ನಾಳೆ ಬೆಂಗಳೂರಿನಲ್ಲಿ ಸರಣಿ ನಿರ್ಣಾಯಕ ಪಂದ್ಯ: ಪ್ರಶಸ್ತಿಗಾಗಿ ಭಾರತ-ವೆಸ್ಟ್‌ಇಂಡೀಸ್ ಹೋರಾಟ

ಬೆಂಗಳೂರು: ಗರಿಷ್ಠ ಮೊತ್ತದ ಪಂದ್ಯಗಳಿಗೆ ಸಾಕ್ಷಿಯಾದ ಐದು ಪಂದ್ಯಗಳ ಟಿ-20 ಸರಣಿಯು ಕ್ಲೈಮ್ಯಾಕ್ಸ್ ಹಂತ ತಲುಪಿದೆ. ಐದನೇ ಹಾಗೂ ಕೊನೆಯ ಪಂದ್ಯವು ಬೆಂಗಳೂರಿನ ಎಂ.ಚಿನ್ನಸ್ವಾಮಿ ಸ್ಟೇಡಿಯಂನಲ್ಲಿ ಶನಿವಾರ ನಡೆಯಲಿದೆ.

ಕಳೆದ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಭಾಗವಹಿಸುವಲ್ಲಿ ವಿಫಲವಾಗಿದ್ದ ವಿಂಡೀಸ್ ತಂಡವು ಮೂರು ವಾರಗಳ ಹಿಂದೆ ಭಾರತಕ್ಕೆ ಆಗಮಿಸಿದೆ. ಹೈದರಾಬಾದ್‌ನಲ್ಲಿ ನಡೆದ ನಾಲ್ಕನೇ ಟಿ-20 ಪಂದ್ಯವನ್ನು ಜಯಿಸುವ ಮೂಲಕ ಸರಣಿಯನ್ನು 2-2ರಿಂದ ಸಮಬಲಗೊಳಿಸಿದೆ. ಬೆಂಗಳೂರಿನಲ್ಲಿ ಸರಣಿ ವಿಜೇತರು ನಿರ್ಧಾರವಾಗಲಿದ್ದಾರೆ.

ಮೊದಲ ಟಿ-20 ಪಂದ್ಯವನ್ನು ಸೋತಿದ್ದ ವಿಂಡೀಸ್ ರಾಂಚಿಯಲ್ಲಿ ನಡೆದಿದ್ದ ಎರಡನೇ ಪಂದ್ಯದಲ್ಲಿ 250 ರನ್ ಗುರಿಯನ್ನು ಯಶಸ್ವಿಯಾಗಿ ಚೇಸ್ ಮಾಡಿ ಸರಣಿಯನ್ನು 1-1ರಿಂದ ಸಮಬಲಗೊಳಿಸಿತ್ತು. ಇಂದೋರ್‌ನಲ್ಲಿ ಮೂರನೇ ಪಂದ್ಯವನ್ನು ಜಯಿಸಿದ್ದ ಭಾರತ ತಂಡವು ಸರಣಿಯಲ್ಲಿ 2-1ರಿಂದ ಮುನ್ನಡೆ ಸಾಧಿಸಿತ್ತು.

ಐಸಿಸಿ ಟಿ-20 ರ್ಯಾಂಕಿಂಗ್‌ನಲ್ಲಿ ಏಳನೇ ಸ್ಥಾನದಲ್ಲಿರುವ ವಿಂಡೀಸ್ ತಂಡ ಭಾರತ ನೆಲದಲ್ಲಿ ಸರಣಿ ಗೆಲ್ಲಲು ಇನ್ನೊಂದು ಪಂದ್ಯ ಗೆಲ್ಲಬೇಕಾಗಿದೆ. ಏಳು ವರ್ಷಗಳ ನಂತರ ಭಾರತ ನೆಲದಲ್ಲಿ ಟಿ-20 ಸರಣಿ ಗೆದ್ದ ಮೊದಲ ಪ್ರವಾಸಿ ತಂಡ ಎನಿಸಿಕೊಳ್ಳುವ ವಿಶ್ವಾಸದಲ್ಲಿದೆ.

ಆಸ್ಟ್ರೇಲಿಯ ತಂಡವು 2019ರ ಫೆಬ್ರವರಿಯಲ್ಲಿ ಭಾರತ ವಿರುದ್ಧ ಟಿ-20 ಸರಣಿಯನ್ನು 2-0 ಅಂತರದಿಂದ ಗೆದ್ದುಕೊಂಡಿತ್ತು. ಆ ನಂತರ ಭಾರತೀಯ ಕ್ರಿಕೆಟ್ ತಂಡವು ಸ್ವದೇಶದಲ್ಲಿ ನಡೆದಿದ್ದ 19 ದ್ವಿಪಕ್ಷೀಯ ಟಿ-20 ಸರಣಿಯಲ್ಲಿ ಅಜೇಯವಾಗುಳಿದಿದ್ದು, 17ರಲ್ಲಿ ಗೆಲುವು ಹಾಗೂ ಎರಡರಲ್ಲಿ ಡ್ರಾ ಸಾಧಿಸಿದೆ.

ಭಾರತ ತಂಡವು ಈ ವರ್ಷಾರಂಭದಲ್ಲಿ ಟಿ-20 ವಿಶ್ವಕಪ್ ಟ್ರೋಫಿಯನ್ನು ತನ್ನಲ್ಲೇ ಉಳಿಸಿಕೊಳ್ಳುವಲ್ಲಿ ಯಶಸ್ವಿಯಾಗಿತ್ತು. ಆದರೆ ಐರ್‌ಲ್ಯಾಂಡ್ ವಿರುದ್ಧ 0-2 ಹಾಗೂ ಇಂಗ್ಲೆಂಡ್ ವಿರುದ್ದ 0-4 ಅಂತರದಿಂದ ಟಿ20 ಸರಣಿ ಸೋತಿತ್ತು. ಹಾಲಿ ವಿಶ್ವ ಚಾಂಪಿಯನ್ ಭಾರತವು ಝಿಂಬಾಬ್ವೆ ವಿರುದ್ಧ ಸರಣಿಯನ್ನು 3-0 ಅಂತರದಿಂದ ಗೆದ್ದುಕೊಂಡು ಗೆಲುವಿನ ಹಳಿಗೆ ಮರಳಿತ್ತು. ಜಪಾನಿನಲ್ಲಿ ಏಶ್ಯನ್ ಗೇಮ್ಸ್‌ನಲ್ಲಿ ಚಿನ್ನದ ಪದಕ ಗೆಲ್ಲುವ ಮೊದಲು ಸ್ವದೇಶದಲ್ಲಿ ಅಫ್ಘಾನಿಸ್ತಾನ ವಿರುದ್ಧ ಸರಣಿಯನ್ನು 3-0 ಅಂತರದಿಂದ ಗೆದ್ದುಕೊಂಡಿತ್ತು.

ಪ್ರಸಕ್ತ ಸರಣಿಯಲ್ಲಿ ನಾಯಕ ಶ್ರೇಯಸ್ ಅಯ್ಯರ್ 159 ರನ್ ಗಳಿಸಿ ಭಾರತದ ಪರ ಗರಿಷ್ಠ ರನ್ ಗಳಿಸಿದ್ದಾರೆ. ಭಾರತದ ಬೌಲಿಂಗ್ ವಿಭಾಗವು ವೆಸ್ಟ್‌ಇಂಡೀಸ್ ಬ್ಯಾಟರ್‌ಗಳಿಂದ ನಿರಂತರವಾಗಿ ಒತ್ತಡಕ್ಕೆ ಒಳಗಾಗುತ್ತಿದೆ. ವಿಂಡೀಸ್ ನಾಯಕ ಶಾಯ್ ಹೋಪ್ ಭರ್ಜರಿ ಫಾರ್ಮ್‌ನಲ್ಲಿದ್ದಾರೆ.

ಸರಣಿಯ ನಾಲ್ಕು ಪಂದ್ಯಗಳಲ್ಲಿ 261 ರನ್ ಗಳಿಸಿರುವ ಹೋಪ್ ಟಾಪ್ ಸ್ಕೋರರ್ ಆಗಿದ್ದಾರೆ. ರಾಂಚಿ ಹಾಗೂ ಹೈದರಾಬಾದ್‌ನಲ್ಲಿ 102 ರನ್ ಗಳಿಸಿ ಅಜೇಯವಾಗುಳಿದಿದ್ದರು.

ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂನ ಬೌಂಡರಿ ಚಿಕ್ಕದ್ದಾಗಿದ್ದು, ಉತ್ತಮ ಬೌನ್ಸ್ ಇರಲಿದೆ. ಇಬ್ಬನಿ ಕಾಟವೂ ಇರುವ ಸಾಧ್ಯತೆಯಿದೆ.

ಶಾಯ್ ಹೋಪ್ ಹಾಗೂ ಸಂಜು ಸ್ಯಾಮ್ಸನ್

ಪ್ರಸಕ್ತ ಭಾರತ ಪ್ರವಾಸದಲ್ಲಿ ಶಾಯ್ ಹೋಪ್ ವಿಂಡೀಸ್‌ಗೆ ಸಾಕಷ್ಟು ವಿಶ್ವಾಸ ತುಂಬಿದ್ದಾರೆ. ಏಕದಿನ ಪಂದ್ಯದಲ್ಲಿ 248 ಎಸೆತಗಳಲ್ಲಿ 278 ರನ್ ಗಳಿಸಿದ್ದ ಹೋಪ್, ಟಿ-20ಯಲ್ಲಿ 135 ಎಸೆತಗಳಲ್ಲಿ 261 ರನ್ ಕಲೆ ಹಾಕಿದ್ದಾರೆ. ಹೋಪ್ ಬೇಗನೆ ಔಟಾಗಿರುವ ಎಲ್ಲ ನಾಲ್ಕು ಪಂದ್ಯಗಳಲ್ಲಿ ವಿಂಡೀಸ್ ತಂಡವು ಸೋಲುಂಡಿದೆ. ಹೋಪ್ ಔಟಾಗದೆ ಉಳಿದ ಮೂರು ಪಂದ್ಯಗಳಲ್ಲಿ ವಿಂಡೀಸ್ ಗೆಲುವು ಪಡೆದಿದೆ. ದ್ವಿಪಕ್ಷೀಯ ಸರಣಿಯಲ್ಲಿ ಯಾವೊಬ್ಬ ಪ್ರವಾಸಿ ತಂಡದ ಬ್ಯಾಟರ್ ಐದು ಶತಕ ಗಳಿಸಿಲ್ಲ. ಹೋಪ್ ಸದ್ಯ ನಾಲ್ಕು ಶತಕ ಗಳಿಸಿದ್ದಾರೆ.

ಸಂಜು ಸ್ಯಾಮ್ಸನ್ ಈ ತನಕ ಶತಕ ಗಳಿಸಿಲ್ಲ, ಆದರೆ ನಿರಾಯಾಸವಾಗಿ ಎರಡು ಅರ್ಧಶತಕಗಳನ್ನು ಗಳಿಸಿದ್ದಾರೆ. ಸಂಜು ಯಶಸ್ಸು ಭಾರತಕ್ಕೆ ಅತ್ಯಂತ ಮಖ್ಯವಾಗಿದೆ. ಹೈದರಾಬಾದ್‌ನಲ್ಲಿ ಭಾರತ ತಂಡವು ಗೆಲ್ಲದೇ ಇದ್ದರೂ ಸ್ಯಾಮ್ಸನ್ ಮೂರು ಓವರ್‌ನೊಳಗೆ ಅರ್ಧಶತಕ ಸಿಡಿಸಿ ಮಿಂಚಿದ್ದರು.

ಟೀಮ್ ನ್ಯೂಸ್: ಅರ್ಷದೀಪ್ ಗಾಯಾಳು

ಹೈದರಾಬಾದ್‌ನಲ್ಲಿ ನಡೆದಿದ್ದ ನಾಲ್ಕನೇ ಟಿ-20 ಪಂದ್ಯದ ವೇಳೆ ಶಮರ್ ಜೋಸೆಫ್ ಬೌಲಿಂಗ್‌ನಲ್ಲಿ ಅರ್ಷದೀಪ್ ಎಡಗೈ ಭುಜಕ್ಕೆ ಗಾಯವಾಗಿತ್ತು. ಬೆಂಗಳೂರು ಪಂದ್ಯದಲ್ಲಿ ಅರ್ಷದೀಪ್ ಆಡುವುದು ಅನುಮಾನವಾಗಿದೆ. ಭಾರತ ತಂಡವು 2022ರಲ್ಲಿ ಕೊನೆಯ ಬಾರಿ ಅಂತರ್‌ರಾಷ್ಟ್ರೀಯ ಪಂದ್ಯವನ್ನಾಡಿದ್ದ ಭುವನೇಶ್ವರ ಕುಮಾರ್‌ಗೆ ಬುಲಾವ್ ನೀಡಿದೆ.

ಅಗ್ರ ಸರದಿಯಲ್ಲಿ ಕಮಿಲ್ ಪೂರನ್ ಬದಲಿಗೆ ಜ್ಯುವೆಲ್ ಆಂಡ್ರ್ಯೂ ಅವರನ್ನು ಕಣಕ್ಕಿಳಿಸಿರುವ ವೆಸ್ಟ್‌ಇಂಡೀಸ್ ತಂಡ ಸದ್ಯ ಆಡುವ 11ರ ಬಳಗದಲ್ಲಿ ಸ್ಥಿರತೆ ಸಾಧಿಸಿದೆ. ರೊಮಾರಿಯೊ ಶೆಫರ್ಡ್ ಗಾಯದಿಂದ ಚೇತರಿಸಿಕೊಂಡು ವಾಪಸಾಗಿದ್ದಾರೆ. ಶಮರ್ ಜೋಸೆಫ್ ಇಕಾನಮಿ ರೇಟ್ 14.17ರಷ್ಟಿದ್ದರೂ ಆಡುವ 11ರ ಬಳಗದಲ್ಲಿ ಉಳಿದುಕೊಳ್ಳಬಹುದು.

ಪಿಚ್ ಹಾಗೂ ವಾತಾವರಣ

ಐಪಿಎಲ್ ಟೂರ್ನಿಯಲ್ಲಿ ಬೆಂಗಳೂರಿನ ಚಿನ್ನಸ್ವಾಮಿ ಸ್ಟೇಡಿಯಂ ಬ್ಯಾಟಿಂಗ್ ಸ್ವರ್ಗವಾಗಿ ಕಾಣಿಸಿಕೊಂಡಿತ್ತು. ಶನಿವಾರದಂದು ಬೆಂಗಳೂರಿನಲ್ಲಿ ಸಾಮಾನ್ಯವಾಗಿ ಮೋಡ ಕವಿದ ವಾತಾವರಣವಿರಲಿದ್ದು, ಅಲ್ಲಲ್ಲಿ ಮಳೆ ಅಥವಾ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆಯಿದೆ ಎಂದು ಭಾರತೀಯ ಹವಾಮಾನ ಇಲಾಖೆಯು ಮುನ್ಸೂಚನೆ ನೀಡಿದೆ.

ಅಂಕಿ-ಅಂಶಗಳು

ಪ್ರಸಕ್ತ ಸರಣಿಯಲ್ಲಿ 98 ಸಿಕ್ಸರ್‌ಗಳು ಸಿಡಿಯಲ್ಪಟ್ಟಿವೆ. ಟಿ-20ಯಲ್ಲಿ ಎರಡು ಐಸಿಸಿ ಪೂರ್ಣ ಸದಸ್ಯ ರಾಷ್ಟ್ರಗಳ ನಡುವಿನ ದ್ವಿಪಕ್ಷೀಯ ಸರಣಿಯಲ್ಲಿ ಗರಿಷ್ಠ ಸಿಕ್ಸರ್ ದಾಖಲಾಗಿದೆ. ಆಸ್ಟ್ರೀಯ ಹಾಗೂ ಜರ್ಮನಿ ನಡುವಿನ ಪಂದ್ಯದಲ್ಲಿ 132 ಸಿಕ್ಸರ್‌ಗಳು ದಾಖಲಾಗಿದ್ದವು.

ವೆಸ್ಟ್‌ಇಂಡೀಸ್ ತಂಡವು 2002ರ ನಂತರ ಯಾವುದೇ ಮಾದರಿಯ ಕ್ರಿಕೆಟ್ ಸರಣಿಯಲ್ಲಿ ಭಾರತ ತಂಡವನ್ನು ಅದರದೇ ನೆಲದಲ್ಲಿ ಸೋಲಿಸಿಲ್ಲ.

ಭಾರತ-ವೆಸ್ಟ್‌ಇಂಡೀಸ್ ಟಿ-20 ಪಂದ್ಯದ ಹೆಡ್-ಟು-ಹೆಡ್

ವೆಸ್ಟ್‌ಇಂಡೀಸ್ ವಿರುದ್ಧ ಟಿ-20 ಕ್ರಿಕೆಟ್‌ನ ಹೆಡ್-ಟು-ಹೆಡ್ ದಾಖಲೆಯಲ್ಲಿ ಭಾರತವು 22-12ರಿಂದ ಮುನ್ನಡೆಯಲ್ಲಿದೆ. ಒಂದು ಪಂದ್ಯದಲ್ಲಿ ಮಾತ್ರ ಫಲಿತಾಂಶ ಬಂದಿರಲಿಲ್ಲ.

ವೆಸ್ಟ್‌ಇಂಡೀಸ್ ತಂಡವು 2023ರಲ್ಲಿ ಕೆರಿಬಿಯನ್ ಹಾಗೂ ಅಮೆರಿಕದಲ್ಲಿ ನಡೆದಿದ್ದ ಭಾರತ ವಿರುದ್ಧದ ದ್ವಿಪಕ್ಷೀಯ ಸರಣಿಯನ್ನು 3-2 ಅಂತರದಿಂದ ಗೆದ್ದುಕೊಂಡಿತ್ತು. ಭಾರತದ ನೆಲದಲ್ಲಿ ಮೊದಲ ಬಾರಿ ದ್ವಿಪಕ್ಷೀಯ ಟಿ-20 ಸರಣಿ ಗೆಲ್ಲಲು ವಿಂಡೀಸ್ ಶನಿವಾರ ಹೋರಾಟ ನಡೆಸಲಿದೆ.

ತಂಡಗಳು

ಭಾರತ(ಸಂಭಾವ್ಯ): 1.ಅಭಿಷೇಕ್ ಶರ್ಮಾ, 2. ಸಂಜು ಸ್ಯಾಮ್ಸನ್(ವಿಕೆಟ್‌ಕೀಪರ್), 3. ಇಶಾನ್ ಕಿಶನ್, 4. ಶ್ರೇಯಸ್ ಅಯ್ಯರ್(ನಾಯಕ), 5. ತಿಲಕ್ ವರ್ಮಾ, 6. ನಮನ್ ಧೀರ್, 7. ನಿತೀಶ್ ಕುಮಾರ್ ರೆಡ್ಡಿ, 8. ಅಕ್ಷರ್ ಪಟೇಲ್, 9. ಪ್ರಿನ್ಸ್ ಯಾದವ್, 10. ಮಯಾಂಕ್ ಯಾದವ್, 11. ಅರ್ಷದೀಪ ಸಿಂಗ್/ಭುವನೇಶ್ವರ ಕುಮಾರ್.

ವೆಸ್ಟ್‌ಇಂಡೀಸ್(ಸಂಭಾವ್ಯ): 1. ಶಾಯ್ ಹೋಪ್(ನಾಯಕ, ವಿಕೆಟ್‌ಕೀಪರ್), 2. ಜ್ಯುವೆಲ್ ಆಂಡ್ರ್ಯೂ, 3. ಶಿಮ್ರೊನ್ ಹೆಟ್ಮೆಯರ್, 4. ರೊವ್‌ಮನ್ ಪೊವೆಲ್, 5. ಶೆರ್ಫಾನ್ ರುದರ್‌ಫೋರ್ಡ್, 6. ರೊಮಾರಿಯೊ ಶೆಫರ್ಡ್, 7. ರೋಸ್ಟನ್ ಚೇಸ್, 8. ಶಮರ್ ಸ್ಪ್ರಿಂಗರ್, 9. ಕೀಮೊ ಪೌಲ್, 10. ಶಮರ್ ಜೋಸೆಫ್, 11. ಗುಡಕೇಶ್ ಮೋಟಿ.