ಟೇಬಲ್ ಟೆನಿಸ್ | ಭಾರತದ ಮಹಿಳಾ ತಂಡ ಕ್ವಾರ್ಟರ್ ಫೈನಲ್ ಗೆ ಲಗ್ಗೆ

ಪ್ಯಾರಿಸ್ : ಸ್ಟಾರ್ ಆಟಗಾರ್ತಿ ಮಣಿಕಾ ಬಾತ್ರಾ ನೇತೃತ್ವದ ಭಾರತದ ಮಹಿಳಾ ಟೇಬಲ್ ಟೆನಿಸ್ ತಂಡವು ಪ್ಯಾರಿಸ್ ಒಲಿಂಪಿಕ್ಸ್ ನಲ್ಲಿ ಸೋಮವಾರ ನಡೆದ ಮಹಿಳೆಯರ ಟೇಬಲ್ ಟೆನಿಸ್ ಟೀಮ್ ಸ್ಪರ್ಧೆಯಲ್ಲಿ ಗರಿಷ್ಠ ರ್ಯಾಂಕಿನ ರೋಮೇನಿಯಾ ತಂಡವನ್ನು 3-2 ಅಂತರದಿಂದ ರೋಚಕವಾಗಿ ಮಣಿಸಿ ಕ್ವಾರ್ಟರ್ ಫೈನಲ್ ಗೆ ಲಗ್ಗೆ ಇಟ್ಟಿತು.

ಭಾರತ ತಂಡವು ಆರಂಭದಲ್ಲಿ 2-0 ಮುನ್ನಡೆ ಪಡೆದಿತ್ತು. ಆಗ ಮರು ಹೋರಾಟ ನೀಡಿದ ರೊಮೇನಿಯಾ 2-2ರಿಂದ ಸಮಬಲ ಸಾಧಿಸಿತ್ತು. ನಿರ್ಣಾಯಕ ಪಂದ್ಯದಲ್ಲಿ ಉತ್ತಮ ಪ್ರದರ್ಶನ ನೀಡಿದ ಮಣಿಕಾ ತನ್ನ ತಂಡಕ್ಕೆ ಗೆಲುವು ತಂದುಕೊಟ್ಟರು.

ಭಾರತದ ಜೋಡಿ ಶ್ರೀಜಾ ಅಕುಲಾ ಹಾಗೂ ಅರ್ಚನಾ ಕಾಮತ್ ಡಬಲ್ಸ್ ಪಂದ್ಯದಲ್ಲಿ ಆಡಿನಾ ಡಿಯಾಕೋನು ಹಾಗೂ ಎಲಿಝಬೆಟಾ ಸಮರಾರನ್ನು 11-9, 12-10, 11-7 ಅಂತರದಿಂದ ಮಣಿಸಿ ಭಾರತಕ್ಕೆ ಆರಂಭಿಕ ಮುನ್ನಡೆ ಒದಗಿಸಿಕೊಟ್ಟರು.

ಆ ನಂತರ ಮಣಿಕಾ ಬಾತ್ರಾ ಅವರು ಮೊದಲ ಸಿಂಗಲ್ಸ್ ಪಂದ್ಯದಲ್ಲಿ ಬರ್ನಾಡೆಟ್ ಸಾಕ್ಸ್ರನ್ನು 11-5, 11-7, 11-7 ನೇರ ಗೇಮ್ ಗಳ ಅಂತರದಿಂದ ಸೋಲಿಸಿ ಭಾರತಕ್ಕೆ 2-0 ಮುನ್ನಡೆ ಒದಗಿಸಿಕೊಟ್ಟರು.

ಎರಡನೇ ಸಿಂಗಲ್ಸ್ ಪಂದ್ಯದಲ್ಲಿ ಶ್ರೀಜಾ ಅಕುಲಾ ಅವರು ಯುರೋಪಿಯನ್ ಚಾಂಪಿಯನ್ ಎಲಿಝಬೆಟಾ ಸಮರಾ ವಿರುದ್ಧ 11-8, 4-11, 11-7, 6-11, 8-11 ಅಂತರದಿಂದ ಸೋತರು.

ಶ್ರೀಜಾ ಅಕುಲಾ ಸೋತ ನಂತರ ಅರ್ಚನಾ ಕಾಮತ್ ಅವರು ಬರ್ನಾಡೆಟ್ ಸಾಕ್ಸ್ ವಿರುದ್ಧ 5-11, 11-8, 7-11, 9-11 ಅಂತರದಿಂದ ಶರಣಾದರು.

ಆಗ ಭಾರತಕ್ಕೆ ನಿರ್ಣಾಯಕ 5ನೇ ಹಾಗೂ ಅಂತಿಮ ಪಂದ್ಯವನ್ನು ಗೆಲ್ಲಲೇಬೇಕಾಗಿತ್ತು. ಆಗ ಮಣಿಕಾ ಅವರು ಆಡಿನಾ ಡಿಯಾಕೋನುರನ್ನು 3-0( 11-5, 11-9, 11-9) ಅಂತರದಿಂದ ಮಣಿಸಿ ಭಾರತಕ್ಕೆ 3-2 ಅಂತರದ ರೋಚಕ ಗೆಲುವು ತಂದುಕೊಟ್ಟರು.

ಭಾರತ ತಂಡ ಮುಂದಿನ ಸುತ್ತಿನಲ್ಲಿ ಮತ್ತೊಂದು ಪ್ರಿ-ಕ್ವಾರ್ಟರ್ ಫೈನಲ್ ನಲ್ಲಿ ಜಯ ಸಾಧಿಸಲಿರುವ ಅಮೆರಿಕ ಅಥವಾ ಜರ್ಮನಿ ತಂಡವನ್ನು ಎದುರಿಸಲಿದೆ. ಅಂತಿಮ-8ರ ಪಂದ್ಯವು ಮಂಗಳವಾರ ನಡೆಯಲಿದೆ.

ಕಳೆದ ವಾರ ಮಣಿಕಾ ಹಾಗೂ ಶ್ರೀಜಾ ಒಲಿಂಪಿಕ್ಸ್ ನ ವೈಯಕ್ತಿಕ ವಿಭಾಗದಲ್ಲಿ ಅಂತಿಮ-16ರ ಸುತ್ತು ತಲುಪಿದ ಭಾರತದ ಮೊದಲ ಆಟಗಾರ್ತಿರೆಂಬ ಕೀರ್ತಿಗೆ ಭಾಜನರಾಗಿದ್ದರು. ದುರದೃಷ್ಟವಶಾತ್ ಇಬ್ಬರೂ ಗರಿಷ್ಠ ರ್ಯಾಂಕಿನ ಎದುರಾಳಿಗಳಿಗೆ ಶರಣಾಗಿ ಮುಂದಿನ ಸುತ್ತಿಗೇರುವಲ್ಲಿ ವಿಫಲರಾಗಿದ್ದರು.