ಇಟಾಲಿಯನ್ ಓಪನ್ ನಲ್ಲಿ ರೋಹನ್ ಬೋಪಣ್ಣ-ಮ್ಯಾಥ್ಯೂ ಎಬ್ಡೆನ್ ಗೆ ಸೋಲು
![ಇಟಾಲಿಯನ್ ಓಪನ್ ನಲ್ಲಿ ರೋಹನ್ ಬೋಪಣ್ಣ-ಮ್ಯಾಥ್ಯೂ ಎಬ್ಡೆನ್ ಗೆ ಸೋಲು ಇಟಾಲಿಯನ್ ಓಪನ್ ನಲ್ಲಿ ರೋಹನ್ ಬೋಪಣ್ಣ-ಮ್ಯಾಥ್ಯೂ ಎಬ್ಡೆನ್ ಗೆ ಸೋಲು](https://www.varthabharati.in/h-upload/2024/05/15/1266776-untitled-1-recovered.webp)
ಮ್ಯಾಥ್ಯೂ ಎಬ್ಡೆನ್ , ರೋಹನ್ ಬೋಪಣ್ಣ | PC : X \ @airnewsalerts
ರೋಮ್: ಎಟಿಪಿ ಇಟಾಲಿಯನ್ ಓಪನ್ ನ ಪ್ರಿ -ಕ್ವಾರ್ಟರ್ ಫೈನಲ್ ನಲ್ಲಿ ರೋಹನ್ ಬೋಪಣ್ಣ ಹಾಗೂ ಮ್ಯಾಥ್ಯೂ ಎಬ್ಡೆನ್ ಸ್ಥಳೀಯ ಜೋಡಿ ಸಿಮೊನ್ ಬೊಲೆಲಿ ಹಾಗೂ ಆಂಡ್ರಿಯ ವವಸ್ಸೋರಿ ವಿರುದ್ದ ಸೋತಿದ್ದಾರೆ.
ಮಂಗಳವಾರ ಒಂದು ಗಂಟೆ, 13 ನಿಮಿಷಗಳ ಕಾಲ ನಡೆದ ಪುರುಷರ ಡಬಲ್ಸ್ ಪಂದ್ಯದಲ್ಲಿ ಎರಡನೇ ಶ್ರೇಯಾಂಕದ ಬೋಪಣ್ಣ ಹಾಗೂ ಎಬ್ಡೆನ್ 2-6, 4-6 ಸೆಟ್ ಗಳ ಅಂತರದಿಂದ ಸೋತಿದ್ದಾರೆ.
ಬೋಪಣ್ಣ ಹಾಗೂ ಎಬ್ಡೆನ್ ಮೊದಲ ಸುತ್ತಿನ ಪಂದ್ಯದಲ್ಲಿ ವೈಲ್ಡ್ಕಾರ್ಡ್ ಆಟಗಾರರಾದ ಮ್ಯಾಟಿಯೊ ಅರ್ನಾಲ್ಡಿ ಹಾಗೂ ಫ್ರಾನ್ಸಿಸ್ಕೊ ಪಾಸ್ಸಾರೊ ವಿರುದ್ಧ ಜಯ ಸಾಧಿಸಿದ್ದರು.
ಬೋಪಣ್ಣ ಜೋಡಿ ಇತ್ತೀಚೆಗೆ ಮ್ಯಾಡ್ರಿಡ್ ಮಾಸ್ಟರ್ಸ್ ಟೂರ್ನಿಯಲ್ಲಿ ಮೊದಲ ಸುತ್ತಿನಲ್ಲಿ ಸೋತು ನಿರ್ಗಮಿಸಿತ್ತು. ಆದರೆ ಬೋಪಣ್ಣ ಹಾಗೂ ಎಬ್ಡೆನ್ ಈ ವರ್ಷ ಆಸ್ಟ್ರೇಲಿಯನ್ ಓಪನ್ ನಲ್ಲಿ ಪುರುಷರ ಡಬಲ್ಸ್ ಪ್ರಶಸ್ತಿ ಜಯಿಸಿ ಪ್ರಮುಖ ಸಾಧನೆ ಮಾಡಿದ್ದರು. 2022ರ ಇಂಡಿಯನ್ ಮಾಸ್ಟರ್ಸ್ ಪ್ರಶಸ್ತಿಯನ್ನು ಜಯಿಸಿರುವ 43ರ ಹರೆಯದ ಬೋಪಣ್ಣ ಎಟಿಪಿ ಮಾಸ್ಟರ್ಸ್- 1000 ಚಾಂಪಿಯನ್ ಆಗಿರುವ ಹಿರಿಯ ಆಟಗಾರ ಎನಿಸಿಕೊಂಡಿದ್ದರು.
ಬೋಪಣ್ಣ ಹಾಗೂ ಎಬ್ಡೆನ್ ವಿಂಬಲ್ಡನ್ ಚಾಂಪಿಯನ್ ಶಿಪ್ ನಲ್ಲಿ ಪುರುಷರ ಡಬಲ್ಸ್ ನಲ್ಲಿ ಸೆಮಿ ಫೈನಲ್ ಹಾಗೂ ಕಳೆದ ಋತುವಿನಲ್ಲಿ ಯು.ಎಸ್. ಓಪನ್ ನಲ್ಲಿ ಫೈನಲ್ ತಲುಪಿದ್ದರು. ಜನವರಿಯಲ್ಲಿ ಆಸ್ಟ್ರೇಲಿಯನ್ ಓಪನ್ ಪ್ರಶಸ್ತಿ ಜಯಿಸಿದ ನಂತರ ಬೋಪಣ್ಣ ಅವರು ಡಬಲ್ಸ್ ನಲ್ಲಿ ವಿಶ್ವದ ನಂ.1 ಆಟಗಾರ ಎನಿಸಿಕೊಂಡಿದ್ದರು.