Asian Games | AITAಗೆ ಫಿಟ್ನೆಸ್ ಪ್ರಮಾಣಪತ್ರ ನೀಡಿದ ಯೂಕಿ ಭಾಂಬ್ರಿ

ಹೊಸದಿಲ್ಲಿ, ಸೆ. 19: ದೇಶದ ಕ್ರೀಡಾ ಆಡಳಿತ ಮಂಡಳಿಯಾದ ಅಖಿಲ ಭಾರತ ಟೆನಿಸ್ ಸಂಸ್ಥೆಗೆ (ಎಐಟಿಎ) ತಮ್ಮ ಫಿಟ್ನೆಸ್ ಪ್ರಮಾಣಪತ್ರವನ್ನು ಒದಗಿಸಿರುವ ಯೂಕಿ ಭಾಂಬ್ರಿ, 2026ರ ಏಶ್ಯನ್ ಗೇಮ್ಸ್‌ನಲ್ಲಿ ಭಾರತದ ಡಬಲ್ಸ್ ಸ್ಪರ್ಧೆಗೆ ಮರಳಲು ಸಜ್ಜಾಗಿದ್ದಾರೆ.

ಗಾಯದ ಸಮಸ್ಯೆಯಿಂದಾಗಿ ಸಿಯೋಲ್‌ನಲ್ಲಿ ಶನಿವಾರ ಕೊನೆಗೊಂಡ ದಕ್ಷಿಣ ಕೊರಿಯಾ ವಿರುದ್ಧದ ಡೇವಿಸ್ ಕಪ್ ಕ್ವಾಲಿಫೈಯಿಂಗ್ ಪಂದ್ಯದಿಂದ ಭಾಂಬ್ರಿ ವಂಚಿತರಾಗಿದ್ದರು. ಭಾರತ ತಂಡವು ಕೊರಿಯಾ ವಿರುದ್ಧ 1–3 ಅಂತರದಿಂದ ಸೋಲುಂಡಿದೆ.

ಯುಎಸ್ ಓಪನ್‌ನಲ್ಲಿ ತಮ್ಮ ಪ್ರಧಾನ ಸುತ್ತಿನ ಪಂದ್ಯಕ್ಕೂ ಮುನ್ನ ಭಾಂಬ್ರಿ ಬಲ ತೊಡೆಯ ಸ್ನಾಯುಸೆಳೆತಕ್ಕೆ ಒಳಗಾಗಿದ್ದರು. ಹೀಗಾಗಿ ದಕ್ಷಿಣ ಕೊರಿಯಾ ವಿರುದ್ಧದ ಪಂದ್ಯದಿಂದ ಹೊರಗುಳಿದಿದ್ದರು.

‘‘ಭಾಂಬ್ರಿ ಅವರು ಸಂಪೂರ್ಣ ಚೇತರಿಸಿಕೊಂಡಿದ್ದು, ತಮ್ಮ ಫಿಟ್ನೆಸ್ ಸರ್ಟಿಫಿಕೇಟನ್ನು ಸಲ್ಲಿಸಿದ್ದಾರೆ’’ ಎಂದು ಎಐಟಿಎ ಗೌರವ ಕಾರ್ಯದರ್ಶಿ ಸುಂದರ್ ಅಯ್ಯರ್ ತಿಳಿಸಿದ್ದಾರೆ.

ಭಾಂಬ್ರಿ ಹಾಗೂ ಮೈಕಲ್ ವೀನಸ್ ಯುಎಸ್ ಓಪನ್‌ನ ಮೊದಲ ಸುತ್ತಿನಲ್ಲಿ ಅಮೆರಿಕದ ಜೋಡಿ ರಿಯಾನ್ ಸೆಗರ್ಮನ್ ಹಾಗೂ ಪ್ಯಾಟ್ರಿಕ್ ವಿರುದ್ಧ 6–7, 6–7 ಸೆಟ್‌ಗಳಿಂದ ಸೋತು ನಿರ್ಗಮಿಸಿದ್ದರು.

ಭಾರತವು ಜಪಾನ್‌ನಲ್ಲಿ ಶನಿವಾರ ಆರಂಭವಾಗಿರುವ ಏಶ್ಯನ್ ಗೇಮ್ಸ್‌ಗೆ ಏಳು ಸದಸ್ಯರ ಟೆನಿಸ್ ತಂಡವನ್ನು ಕಳುಹಿಸಿಕೊಟ್ಟಿದೆ. ಏಕೈಕ ಸಿಂಗಲ್ಸ್ ಸ್ಪರ್ಧೆಯಲ್ಲಿ ಸುಮಿತ್ ನಾಗಲ್ ಇದ್ದಾರೆ. ಎನ್. ಶ್ರೀರಾಮ್ ಬಾಲಾಜಿ–ಅನಿರುದ್ಧ ಚಂದ್ರಶೇಖರ್ ಹಾಗೂ ಡಿಕೆ ಸುರೇಶ್–ಯೂಕಿ ಭಾಂಬ್ರಿ ಅವರು ಪುರುಷರ ಡಬಲ್ಸ್ ತಂಡದಲ್ಲಿದ್ದಾರೆ. ಅಂಕಿತಾ ರೈನಾ–ಋತುಜಾ ಭೋಂಸ್ಲೆ ಮಹಿಳೆಯರ ಡಬಲ್ಸ್ ತಂಡದಲ್ಲಿದ್ದಾರೆ.