ಉದ್ಯೋಗ ಖಾತ್ರಿ ಯೋಜನೆ | ಅರ್ಥವೇ ಇಲ್ಲದೆ ಕೇಂದ್ರದ ಮೋದಿ ಸರಕಾರ ‘ಗಾಂಧಿ ಹೆಸರು’ ಕೈಬಿಟ್ಟಿದೆ : ಸಿಎಂ ಡಿ.ಕೆ.ಶಿವಕುಮಾರ್
ಮಹಾತ್ಮ ಗಾಂಧಿ ಸೇವಾ ಪ್ರಶಸ್ತಿ ಪ್ರದಾನ ಸಮಾರಂಭ
ಬೆಂಗಳೂರು : ಅರ್ಥವೇ ಇಲ್ಲದೆ, ಯಾವುದೇ ಮಾಹಿತಿಯೂ ನೀಡದೆ ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರಕಾರ ಮಹಾತ್ಮ ಗಾಂಧಿ ಅವರ ಹೆಸರನ್ನು ವಿವಿಧ ಯೋಜನೆಗಳಿಂದ ಕೈಬಿಟ್ಟಿದೆ. ಈ ಬಗ್ಗೆ ಈ ಬಗ್ಗೆ ವಿಸ್ತೃತ ಚರ್ಚೆ ನಡೆಯುವ ಅಗತ್ಯವಿದೆ ಎಂದು ಮುಖ್ಯಮಂತ್ರಿ ಡಿ.ಕೆ.ಶಿವಕುಮಾರ್ ಹೇಳಿದ್ದಾರೆ.
ಶುಕ್ರವಾರ ನಗರದ ಕುಮಾರಕೃಪಾದಲ್ಲಿರುವ ಗಾಂಧಿ ಭವನ ಸಭಾಂಗಣದಲ್ಲಿ ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಹಾಗೂ ಕರ್ನಾಟಕ ಗಾಂಧಿ ಸ್ಮಾರಕ ನಿಧಿ ಸಹಯೋಗದಲ್ಲಿ ಮಹಾತ್ಮ ಗಾಂಧೀಜಿಯವರ 157ನೆ ಜಯಂತಿ ಅಂಗವಾಗಿ ಗಾಂಧಿ ಆಯೋಜಿಸಿದ್ದ ಗಾಂಧಿ ಸೇವಾ ಪ್ರಶಸ್ತಿ-2026 ಪ್ರದಾನ ಹಾಗೂ ಕೊಪ್ಪಳ ಜಿಲ್ಲೆಯ 11 ವ್ಯಸನಮುಕ್ತ ಗ್ರಾಮಗಳಿಗೆ ಗಾಂಧಿ ಪುರಸ್ಕಾರ ನೀಡಿ ಅವರು ಮಾತನಾಡಿದರು.
ಗಾಂಧೀಜಿ ಹುತಾತ್ಮರಾದ ಸಂದರ್ಭದಲ್ಲಿ ವಿಶ್ವ ಸಂಸ್ಥೆಯ ಬಹುತೇಕ ಎಲ್ಲ ಸದಸ್ಯ ರಾಷ್ಟ್ರಗಳು ಧ್ವಜವನ್ನು ಅರ್ಧಕ್ಕೆ ಇಳಿಸಿ ಗೌರವ ನೀಡಿದ್ದವು. ಆದರೆ ಈಗಿನ ಕೇಂದ್ರ ಸರಕಾರವು ಉದ್ಯೋಗ ಖಾತ್ರಿ ಯೋಜನೆಯಿಂದ ಗಾಂಧೀಜಿಯ ಹೆಸರನ್ನು ಕೈಬಿಟ್ಟಿದೆ. ಇದಕ್ಕೆ ಕಾರಣವೂ ನೀಡಿಲ್ಲ. ಅವರ ನಡೆಯೂ ಅರ್ಥವಾಗಿಲ್ಲ. ಈ ಯೋಜನೆಯಲ್ಲಿ ಗಾಂಧೀಜಿಯ ಹೆಸರಿದ್ದರೆ ಏನು ತೊಂದರೆ ಆಗುತ್ತಿತ್ತು? ದೇಶವನ್ನು ಆಳುತ್ತಿರುವ ನಾಯಕರಿಗೆ ಅವರ ಹೆಸರು ತೆಗೆಯಬೇಕು ಎಂದು ಏಕೆ ಅನಿಸಿತು. ಈಗ ಯೋಜನೆಗೆ ವಿಬಿಜಿ ರಾಮ್ ಜಿ ಹೆಸರು ಬಂದಿದೆ. ಈ ಬಗ್ಗೆ ಚರ್ಚೆ ಆಗುವ ಅಗತ್ಯವಿದೆ ಎಂದು ಪ್ರತಿಪಾದಿಸಿದರು
ಮಹಾತ್ಮ ಗಾಂಧೀಜಿಯವರ ವಿಚಾರಗಳು ಭಾರತ ದೇಶಕ್ಕೆ ಮಾತ್ರವಲ್ಲ ,ಪ್ರಪಂಚ ಹಾಗೂ ಸಮಸ್ತ ಮನುಕುಲಕ್ಕೆ ಇಂದಿಗೂ ಪ್ರಸ್ತುತವಾಗಿವೆ. ಗಾಂಧೀಜಿಯವರ ವ್ಯಕ್ತಿತ್ವ ಮತ್ತು ಘನತೆಗೆ ಹೋಲಿಕೆಯಾಗಬಲ್ಲ ಮತ್ತೊಂದು ವ್ಯಕ್ತಿತ್ವವಿಲ್ಲ.ಜಗತ್ತಿನ ವಿವಿಧ ರಾಷ್ಟ್ರಗಳಲ್ಲಿ ಗಾಂಧೀಜಿ ಪ್ರತಿಮೆ ಸ್ಥಾಪಿಸಲಾಗಿದೆ. ವಿಶ್ವವಿದ್ಯಾಲಯಗಳಲ್ಲಿ ಗಂಭೀರ ಚರ್ಚೆಗಳು ನಡೆದಿವೆ. ವಿಶ್ವದ ಎಲ್ಲ ನಾಯಕರು ಗಾಂಧೀಜಿಯನ್ನು ಮಾದರಿಯಾಗಿ ಸ್ವೀಕರಿಸಿದ್ದಾರೆ. ನಾವು ಈ ದೇಶದಲ್ಲಿ ಹುಟ್ಟಿ ಬದುಕುತ್ತಿರುವುದೇ ನಮ್ಮೆಲ್ಲರ ಭಾಗ್ಯ ಎಂದು ಅವರು ನುಡಿದರು.
ಗಾಂಧಿ ಭಾರತ ಶತಮಾನೋತ್ಸವ ಸಮಿತಿ ಅಧ್ಯಕ್ಷರೂ ಆದ ಮಾಜಿ ಸಚಿವ ಎಚ್.ಕೆ.ಪಾಟೀಲ್ ಮಾತನಾಡಿ, ಕೊಪ್ಪಳ ಜಿಲ್ಲೆಯಲ್ಲಿ ಸ್ವಯಂಪ್ರೇರಿತವಾಗಿ ವ್ಯಸನಮುಕ್ತ ಗ್ರಾಮಗಳನ್ನಾಗಿಸಲು ಪ್ರಯತ್ನಿಸುತ್ತಿರುವವರ ಕಾಯಕವನ್ನು ಸಮಾಜ ಮೆಚ್ಚುಗೆ ವ್ಯಕ್ತಪಡಿಸಬೇಕು ಎಂದು ಹೇಳಿದರು.
ಗಾಂಧಿ ಸೇವಾ ಪ್ರಶಸ್ತಿ ಸ್ವೀಕರಿಸಿದ ಮಾತನಾಡಿದ ಡಾ.ವೂಡೇ ಪಿ.ಕೃಷ್ಣ, ಮಹಾತ್ಮ ಗಾಂಧಿಜಿಯವರ ಹೆಸರಿನ ಪ್ರಶಸ್ತಿ ದೊರೆತಿರುವುದು ಜವಾಬ್ದಾರಿ ಹೆಚ್ಚಿಸಿದೆ. ಗಾಂಧೀಜಿಯವರ ವಿಚಾರಗಳನ್ನು ಯುವ ಜನಾಂಗಕ್ಕೆ ದಾಟಿಸಬೇಕು. ಮಹಾತ್ಮ ಗಾಂಧೀಜಿಯವರನ್ನು ತಪ್ಪಾಗಿ ಅರ್ಥೈಸುವ ವ್ಯವಸ್ಥಿತ ಪ್ರಯತ್ನಗಳು ನಡೆಯುತ್ತಿವೆ. ಗಾಂಧೀಜಿಯವರನ್ನು ಸಂಪೂರ್ಣವಾಗಿ ಓದದೇ,ಅರಿಯದೇ ಟೀಕಿಸಬಾರದು ಎಂದರು.
ಇದೇ ವೇಳೆ ಪ್ರಶಸ್ತಿ ಮೊತ್ತ 5 ಲಕ್ಷ ರೂ.ಗಳನ್ನು ಕರ್ನಾಟಕ ಗಾಂಧಿ ಸ್ಮಾರಕ ನಿಧಿಗೆ ಅರ್ಪಿಸುವುದಾಗಿ ಪ್ರಕಟಿಸಿದರು. ಸಮಾರಂಭದ ಅಧ್ಯಕ್ಷತೆಯನ್ನು ಸಚಿವ ರಿಝ್ವಾನ್ ಅರ್ಶದ್‍ಹಿಸಿದ್ದರು. ಸಚಿವ ಎಚ್.ಸಿ.ಬಾಲಕೃಷ್ಣ, ಕರ್ನಾಟಕ ರಾಜ್ಯ ಮದ್ಯಪಾನ ಸಂಯಮ ಮಂಡಳಿಯ ಅಧ್ಯಕ್ಷ ಶರಣಪ್ಪ ಸಲಾದಪುರ, ವಾರ್ತಾ ಇಲಾಖೆಯ ಕಾರ್ಯದರ್ಶಿ ಜೆ.ಮಂಜುನಾಥ್, ಆಯುಕ್ತ ಎಂ.ಎನ್.ಅನುಚೇತ್ ಮತ್ತಿತರರು ಉಪಸ್ಥಿತರಿದ್ದರು.
ದತ್ತಿ ಪ್ರಶಸ್ತಿ ಪ್ರದಾನ: ಮಂಜುನಾಥ್ ಚಾಂದ್ ಅವರ ‘ಮಹಾತ್ಮನ ಮಗಳು' ಹಾಗೂ ರಮೇಶ್ ಬಿಳಿಕೆರೆ ಅವರ ‘ಮರೆಯಲಾಗದ ಮಾಣಿಕ್ಯ ಟಿ.ಎಸ್.ಸುಬ್ಬಣ್ಣ' ಕೃತಿಗೆ ಜಯಲಕ್ಷ್ಮೀ ಹೊ.ಶ್ರೀನಿವಾಸಯ್ಯ ದತ್ತಿ ಪ್ರಶಸ್ತಿ, ಮೈಸೂರಿನ ಕಡಕೊಳದ ಶೇಷಾದ್ರಿಪುರಂ ಇನ್ ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿಯ ಎನ್‍ಎಸ್‍ಎಸ್ ಅಧಿಕಾರಿ ಆರ್.ರಾಘವೇಂದ್ರ ಹಾಗೂ ಬೆಳಗಾವಿ ಜಿಲ್ಲೆ ಕುಡಚಿಯ ಬಿ.ಶಂಕರಾನಂದ ಕಾಲೇಜಿನ ಎನ್‍ಎಸ್‍ಎಸ್ ಅಧಿಕಾರಿ ಸುರೇಖಾ ಅಶೋಕ ಬೆಳಗಲಿ ಅವರಿಗೆ ಪ್ರೊ.ಜಿ.ಬಿ.ಶಿವರಾಜು ಅತ್ಯುತ್ತಮ ಎನ್‍ಎಸ್‍ಎಸ್ ಪ್ರಶಸ್ತಿ, ರಾಜ್ಯ ಮಟ್ಟದ ಉತ್ತಮ ಎನ್‍ಎಸ್ ಎಸ್ ಸ್ವಯಂ ಸೇವಕ ಪುರಸ್ಕಾರವನ್ನು ತುಮಕೂರಿನ ಜಿ.ಎ.ಸಿದ್ದೇಶ್, ಮಸ್ಕಿಯ ಜೆ.ನಾಗರಾಜ, ಮಂಡ್ಯದ ಚೈತ್ರಾ ಸಿ, ಹಾಗೂ ರಾಯಚೂರಿನ ಜೆ.ಎಸ್.ಸುಷ್ಮಾ ಅವರಿಗೆ ಪ್ರದಾನಿಸಲಾಯಿತು.
— CM of Karnataka (@CMofKarnataka) October 2, 2026
ವಾರ್ತಾ ಮತ್ತು ಸಾರ್ವಜನಿಕ ಸಂಪರ್ಕ ಇಲಾಖೆ ಪ್ರಕಟಿಸಿದ ವಾರ್ತಾ ಜನಪದ ಹಾಗೂ ಮಾರ್ಚ್ ಆಫ್ ಕರ್ನಾಟಕ ಗಾಂಧಿ ದರ್ಶನ ವಿಶೇಷ ಸಂಚಿಕೆಗಳು, ಕೆ.ಎಸ್.ನರಸಿಂಹಸ್ವಾಮಿಯವರ ಅನುವಾದಿತ ಕೃತಿ ‘ನನ್ನ ಕನಸಿನ ಭಾರತ ಮತ್ತು ಮೋಹನ ಮಾಲೆ', ಬಿಬಿಸಿ ಬಾನುಲಿ ಪ್ರಸಾರದ ನಾಲ್ಕು ಕಾರ್ಯಕ್ರಮಗಳ ಕುರಿತು ಫ್ರಾನ್ಸಿಸ್ ವ್ಯಾಟ್ಸನ್ ಮತ್ತು ಮೌರಿಸ್ ಬ್ರೌನ್ ಅವರ ಕೃತಿ 'ಗಾಂಧಿ ಸಂಕಥನ: ಬಹುಮುಖ ನೋಟ' (ಅನುವಾದ ಮಹಾಬಲೇಶ್ವರ ರಾವ್) ಹಾಗೂ ಅರವಿಂದ ಚೊಕ್ಕಾಡಿಯವರ 'ಆಸುಪಾಸಿನಲ್ಲಿ ಗಾಂಧಿ' ಕೃತಿಗಳನ್ನು ಲೋಕಾರ್ಪಣೆಗೊಳಿಸಲಾಯಿತು.
