ಕೊಡಗು ಜಿಲ್ಲಾಧಿಕಾರಿ ಕಚೇರಿ ತಡೆಗೋಡೆ ನಿರ್ಮಾಣ ಕಳಪೆ ಆರೋಪ; ಕಾಮಗಾರಿ ಪರಿಶೀಲಿಸಿದ ಲೋಕಾಯುಕ್ತ ಅಧಿಕಾರಿಗಳು

ಮಡಿಕೇರಿ,ಜು.18: ಕೊಡಗು ಜಿಲ್ಲಾಡಳಿತ ಭವನದ ಬಹುಕೋಟಿ ವೆಚ್ಚದ ತಡೆಗೋಡೆ ಕಾಮಗಾರಿ ಕಳಪೆ ಮತ್ತು ಅವೈಜ್ಞಾನಿಕವಾಗಿದೆ ಎಂಬ ದೂರನ್ನು ಆಧರಿಸಿ ಲೋಕಾಯುಕ್ತ ಅಧಿಕಾರಿಗಳು ಮಡಿಕೇರಿಗೆ ಆಗಮಿಸಿ ತಡೆಗೋಡೆ ಪರಿಶೀಲನೆ ನಡೆಸಿದರು. ಬೆಂಗಳೂರು ಲೋಕಾಯುಕ್ತದ ತಾಂತ್ರಿಕ ವಿಭಾಗದ ಕಾರ್ಯಪಾಲಕ ಅಭಿಯಂತರ ಡಿ.ರವಿಶಂಕರ್, ಲೋಕಾಯುಕ್ತದ ಗುಣಮಟ್ಟ ಖಾತ್ರಿ ವಿಭಾಗದ ಸಹಾಯಕ ಕಾರ್ಯಪಾಲಕ ಅಭಿಯಂತರ ಡಿ.ಎಂ. ಗಿರೀಶ್, ಕಿರಿಯ ಅಭಿಯಂತರ ಸುಬ್ಬಯ್ಯ ಹಾಗೂ ವಿನಯ್ ಅವರುಗಳ ತಂಡ ದೂರುದಾರ ತೆನ್ನೀರಾ ಮೈನಾ ಅವರ ಸಮ್ಮುಖದಲ್ಲಿ ಕಾಮಗಾರಿಯನ್ನು ಪರಿಶೀಲನೆ ನಡೆಸಿದರು. ಗುತ್ತಿಗೆದಾರರು ಮತ್ತು ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳಿಂದ ಕಾಮಗಾರಿಯ ಮಾಹಿತಿ ಪಡೆದರು.

ತಡೆಗೋಡೆ ವಿನ್ಯಾಸ, ಬಳಸಲಾದ ತಾಂತ್ರಿಕತೆ, ಕಾಂಕ್ರೀಟ್ ಸ್ಲ್ಯಾಬ್ ಮಾದರಿ, ಜಿಯೋ ಫ್ಯಾಬ್ರಿಕೇಷನ್, ನೈಲ್ಸ್, ಮೆಷ್ ಮತ್ತಿತ್ತರ ವಿಚಾರಗಳ ಕುರಿತು ದಾಖಲಾತಿಗಳನ್ನು ಪರಿಶೀಲನೆಗೆ ಒಳಪಡಿಸಿದರು. ಕಾಮಗಾರಿಗೆ ಸಂಬಂಧಿಸಿದಂತೆ ಗುತ್ತಿಗೆದಾರರಿಗೆ ಪಾವತಿ ಮಾಡಲಾಗಿರುವ ಹಣಕಾಸಿನ ದಾಖಲಾತಿಯನ್ನು ಒದಗಿಸುವಂತೆ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳಿಗೆ ಲೋಕಾಯುಕ್ತ ಅಧಿಕಾರಿಗಳು ಸೂಚಿಸಿದರು.

'ಬೆದರಿಕೆ ಆರೋಪ:'

ಲೋಕಾಯುಕ್ತ ಅಧಿಕಾರಿಗಳ ಜೊತೆ ಮಾತನಾಡಿದ ದೂರುದಾರ ತೆನ್ನೀರಾ ಮೈನಾ, ಲೋಕೋಪಯೋಗಿ ಅಧಿಕಾರಿಗಳು ತಮ್ಮ ಪ್ರಭಾವ ಬಳಸಿ, ತಡೆಗೋಡೆ ಮೂಲ ಗುತ್ತಿಗೆದಾರರಿಗೆ ಬೆದರಿಕೆ ಒಡ್ಡಿ ಕಾಮಗಾರಿಯನ್ನು ಸಬ್ ಕಂಟ್ರಾಕ್ಟ್ ನೀಡುವಂತೆ ಮಾಡಿದ್ದಾರೆ. ಪರಿಣಾಮವಾಗಿ ಕಾಮಗಾರಿಗೆ ಬೇಕಾಗುವ ಕಚ್ಚಾ ವಸ್ತುಗಳ ಪೂರೈಕೆ, ತಡೆಗೋಡೆಗೆ ಮಣ್ಣು ತುಂಬಿಸುವುದು ಸೇರಿದಂತೆ ಇತರೆ ಕಾಮಗಾರಿಗಳನ್ನು ಬೇರೆ ಗುತ್ತಿಗೆದಾರರು ನಿರ್ವಹಿಸಿದ್ದಾರೆ. ಪರಿಣಾಮವಾಗಿ ಕಳೆದ ವರ್ಷದ ಜುಲೈ ತಿಂಗಳಲ್ಲಿ ತಡೆಗೋಡೆ ಸ್ಲ್ಯಾಬ್‍ಗಳು ಒಡೆದು ಇಡೀ ತಡೆಗೋಡೆಯೇ ಅಪಾಯಕ್ಕೆ ಸಿಲುಕುವಂತಾಯಿತು ಎಂದು ಲೋಕಾಯುಕ್ತ ಅಧಿಕಾರಿಗಳಿಗೆ ವಿವರಿಸಿದರು.

'ಅವೈಜ್ಞಾನಿಕ ಕಾಮಗಾರಿ':

ತಡೆಗೋಡೆ ಕಾಮಗಾರಿಯನ್ನು ಕೊಡಗಿನ ಹವಾಮಾನ ಅನುಸರಿಸಿ ಮಾಡಲಾಗಿಲ್ಲ. ಕಾಂಕ್ರೀಟ್ ಸ್ಲ್ಯಾಬ್ ಅಳವಡಿಸುವ ಸಂದರ್ಭ ವಿನ್ಯಾಸದ ನಿಯಮಗಳನ್ನು ಗಾಳಿಗೆ ತೂರಲಾಗಿದೆ. ತಡೆಗೋಡೆ ಮತ್ತು ಸ್ಲ್ಯಾಬ್ ನಡುವಿನ ಅಂತರಕ್ಕೆ ಬೇಕಾಬಿಟ್ಟಿಯಾಗಿ ಮಣ್ಣು ತುಂಬಿಸಲಾಗಿದ್ದು ಅದನ್ನು ಗಟ್ಟಿಗೊಳಿಸಿಲ್ಲ. ತುಂಬಿಸಲಾದ ಮಣ್ಣಿನ ಸಾಂದ್ರತೆ ಶೇ.96ಕ್ಕಿಂತಲೂ ಕಡಿಮೆ ಇದ್ದು, ಜಿಯೋ ಫ್ಯಾಬ್ರಿಕೇಷನ್ ಪ್ರಕ್ರಿಯೆ ನಡೆಸಿಲ್ಲ. ಸ್ಲ್ಯಾಬ್‍ನ ಫಿಲ್ಟರ್ ಮೀಡಿಯಾ ಕ್ರಮಬದ್ದವಾಗಿಲ್ಲ. ಸ್ಲ್ಯಾಬ್ ಪ್ಯಾನೆಲ್, ನೇಯಿಲಿಂಗ್, ರಾಡ್ ಅಳವಡಿಕೆ, ಬೆಲ್ಟ್, ಕೇಬಲ್ ಅಳವಡಿಕೆ ಕ್ರಮಬದ್ದವಾಗಿಲ್ಲ ಎಂದು ತೆನ್ನೀರಾ ಮೈನಾ ಲೋಕಾಯುಕ್ತ ಅಧಿಕಾರಿಗಳ ಗಮನ ಸೆಳೆದರು. ಈ ಸಂದರ್ಭ ಸ್ಥಳದಲ್ಲಿದ್ದ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳು ತಡೆಗೋಡೆ ಸ್ಥಳದಲ್ಲಿ ನೀರಿನ ಒರತೆ ಇದ್ದದ್ದೇ ತಡೆಗೋಡೆ ಕುಸಿಯಲು ಕಾರಣ ಎಂದು ಸಬೂಬು ನೀಡಿದರು. ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿದ ದೂರುದಾರ ಮೈನಾ, ಅಲ್ಲಿ ಯಾವುದೇ ನೀರಿನ ಒರತೆ ಇರಲಿಲ್ಲ, ಇದ್ದರೂ ಕೂಡ ಅದಕ್ಕೆ ತಕ್ಕಂತೆ ವೈಜ್ಞಾನಿಕವಾಗಿ ಕಾಮಗಾರಿ ನಿರ್ವಹಿಸಿಲ್ಲ ಎಂದು ಆರೋಪಿಸಿದರು.

ಪ್ರಯೋಗಾಲಯದಲ್ಲಿ ಮಣ್ಣು ಪರೀಕ್ಷೆ:

ಕಾಮಗಾರಿ ಕ್ರಮಬದ್ದವಾಗಿಲ್ಲ ಎಂಬ ದೂರು ಕೇಳಿ ಬಂದ ಹಿನ್ನೆಲೆಯಲ್ಲಿ ತಡೆಗೋಡೆಗೆ ತುಂಬಿಸಿದ ಮಣ್ಣನ್ನು ಪರಿಶೀಲನೆ ನಡೆಸಲು ಸ್ಥಳದಿಂದ ಸಂಗ್ರಹಿಸಲಾಯಿತು. ದೂರುದಾರ ಮೈನಾ ಸೂಚಿಸಿದ ಸ್ಥಳದಲ್ಲಿ ಒಟ್ಟು 2 ಗುಂಡಿಗಳನ್ನು ಮಾಡಿ ಲೋಕಾಯುಕ್ತ ಅಧಿಕಾರಿಗಳೇ ವೈಜ್ಞಾನಿಕವಾಗಿ ಮಣ್ಣನ್ನು ಸಂಗ್ರಹಿಸಿದರು. ಮಾತ್ರವಲ್ಲದೇ ತಡೆಗೋಡೆಗೆ ಅಳವಡಿಸುವ ಜೆಲ್ಲಿ, ಎಂ.ಸ್ಯಾಂಡ್ ಮಿಶ್ರಿತ ಫಿಲ್ಟರ್ ಮೀಡಿಯಾವನ್ನು ಕೂಡ ಅಧಿಕಾರಿಗಳು ಸಂಗ್ರಹಿಸಿದರು. ಈ ಸ್ಯಾಂಪಲ್‍ಗಳನ್ನು ಬೆಂಗಳೂರು ಲೋಕಾಯುಕ್ತದ ತಾಂತ್ರಿಕ ವಿಭಾಗದ ಪ್ರಯೋಗಾಲಯದಲ್ಲಿ ಪರೀಕ್ಷೆಗೆ ಒಳಪಡಿಸಲಾಗುತ್ತದೆ. ಆ ಮೂಲಕ ಮಣ್ಣಿನ ಸಾಂದ್ರತೆ, ಕಾಮಗಾರಿಗೆ ಬಳಸಲ್ಪಟ್ಟ ಕಚ್ಚಾವಸ್ತುಗಳ ಗುಣಮಟ್ಟ ಪರಿಶೀಲನೆಗೆ ಒಳಪಡಿಸಲಾಗುತ್ತದೆ ಎಂದು ಲೋಕಾಯುಕ್ತ ಅಧಿಕಾರಿಗಳು ದೂರುದಾರ ತೆನ್ನೀರಾ ಮೈನಾ ಅವರಿಗೆ ವಿವರಿಸಿ, ದಾಖಲಾತಿಗಳಿಗೆ ಸಹಿ ಪಡೆದರು.

ಈ ಸಂದರ್ಭ ಲೋಕೋಪಯೋಗಿ ಇಲಾಖೆ ನಿವೃತ್ತ ಕಾರ್ಯಪಾಲಕ ಅಭಿಯಂತರ ಮದನ್ ಮೋಹನ್, ಕೊಡಗು ಜಿಲ್ಲಾ ಲೋಕೋಪಯೋಗಿ ಇಲಾಖೆ ಕಾರ್ಯಪಾಲಕ ಅಭಿಯಂತರ ಸಿದ್ದೇಗೌಡ, ಇಲಾಖೆ ಇಂಜಿನಿಯರ್‍ಗಳಾದ ಶಿವರಾಂ, ಡಿ.ನಾಗರಾಜು, ಧ್ರುವರಾಜ್, ಪಿ.ಸತೀಶ್, ಕೆ.ಸಿ.ಪ್ರಮೋದ್, ನಗರ ಸಭೆ ಮಾಜೀ ಅಧ್ಯಕ್ಷ ಹೆಚ್.ಎಂ. ನಂದಕುಮಾರ್, ಪುಷ್ಪ ಪೂಣಚ್ಚ, ಕಳಪೆ ಕಾಮಗಾರಿ ಸಂಬಂಧ ಈಗಾಗಲೇ ಅಮಾನತ್ತಾಗಿರುವ ಕಿರಿಯ ಇಂಜಿನಿಯರ್ ದೇವರಾಜ್ ಮತ್ತಿತರರು ಹಾಜರಿದ್ದರು.

'ಗೊಂದಲ ಮೂಡಿಸಬೇಡಿ':

ತಡೆಗೋಡೆ ಕಾಮಗಾರಿ ಕುರಿತು ಲೋಕಾಯುಕ್ತ ಅಧಿಕಾರಿಗಳು ಗುತ್ತಿಗೆದಾರರು ಮತ್ತು ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳಿಗೆ ವಿವಿಧ ಪ್ರಶ್ನೆಗಳನ್ನು ಮುಂದಿಟ್ಟರು. ಈ ವೇಳೆ ಲೋಕೋಪಯೋಗಿ ಇಲಾಖೆ ಅಧಿಕಾರಿಗಳು ಮತ್ತು ಗುತ್ತಿಗೆದಾರರು ದಾಖಲಾತಿಗಳನ್ನು ಮುಂದಿಟ್ಟು ವ್ಯತಿರಿಕ್ತವಾಗಿ ಮಾಹಿತಿ ನೀಡಿದರು. ಈ ಸಂದರ್ಭ ಲೋಕಾಯುಕ್ತ ಅಧಿಕಾರಿ ಡಿ.ರವಿಶಂಕರ್ ಮತ್ತು ಡಿ.ಎಂ. ಗಿರೀಶ್ ಅವರುಗಳು ಗೊಂದಲದ ಮಾಹಿತಿ ಏಕೆ ನೀಡುತ್ತೀರಾ, ಕಾಮಗಾರಿಯ ಮಾಹಿತಿ ಮಾತ್ರವೇ ಸಮರ್ಪಕವಾಗಿ ನೀಡಿ ಎಂದು ಅಸಮಾಧಾನ ವ್ಯಕ್ತಪಡಿಸಿದರು. ಕಾಮಗಾರಿಯ ಪ್ರತಿ ಹಂತದ ಪರಿಶೀಲನೆಯನ್ನು ವಿಡಿಯೋ ಚಿತ್ರೀಕರಣ ಮಾಡಲಾಗುತ್ತಿತ್ತು.