ಸ್ವಿಟ್ಸರ್ಲ್ಯಾಂಡ್ ಗೋಲ್ಕೀಪರ್ ಸೋಮರ್ ಫುಟ್ಬಾಲ್ ಗೆ ವಿದಾಯ
ಝೂರಿಚ್ : ದೀರ್ಘ ಕಾಲ ಸ್ವಿಟ್ಸರ್ಲ್ಯಾಂಡ್ ನ ನಂ.1 ಗೋಲ್ಕೀಪರ್ ಆಗಿದ್ದ ಯಾನ್ ಸೋಮರ್ ಸೋಮವಾರ ತನ್ನ 35ನೇ ವಯಸ್ಸಿನಲ್ಲಿ ಅಂತರರಾಷ್ಟ್ರೀಯ ಫುಟ್ಬಾಲ್ ನಿಂದ ನಿವೃತ್ತಿಯಾಗಿದ್ದಾರೆ. ಇಂಟರ್ ಮಿಲನ್ ಎಫ್ಸಿ ಪರ ಆಡುವುದರತ್ತ ಹೆಚ್ಚು ಗಮನ ನೀಡುವ ಸಲುವಾಗಿ ಈ ನಿರ್ಧಾರ ತೆಗೆದುಕೊಂಡಿದ್ದಾರೆ.
ಸ್ವಿಸ್ ಫುಟ್ಬಾಲ್ ಒಕ್ಕೂಟವು ಸೋಮರ್ ಅವರ ನಿರ್ಧಾರವನ್ನು ಪ್ರಕಟಿಸಿದೆ. 2012ರಲ್ಲಿ ಚೊಚ್ಚಲ ಪಂದ್ಯ ಆಡಿದ ನಂತರ 12 ವರ್ಷಗಳ ಕಾಲ ಸ್ವಿಸ್ ತಂಡವನ್ನು 94 ಪಂದ್ಯಗಳಲ್ಲಿ ಪ್ರತಿನಿಧಿಸಿದ್ದಾರೆ. ಕಳೆದ ತಿಂಗಳು ಜರ್ಮನಿಯಲ್ಲಿ ನಡೆದಿದ್ದ ಯುರೋ ಚಾಂಪಿಯನ್ಶಿಪ್ ನಲ್ಲಿ ಸ್ವಿಸ್ ತಂಡ ಕ್ವಾರ್ಟರ್ ಫೈನಲ್ ತಲುಪುವಲ್ಲಿ ಪ್ರಮುಖ ಕಾಣಿಕೆ ನೀಡಿದ್ದರು. ಕ್ವಾರ್ಟರ್ ಫೈನಲ್ ನಲ್ಲಿ ಸ್ವಿಸ್ ತಂಡ ಇಂಗ್ಲೆಂಡ್ ವಿರುದ್ದ ಕಡಿಮೆ ಅಂತರದಿಂದ ಸೋತಿತ್ತು. ಸೋಮರ್ ಅವರು ಯರೋ 2016 ಹಾಗೂ 2020, 2018 ಹಾಗೂ 2022ರಲ್ಲಿ ನಡೆದಿದ್ದ ವಿಶ್ವಕಪ್ ನಲ್ಲಿ ತನ್ನ ಪ್ರತಿಭೆಯನ್ನು ಪ್ರದರ್ಶಿಸಿದ್ದರು.
ಸೋಮರ್ ಕಳೆದ ವರ್ಷ ಬೆಯರ್ನ್ ಮ್ಯೂನಿಚ್ನಿಂದ ಇಂಟರ್ ಮಿಲನ್ ಗೆ ವರ್ಗಾವಣೆಯಾಗಿ ತನ್ನ ಕ್ಲಬ್ ವೃತ್ತಿಜೀವನದಲ್ಲಿ ಹೊಸ ಅಧ್ಯಾಯ ತೆರೆದಿದ್ದರು. ತನ್ನ ಅಧಿಕೃತ ಇನ್ಸ್ಟಾಗ್ರಾಮ್ ನಲ್ಲಿ ಹೇಳಿಕೆಯೊಂದನ್ನು ಬಿಡುಗಡೆ ಮಾಡಿರುವ ಸೋಮರ್ ಅವರು ರಾಷ್ಟ್ರೀಯ ತಂಡವನ್ನು ಪ್ರತಿನಿಧಿಸಿದ್ದು ಒಂದು ಮಹಾ ಗೌರವ ಎಂದು ಹೇಳಿದ್ದಾರೆ.
ಸೋಮರ್ ಅವರು ಸ್ವಿಸ್ ಪರ ಮೂರು ವಿಶ್ವಕಪ್ ಹಾಗೂ ಮೂರು ಯುರೋಪಿಯನ್ ಚಾಂಪಿಯನ್ಶಿಪ್ ಗಳಲ್ಲಿ ಆಡಿದ್ದಾರೆ.
ಸೋಮರ್ ಕಳೆದ ತಿಂಗಳು ಜರ್ಮನಿಯಲ್ಲಿ ನಡೆದಿದ್ದ ಯುರೋ 2024ರ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ಇಂಗ್ಲೆಂಡ್ ವಿರುದ್ಧ 1-1ರಿಂದ ಡ್ರಾನಲ್ಲಿ ಅಂತ್ಯಗೊಂಡ ಪಂದ್ಯದಲ್ಲಿ ವಿದಾಯದ ಪಂದ್ಯ ಆಡಿದ್ದರು.
ಯುರೋ 2020ರಲ್ಲಿ ಫ್ರಾನ್ಸ್ ವಿರುದ್ಧ ಅಂತಿಮ-16ರ ಪಂದ್ಯವು 3-3ರಿಂದ ಡ್ರಾನಲ್ಲಿ ಅಂತ್ಯಗೊಂಡಾಗ ಪೆನಾಲ್ಟಿ ಶೂಟೌಟ್ ನಲ್ಲಿ ಕೈಲಿಯನ್ ಎಂಬಾಪೆ ಬಾರಿಸಿದ ಪೆನಾಲ್ಟಿ ಹೊಡೆತವನ್ನು ತಡೆದಿರುವುದು ಸ್ವಿಸ್ ಪರ ಸೋಮರ್ ಅವರ ಸ್ಮರಣೀಯ ಪ್ರದರ್ಶನವಾಗಿದೆ.
ಸೋಮರ್ ಅನಾರೋಗ್ಯದಿಂದ ವಿಶ್ರಾಂತಿ ಪಡೆದಾಗ 26ರ ಹರೆಯದ ಕೋಬೆಲ್ 2022ರ ವಿಶ್ವಕಪ್ ನಲ್ಲಿ ಸರ್ಬಿಯ ವಿರುದ್ಧ 3-2ರಿಂದ ಗೆದ್ದ ಪಂದ್ಯಸಹಿತ 5 ಪಂದ್ಯಗಳಲ್ಲಿ ಆಡಿದ್ದರು. ಗ್ರೆಗೊರ್ ಕೊಬೆಲ್ ಅವರು ಸೋಮರ್ ಸ್ಥಾನವನ್ನು ತುಂಬುವ ಸಾಧ್ಯತೆಯಿದೆ.
ಸ್ವಿಸ್ ತಂಡವು ಯುಇಎಫ್ಎ ನೇಶನ್ಸ್ ಲೀಗ್ ನಲ್ಲಿ ಸೆಪ್ಟಂಬರ್ 5 ಹಾಗೂ 8ರಂದು ಡೆನ್ಮಾರ್ಕ್ ಹಾಗೂ ಯುರೋ-2024ರ ಚಾಂಪಿಯನ್ ಸ್ಪೇನ್ ತಂಡವನ್ನು ಎದುರಿಸಲಿದೆ.
