ಏಕದಿನ ಕ್ರಿಕೆಟ್ ವಿಶ್ವಕಪ್ ಟೂರ್ನಿಯ ಮರೆಯಲಾರದ ಕ್ಷಣಗಳು…
► 1992ರ ವಿಶ್ವಕಪ್ ಫೈನಲ್ ನಲ್ಲಿ ಸತತ 2 ಎಸೆತಗಳಲ್ಲಿ 2 ವಿಕೆಟ್ ಕಬಳಿಸಿದ್ದ ವಸೀಂ ಅಕ್ರಂ
ಮೆಲ್ಬೋರ್ನ್ ನಲ್ಲಿ ನಡೆದಿದ್ದ ಇಂಗ್ಲೆಂಡ್ ವಿರುದ್ಧದ 1992ರ ವಿಶ್ವಕಪ್ ಫೈನಲ್ ಪಂದ್ಯದ 35 ನೇ ಓವರ್ನಲ್ಲಿ ‘ಸ್ವಿಂಗ್ ಸುಲ್ತಾನ್’ ಎಂದೇ ಖ್ಯಾತರಾಗಿದ್ದ ವಸೀಂ ಅಕ್ರಂ ಸತತ ಎರಡು ಎಸೆತಗಳಲ್ಲಿ 2 ವಿಕೆಟ್ ಪಡೆದು ಪಾಕಿಸ್ತಾನಕ್ಕೆ ಮೇಲುಗೈ ಒದಗಿಸಿಕೊಟ್ಟಿದ್ದರು. 31 ರನ್ ಗಳಿಸಿದ್ದ ಅಲನ್ ಲ್ಯಾಂಬ್ ರನ್ನು ಅತ್ಯುತ್ತಮ ಎಸೆದಿಂದ ಕ್ಲೀನ್ ಬೌಲ್ಡ್ ಮಾಡಿದ್ದ ಅಕ್ರಂ ಇಂಗ್ಲೆಂಡಿನ ಅತ್ಯಂತ ಭರವಸೆಯ ಜೊತೆಯಾಟವನ್ನು ಮುರಿದಿದ್ದರು. ಮುಂದಿನ ಎಸೆತದಲ್ಲಿ ಕ್ರಿಸ್ ಲೂಯಿಸ್ (0) ಸ್ಟಂಪ್ ಅನ್ನು ಉಡಾಯಿಸಿದ ಅಕ್ರಂ (3-49) ಪಾಕಿಸ್ತಾನ ತಂಡವು ಚೊಚ್ಚಲ ವಿಶ್ವಕಪ್ ಗೆಲ್ಲಲು ಪ್ರಮುಖ ಕಾಣಿಕೆ ನೀಡಿದ್ದರು.ಈ ಸಾಹಸಕ್ಕೆ ಪಂದ್ಯಶ್ರೇಷ್ಠ ಗೌರವ ಪಡೆದಿದ್ದರು.
► ಭಾರತಕ್ಕೆ ಆಘಾತಕಾರಿ ಸೋಲುಣಿಸಿದ್ದ ಬಾಂಗ್ಲಾದೇಶ (2007)
ಪೋರ್ಟ್ ಆಫ್ ಸ್ಪೇನ್ ನಲ್ಲಿ ನಡೆದ 2007 ವಿಶ್ವಕಪ್ ನಲ್ಲಿ ಬಲಿಷ್ಠ ಭಾರತ ತಂಡವನ್ನು ಮಣಿಸಿದ್ದ ಬಾಂಗ್ಲಾದೇಶದ ಯುವ ಆಟಗಾರರ ದಂಡು ಎಲ್ಲರ ಗಮನ ಸೆಳೆದಿತ್ತು. ಮಶ್ರಫೆ ಮೊರ್ತಾಝಾ 4 ವಿಕೆಟ್ ಗಳನ್ನು ಕಬಳಿಸಿದ್ದರೆ, ತಮೀಮ್ ಇಕ್ಬಾಲ್(51 ರನ್) , ಮುಶ್ಫಿಕುರ್ರಹೀಮ್ (56 ರನ್) ಹಾಗೂ ಶಾಕಿಬ್ ಅಲ್ ಹಸನ್ (53 ರನ್) ಅವರ ಅರ್ಧಶತಕಗಳ ಬೆಂಬಲದೊಂದಿಗೆ ಬಾಂಗ್ಲಾ ತಂಡವು ಭಾರತವನ್ನು ಐದು ವಿಕೆಟ್ ಗಳಿಂದ ಸೋಲಿಸಿ ಶಾಕ್ ನೀಡಿತ್ತು.
ಈ ಫಲಿತಾಂಶದ ಪರಿಣಾಮ ಭಾರತ ಪಂದ್ಯಾವಳಿಯ ಸೂಪರ್-8 ಹಂತ ಆರಂಭವಾಗುವ ಮೊದಲೇ ಟೂರ್ನಿಯಿಂದ ನಿರ್ಗಮಿಸಿತ್ತು.
► ದಕ್ಷಿಣ ಆಫ್ರಿಕಾ ವಿರುದ್ಧ ನಾಲ್ಕು ಎಸೆತಗಳಲ್ಲಿ ನಾಲ್ಕು ವಿಕೆಟ್ ಕಬಳಿಸಿದ ಮಾಲಿಂಗ
ಕೈಯಲ್ಲಿ ಐದು ವಿಕೆಟ್ ಹೊಂದಿದ್ದ ದಕ್ಷಿಣ ಆಫ್ರಿಕಾ ತಂಡಕ್ಕೆ ಗೆಲ್ಲಲು ನಾಲ್ಕು ರನ್ ಅಗತ್ಯವಿತ್ತು. ಶ್ರೀಲಂಕಾ ವಿರುದ್ಧದ ಅದರ ಗೆಲುವು ಬಹುತೇಕ ಖಚಿತವಾಗಿತ್ತು. ಆಗ ದಾಳಿಗಿಳಿದ ಸ್ಲಿಂಗ್ ಆ್ಯಕ್ಷನ್ ವೇಗಿ ಮಾಲಿಂಗ ನಾಲ್ಕು ಎಸೆತಗಳಲ್ಲಿ ನಾಲ್ಕು ವಿಕೆಟ್ ಗಳನ್ನು ಕಿತ್ತು ಪಂದ್ಯವನ್ನು ತನ್ನ ತಂಡದತ್ತ ತಿರುಗಿಸಲು ಯತ್ನಿಸಿದ್ದರು. ಅಂತಿಮವಾಗಿ ದಕ್ಷಿಣ ಆಫ್ರಿಕಾ ಒಂದು ವಿಕೆಟ್ ನಿಂದ ರೋಚಕ ಗೆಲುವು ಸಾಧಿಸುವಲ್ಲಿ ಯಶಸ್ವಿಯಾಯಿತು. ವೇಗಿಯ ಪ್ರಯತ್ನವು ಪಂದ್ಯಾವಳಿಯಲ್ಲಿ ಗುರುತನ್ನು ಮೂಡಿಸಿತ್ತು.
► 2015ರ ಸೆಮಿ ಫೈನಲ್ ನಲ್ಲಿ ದಕ್ಷಿಣ ಆಫ್ರಿಕಾದ ಕನಸು ಭಗ್ನಗೊಳಿಸಿದ್ದ ದ.ಆಫ್ರಿಕಾ ಸಂಜಾತ ಗ್ರ್ಯಾಂಟ್ ಎಲಿಯಟ್
ದಕ್ಷಿಣ ಆಫ್ರಿಕಾ ವಿರುದ್ಧದ ಸೆಮಿಫೈನಲ್ ಪಂದ್ಯದಲ್ಲಿ ನ್ಯೂಝಿಲ್ಯಾಂಡ್ ಗೆಲುವಿಗೆ ಎರಡು ಎಸೆತಗಳಲ್ಲಿ ಐದು ರನ್ ಅಗತ್ಯವಿತ್ತು. ನ್ಯೂಝಿಲ್ಯಾಂಡ್ ನ ಗ್ರಾಂಟ್ ಎಲಿಯಟ್ ಸ್ಟ್ರೈಕ್ ನಲ್ಲಿದ್ದರೆ, ದಕ್ಷಿಣ ಆಫ್ರಿಕಾದ ಡೇಲ್ ಸ್ಟೇನ್ ಬೌಲಿಂಗ್ ಮಾಡುತ್ತಿದ್ದರು.
ಅದುವರೆಗೆ ಎರಡೂ ತಂಡಗಳು ಫೈನಲ್ ಗೆ ತಲುಪಿರಲಿಲ್ಲ ಎಂಬ ಅಂಶವು ನಾಟಕೀಯತೆಯನ್ನು ಹೆಚ್ಚಿಸಿತ್ತು. ಕೊನೆಯಲ್ಲಿ ಎಲಿಯಟ್ ಗೆಲುವಿನ ರನ್ ದಾಖಲಿಸಿದರು. ಮೂಲತಃ ದಕ್ಷಿಣ ಆಫ್ರಿಕಾ ಆಟಗಾರನಾಗಿದ್ದ ಎಲಿಯಟ್ ಔಟಾಗದೆ 84 ರನ್ ಗಳಿಸಿ ತನ್ನ ತಾಯ್ನಾಡಿನ ತಂಡಕ್ಕೆ ಖಳನಾಯಕನಾಗಿದ್ದರು. ಈ ಸಾಹಸಕ್ಕೆ ಪಂದ್ಯಶ್ರೇಷ್ಠ ಪ್ರಶಸ್ತಿ ಪಡೆದಿದ್ದರು. ದಕ್ಷಿಣ ಆಫ್ರಿಕಾವು ಮತ್ತೊಮ್ಮೆ ಸೆಮಿ-ಫೈನಲ್ ನಲ್ಲಿ ಮುಗ್ಗರಿಸಿ ಮತ್ತೊಂದು ವಿಶ್ವಕಪ್ ನಲ್ಲಿ ಆಘಾತಕಾರಿ ಸೋಲನುಭವಿಸಿತ್ತು.
► ಭಾರತ ಹಾಗೂ ಇಂಗ್ಲೆಂಡ್ ಪಂದ್ಯ ಟೈ(2011ರ ವಿಶ್ವಕಪ್)
‘ಲಿಟಲ್ ಮಾಸ್ಟರ್’ ಸಚಿನ್ ತೆಂಡುಲ್ಕರ್ ಅವರ ಶ್ರೇಷ್ಠ ಶತಕ(120 ರನ್) ವನ್ನು ಮೀರಿಸಿದ ನಾಯಕ ಆ್ಯಂಡ್ರ್ಯೂ ಸ್ಟ್ರಾಸ್ ಅವರ ಅಮೋಘ 158 ರನ್ ನೆರವಿನಿಂದ ಇಂಗ್ಲೆಂಡ್ ತಂಡ ಭಾರತ ವಿರುದ್ಧ 2011ರಲ್ಲಿ ಬೆಂಗಳೂರಿನಲ್ಲಿ ನಡೆದಿದ್ದ ವಿಶ್ವಕಪ್ ಗ್ರೂಪ್ ಪಂದ್ಯವನ್ನು ಟೈ ಮಾಡಿಕೊಂಡಿತ್ತು. ಇಂಗ್ಲೆಂಡ್ ಗೆಲುವಿನ ಹತ್ತಿರ ತಲುಪಲು ಯಶಸ್ವಿಯಾಯಿತು, ಭಾರತದ 338 ರನ್ ಗೆ ಉತ್ತರವಾಗಿ ಇಂಗ್ಲೆಂಡ್ ಕೂಡ 8 ವಿಕೆಟ್ ನಷ್ಟಕ್ಕೆ 338 ರನ್ ಗಳಿಸಿ ಸಮಬಲದ ಹೋರಾಟ ನೀಡಿತ್ತು.
ಮುಂದುವರಿಯುತ್ತದೆ….
