ಒಂದು ದೇಶ-ಒಂದು ಚುನಾವಣೆ ಅಸಾಧ್ಯ: ಕೆಪಿಸಿಸಿ ವಕ್ತಾರ ಎಸ್.ಎಂ. ಪಾಟೀಲ ಗಣಿಹಾರ
ವಿಜಯಪುರ : ಒಂದುದೇಶ-ಒಂದು ಚುನಾವಣೆ ಎಂಬುದು ಅಸಾಧ್ಯದ ಮಾತು, ಈ ಕಾರಣಕ್ಕಾಗಿ ಸಂವಿಧಾನ ತಿದ್ದುಪಡಿ ತರಲು ಹೊರಟಿರುವುದು ಸರಿಯಲ್ಲ, ಆಯಾ ರಾಜ್ಯದ ವಿಧಾನಸಭೆ ಅತಂತ್ರವಾದಾಗ, ರಾಜಕೀಯ ಕ್ಷೀಪ್ರ ಕ್ರಾಂತಿ ಸಂಭವಿಸಿದಾಗ ಅಲ್ಲಿ ಚುನಾವಣೆ ನಡೆಸುವುದು ಹೇಗೆ? ಒಕ್ಕೂಟ ವ್ಯವಸ್ಥೆಗೆ ಧಕ್ಕೆ ತರುವ ಪ್ರಯತ್ನ, ಈ ಎಲ್ಲ ಬೆಳವಣಿಗೆಗಳ ಮೂಲಕ ಸಂವಿಧಾನ ಶಕ್ತಿಯನ್ನು ಅಡಗಿಸುವ ಏಕೈಕ ಪ್ರಯತ್ನ ಇದಾಗಿದೆ ಎಂದು ಎಂದು ಕೆಪಿಸಿಸಿ ವಕ್ತಾರ ಎಸ್.ಎಂ. ಪಾಟೀಲ ಗಣಿಹಾರ ಆಕ್ರೋಶ ವ್ಯಕ್ತಪಡಿಸಿದರು.
ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಈ ಬಾರಿ ಚುನಾವಣೆಯಲ್ಲಿ ಬಿಜೆಪಿ ಮಗ್ಗರಿಸುವುದು ಖಚಿತ ಈ ಕಾರಣಕ್ಕಾಗಿಯೇ ಲೋಕಸಭೆ ಚುನಾವಣೆಯನ್ನು ಮುಂದೂಡವ ಏಕೈಕ ಕುತಂತ್ರದಿಂದಾಗಿ ಈ ರೀತಿ ಬಿಜೆಪಿ ಸರ್ವಾಧಿಕಾರಿ ಧೋರಣೆ ಅನುಸರಿಸಿ ಒಂದು ದೇಶ-ಒಂದು ಚುನಾವಣೆ ಬೆಳವಣಿಗೆ ಆರಂಭಿಸಿದೆ, ಬಿಜೆಪಿಗೆ ಎನ್ಡಿಎ ಮತ್ತೆ ನೆನಪಾಗಿದೆ, ಕೇವಲ ಮೋದಿ ಹೆಸರು ಮಾತ್ರ ಚುನಾವಣೆಗೆ ಸಾಕಾಗುವುದಿಲ್ಲ ಎಂದು ಆರ್ಎಸ್ಎಸ್ ಮುಖವಾಣಿಯೇ ಹೇಳಿದೆ ಎಂದರು.
ರಾಷ್ಟ್ರಪತಿಯಂತಹ ಶ್ರೇಷ್ಠ ಹುದ್ದೆ ಅಲಂಕರಿಸಿದ ರಮಾನಾಥ್ ಕೋವಿಂದ ಅವರ ನೇತೃತ್ವದಲ್ಲಿ ವರದಿ ತಯಾರಿಸಲು ಹೇಳಿದೆ. ಅಂತಹ ದೊಡ್ಡ ಹುದ್ದೆ ನಿಭಾಯಿಸಿದ ವ್ಯಕ್ತಿಯನ್ನು ಈ ರೀತಿ ವರದಿ ಒಪ್ಪಿಸುವ ಕೆಲಸಕ್ಕೆ ನೇಮಿಸಿರುವ ಬಿಜೆಪಿ ಕೋವಿಂದ್ ಅವರು ದಲಿತರು ಎನ್ನುವ ಕಾರಣಕ್ಕೆ ಈ ರೀತಿ ಅವಮಾನ ಮಾಡಿದಂತಿದೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ಈ ಹಿಂದಿನ ಬಿಜೆಪಿ ಸರ್ಕಾರ ಅವಧಿಯಲ್ಲಿ ಎರಡೂವರೆ ವರ್ಷಗಳ ಕಾಲ ಜಲಸಂಪನ್ಮೂಲ ಸಚಿವರಾಗಿದ್ದ ಗೋವಿಂದ ಕಾರಜೋಳರು ಯುಕೆಪಿ ಯೋಜನೆಗೆ ಯಾವ ಆದ್ಯತೆಯೂ ನೀಡಿಲ್ಲ, ಹೀಗಾಗಿ ಯುಕೆಪಿ ಯೋಜನೆ ಬಗ್ಗೆ ಮಾತನಾಡಲು ಯಾವ ನೈತಿಕ ಹಕ್ಕು ಗೋವಿಂದ ಕಾರಜೋಳ ಅವರಿಗೆ ಇಲ್ಲ ಎಂದರು.
ಮುಖ್ಯಮಂತ್ರಿಗಳ ಎಡಬಲದಲ್ಲಿಯೇ ಇದ್ದು, ಪ್ರಭಾವಿಯಾಗಿದ್ದರೂ ಸಹ ಜಲಸಂಪನ್ಮೂಲ ಇಲಾಖೆಯಿಂದ ಅವಳಿ ಜಿಲ್ಲೆಗೆ ಯಾವ ಕೊಡುಗೆಯನ್ನು ಕಾರಜೋಳರು ಕೊಟ್ಟಿಲ್ಲ, ಅವರು ಯುಕೆಪಿ ಯೋಜನೆಗಳಿಗೆ ನೀಡಿದ ಕೊಡುಗೆಯನ್ನು ಕೂಡಲೇ ಬಹಿರಂಗಪಡಿಸಬೇಕು, ಈ ಹಿಂದೆ ಸಿದ್ಧರಾಮಯ್ಯ ಸರ್ಕಾರದ ಅವಧಿಯಲ್ಲಿ ಜಲಸಂಪನ್ಮೂಲ ಸಚಿವರಾಗಿದ್ದ ಎಂ.ಬಿ. ಪಾಟೀಲ ನೀರಾವರಿ ಕ್ರಾಂತಿಯನ್ನೇ ಮಾಡಿ ಆಧುನಿಕ ಭಗೀರಥ ಎನಿಸಿಕೊಂಡಿದ್ದಾರೆ. ಈ ರೀತಿಯಾಗಿ ಯಾವ ಕೆಲಸವನ್ನೂ ಕಾರಜೋಳರು ಏಕೆ ಮಾಡಲಿಲ್ಲ ಎಂದು ಪ್ರಶ್ನಿಸಿದರು.
ಗೋವಿಂದ ಕಾರಜೋಳರು ಮೊದಲು ಸುಂಸ್ಕೃತ, ಸಭ್ಯ ರಾಜಕಾರಣಿಯಾಗಿದ್ದರು, ಬುದ್ಧ-ಬಸವ-ಡಾ.ಅಂಬೇಡ್ಕರ ಅನುಯಾಯಿಯಾಗಿದ್ದ ಅವರು ಅಧಿಕಾರ ಲಾಲಸೆಗಾಗಿ ಬಿಜೆಪಿಗೆ ಹೋಗಿ, ಸಂಘ ಪರಿವಾರವನ್ನು ಒಲಿಸಲು ಈ ರೀತಿ ಹೇಳಿಕೆ ನೀಡುತ್ತಿದ್ದಾರೆ ಎಂದರು.
ಕಾಂಗ್ರೆಸ್ ಸರ್ಕಾರ ಎಲ್ಲ ಯೋಜನೆ ಅನುಷ್ಠಾನಗೊಳಿಸಲಿದೆ, ಆದರೆ ಸ್ವಲ್ಪವೂ ಬಿಜೆಪಿಗರಿಗೆ ಸಮಾಧಾನವಿಲ್ಲ, ಅಧಿಕಾರ ಕಳೆದುಕೊಂಡ ಈ ಎಲ್ಲ ನಾಯಕರಿಗೆ ಮೀನು ನೀರಿನಿಂಧ ಹೊರಬಂದು ಯಾವ ರೀತಿ ಒದ್ದಾಡುತ್ತದೆಯೋ ಆ ರೀತಿ ಎಲ್ಲ ಬಿಜೆಪಿಗರು ಚಡಪಡಿಸುತ್ತಿದ್ದಾರೆ ಎಂದರು.
ಎಸ್.ಸಿ.-ಎಸ್.ಟಿ. ಅನುದಾನವನ್ನು ಗ್ಯಾರಂಟಿ ಯೋಜನೆಗೆ ಡೈವರ್ಟ್ ಮಾಡಲಾಗುತ್ತಿದೆ ಎಂದು ಬಿಜೆಪಿಗರು ಅಪಪ್ರಚಾರ ಮಾಡುತ್ತಿದ್ದಾರೆ, ಬ್ಯಾಕ್ಲಾಗ್ ಹುದ್ದೆ ಭರ್ತಿ, ಎಸ್.ಸಿ.-ಎಸ್ಟಿ ಕಲ್ಯಾಣಕ್ಕಾಗಿ ಸಾವಿರಾರು ಕೋಟಿ ರೂ. ಅನುದಾನ, ಸರ್ಕಾರಿ ಗುತ್ತಿಗೆಯಲ್ಲಿ ೧ ಕೋಟಿ ರೂ. ಎಸ್.ಸಿ-.ಎಸ್.ಟಿ. ಸಮುದಾಯಕ್ಕೆ ಮೀಸಲು ಹೀಗೆ ದೊಡ್ಡಮಟ್ಟದ ಕೊಡುಗೆಯನ್ನು ಸಿದ್ಧರಾಮಯ್ಯ ನೇತೃತ್ವದ ಸರ್ಕಾರ ಮಾಡಿದೆ, ದಲಿತರ ಕಲ್ಯಾಣವೇ ಕಾಂಗ್ರೆಸ್ ಸರ್ಕಾರದ ಧ್ಯೇಯ ಎಂದರು.
ಈ ಹಿಂದೆಯೂ ಬಿಜೆಪಿ ಸರ್ಕಾರ ಕಾವೇರಿ ನೀರು ಹರಿಸಿದೆ, ಸುಪ್ರೀಂಕೋರ್ಟ್ ಆದೇಶದನ್ವಯ ನೀರು ಹರಿಸಲಾಗಿದೆ, ಕೋರ್ಟ್ ಆದೇಶವನ್ನು ರಾಜ್ಯ ಸರ್ಕಾರ ಪಾಲಿಸಿದೆ ಹೊರತು `ಇಂಡಿಯಾ' ಒಕ್ಕೂಟದ ಗೆಳೆತನಕ್ಕಾಗಿ ಅಲ್ಲ ಎಂದು ಘಂಟಾಘೋಷವಾಗಿ ಜಲಸಂಪನ್ಮೂಲ ಸಚಿವ ಡಿ.ಕೆ. ಶಿವಕುಮಾರ ಹೇಳಿದ್ದಾರೆ, ಆದರೂ ಸಹ ಕಾರಜೋಳರು ಹಾಗೂ ಬಿಜೆಪಿಗರು ರಾಜಕಾರಣ ಮಾಡುತ್ತಿದ್ದಾರೆ ಎಂದರು.
ಗ್ಯಾರಂಟಿ ಯೋಜನೆಗಳ ಯಶಸ್ವಿ ಬಗ್ಗೆ ನಡೆದ ಸಮೀಕ್ಷೆಯಲ್ಲಿ ಶೇ.೭೨ ರಷ್ಟು ಜನರು ಈ ಯೋಜನೆ ಬಗ್ಗೆ ಸಂತಸ ವ್ಯಕ್ತಪಡಿಸಿದ್ದಾರೆ, ಬಹುಸಂಖ್ಯಾತ ಪ್ರಜೆಗಳಿಗೆ ಈ ಯೋಜನೆಗಳ ಲಾಭ ತಟ್ಟಿದೆ, ಶೇ.೨೬ ರಷ್ಟು ಜನರು ಇದನ್ನು ವಿರೋಧಿಸಿದರೂ ಸಹ ಆ ಯೋಜನೆಗಳ ಫಲಾನುಭವ ಸಹ ಅವರು ಪಡೆಯುತ್ತಿದ್ದಾರೆ,
ಕಾಂಗ್ರೆಸ್ ಯುವ ಮುಖಂಡರಾದ ಫಯಾಜ್ ಕಲಾದಗಿ, ನಾಗರಾಜ ಲಂಬು, ವಸಂತ ಹೊನಮೋಡೆ ಮೊದಲಾದವರು ಪತ್ರಿಕಾಗೋಷ್ಠಿಯಲ್ಲಿ ಉಪಸ್ಥಿತರಿದ್ದರು.
