T20 ವಿಶ್ವಕಪ್‌ | USA ಎದುರು ಭಾರತದ ಟಾಪ್‌ಆರ್ಡರ್ ಕುಸಿತ

ಮುಂಬೈ: ಇಲ್ಲಿನ ವಾಂಖೆಡೆ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಭಾರತ–ಅಮೆರಿಕ ಟಿ20 ವಿಶ್ವಕಪ್ ಪಂದ್ಯದಲ್ಲಿ ಟಾಸ್ ಸೋತು ಮೊದಲು ಬ್ಯಾಟಿಂಗ್‌ಗೆ ಇಳಿದ ಭಾರತ ತಂಡ ಆರಂಭದಲ್ಲೇ ಹಿನ್ನಡೆ ಅನುಭವಿಸಿತು. ಪವರ್‌ಪ್ಲೇ ಅವಧಿಯಲ್ಲೇ ಪ್ರಮುಖ ವಿಕೆಟ್‌ಗಳನ್ನು ಕಳೆದುಕೊಂಡ ಭಾರತ ಸಂಕಷ್ಟಕ್ಕೆ ಸಿಲುಕಿದೆ.

ತಂಡದ ಮೊತ್ತ 8 ರನ್ ಆಗಿದ್ದಾಗಲೇ ಆರಂಭಿಕ ಆಟಗಾರ ಅಭಿಷೇಕ್ ಶರ್ಮ ಶೂನ್ಯಕ್ಕೆ ಔಟಾಗಿ ನಿರಾಶೆ ಮೂಡಿಸಿದರು. ಅಲಿ ಖಾನ್ ಎಸೆತದಲ್ಲಿ ಸಂಜಯ್ ಕೃಷ್ಣಮೂರ್ತಿ ಕೈಗೆ ಕ್ಯಾಚ್ ನೀಡಿದ ಅವರು ಪೆವಿಲಿಯನ್ ಸೇರಿದರು.

ಇದಾದ ಬಳಿಕ ಇಶಾನ್ ಕಿಶನ್ ಹಾಗೂ ತಿಲಕ್ ವರ್ಮ ಜೋಡಿ ಇನ್ನಿಂಗ್ಸ್ ಕಟ್ಟಲು ಪ್ರಯತ್ನಿಸಿತು. ನಾಲ್ಕು ಓವರ್‌ಗಳ ಅಂತ್ಯಕ್ಕೆ ಭಾರತ 33 ರನ್ ಗಳಿಸಿತ್ತು. ಇಶಾನ್ ಕಿಶನ್ 10 ರನ್ ಹಾಗೂ ತಿಲಕ್ ವರ್ಮ 24 ರನ್ ಗಳಿಸಿ ಕ್ರೀಸ್‌ನಲ್ಲಿ ಮುಂದುವರಿದಿದ್ದರು.

ಆದರೆ ಐದನೇ ಓವರ್‌ನಲ್ಲಿ ಅಮೆರಿಕ ತಂಡ ಪಂದ್ಯದಲ್ಲಿ ಮೇಲುಗೈ ಸಾಧಿಸಿತು. ಶ್ಯಾಡ್ಲಿ ವ್ಯಾನ್ ಶಾಲ್ಕ್‌ವೈಕ್ ಎಸೆತದಲ್ಲಿ ಇಶಾನ್ ಕಿಶನ್ ಔಟಾದರು. ಆಫ್‌ಸ್ಟಂಪ್ ಹತ್ತಿರದ ಫುಲ್‌ಲೆಂಗ್ತ್ ಚೆಂಡನ್ನು ಮಿಡ್‌ಆಫ್ ಮೇಲೆ ಎತ್ತಲು ಯತ್ನಿಸಿದ ಅವರು ಸರಿಯಾಗಿ ಅರ್ಥ ಮಾಡಿಕೊಳ್ಳಲು ವಿಫಲರಾದ ಪರಿಣಾಮ ಮಿಲಿಂದ್ ಕುಮಾರ್ ಕೈಗೆ ಕ್ಯಾಚ್ ಒಪ್ಪಿಸಿದರು. ಕಿಶನ್ 16 ಎಸೆತಗಳಲ್ಲಿ 20 ರನ್ ಗಳಿಸಿ ನಿರ್ಗಮಿಸಿದರು. ಭಾರತ 45ಕ್ಕೆ 2 ವಿಕೆಟ್ ಕಳೆದುಕೊಂಡಿತು.

ಅದಾದ ಕೆಲವೇ ಕ್ಷಣಗಳಲ್ಲಿ ತಿಲಕ್ ವರ್ಮ ಕೂಡ ಪೆವಿಲಿಯನ್ ಸೇರಿದರು. ಪುಲ್ ಶಾಟ್ ಪ್ರಯತ್ನಿಸಿದ ಅವರು ಚೆಂಡನ್ನು ಎತ್ತರಕ್ಕೆ ಎತ್ತಿದ ಪರಿಣಾಮ ಮಿಡ್‌ವಿಕೆಟ್‌ನಲ್ಲಿ ನಾಯಕ ಮೋನಾಂಕ್ ಪಟೇಲ್ ಸುಲಭ ಕ್ಯಾಚ್ ಪಡೆದರು. ವರ್ಮ 16 ಎಸೆತಗಳಲ್ಲಿ 25 ರನ್ ಗಳಿಸಿದರು. ಭಾರತ 46ಕ್ಕೆ 3 ವಿಕೆಟ್ ಕಳೆದುಕೊಂಡಿತು.

ಅದೇ ಓವರ್‌ನಲ್ಲಿ ಶಿವಮ್ ದುಬೆ ಗೋಲ್ಡನ್ ಡಕ್‌ಗೆ ನಿರ್ಗಮಿಸಿದ್ದು ಭಾರತದ ಸಂಕಷ್ಟವನ್ನು ಮತ್ತಷ್ಟು ಗಂಭೀರಗೊಳಿಸಿತು. ನಿಧಾನಗತಿಯ ಶಾರ್ಟ್ ಚೆಂಡಿಗೆ ಆಡಿದ ಪುಲ್ ಪ್ರಯತ್ನ ಟಾಪ್ ಎಡ್ಜ್ ಆಗಿ ಶಾರ್ಟ್ ಫೈನ್ ಲೆಗ್ ಕಡೆಗೆ ತೇಲಿದ ಚೆಂಡನ್ನು ಸೌರಭ್ ನೇತ್ರವಲ್ಕರ್ ಸುರಕ್ಷಿತವಾಗಿ ಹಿಡಿದರು. ಭಾರತ 46ಕ್ಕೆ 4 ವಿಕೆಟ್ ಕಳೆದುಕೊಂಡಿತು.

ಪವರ್‌ಪ್ಲೇ ಅವಧಿಯಲ್ಲೇ ನಾಲ್ಕು ಪ್ರಮುಖ ವಿಕೆಟ್ ಕಳೆದುಕೊಂಡ ಭಾರತ ಆರಂಭದಲ್ಲೇ ಒತ್ತಡಕ್ಕೆ ಸಿಲುಕಿದೆ. ಅಮೆರಿಕ ತಂಡ ಶಿಸ್ತಿನ ಬೌಲಿಂಗ್ ಮೂಲಕ ಪಂದ್ಯದಲ್ಲಿ ಮೇಲುಗೈ ಸಾಧಿಸಿದೆ.