Asian Games | ಮೊದಲ ಸುತ್ತಿನಲ್ಲಿ ಮುಗ್ಗರಿಸಿದ ಸಾತ್ವಿಕ್-ಚಿರಾಗ್

ನಗೋಯ, ಸೆ.25: ಏಶ್ಯನ್ ಗೇಮ್ಸ್ ನಲ್ಲಿ ಬ್ಯಾಡ್ಮಿಂಟನ್ ನಲ್ಲಿ ಭಾರತವು ಭಾರೀ ಹಿನ್ನಡೆ ಅನುಭವಿಸಿದ್ದು, ಹಾಲಿ ಪುರುಷರ ಡಬಲ್ಸ್ ಚಾಂಪಿಯನ್ ಗಳಾದ ಸಾತ್ವಿಕ್ಸಾಯಿರಾಜ್ ರಾಂಕಿರೆಡ್ಡಿ ಹಾಗೂ ಚಿರಾಗ್ ಶೆಟ್ಟಿ ಮೊದಲ ಸುತ್ತಿನಲ್ಲಿ ಸೋತು ನಿರ್ಗಮಿಸಿದ್ದಾರೆ.

ಶುಕ್ರವಾರ ಒಂದು ಗಂಟೆ ಹಾಗೂ ಎಂಟು ನಿಮಿಷಗಳ ಕಾಲ ನಡೆದ ಹಣಾಹಣಿಯಲ್ಲಿ ನಾಲ್ಕನೇ ಶ್ರೇಯಾಂಕದ ಭಾರತೀಯ ಜೋಡಿ ಥಾಯ್ಲೆಂಡ್ ನ ಪಕ್ಕಾಪನ್ ಹಾಗೂ ಪೀರಾಚೈ ವಿರುದ್ಧ 21-12, 19-21, 14-21 ಅಂತರದಿಂದ ಆಘಾತಕಾರಿ ಸೋಲುಂಡರು.

ಭಾರತಕ್ಕೆ ಪದಕದ ಭರವಸೆ ಮೂಡಿಸಿದ್ದ ಸಾತ್ವಿಕ್ ಹಾಗೂ ಚಿರಾಗ್ 2023ರ ಆವೃತ್ತಿಯ ಏಶ್ಯನ್ ಗೇಮ್ಸ್ನಲ್ಲಿ ಚಿನ್ನದ ಪದಕ ಜಯಿಸಿದ್ದರು.

ಭಾರತೀಯ ಜೋಡಿ ಮೊದಲ ಗೇಮ್ ಅನ್ನು 20 ನಿಮಿಷಗಳಲ್ಲಿ 21-12 ಅಂತರದಿಂದ ಗೆದ್ದುಕೊಂಡು ಉತ್ತಮ ಆರಂಭ ಪಡೆದಿತ್ತು. ಆದರೆ ಥಾಯ್ಲೆಂಡ್ ಜೋಡಿ ಎರಡನೇ ಗೇಮ್ನಲ್ಲಿ ತನ್ನ ಲಯ ಕಂಡುಕೊಂಡಿದ್ದು, 24 ನಿಮಿಷಗಳಲ್ಲಿ 21-19 ಅಂತರದಿಂದ ಗೆದ್ದಿದೆ.

ಕೊನೆಯ ಗೇಮ್ನಲ್ಲಿ ಸಾತ್ವಿಕ್ ಹಾಗೂ ಚಿರಾಗ್ ತಮ್ಮ ಲಯ ಮರಳಿ ಪಡೆಯುವಲ್ಲಿ ವಿಫಲರಾಗಿದ್ದು, ಥಾಯ್ಲೆಂಡ್ ಜೋಡಿ ತಕ್ಷಣವೇ ಹಿಡಿತ ಸಾಧಿಸಿ ಕೇವಲ 19 ನಿಮಿಷಗಳಲ್ಲಿ ಮೂರನೇ ಗೇಮ್ ಅನ್ನು 21-14 ಅಂತರದಿಂದ ಗೆದ್ದುಕೊಂಡಿತು.

ಸಾತ್ವಿಕ್ ಹಾಗೂ ಚಿರಾಗ್ ನಾಲ್ಕನೇ ಶ್ರೇಯಾಂಕದೊಂದಿಗೆ ಗೇಮ್ಸ್ಗೆ ಪ್ರವೇಶಿಸಿದ್ದು, ಇನ್ನೊಂದು ಚಿನ್ನ ಗೆಲ್ಲುವ ವಿಶ್ವಾಸ ಮೂಡಿಸಿದ್ದರು. ಆದರೆ, ಸಾತ್ವಿಕ್ ಹಾಗೂ ಚಿರಾಗ್ ಅಭಿಯಾನವು ಮೊದಲ ಸುತ್ತಿನಲ್ಲಿ ಕೊನೆಗೊಂಡಿದ್ದು, ಪುರುಷರ ಡಬಲ್ಸ್ ನಲ್ಲಿ ಭಾರತದ ಅತಿ ದೊಡ್ಡ ಪದಕ ಸ್ಪರ್ಧಿಗಳು ನಿರಾಶೆಗೊಳಿಸಿದರು.