ಮೋದಿಕರಣದ ರಾಜಕೀಯವನ್ನು ಕೊನೆಗಾಣಿಸುವುದು ಅನಿವಾರ್ಯ: ಶಿವಸುಂದರ್

ಬೆಂಗಳೂರು: ‘ಲೋಕಸಭೆ ಚುನಾವಣೆಯ ಹೊಸ್ತಿಲಲ್ಲಿರುವ ನಾವು ಮೋದಿಕರಣದ ರಾಜಕೀಯವನ್ನು ಕೊನೆಗಾಣಿಸುವುದು ಅನಿವಾರ್ಯ. ದೇಶದ ಆರ್ಥಿಕತೆಯಲ್ಲಿ ಅದಾನೀಕರಣ, ನ್ಯಾಯಾಂಗದಲ್ಲಿ ಅಯೋಧ್ಯೀಕರಣವನ್ನು ತಡೆಯದಿದ್ದರೆ ಪ್ರಜಾಪ್ರಭುತ್ವ ಮತ್ತು ಸಂವಿಧಾನವನ್ನು ಉಳಿಸುವುದು ಕಷ್ಟ’ ಎಂದು ಅಂಕಣಕಾರ ಶಿವಸುಂದರ್ ಆತಂಕ ವ್ಯಕ್ತಪಡಿಸಿದ್ದಾರೆ.

ಗುರುವಾರ ನಗರದ ಜೈಭೀಮ್ ಭವನದಲ್ಲಿ ‘ಬಹುತ್ವ ಕರ್ನಾಟಕ, ಪೀಪಲ್ಸ್ ಯೂನಿಯನ್ ಫಾರ್ ಸಿವಿಲ್ ಲಿಬರ್ಟಿಸ್(ಪಿಯುಸಿಎಲ್), ಎಐಎಲ್‍ಎಜೆ’ ಸಂಯುಕ್ತಾಶ್ರಯದಲ್ಲಿ ಆಯೋಜಿಸಿದ್ದ ‘ಬಾಬರಿ ನಂತರದ ಕಾಲಘಟ್ಟ: ಮುಂದಿರುವ ಸಾಂಸ್ಕೃತಿಕ ಹಾಗೂ ಸಾಂವಿಧಾನಿಕ ಮಾರ್ಗಗಳು’ ಸಂವಾದ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ರಾಮ ಮಂದಿರದ 400 ವರ್ಷಗಳ ಇತಿಹಾಸದಲ್ಲಿ ಏನಾದರೂ ಆಗಿರಬಹುದು. ಅಯೋಧ್ಯೆಯಲ್ಲಿ ಮಂದಿರ ಕೆಡವಿ ಮಸೀದಿ ಕಟ್ಟಿರುವ ಯಾವ ಪುರಾವೆಯೂ ಇಲ್ಲ. ಬಲವಿದ್ದವರ ಭಕ್ತಿಗೆ ಪುರಾವೆಗಳನ್ನು ಕೇಳಲಾಗುವುದಿಲ್ಲ ಎನ್ನುವುದು ಸಾಬೀತಾಗಿದೆ. ಪ್ರಧಾನಿ ಮೋದಿ ಹೇಳುತ್ತಾರೆ, ‘ರಾಮನೆಂದರೆ ರಾಷ್ಟ್ರವೆಂದು’. ಇದು ಮೋದಿಯಿಂದ ಪ್ರಾರಂಭವಾಗಿದ್ದಲ್ಲ, ಸಾವರ್ಕರ್, ‘ಶ್ರೀರಾಮ ಹಿಂದುತ್ವದ ಸಾಮ್ರಾಟ’ ಎಂದು ಹೇಳಿದ್ದರು. ಅಲ್ಲಿಂದ ಬ್ರಾಹ್ಮಣ್ಯದ ರಾಜಕಾರಣಕ್ಕೆ ಶ್ರೀರಾಮ ಏಜೆಂಟ್ ಆಗಿಬಿಟ್ಟರು. ಇದನ್ನು ದೇಶದ ಜನರ ತಲೆಯಿಂದ ತೆಗೆದಾಗ ಮೋದಿಯನ್ನು ಸಂಸತ್‍ನಿಂತ ಹೊರಗೆ ಕಳಿಸಬಹುದು ಎಂದು ಶಿವಸುಂದರ್ ಹೇಳಿದರು.

ರಿಪಬ್ಲಿಕನ್ ಪಾರ್ಟಿ ಆಫ್ ಇಂಡಿಯಾದ ರಾಜ್ಯಾಧ್ಯಕ್ಷ ಆರ್.ಮೋಹನ್‍ರಾಜ್ ಮಾತನಾಡಿ, ಒಂಭತ್ತು ವರ್ಷದಲ್ಲಿ ಪ್ರಧಾನಿ ಮೋದಿ ಎಲ್ಲ ಸಾರ್ವಜನಿಕ ಸಸ್ಥೆಗಳನ್ನು ಮಾರಾಟ ಮಾಡಿದ್ದಾರೆ. ಹೀಗಾದರೆ ಮೀಸಲಾತಿಗೆ ಹೇಗೆ ಪ್ರಾಮುಖ್ಯತೆ ಬರುತ್ತೆ. ಇಂದು ಎಸ್‍ಸಿ, ಎಸ್‍ಟಿ ಮೀಸಲು ಕ್ಷೇತ್ರಗಳು ಬಿಜೆಪಿಯ ಪಾಲಾಗಿದ್ದು, ರಾಜ್ಯದ ಯುವಜನರು ಎಚ್ಚೆತ್ತುಕೊಳ್ಳಬೇಕು ಎಂದು ಕರೆ ನೀಡಿದರು.

‘ನಮ್ಮನ್ನು ದೇವರು, ಧರ್ಮಗಳು ಸಂಕೋಲೆಗಳಿಂದ ಬಿಡುಗಡೆ ಮಾಡಿಲ್ಲ. ಬಿಡುಗಡೆ ಸಾಧ್ಯವಾಗಿದ್ದು ಸಂವಿಧಾನದಿಂದ. ಶ್ರೀರಾಮಯೆಂದರೆ ಮನುಧರ್ಮ ಇದ್ದಂತೆ. ಅದು ಮತ್ತೆ ವರ್ಣಾಶ್ರಮದ ಕಡೆಗೆ ಕೊಂಡೊಯ್ಯುತ್ತದೆ. ಪ್ರಧಾನಿ ಮೋದಿ ಹಲವು ಬಾರಿ ಸುಳ್ಳುಗಳನ್ನು ಹೇಳಿ ಜನರನ್ನು ನಂಬಿಸುತ್ತಾರೆ. ನಾವು ಸತ್ಯವನ್ನು ಹೇಳಿ ಜನರನ್ನು ಜಾಗೃತಗೊಳಿಸಬೇಕು ಎಂದು ಅವರು ಸಲಹೆ ನೀಡಿದರು. ಸಂವಾದದಲ್ಲಿ ವಕೀಲೆ ಮೈತ್ರೇಯಿ ಕೃಷ್ಣನ್ ಮಾತನಾಡಿದರು. ವಿವಿಧ ಸಂಘಟನೆಗಳ ಕಾರ್ಯಕರ್ತರು ಈ ವೇಳೆ ಉಪಸ್ಥಿತರಿದ್ದರು.