ನ್ಯೂಝಿಲ್ಯಾಂಡ್ ಪ್ರವಾಸ |ಭಾರತದ ಹಾಕಿ ತಂಡ ಪ್ರಕಟ; ಸಂಜಯ್ ನಾಯಕ

ಹೊಸದಿಲ್ಲಿ: ಒಲಿಂಪಿಕ್ಸ್‌ನಲ್ಲಿ ಕಂಚಿನ ಪದಕ ವಿಜೇತ ಸಂಜಯ್ ಭಾರತದ ಯುವ ಪುರುಷರ ಹಾಕಿ ತಂಡದ ನಾಯಕನಾಗಿ ನೇಮಕಗೊಂಡಿದ್ದು, ಉಭಯ ದೇಶಗಳ ನಡುವಿನ 100 ವರ್ಷಗಳ ಕ್ರೀಡಾ ಸಂಬಂಧದ ಸಂಕೇತವಾಗಿ ನವೆಂಬರ್ 15ರಿಂದ 23ರ ತನಕ ನ್ಯೂಝಿಲ್ಯಾಂಡ್ ಪ್ರವಾಸದ ವೇಳೆ ಭಾರತ ತಂಡವು ಮೂರು ಪಂದ್ಯಗಳನ್ನು ಆಡಲಿದೆ.

ಆಕ್ಲೆಂಡ್‌ನ ಲಾಯ್ಡ್ ಹಾಕಿ ಸ್ಟೇಡಿಯಂನಲ್ಲಿ ನವೆಂಬರ್ 19, 21 ಹಾಗೂ 22ರಂದು ಭಾರತ ತಂಡವು ಮೂರು ಪಂದ್ಯಗಳನ್ನು ಆಡಲಿದೆ.

ಈ ಪ್ರವಾಸವು 1926ರಲ್ಲಿ ಭಾರತೀಯ ಸೇನಾ ಹಾಕಿ ತಂಡವು ನಡೆಸಿದ ಐತಿಹಾಸಿಕ ಭೇಟಿಯ ನೆನಪನ್ನು ಗೌರವಿಸುತ್ತದೆ. ಹಾಕಿ ದಂತಕತೆ ಮೇಜರ್ ಧ್ಯಾನ್‌ಚಂದ್ ಅವರು ಈ ತಂಡದಲ್ಲಿದ್ದರು. ನ್ಯೂಝಿಲ್ಯಾಂಡ್ ಪ್ರವಾಸ ಕೈಗೊಂಡ ಮೊತ್ತ ಮೊದಲ ಭಾರತೀಯ ತಂಡ ಇದಾಗಿದೆ.

ಹಾಕಿ ಇಂಡಿಯಾವು 20 ಸದಸ್ಯರ ತಂಡವನ್ನು ಸೋಮವಾರ ಪ್ರಕಟಿಸಿದೆ. ಇದರಲ್ಲಿ ಅಂಡರ್-21 ತಂಡದ ಆಟಗಾರರು ಹಾಗೂ ಹಾಲಿ ಭಾರತ ‘ಎ’ ತಂಡದ ಆಟಗಾರರ ಮಿಶ್ರಣವಿದೆ. ಯುವ ಪ್ರತಿಭೆಗಳಿಗೆ ಅಂತರ್‌ರಾಷ್ಟ್ರೀಯ ಮಟ್ಟದಲ್ಲಿ ಮಿಂಚುವ ಅವಕಾಶ ಒದಗಿಸಿದೆ.

ಭಾರತದ ಪೂರ್ಣ ತಂಡ ಇಂತಿದೆ

ಗೋಲ್‌ಕೀಪರ್‌ಗಳು: ಮೋಹಿತ್ ಎಚ್.ಎಸ್., ಪವನ್

ಡಿಫೆಂಡರ್‌ಗಳು: ಸಂಜಯ್(ನಾಯಕ), ನೀಲಂ ಸಂಜೀಪ್, ಶಾರದಾನಂದ ತಿವಾರಿ, ಟಲೇಮ್ ಪ್ರಿಯಬಾರ್ತ,ಅನ್ಮೋಲ್ ಎಕ್ಕಾ ಹಾಗೂ ಯಶ್‌ದೀಪ್ ಸಿವಾಚ್.

ಮಿಡ್ ಫೀಲ್ಡರ್‌ಗಳು: ಅಂಗದ್ ಬೀರ್ ಸಿಂಗ್, ಆದಿತ್ಯ ಅರ್ಜುನ್, ರಬಿಚಂದ್ರ ಸಿಂಗ್, ವಿಷ್ಣುಕಾಂತ ಸಿಂಗ್, ಮನ್ಮೀತ್ ಸಿಂಗ್, ರೋಶನ್ ಕುಜೂರ್ ಹಾಗೂ ವೆಂಕಟೇಶ್.

ಫಾರ್ವರ್ಡ್‌ಗಳು: ಅಜಿತ್ ಯಾದವ್, ಉತ್ತಮ್ ಸಿಂಗ್, ಕಾರ್ತಿ ಸೆಲ್ವಂ, ಅರ್ಷದೀಪ ಸಿಂಗ್ ಹಾಗೂ ಅರೈಜೀತ್ ಸಿಂಗ್.