ಟಿ20 ವಿಶ್ವಕಪ್| ಯುಎಇಯನ್ನು 6 ವಿಕೆಟ್ನಿಂದ ಸೋಲಿಸಿದ ದಕ್ಷಿಣ ಆಫ್ರಿಕ
ಹೊಸದಿಲ್ಲಿ, ಫೆ. 18: ಐಸಿಸಿ ಪುರುಷರ ಟಿ20 ವಿಶ್ವಕಪ್ನಲ್ಲಿ, ‘ಡಿ’ ಗುಂಪಿನ ಲೀಗ್ ಪಂದ್ಯವೊಂದರಲ್ಲಿ ಬುಧವಾರ ದಕ್ಷಿಣ ಆಫ್ರಿಕ ತಂಡವು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ತಂಡವನ್ನು ಆರು ವಿಕೆಟ್ಗಳಿಂದ ಸೋಲಿಸಿದೆ. ಈಗಾಗಲೇ ಸೂಪರ್ ಎಂಟರ ಘಟ್ಟವನ್ನು ಪ್ರವೇಶಿಸಿರುವ ದಕ್ಷಿಣ ಆಫ್ರಿಕವು, ಈಗ ತನ್ನ ಗುಂಪಿನ ಎಲ್ಲಾ ನಾಲ್ಕು ಪಂದ್ಯಗಳನ್ನು ಗೆದ್ದು ತನ್ನ ನೈತಿಕ ಸಾಮರ್ಥ್ಯವನ್ನು ಹೆಚ್ಚಿಸಿಕೊಂಡಿದೆ.
ಹೊಸದಿಲ್ಲಿಯ ಅರುಣ್ ಜೇಟ್ಲಿ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯಕ್ಕೆ ಮಳೆ ಅಡಚಣೆ ಉಂಟು ಮಾಡಿತಾದರೂ ಯಾವುದೇ ಓವರ್ಗಳು ಕಡಿತಗೊಳ್ಳಲಿಲ್ಲ.
ಗೆಲುವಿಗೆ 123 ರನ್ಗಳ ಗುರಿಯನ್ನು ಪಡೆದ ದಕ್ಷಿಣ ಆಫ್ರಿಕವು, ಆಕ್ರಮಣಕಾರಿ ಆಟವನ್ನು ಆಡಿ ಇನ್ನೂ 40 ಎಸೆತಗಳು ಬಾಕಿಯಿರುವಂತೆಯೇ ಜಯವನ್ನು ಘೋಷಿಸಿತು. ಅದು 13.2 ಓವರ್ಗಳಲ್ಲಿ ಕೇವಲ ನಾಲ್ಕು ವಿಕೆಟ್ಗಳನ್ನು ಕಳೆದುಕೊಂಡು 123 ರನ್ ಗಳಿಸಿತು.
ಆರಂಭಿಕರಾದ ಏಡನ್ ಮರ್ಕ್ರಾಮ್ (11 ಎಸೆತಗಳಲ್ಲಿ 28 ರನ್) ಮತ್ತು ಕ್ವಿಂಟನ್ ಡಿ ಕಾಕ್ (16 ಎಸೆತಗಳಲ್ಲಿ 14 ರನ್) ದಕ್ಷಿಣ ಆಫ್ರಿಕ ಇನಿಂಗ್ಸ್ಗೆ ಆರಂಭಿಕ ವೇಗವನ್ನು ಒದಗಿಸಿದರು. ಬಳಿಕ ರಯಾನ್ ರಿಕೆಲ್ಟನ್ (16 ಎಸೆತಗಳಲ್ಲಿ 30 ರನ್) ಮತ್ತು ಡೆವಾಲ್ಡ್ ಬ್ರೆವಿಸ್ (25 ಎಸೆತಗಳಲ್ಲಿ 36 ರನ್) ತಂಡವನ್ನು ಗೆಲುವಿನ ಸಮೀಪ ತಂದರು.
ಟ್ರೈಸ್ಟನ್ ಸ್ಟಬ್ಸ್ (ಔಟಾಗದೆ 6 ರನ್) ಮತ್ತು ಜಾಸನ್ ಸ್ಮಿತ್ (ಔಟಾಗದೆ 3) ವಿಜಯದ ವಿಧಿವಿಧಾನಗಳನ್ನು ಪೂರೈಸಿದರು.
ಇದಕ್ಕೂ ಮೊದಲು ಟಾಸ್ ಸೋತು ಮೊದಲು ಬ್ಯಾಟಿಂಗ್ ಮಾಡಿದ ಯುಎಇ 20 ಓವರ್ಗಳಲ್ಲಿ ಆರು ವಿಕೆಟ್ಗಳ ನಷ್ಟಕ್ಕೆ 122 ರನ್ ಗಳಿಸಿತು.
ಯುಎಇ ಬ್ಯಾಟರ್ಗಳು ಮೊದಲ ನಾಲ್ಕು ಓವರ್ಗಳಲ್ಲಿ ವಿಕೆಟ್ ನಷ್ಟವಿಲ್ಲದೆ 36 ರನ್ಗಳನ್ನು ಸೂರೆಗೈದರು.
ಆರಂಭಿಕರಾದ ಆರ್ಯಾಂಶ್ ಶರ್ಮಾ ಮತ್ತು ನಾಯಕ ಮುಹಮ್ಮದ್ ವಸೀಮ್ ಕ್ರಮವಾಗಿ 13 ಮತ್ತು 22 ರನ್ಗಳ ದೇಣಿಗೆಗಳನ್ನು ನೀಡಿದರು. ಅಲಿಶಾನ್ ಶರಫು 45 ರನ್ಗಳನ್ನು ಗಳಿಸಿದರು.
ದಕ್ಷಿಣ ಆಫ್ರಿಕದ ಪರವಾಗಿ ಆ್ಯನ್ರಿಕ್ ನೋರ್ಟ್ಯೆ ಎರಡು ವಿಕೆಟ್ಗಳನ್ನು ಕಿತ್ತರೆ, ಕಾರ್ಬಿನ್ ಬೋಶ್ ಮೂರು ವಿಕೆಟ್ಗಳನ್ನು ಉರುಳಿಸಿದರು.
ಸಂಕ್ಷಿಪ್ತ ಸ್ಕೋರ್
ಯುಎಇ (20 ಓವರ್ಗಳಲ್ಲಿ) 122-6
ಮುಹಮ್ಮದ್ ವಸೀಮ್ 22, ಅಲಿಶಾನ್ ಶರಫು 45
ಆ್ಯನ್ರಿಕ್ ನೋರ್ಟ್ಯೆ 2-28, ಕಾರ್ಬಿನ್ ಬೋಶ್ 3-12
ದಕ್ಷಿಣ ಆಫ್ರಿಕ (13.2 ಓವರ್ಗಳಲ್ಲಿ) 123-4
ಏಡನ್ ಮರ್ಕ್ರಾಮ್ 28, ರಯಾನ್ ರಿಕಲ್ಟನ್ 30, ಡೆವಾಲ್ಡ್ ಬ್ರೆವಿಸ್ 36
