ಬೆಂಗಳೂರಿನಲ್ಲಿ ಇಂಟರ್ನೆಟ್ ವ್ಯತ್ಯಯ ಸಾಧ್ಯತೆ; ಕಾರಣ ಇಲ್ಲಿದೆ…

ಬೆಂಗಳೂರು: ತಂತ್ರಜ್ಞಾನ ನಗರ ಎಂಬ ಹಿರಿಮೆಗೆ ಪಾತ್ರವಾಗಿರುವ ಬೆಂಗಳೂರಿನ ತಂತ್ರಜ್ಞಾನ ಕಂಪನಿಗಳ ಕಾರ್ಯನಿರ್ವಹಣೆ ಹಾಗೂ ಮನೆಯಿಂದಲೇ ಉದ್ಯೋಗ ನಿರ್ವಹಿಸುತ್ತಿರುವ ಉದ್ಯೋಗಿಗಳ ಮೇಲೆ ಅಂತರ್ಜಾಲ ಸೇವೆ ವ್ಯತ್ಯಯದಿಂದ ಪ್ರತಿಕೂಲ ಪರಿಣಾಮವಾಗುವ ಸಾಧ್ಯತೆ ಇದೆ. ನಗರದಾದ್ಯಂತ ತನ್ನ ಕಂಬಗಳ ಮೇಲೆ ಅನಧಿಕೃತವಾಗಿ ಹಾಕಲಾಗಿರುವ ಆಪ್ಟಿಕಲ್ ಫೈಬರ್ ಕೇಬಲ್ ಗಳು, ಡಾಟಾ ಕೇಬಲ್ ಗಳು ಹಾಗೂ ಡಿಶ್ ಕೇಬಲ್ ಗಳನ್ನು ತೆಗೆದು ಹಾಕುವ ನಿರ್ಧಾರಕ್ಕೆ ಬೆಂಗಳೂರು ವಿದ್ಯುಚ್ಛಕ್ತಿ ಸರಬರಾಜು ಕಂಪನಿಯು ಬಂದಿರುವುದರಿಂದ ಈ ಗಂಭೀರ ವ್ಯತ್ಯಯವಾಗುವ ಸಾಧ್ಯತೆ ಇದೆ ಎಂದು ವರದಿಯಾಗಿದೆ.

ತೂಗುಬಿದ್ದಿರುವ ಆಪ್ಟಿಕಲ್ ಫೈಬರ್ ಕೇಬಲ್ ಗಳಿಂದ ವಿದ್ಯುತ್ ಕಂಬಗಳು ಬಿದ್ದು, ಪಾದಚಾರಿಗಳು ಗಾಯಗೊಂಡಿರುವ ಎರಡು ಪ್ರತ್ಯೇಕ ಘಟನೆಗಳ ಹಿನ್ನೆಲೆಯಲ್ಲಿ ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿಯು ಈ ಕ್ರಮಕ್ಕೆ ಮುಂದಾಗಿದೆ. ಮೊದಲ ಘಟನೆಯು ಆಗಸ್ಟ್ 19ರಂದು ಬೆಳ್ಳಂದೂರು ಬಳಿಯ ದೇವರಬಿಸನಹಳ್ಳಿಯಲ್ಲಿ ನಡೆದಿದ್ದು, ವಿದ್ಯುತ್ ಕಂಬವು ಕೆಳಗೆ ಬಿದ್ದಿದ್ದರಿಂದ 23 ವರ್ಷದ ಪಾದಚಾರಿಯೊಬ್ಬರು ಗಾಯಗೊಂಡಿದ್ದರು. ಎರಡನೆ ಘಟನೆಯು ಆಗಸ್ಟ್ 22ರಂದು ಕೋರಮಂಗಲ ಬಳಿಯ ಸದ್ದುಗುಂಟೆಪಾಳ್ಯ ಬಳಿ ನಡೆದಿದ್ದು, ಈ ಘಟನೆಯಲ್ಲಿ 21 ವರ್ಷದ ಕಾಲೇಜು ವಿದ್ಯಾರ್ಥಿಯೊಬ್ಬರು ಗಂಭೀರ ಸ್ವರೂಪದ ಸುಟ್ಟು ಗಾಯಗಳಿಗೆ ಒಳಗಾಗಿದ್ದರು.

ಇದಕ್ಕೆ ಪ್ರತಿಯಾಗಿ, ಎಲ್ಲ ಅನಧಿಕೃತ ಕೇಬಲ್ ಗಳನ್ನು ಇನ್ನು ಒಂದು ವಾರದಲ್ಲಿ ತೆರವುಗೊಳಿಸಲಾಗುವುದು ಎಂಬ ತನ್ನ ನಿರ್ಧಾರವನ್ನು ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ ಪ್ರಕಟಿಸಿದೆ. ಒಂದು ವೇಳೆ ಒಎಫ್ಸಿ ಹಾಗೂ ಡಿಶ್ ಕೇಬಲ್ ನಿರ್ವಾಹಕರು ಈ ನಿಗದಿತ ಅವಧಿಯೊಳಗೆ ತನ್ನ ಸೂಚನೆಯನ್ನು ಅನುಸರಿಸದಿದ್ದರೆ, ತಾನೇ ಈ ವಿಷಯವನ್ನು ಕೈಗೆತ್ತಿಕೊಳ್ಳಬೇಕಾಗುತ್ತದೆ ಹಾಗೂ ಕೇಬಲ್ ಗಳ ತೆರವಿಗೆ ಮುಂದಾಗಬೇಕಾಗುತ್ತದೆ. ಇದರೊಂದಿಗೆ ಸಂಬಂಧಿಸಿದ ಕಾರ್ಯನಿರ್ವಾಹಕರ ವಿರುದ್ಧ ಪ್ರಕರಣಗಳನ್ನೂ ದಾಖಲಿಸಲಾಗುತ್ತದೆ ಎಂದು ಬೆಂಗಳೂರು ವಿದ್ಯುತ್ ಸರಬರಾಜು ಕಂಪನಿ ಎಚ್ಚರಿಕೆ ನೀಡಿದೆ.

ಭವಿಷ್ಯದಲ್ಲಿ ಸಾರ್ವಜನಿಕ ಸುರಕ್ಷತೆಯ ಖಾತ್ರಿ ಹಾಗೂ ಇಂತಹ ಅಪಘಾತಗಳನ್ನು ತಡೆಯುವ ಗುರಿಯನ್ನು ಈ ಕ್ರಮ ಹೊಂದಿದ್ದರೂ, ತಂತ್ರಜ್ಞಾನ ತಾಣವಾಗಿರುವ ಬೆಂಗಳೂರು ನಗರದಲ್ಲಿ ಭಾರಿ ಪ್ರಮಾಣದ ಅಂತರ್ಜಾಲ ಸೇವೆ ವ್ಯತ್ಯಯವಾಗಬಹುದು ಎಂಬ ಆತಂಕಗಳೂ ವ್ಯಕ್ತವಾಗಿವೆ. ಅನಧಿಕೃತ ಕೇಬಲ್ ಗಳ ತೆರವಿನಿಂದ ಅಂತರ್ಜಾಲ ಸೇವೆಯಲ್ಲಿ ವ್ಯತ್ಯಯವಾಗಿದೆ ಎಂದು ಸರ್ಜಾಪುರ ರಸ್ತೆ, ಕಾರ್ಮೆಲಾರಾಮ್ ಹಾಗೂ ಎಚ್ಎಸ್ಆರ್ ಬಡಾವಣೆಯ ನಿವಾಸಿಗಳು ಸೇರಿದಂತೆ ಹಲವಾರು ಪ್ರದೇಶದ ನಿವಾಸಿಗಳು ದೂರಿದ್ದಾರೆ.

2019ರಲ್ಲಿ ಬಿಬಿಎಂಪಿಯು ಇದೇ ರೀತಿಯಲ್ಲಿ ಅನಧಿಕೃತ ಕೇಬಲ್ ಗಳನ್ನು ತೆರವುಗೊಳಿಸಿದ್ದಾಗ, ಹೊರವರ್ತುಲ ರಸ್ತೆ, ಸರ್ಜಾಪುರ ರಸ್ತೆ, ವೈಟ್ ಫೀಲ್ಡ್, ಮಾರತ್ತಹಳ್ಳಿ, ಬೆಳ್ಳಂಡೂರು ಹಾಗೂ ಸರ್ಜಾಪುರಗಳಲ್ಲಿ ಉಂಟಾಗಿದ್ದ ಅಂತರ್ಜಾಲ ಸೇವೆ ವ್ಯತ್ಯಯದಂತೆಯೇ ಈ ಬಾರಿಯೂ ಆಗಬಹುದು ಎಂಬ ಆತಂಕ ಉಂಟಾಗಿದೆ. ಇಂತಹ ಕ್ರಮದ ಕುರಿತು ದೂರಸಂಪರ್ಕ ಹಾಗೂ ಅಂತರ್ಜಾಲ ಸೇವೆ ಪೂರೈಕೆದಾರರಿಗೆ ಮುಂಚಿತವಾಗಿಯೇ ಮಾಹಿತಿ ನೀಡದಿರುವುದರಿಂದ ತೀವ್ರ ಸ್ವರೂಪದ ಅಂತರ್ಜಾಲ ಸೇವೆ ವ್ಯತ್ಯಯವಾಗಿ, ಅದರಿಂದ ಬಳಕೆದಾರರಿಗೆ ಅನನುಕೂಲವಾಗಬಹುದು ಎಂದು ಭಾರತೀಯ ದೂರಸಂಪರ್ಕ ಕಾರ್ಯನಿರ್ವಾಹಕರ ಒಕ್ಕೂಟ(COAI)ವು ಕಳವಳ ವ್ಯಕ್ತಪಡಿಸಿದೆ.