T20 ಸರಣಿ | ಅಭಿಷೇಕ್ ಶರ್ಮಾ ಸ್ಫೋಟಕ ಶತಕ; ಅಫ್ಘಾನ್ ಗೆ 222 ರನ್ ಗಳ ಗುರಿ ನೀಡಿದ ಭಾರತ

ಹೊಸದಿಲ್ಲಿ: ಅಫ್ಘಾನಿಸ್ತಾನ ವಿರುದ್ಧದ ಮೂರನೇ T20I ಪಂದ್ಯದಲ್ಲಿ ಆರಂಭಿಕ ಬ್ಯಾಟರ್ ಅಭಿಷೇಕ್ ಶರ್ಮಾ ಅವರ ಸ್ಫೋಟಕ ಶತಕದ ನೆರವಿನಿಂದ ಭಾರತ 20 ಓವರ್ಗಳಲ್ಲಿ 7 ವಿಕೆಟ್ ಕಳೆದುಕೊಂಡು 221 ರನ್ ಗಳಿಸಿತು.

ಟಾಸ್ ಗೆದ್ದ ಅಫ್ಘಾನಿಸ್ತಾನ ಬೌಲಿಂಗ್ ಆಯ್ಕೆ ಮಾಡಿಕೊಂಡಿತು. ಮೂರು ಪಂದ್ಯಗಳ ಸರಣಿಯಲ್ಲಿ ಭಾರತ ಈಗಾಗಲೇ 2–0 ಮುನ್ನಡೆಯಲ್ಲಿದೆ.

ಅಭಿಷೇಕ್ ಕೇವಲ 34 ಎಸೆತಗಳಲ್ಲಿ 108 ರನ್ ಬಾರಿಸಿದರು. ಅವರ ಇನ್ನಿಂಗ್ಸ್ ನಲ್ಲಿ 9 ಬೌಂಡರಿ ಮತ್ತು 11 ಸಿಕ್ಸರ್ಗಳಿದ್ದವು.

9.5ನೇ ಓವರ್ನಲ್ಲಿ ರಶೀದ್ ಖಾನ್ ಎಸೆತದಲ್ಲಿ ಅಭಿಷೇಕ್ ವಿಕೆಟ್ ಒಪ್ಪಿಸಿದರು. ಆಫ್ ಸ್ಟಂಪ್ ನ ಹೊರಗೆ ರಶೀದ್ ಗೂಗ್ಲಿ ಎಸೆದಾಗ, ಅಭಿಷೇಕ್ ಕ್ರೀಸ್ ನ ಅಂಚಿನಲ್ಲಿ ಆಫ್ಸೈಡ್ ನಲ್ಲಿ ಹೊಡೆಯಲು ಪ್ರಯತ್ನಿಸಿದರು. ಚೆಂಡು ಬ್ಯಾಟ್ ನ ಹೊರ ಅಂಚಿಗೆ ತಾಗಿ ವಿಕೆಟ್ ಕೀಪರ್ ರಹಮಾನುಲ್ಲಾ ಗುರ್ಬಾಝ್ ಅವರ ಕೈ ಸೇರಿತು. ಕ್ಯಾಚ್ಗೆ ಮನವಿ ಸಲ್ಲಿಕೆಯಾದ ಬೆನ್ನಲ್ಲೇ ಅಂಪೈರ್ ಔಟ್ ನೀಡಿದರು.

ಅಭಿಷೇಕ್ ರಿವ್ಯೂ ಪಡೆದರು. ಆದರೆ ಅಲ್ಟ್ರಾ ಎಡ್ಜ್ ನಲ್ಲಿ ಚೆಂಡು ಬ್ಯಾಟ್ ಗೆ ಸಮೀಪಿಸಿದಾಗ ದೊಡ್ಡ ಸ್ಪೈಕ್ ಕಂಡುಬಂದಿತು. ಹೀಗಾಗಿ ಅಂಪಾಯರ್ ನಿರ್ಧಾರವೇ ಮುಂದುವರಿಯಿತು. 9.5 ಓವರ್ ಗಳಲ್ಲಿ ಭಾರತ 142/1 ರನ್ ಗಳಿಸಿತ್ತು. ಭಾರಿ ಕರತಾಡನದ ನಡುವೆ ಅಭಿಷೇಕ್ ಮೈದಾನದಿಂದ ಹೊರನಡೆದರು.

ಅಭಿಷೇಕ್ ಅವರೊಂದಿಗೆ ಆರಂಭಿಕರಾಗಿ ಆಡಿದ ಸಂಜು ಸ್ಯಾಮ್ಸನ್ ಕೂಡ ಅರ್ಧಶತಕ ಬಾರಿಸಿದರು. ಅವರು 35 ಎಸೆತಗಳಲ್ಲಿ 50 ರನ್ ಗಳಿಸಿದರು. 2 ಬೌಂಡರಿ ಮತ್ತು 4 ಸಿಕ್ಸರ್ ಗಳನ್ನು ಸಿಡಿಸಿದ ಸಂಜು ಅವರ ಸ್ಟ್ರೈಕ್ ರೇಟ್ 142.86. 13.1ನೇ ಓವರ್ ನಲ್ಲಿ ಅಝ್ಮತುಲ್ಲಾ ಒಮರ್ಝಾಯ್ ಅವರ ಬೌಲಿಂಗ್ ನಲ್ಲಿ ರಶೀದ್ ಖಾನ್ ಗೆ ಕ್ಯಾಚ್ ನೀಡಿ ಸ್ಯಾಮ್ಸನ್ ಔಟಾದರು.

ತಿಲಕ್ ವರ್ಮ 5 ಎಸೆತಗಳಲ್ಲಿ 2 ರನ್ ಗಳಿಸಿ ರನ್ಔಟ್ ಆದರು. ಶ್ರೇಯಸ್ ಅಯ್ಯರ್ 20 ಎಸೆತಗಳಲ್ಲಿ 29 ರನ್ ಗಳಿಸಿದರು. ಶಿವಂ ದುಬೆ 10 ಎಸೆತಗಳಲ್ಲಿ 14 ರನ್ ಗಳಿಸಿದರು. ಇಶಾನ್ ಕಿಶನ್ 8 ಎಸೆತಗಳಲ್ಲಿ 10 ರನ್ ಗಳಿಸಿ ರನ್ಔಟ್ ಆದರು. ನಿತೀಶ್ ಕುಮಾರ್ ರೆಡ್ಡಿ 4 ಎಸೆತಗಳಲ್ಲಿ 1 ರನ್ ಗಳಿಸಿ ಅಬ್ದುಲ್ಲಾ ಅಹ್ಮದ್ ಜಾಯ್ ಅವರ ಬೌಲಿಂ ಗ್ನಲ್ಲಿ ನೂರ್ ಉಲ್ ರೆಹಮಾನ್ಗೆ ಕ್ಯಾಚ್ ನೀಡಿದರು.

ಅಕ್ಷರ್ ಪಟೇಲ್ 4 ಎಸೆತಗಳಲ್ಲಿ 5 ರನ್ ಹಾಗೂ ರವಿ ಬಿಷ್ಣೋಯ್ ಯಾವುದೇ ಎಸೆತ ಎದುರಿಸದೆ ಅಜೇಯರಾಗಿದ್ದರು. ಹೆಚ್ಚುವರಿಯಾಗಿ ಭಾರತಕ್ಕೆ 2 ರನ್ ಗಳು (2 ವೈಡ್) ದೊರೆತವು.

ಅಝ್ಮತುಲ್ಲಾ ಒಮರ್ಝಾಯ್ 3 ಓವರ್ಗಳಲ್ಲಿ 27 ರನ್ ನೀಡಿ 2 ವಿಕೆಟ್ ಪಡೆದರು. ರಶೀದ್ ಖಾನ್ 4 ಓವರ್ ಗಳಲ್ಲಿ 43 ರನ್ ನೀಡಿ ಒಂದು ವಿಕೆಟ್ ಮತ್ತು ಅಬ್ದುಲ್ಲಾ ಅಹ್ಮದ್‌ ಝಾಯ್ 4 ಓವರ್ ಗಳಲ್ಲಿ 38 ರನ್ ನೀಡಿ ಒಂದು ವಿಕೆಟ್ ಪಡೆದರು.

ಫಜಲ್ಹಕ್ ಫಾರೂಕಿ 4 ಓವರ್ಗಳಲ್ಲಿ 39 ರನ್ ನೀಡಿ ವಿಕೆಟ್ ಪಡೆಯಲಿಲ್ಲ. ಮುಜೀಬ್ ಉರ್ ರೆಹಮಾನ್ 4 ಓವರ್ಗಳಲ್ಲಿ 45 ರನ್ ಮತ್ತು ಮೊಹಮ್ಮದ್ ನಬಿ ಒಂದು ಓವರ್ ನಲ್ಲಿ 29 ರನ್ ನೀಡಿ ದುಬಾರಿಯಾದರು.