15 ವರ್ಷಗಳಲ್ಲಿ ಇದೇ ಮೊದಲ ಬಾರಿ ಸತತ ಏಕದಿನ ಪಂದ್ಯಗಳನ್ನು ಆಡಲು ಸಜ್ಜಾಗುತ್ತಿರುವೆ: ವಿರಾಟ್ ಕೊಹ್ಲಿ

ಕೊಲಂಬೊ: ಶ್ರೀಲಂಕಾ ವಿರುದ್ಧ ಸೂಪರ್-4 ಪಂದ್ಯವನ್ನಾಡಲು ಮಂಗಳವಾರ ಪಿಚ್ಗೆ ಮರಳಲು ನಾನು ಸಿದ್ಧವಾಗಿದ್ದೇನೆ. ಟೆಸ್ಟ್ ಆಟಗಾರನಾಗಿರುವ ಕಾರಣ ಇದು ನನಗೆ ಸಾಧ್ಯವಾಗುತ್ತಿದೆ. ಟೆಸ್ಟ್ ಕ್ರಿಕೆಟ್ ನನಗೆ ಚೇತರಿಸಿಕೊಳ್ಳಲು ಸಹಾಯ ಮಾಡುತ್ತಿದೆ ಹಾಗೂ ಸತತ ಮೂರನೇ ದಿನ ಆಡಲು ಅದು ನನಗೆ ಅನುವು ಮಾಡಿಕೊಡುತ್ತಿದೆ. 15 ವರ್ಷಗಳ ವೃತ್ತಿಜೀವನದಲ್ಲಿ ಇದೇ ಮೊದಲ ಬಾರಿ ಏಕದಿನ ಕ್ರಿಕೆಟ್ ನಲ್ಲಿ ಸತತ 3ನೇ ದಿನ ಆಡಲು ಸಜ್ಜಾಗುತ್ತಿರುವೆ ಎಂದು 94 ಎಸೆತಗಳಲ್ಲಿ 122 ರನ್ ಗಳಿಸಿದ್ದಕ್ಕೆ ಪಂದ್ಯಶ್ರೇಷ್ಠ ಗೌರವಕ್ಕೆ ಪಾತ್ರರಾದ ಭಾರತದ ಸ್ಟಾರ್ ಕ್ರಿಕೆಟಿಗ ವಿರಾಟ್ ಕೊಹ್ಲಿ ಹೇಳಿದರು.

ಕೊಹ್ಲಿಯ ಹಿಂದಿನ ಹಲವಾರು ಉತ್ತಮ ಇನಿಂಗ್ಸ್ ನಂತೆಯೇ ತನ್ನ ನೆಚ್ಚಿನ ಎದುರಾಳಿ ಪಾಕಿಸ್ತಾನದ ವಿರುದ್ಧ ಸೋಮವಾರ ಮಹತ್ವದ ಶತಕ ಸಿಡಿಸಿ ಗಮನಾರ್ಹ ದಾಖಲೆಗಳನ್ನು ನಿರ್ಮಿಸಿದರು. 55 ಎಸೆತಗಳಲ್ಲಿ 50 ರನ್ ಗಳಿಸಿದ್ದ ಕೊಹ್ಲಿ 94 ಎಸೆತಗಳಲ್ಲಿ ಅಜೇಯ 122 ರನ್ ಗಳಿಸಿದರು. ತಮ್ಮ ಇನಿಂಗ್ಸ್ ನ ಕೊನೆಯ 39 ಎಸೆತಗಳಲ್ಲಿ 72 ರನ್ ಸಿಡಿಸುವ ಮೂಲಕ ಪಾಕಿಸ್ತಾನದ ವಿರುದ್ಧ ಮಳೆ ಅಡ್ಡಿಪಡಿಸಿದ ಏಶ್ಯ ಕಪ್ ಸೂಪರ್ ಫೋರ್ ಪಂದ್ಯದಲ್ಲಿ ಭಾರತ ಮಳೆ ಹರಿಸಲು ನೆರವಾದರು. ಕೆ.ಎಲ್. ರಾಹುಲ್ ಜೊತೆಯಲ್ಲಿ ಬ್ಯಾಟಿಂಗ್ ಮಾಡಿದ ಕೊಹ್ಲಿ, ಪಾಕಿಸ್ತಾನದ ಬೌಲಿಂಗ್ ದಾಳಿಯನ್ನು ನುಚ್ಚುನೂರು ಮಾಡಿದರು.

"ನಾನು ಆ ರನ್ ಗಳಿಸುವತ್ತ ಗಮನ ಹರಿಸಿದ್ದೆ. ಅದಕ್ಕಾಗಿ ಸಂತೋಷವಾಗಿದೆ, ಆದರೆ ನಾನು ನಾಳೆ (ಮಂಗಳವಾರ) ಮಧ್ಯಾಹ್ನ 3 ಗಂಟೆಗೆ ಆಡಬೇಕು ಎಂಬ ಕುರಿತಂತೆಯೂ ಯೋಚಿಸುತ್ತಿದ್ದೆ" ಎಂದು ವಿರಾಟ್ ಕೊಹ್ಲಿ ಪಂದ್ಯದ ನಂತರ ಹೇಳಿದರು.

"15 ವರ್ಷಗಳ ಕ್ರಿಕೆಟ್ ಜೀವನದಲ್ಲಿ ನಾನು ಇದೇ ಮೊದಲ ಬಾರಿಗೆ ಬೆನ್ನುಬೆನ್ನಿಗೆ ಏಕದಿನ ಪಂದ್ಯಗಳನ್ನು ಆಡುತ್ತಿದ್ದೇನೆ. ಅದೃಷ್ಟವಶಾತ್ ನಾವು ಟೆಸ್ಟ್ ಆಟಗಾರರಾಗಿದ್ದೇವೆ, ಆದ್ದರಿಂದ ಮರುದಿನ ಹೇಗೆ ಆಡಬೇಕೆಂದು ನಮಗೆ ತಿಳಿದಿದೆ. ಚೇತರಿಸಿಕೊಳ್ಳುವುದು ನಿರ್ಣಾಯಕ. ನನಗೆ ನವೆಂಬರ್ನಲ್ಲಿ 35 ವರ್ಷ ವಯಸ್ಸಾಗುತ್ತದೆ. ಆದ್ದರಿಂದ ನಾನು ನನ್ನ ಚೇತರಿಕೆಯ ಬಗ್ಗೆ ಕಾಳಜಿ ವಹಿಸಬೇಕಾಗಿದೆ ”ಎಂದು ಕೊಹ್ಲಿ ಹೇಳಿದರು.

ಕೆ.ಎಲ್. ರಾಹುಲ್ ಗಾಯದಿಂದಾಗಿ ಐದು ತಿಂಗಳ ವಿರಾಮದ ನಂತರ ತಮ್ಮ ಮೊದಲ ಅಂತಾರಾಷ್ಟ್ರೀಯ ಪಂದ್ಯದಲ್ಲಿ 111 ರನ್ ಗಳಿಸಿದ್ದಕ್ಕಾಗಿ ಕೊಹ್ಲಿ ಅವರನ್ನು ಬಾಯ್ತುಂಬ ಪ್ರಶಂಶಿಸಿದರು.