಡದ 0-2 ಅಂತರದ ಸೋಲಿಗೆ ತಾಂತ್ರಿಕ ತಪ್ಪುಗಳೇ ಕಾರಣ ಎಂದು ದೂರಿದ್ದಾರೆ.

ಫ್ರಾನ್ಸ್ ತಂಡವು ಸೆಮಿಫೈನಲ್‌ ತನಕ ತಲುಪುವಲ್ಲಿ ನೆರವಾಗಿದ್ದ ಎಂಬಾಪೆ ಪ್ರಸಕ್ತ ಟೂರ್ನಿಯ ಓರ್ವ ಸ್ಟಾರ್ ಆಟಗಾರನಾಗಿ ಹೊರಹೊಮ್ಮಿದ್ದರು. ಒಟ್ಟು ಎಂಟು ಗೋಲುಗಳನ್ನು ದಾಖಲಿಸಿ ವಿಶ್ವದಾದ್ಯಂತದ ಅಭಿಮಾನಿಗಳನ್ನು ರಂಜಿಸಿದ್ದರು.

ಆದರೆ 27 ವರ್ಷದ ಎಂಬಾಪೆಗೆ ಸತತ ಮೂರನೇ ಬಾರಿ ವಿಶ್ವಕಪ್ ಫೈನಲ್ ತಲುಪಬೇಕೆಂಬ ಕನಸು ಈಡೇರಲಿಲ್ಲ. ಎಂಬಾಪೆ ಅವರ ಕನಸನ್ನು ಸ್ಪೇನ್ ತಂಡ ಭಗ್ನಗೊಳಿಸಿತು.

ಈ ಸೋಲು ಫ್ರಾನ್ಸ್ ತಂಡಕ್ಕೆ ಭಾರಿ ನಿರಾಶೆ ಉಂಟು ಮಾಡಿದೆ ಎಂದಿರುವ ಎಂಬಾಪೆ, ‘‘ತಾಂತ್ರಿಕವಾಗಿ ಅಥವಾ ನಮ್ಮ ಒಟ್ಟಾರೆ ಪ್ರದರ್ಶನದ ಮಟ್ಟವು ನಾವು ಬಯಸಿದಂತೆ ಇರಲಿಲ್ಲ. ವಿಶ್ವಕಪ್ ಸೆಮಿಫೈನಲ್‌ ನಲ್ಲಿ ಮಾಡಬೇಕಾಗಿದ್ದನ್ನು ಮಾಡದಿದ್ದರೆ ಗೆಲುವು ಅಸಾಧ್ಯ’’ ಎಂದು ರಿಯಲ್ ಮ್ಯಾಡ್ರಿಡ್ ಕ್ಲಬ್‌ನ ಸ್ಟಾರ್ ಆಟಗಾರ ಹೇಳಿದ್ದಾರೆ.

‘‘ನಮ್ಮ ಗುರಿ ಸ್ಪೇನ್ ತಂಡವನ್ನು ನಿಧಾನ, ನಿಯಂತ್ರಿತ ಲಯಕ್ಕೆ ಹೊಂದಿಕೊಳ್ಳದಂತೆ ತಡೆಯುವುದಾಗಿತ್ತು. ಆಟವನ್ನು ನಿಯಂತ್ರಿಸುವ ವಿಚಾರದಲ್ಲಿ ಅವರು ನಮಗಿಂತ ಉತ್ತಮರು. ನಾವು ಆ ನಿಟ್ಟಿನಲ್ಲಿ ವಿಫಲರಾಗಿದ್ದೇವೆ’’ ಎಂದರು.