38 ತಿಂಗಳ ಹಿಂಬಾಕಿ ವೇತನಕ್ಕೆ ಆಗ್ರಹಿಸಿ ಸಾರಿಗೆ ನೌಕರರಿಂದ ‘ಬೆಂಗಳೂರು ಚಲೋ’; ಬೇಡಿಕೆಗಳ ಕುರಿತು ತೀರ್ಮಾನಿಸಲು ಮಾ.2ರವರೆಗೆ ಸರಕಾರಕ್ಕೆ ಗಡುವು

ಬೆಂಗಳೂರು : 2020ರ ಜನವರಿಯಿಂದ 2023ರ ಫೆ.28ರ ವರೆಗಿನ 38 ತಿಂಗಳ ಹಿಂಬಾಕಿ ವೇತನ, ದಿನ ಭತ್ಯೆ ಹೆಚ್ಚಳ ಸೇರಿದಂತೆ ವಿವಿಧ ಬೇಡಿಕೆಗಳ ಈಡೇರಿಕೆಗಾಗಿ ಆಗ್ರಹಿಸಿ, ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮಗಳ ಕಾರ್ಮಿಕ ಸಂಘಟನೆಗಳ ಜಂಟಿ ಕ್ರಿಯಾ ಸಮಿತಿಯ ನೇತೃತ್ವದಲ್ಲಿ ಸಾರಿಗೆ ನೌಕರರು ನಗರದ ಫ್ರೀಡಂ ಪಾರ್ಕ್‍ನಲ್ಲಿ ಗುರುವಾರ ‘ಬೆಂಗಳೂರು ಚಲೋ’ ನಡೆಸಿ, ಸರಕಾರದ ವಿರುದ್ದ ಆಕ್ರೋಶ ವ್ಯಕ್ತಪಡಿಸಿದರು.

ಕೆಎಸ್ಸಾರ್ಟಿಸಿ ಸ್ಟಾಫ್ ಆಂಡ್ ವರ್ಕರ್ಸ್ ಫೆಡರೇಷನ್‍ನ ವಿಜಯಬಾಸ್ಕರ್ ಡಿ.ಎ. ಮಾತನಾಡಿ, ‘ನಾವು 38 ತಿಂಗಳ ಹಿಂಬಾಕಿಯನ್ನು ಕೇಳಿದರೆ ಸರಕಾರ 26 ತಿಂಗಳ ಹಿಂಬಾಕಿ ಕೊಡುತ್ತೇವೆ ಎಂದು ಹೇಳಿದೆ. ಸರಕಾರಕ್ಕೂ ನಮಗೂ ಏನು ವ್ಯತ್ಯಾಸವೆಂದರೆ, ಕೇವಲ 521ಕೋಟಿ ರೂ. ಅದು ಸರಕಾರಕ್ಕೆ ದೊಡ್ಡದಲ್ಲದಿದ್ದರೂ, ಸಾರಿಗೆ ನೌಕರರಿಗೆ ದೊಡ್ಡದು. ಸಾರಿಗೆ ಸಂಸ್ಥೆಗಳಿಗೆ 35ರಿಂದ 40 ವರ್ಷ ದುಡಿದು, ಕೋವಿಡ್ ಸಮಯದಲ್ಲಿ ಮರಣಹೊಂದಿದರೋ ಅಂತವರಿಗೆ ಹಿಂಬಾಕಿಯನ್ನು ನಿರಾಕರಣೆ ಮಾಡುತ್ತಿರುವುದು ನ್ಯಾಯವೇ?’ ಎಂದು ಪ್ರಶ್ನಿಸಿದರು.

ಅತ್ಯಂತ ಹೆಚ್ಚು ಬಜೆಟ್ ಮಂಡನೆ ಮಾಡಿರುವ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಈ ಬಾರಿ ಮಾ.6ಕ್ಕೆ ಬಜೆಟ್ ಮಂಡಿಸುತ್ತಿದ್ದು, 4 ಲಕ್ಷದ 50 ಸಾವಿರ ಕೋಟಿ ರೂ., ದಕ್ಷಿಣ ಭಾರತದಲ್ಲೇ ಅತೀ ದೊಡ್ಡ ಬಜೆಟ್ ಅಂತಹ ದೊಡ್ಡ ಬಜೆಟ್‍ನಲ್ಲಿ ಸಾರಿಗೆ ನೌಕರರಿಗೆ ಕೇವಲ 521ಕೋಟಿ ರೂ.ಗೆ ಯಾಕೆ ಚೌಕಾಸಿ ಮಾಡಬೇಕು ಎಂದು ಅವರು ಕೇಳಿದರು.

2024ರ ಜ.1ರಿಂದ ವೇತನ ಪರಿಷ್ಕರಣೆಯಾಗಬೇಕು ಎನ್ನುವುದು ನಮ್ಮ ಮತ್ತೊಂದು ಬೇಡಿಕೆ, ಅದಕ್ಕೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ಮುಂದಿನ ಒಪ್ಪಂದ 2027ರ ಮಾ.1ಕ್ಕೆ ಎಂದು ಹೇಳಿದ್ದರು. ಅದೇ ನಿಲುವಿಗೆ ಗಟ್ಟಿಯಾಗಿ ನಿಂತಿದ್ದರೆ, ಅದನ್ನು ಒಪ್ಪದಿದ್ದರೂ ಮೆಚ್ಚಿಕೊಳ್ಳುತ್ತಿದ್ದೆವು. ಕಾರ್ಮಿಕರ ತಾಳ್ಮೆ ಪರೀಕ್ಷೆ ಮಾಡಬೇಡಿ. ನಾವು ಬಹಳ ಸ್ಪಷ್ಟವಾಗಿದ್ದೇವೆ. ಹೋರಾಟ ನಮಗೆ ಗೆಲುವು ತಂದು ಕೊಡುತ್ತದೆ ಎಂದು ತಿಳಿಸಿದರು.

ಹೋರಾಟಗಾರ ಡಾ.ಸಿದ್ದನಗೌಡ ಪಾಟೀಲ್ ಮಾತನಾಡಿ, ಇತ್ತೀಚಿಗೆ ಮುಖ್ಯಮಂತ್ರಿ ಸಿದ್ದರಾಮಯ್ಯ ಬಜೆಟ್ ಕುರಿತು ರೈತರ ಅಭಿಪ್ರಾಯ ಕೇಳಲು ಸಭೆ ಕರೆದಿದ್ದರು. ಅದಕ್ಕೆ ನಾವು ಅಭಿನಂದನೆಗಳನ್ನು ಸಲ್ಲಿಸಿದ್ದೇವೆ. ಆದರೆ ಕಾರ್ಮಿಕ ನಾಯಕರನ್ನು ಬಜೆಟ್ ಪೂರ್ವಭಾವಿ ಸಭೆಗೆ ಕರೆದಿಲ್ಲ. ಅನಂತ್ ಸುಬ್ಬರಾವ್ ಅವರು ನಿಧನವಾದಾಗ ಸರಕಾರ ಗೌರವ ಸಲ್ಲಿಸಿದೆ. ಅದರಂತೆ ಅವರ ಆಶಯಗಳನ್ನು ಪೂರೈಸಿ ಗೌರವ ಸಲ್ಲಿಸಬೇಕಿದೆ ಎಂದು ತಿಳಿಸಿದರು.

ಹೋರಾಟದ ಸ್ಥಳಕ್ಕೆ ಆಗಮಿಸಿದ ಕೆಎಸ್ಸಾರ್ಟಿಸಿ ವ್ಯವಸ್ಥಾಪಕ ನಿರ್ದೇಶಕ ಅಕ್ರಂ ಪಾಷ ಮಾತನಾಡಿ, ‘ನಾನು ಸಂಸ್ಥೆಗೆ ವ್ಯವಸ್ಥಾಪಕ ನಿರ್ದೇಶಕನಾಗಿ ಬಂದ ಮೇಲೆ ಸಾರಿಗೆ ನೌಕರರ ಬೇಡಿಕೆಗಳಿಗೆ ನನ್ನ ಹಂತದಲ್ಲಿ ಏನೇನು ಪರಿಹಾರ ಆಗಬೇಕಿತ್ತು ಅದನ್ನೆಲ್ಲ ಮಾಡಿದ್ದೇನೆ. ಸುಮಾರು 100ಕೋಟಿ ರೂ. ಗ್ರ್ಯಾಚುಟಿ ಬಾಕಿ ಇತ್ತು. ಅದನ್ನು ಬಿಡುಗಡೆ ಮಾಡಿದ್ದೇವೆ ಎಂದು ಹೇಳಿದರು.

ವೇತನ ಪರಿಷ್ಕರಣೆ ಸೇರಿದಂತೆ ಇತರ ಬೇಡಿಕೆಗಳನ್ನು ಸರಕಾರದ ಹಂತದಲ್ಲಿ ಮೂರು ಬಾರಿ ಚರ್ಚೆಯಾಗಿದೆ. ಆರ್ಥಿಕ ಸ್ಥಿತಿಯನ್ನು ನೋಡಿಕೊಂಡು ಪರಿಹಾರ ಒದಗಿಸಬೇಕಾಗಿದೆ. ಸರಕಾರದಿಂದ 14 ತಿಂಗಳ ಹಿಂಬಾಕಿಗೆ ಆದೇಶವಾಗಿದೆ. ಉಳಿದಂತೆ ಕೋವಿಡ್ ಸಮಯದ 12 ತಿಂಗಳ ವೇತನ ಬಾಕಿಯನ್ನು ನೀಡಲು ಸರಕಾರ ಒಪ್ಪಿಕೊಂಡಿದೆ ಎಂದು ಅವರು ತಿಳಿಸಿದರು.

ಪ್ರತಿಭಟನೆಯಲ್ಲಿ ಸಾರಿಗೆ ನಿಗಮಗಳ ಕಾರ್ಮಿಕ ಸಂಘಟನೆಗಳ ಜಂಟಿ ಕ್ರಿಯಾ ಸಮಿತಿ ಸಂಚಾಲಕ ಜಯದೇವರಾಜ್ ಅರಸ್, ಕಾರ್ಮಿಕ ಮುಖಂಡರಾದ ಕೆ.ಪ್ರಕಾಶ್, ವರಲಕ್ಷ್ಮೀ, ದಲಿತ ಮುಖಂಡ ಆರ್. ಮೋಹನ್‍ರಾಜ್ ಸೇರಿದಂತೆ ಸಾವಿರಾರು ಸಾರಿಗೆ ಕಾರ್ಮಿಕರು ಭಾಗವಹಿಸಿದ್ದರು.