HSRP ವಿರುದ್ಧ ಲೋಕಾಯುಕ್ತಕ್ಕೆ ದೂರು: ಸಾರಿಗೆ ಇಲಾಖೆಯಿಂದ 700 ಕೋಟಿ ರೂ.ಗಳ ಭ್ರಷ್ಟಚಾರ ಆರೋಪ

ಬೆಂಗಳೂರು: 2019ರ ಎಪ್ರಿಲ್ 1ಕ್ಕೆ ಮೊದಲು ಖರೀದಿಸಿದ ವಾಹನಗಳಿಗೆ ‘ಉನ್ನತ ಸುರಕ್ಷತಾ ನೋಂದಣಿ ಫಲಕ’(ಎಚ್ಎಸ್ಆರ್ ಪಿ) ಕಡ್ಡಾಯವಾಗಿ ಅಳವಡಿಸಬೇಕು ಎಂಬ ಸಾರಿಗೆ ಇಲಾಖೆಯ ಆದೇಶದಿಂದ 700 ಕೋಟಿ ರೂ.ಭ್ರಷ್ಟಚಾರ ನಡೆದಿದೆ ಎಂದು ಆರೋಪಿಸಿ ಅಖಿಲ ಕರ್ನಾಟಕ ವಾಹನ ನಂಬರ್ ಪ್ಲೇಟ್ ತಯಾರಕರು ಮತ್ತು ಮಾರಾಟಗಾರರ ಸಂಘದ ಅಧ್ಯಕ್ಷ ಎಸ್.ಎನ್.ಜಿತೇಂದ್ರ ಲೋಕಾಯುಕ್ತಕ್ಕೆ ಬುಧವಾರ ದೂರು ನೀಡಿದ್ದಾರೆ.

ಕೇಂದ್ರ ಮೋಟಾರು ವಾಹನಗಳ ನಿಯಮಗಳು (ಸಿಎಂವಿಆರ್) 1989ರ ಅನುಸಾರವಾಗಿ ಸಾರಿಗೆ ಇಲಾಖೆಯು ವಾಹನ ತಯಾರಕರು(ಮೂಲ ಸಲಕರಣೆ ತಯಾರಕರು, ಒಇಎಂಗಳು) ಮತ್ತು ಅವರ ವಿತರಕರು ಹಳೆ ವಾಹನಗಳ ಮೇಲೆ ಎಚ್ಎಸ್ಆರ್ ಪಿಗಳನ್ನು ಪೂರೈಸಲು ಮತ್ತು ಕಳಪೆ ಗುಣಮಟ್ಟದ ವಸ್ತುಗಳನ್ನು ನಿಯಂತ್ರಿಸಲು ಮತ್ತು ಪರಿಶೀಲಿಸಲು ಮಾತ್ರ ಅನುಮತಿ ನೀಡಿದೆ. ಒಇಎಂಗಳು ಮತ್ತು ಅವುಗಳ ವಿತರಕರು ಹಳೆಯ ವಾಹನಗಳ ಮಾಲಕರಿಗೆ ಎಚ್ಎಸ್ಆರ್ ಪಿಗಳನ್ನು ಮಾರಾಟ ಮಾಡಲು ಮತ್ತು ಅಳವಡಿಸಲು ಅನುಮತಿಸಿದ್ದು, ಎಚ್ಎಸ್ಆರ್ ಪಿ ತಯಾರಕರು ಸೇರಿದಂತೆ ಉಳಿದ ಯಾವುದೇ ಸಂಸ್ಥೆ ನೇರವಾಗಿ ಹಳೆಯ ವಾಹನಗಳ ಮಾಲಕರಿಗೆ ಮಾರಾಟ ಮಾಡುವಂತಿಲ್ಲ.

ಸಿಎಂವಿಆರ್ 1989ರ ನಿಯಮ 50 ಮತ್ತು ಮೋಟಾರು ವಾಹನಗಳ ಆದೇಶ, 2018ರ ಷರತ್ತು 4 ಮತ್ತು 5 ನಿರ್ದಿಷ್ಟವಾಗಿ ಒಇಎಂಗಳು ಅವರು ವಾಣಿಜ್ಯ ಒಪ್ಪಂದಗಳನ್ನು ಹೊಂದಿರುವ ಎಚ್ಎಸ್ಆರ್ ಪಿ ತಯಾರಕರಿಂದ ಹಳೆಯ ಮತ್ತು ಹೊಸ ವಾಹನಗಳಿಗೆ ಖಾಲಿ ನೋಂದಣಿ ಫಲಕಗಳನ್ನು ಖರೀದಿಸಬೇಕು. ಈ ಫಲಕಗಳ ಮೇಲೆ ವಿತರಕರು ತಮ್ಮ ಸ್ವಂತ ಮೂಲಸೌಕರ್ಯವನ್ನು ಬಳಸಿಕೊಂಡು ನೋಂದಣಿ ಸಂಖ್ಯೆಯನ್ನು ಉಬ್ಬುಗೊಳಿಸಿ, ನಂತರ ಅದನ್ನು ಹಳೆಯ ವಾಹನಗಳ ಮಾಲಕರಿಗೆ ಎಚ್ಎಸ್ಆರ್ ಪಿಗಳನ್ನು ಮಾರಾಟ ಮಾಡಬೇಕು. ಆದರೆ ಓಇಎಂಗಳಾಗಲಿ ಅಥವಾ ಅವುಗಳ ವಿತರಕರಾಗಲಿ ಹಳೆಯ ವಾಹನಗಳಲ್ಲಿ ಎಚ್ಎಸ್ಆರ್ ಪಿಗಳನ್ನು ಪೂರೈಸುತ್ತಿಲ್ಲ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಅದೇ ಅಧಿಸೂಚನೆಯಿಂದ ವಿಧಿಸಲಾದ ನಿಷೇಧಕ್ಕೆ ವಿರುದ್ಧವಾಗಿ ಅಧಿಸೂಚನೆಗೆ ನುಸುಳಿರುವ ಕೆಲವು ನಿಬಂಧನೆಗಳ ಲಾಭವನ್ನು ಪಡೆಯುವ ಮೂಲಕ, ನೋಂದಣಿ ಫಲಕಗಳನ್ನು ಪೂರೈಸಲು ಒಇಎಂಗಳೊಂದಿಗೆ ವಾಣಿಜ್ಯ ಒಪ್ಪಂದವನ್ನು ಹೊಂದಿರುವ ಎಚ್ಎಸ್ಆರ್ ಪಿ ತಯಾರಕರ ಸಣ್ಣ ಕಾರ್ಟೆಲ್ ನೇರವಾಗಿ ಎಚ್ಎಸ್ಆರ್ ಪಿಗಳನ್ನು ಮಾಲಕರಿಗೆ ಮಾರಾಟ ಮಾಡುತ್ತಿದೆ. ಹಳೆಯ ವಾಹನಗಳಿಗೆ ದುಬಾರಿ ಬೆಲೆ ವಿಧಿಸಲಾಗುತ್ತಿದೆ ಎಂದು ಅರ್ಜಿದಾರರು ದೂರಿನಲ್ಲಿ ಆರೋಪಿಸಿದ್ದಾರೆ.

ಸಾರಿಗೆ ಇಲಾಖೆಯ ನಾಲ್ವರು ಅಧಿಕಾರಿಗಳು ಸುಮಾರು 2 ಕೋಟಿ ಹಳೆಯ ವಾಹನಗಳ ಮಾಲಕರಿಗೆ ಕಡಿಮೆ ದರದಲ್ಲಿ ಎಚ್ಎಸ್ಆರ್ ಪಿಯನ್ನು ಪಡೆದುಕೊಳ್ಳುವುದನ್ನು ಖಚಿತಪಡಿಸಿಕೊಳ್ಳುವ ಕರ್ತವ್ಯಕ್ಕೆ ಬದ್ಧರಾಗಿದ್ದಾರೆ. ಬದಲಿಗೆ, ಅವರು ಕೆಲವು ಎಚ್ಎಸ್ಆರ್ ಪಿ ತಯಾರಕರಿಗೆ ಯಾವುದೇ ಬೆಲೆಗೆ ಮಾರಾಟ ಮಾಡಲು ಅನುಮತಿ ನೀಡುತ್ತಿದ್ದಾರೆ. ಆಡಳಿತಾತ್ಮಕ ನಿಷ್ಕ್ರಿಯತೆಯಿಂದಾಗಿ, ಕೆಲವು ಎಚ್ಎಸ್ಆರ್ ಪಿ ತಯಾರಕರು, ವಾಹನ ತಯಾರಕರು ಮತ್ತು ನಾಲ್ವರು ಅಧಿಕಾರಿಗಳನ್ನು ಒಳಗೊಂಡ ಕೂಟ ಸುಮಾರು ರೂ.ಗಳ ಅಕ್ರಮ ಲಾಭವನ್ನು ಪಡೆಯುತ್ತಿದೆ. ಈ ಅಕ್ರಮದಿಂದ 500 ಕೋಟಿ ರೂ ನಷ್ಟವಾಗಿದೆ ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

ಭ್ರಷ್ಟಚಾರ ಮತ್ತು ಕರ್ತವ್ಯಲೋಪ ಆರೋಪದಡಿ ಸಾರಿಗೆ ಇಲಾಖೆಯ ನಾಲ್ವರು ಹಿರಿಯ ಅಧಿಕಾರಿಗಳ ವಿರುದ್ಧ ದೂರು ದಾಖಲಾಗಿದೆ. ಸಾರ್ವಜನಿಕರ ಅನುಕೂಲಕ್ಕಾಗಿ ಇರಬೇಕಾದ ಅಧಿಕಾರಿಗಳು ತಮ್ಮ ಸ್ಥಾನವನ್ನು ದುರುಪಯೋಗಪಡಿಸಿಕೊಂಡು, ಸುಮಾರು ಎರಡು ಕೋಟಿ ಹಳೆಯ ವಾಹನಗಳ ಮಾಲಕರನ್ನು ಹೆಚ್ಚಿನ ದರದಲ್ಲಿ ಎಚ್ಎಸ್ಆರ್ ಪಿ ಖರೀದಿಸುವಂತಹ ಪರಿಸ್ಥಿತಿ ನಿರ್ಮಿಸಿದ್ದಾರೆ ಎಂದು ಜಿತೇಂದ್ರ ಅವರು ಅರ್ಜಿಯಲ್ಲಿ ಆರೋಪಿಸಿದ್ದಾರೆ.