ಆ್ಯಪ್ ಗಳನ್ನು ತಾನೇ ನಿಯಂತ್ರಿಸಲಿದೆ ಮೆಟಾದ ಹೊಸ AI ಏಜೆಂಟ್ Muse; ಇನ್ನು ಮುಂದೆ ಶಾಪಿಂಗ್-ಇಮೇಲ್ ಕಳುಹಿಸುವುದು ಎಲ್ಲವೂ ಸುಲಭ!

ದಿನನಿತ್ಯದ ಡಿಜಿಟಲ್ ಕೆಲಸಗಳನ್ನು ಯಾಂತ್ರಿಕವಾಗಿ ಮಾಡಬಹುದಾದ ಹೊಸ ಡಿಜಿಟಲ್ ಅಸಿಸ್ಟಂಟ್ Muse (ಮ್ಯೂಸ್) ಅನ್ನು ಮೆಟಾ ಬಿಡುಗಡೆ ಮಾಡಿದೆ

ಮೆಟಾ ಹೊಸ ಕೃತಕ ಬುದ್ಧಿಮತ್ತೆ ಸಹಾಯಕ ‘ಮ್ಯೂಸ್’ ಅನ್ನು ಬಿಡುಗಡೆ ಮಾಡಿದೆ. ಈ ಏಜೆಂಟ್ ಕೇವಲ ಪ್ರಾಂಪ್ಟ್ ಗಳಿಗೆ ಪ್ರತಿಕ್ರಿಯಿಸುವ ಬದಲಾಗಿ ನೈಜ ಕೆಲಸಗಳನ್ನು ಸ್ವತಂತ್ರವಾಗಿ ಪೂರ್ಣಗೊಳಿಸುತ್ತದೆ.

ಮಂಗಳವಾರ ಅನಾವರಣಗೊಂಡ ಈ ಉಪಕರಣವು ಇಮೇಲ್ ಕಳುಹಿಸುವುದು, ಪ್ರಯಾಣ ಕಾಯ್ದಿರಿಸುವುದು, ವೇಳಾಪಟ್ಟಿ ನಿರ್ವಹಿಸುವುದು, ಆನ್ಲೈನ್ ಶಾಪಿಂಗ್ ಮಾಡುವುದು ಮತ್ತು ಬಳಕೆದಾರರ ಸೀಮಿತ ಹಸ್ತಕ್ಷೇಪದ ಜೊತೆಗೆ ಇತರ ದಿನನಿತ್ಯದ ಚಟುವಟಿಕೆಗಳನ್ನು ನಿರ್ವಹಿಸುವಂತಹ ಕ್ರಿಯೆಗಳನ್ನು ನಿರ್ವಹಿಸಬಹುದು. ಆರಂಭದಲ್ಲಿ ಅಮೆರಿಕದಲ್ಲಿ ವಯಸ್ಕರಿಗೆ ಲಭ್ಯವಿರುವ ಮ್ಯೂಸ್ ಅನ್ನು ಮೆಟಾದ ವಾಟ್ಸಾಪ್ ವೇದಿಕೆ ಮೂಲಕ ಪ್ರವೇಶಿಸಬಹುದು. ಅಥವಾ ಮ್ಯೂಸ್ ಗೆ ಮೀಸಲಾದ ಅಪ್ಲಿಕೇಶನ್ ಮೂಲಕವೂ ಪ್ರವೇಶಿಸಬಹುದು.

“ನಿಮ್ಮ ಗುರಿಗಳನ್ನು ಅರ್ಥಮಾಡಿಕೊಳ್ಳುವ ಮತ್ತು ನಿಮಗಾಗಿ 24/7 ಕೆಲಸ ಮಾಡುವ ವೈಯಕ್ತಿಕ ಏಜೆಂಟ್ ಮ್ಯೂಸ್ ಅನ್ನು ಪರಿಚಯಿಸಲಾಗುತ್ತಿದೆ” ಎಂದು ಮೆಟಾ ಸಿಇಒ ಮಾರ್ಕ್ ಝುಕರ್ ಬರ್ಗ್ ಹೇಳಿದ್ದಾರೆ. “ಗೌಪ್ಯತೆ ಮತ್ತು ಸುರಕ್ಷತೆಗೆ ಪ್ರಾಮುಖ್ಯತೆ ಕೊಟ್ಟು ಮ್ಯೂಸ್ ಅನ್ನು ನಿರ್ಮಿಸಲಾಗಿದೆ. ಡೇಟಾ ಮತ್ತು ರುಜುವಾತುಗಳು Muse Secure VM ನಲ್ಲಿ ಇರುತ್ತವೆ. Muse Secure VM ಎನ್ನುವುದು ಬ್ರೌಸರ್, ಸಿಪಿಯು, ಮೆಮೊರಿ ಮತ್ತು ಸಂಗ್ರಹಣೆ ಇರುವ ಪ್ರತ್ಯೇಕ ಲಿನಕ್ಸ್ ಕಂಪ್ಯೂಟರ್ ಆಗಿರುತ್ತದೆ.

ಮ್ಯೂಸ್ ಬಿಡುಗಡೆಯ ನಂತರ ಬಳಕೆದಾರರ ಪರವಾಗಿ ಕಾರ್ಯನಿರ್ವಹಿಸುವ ಸಾಮರ್ಥ್ಯವಿರುವ AI ಏಜೆಂಟ್ ಗಳನ್ನು ಅಭಿವೃದ್ಧಿಪಡಿಸುತ್ತಿರುವವರ ಸ್ಪರ್ಧೆಯಲ್ಲಿ ಮೆಟಾ ಸೇರಿಕೊಂಡಿದೆ.

“ವೈಯಕ್ತಿಕ ಸೂಪರ್ ಇಂಟೆಲಿಜೆನ್ಸ್ ತಂತ್ರಜ್ಞಾನವನ್ನು ಪರಿಚಯಿಸುವತ್ತ ಇದು ಮೊದಲ ಹೆಜ್ಜೆ” ಎಂದು ಮಾರ್ಕ್ ಝುಕರ್ ಬರ್ಗ್ ಹೇಳಿದ್ದಾರೆ. ವೈಯಕ್ತಿಕ ಸೂಪರ್ ಇಂಟೆಲಿಜೆನ್ಸ್ ಎಂದರೆ ಜನರು ನಿತ್ಯದ ಮತ್ತು ದೀರ್ಘಕಾಲೀನ ಗುರಿಗಳನ್ನು ಸಾಧಿಸಲು ಸಹಾಯ ಮಾಡುವ AI ವ್ಯವಸ್ಥೆಗಳು.

ಸಾಂಪ್ರದಾಯಿಕ ಚಾಟ್ಬಾಟ್ ಗಳಿಗೆ ಭಿನ್ನವಾಗಿ ಸೂಚನೆ ಪಡೆದ ನಂತರ ಮ್ಯೂಸ್ ಹಿನ್ನೆಲೆಯಲ್ಲಿ ಕೆಲಸ ಮುಂದುವರಿಸಬಹುದು. ಮ್ಯೂಸ್ ಮೀಸಲಿಡಲಾದ ವರ್ಚುವಲ್ ಯಂತ್ರದ ಮೂಲಕ ಕಾರ್ಯನಿರ್ವಹಿಸುತ್ತದೆ. ಇಮೇಲ್, ಕ್ಯಾಲೆಂಡರ್ಗಳು, ಪಾವತಿ ವೇದಿಕೆಗಳು, ಶಾಪಿಂಗ್ ಅಪ್ಲಿಕೇಶನ್ಗಳು ಮತ್ತು ಸ್ಮಾರ್ಟ್ ಹೋಮ್ ವ್ಯವಸ್ಥೆಗಳಂತಹ ಸೇವೆಗಳೊಂದಿಗೆ ಸಂವಹನ ನಡೆಸಲು ಅನುವು ಮಾಡಿಕೊಡುತ್ತದೆ.

ಮ್ಯೂಸ್ ಯಾವ ಅಪ್ಲಿಕೇಶನ್ಗಳನ್ನು ಬಳಸಬಹುದು ಮತ್ತು ಯಾವ ಸಮಯದಲ್ಲಿ ಅನುಮತಿ ಹಿಂಪಡೆಯಬಹುದು ಎಂದು ಬಳಕೆದಾರರು ನಿರ್ಧರಿಸುತ್ತಾರೆ ಎಂದು ಮೆಟಾ ಹೇಳಿದೆ.

ಕಂಪನಿಯು ತನ್ನ AI ಮಾಡೆಲ್ಗಳಿಗೆ ತರಬೇತಿ ನೀಡಲು ಸಂಭಾಷಣೆಗಳನ್ನು ಬಳಸುವುದನ್ನು ತಡೆಯುವ ಆಯ್ಕೆಯನ್ನೂ ಸಹ ನೀಡುತ್ತಿದೆ. ಈ ವರ್ಷದ ಕೊನೆಯಲ್ಲಿ ಸೇವೆಯ ಎನ್ಕ್ರಿಪ್ಟ್ ಮಾಡಿದ ಆವೃತ್ತಿ ಪರಿಚಯಿಸಲು ಯೋಜಿಸಿದೆ.

ಭಾರೀ ಬಳಕೆಯ ಅಗತ್ಯವಿರುವವರಿಗೆ ಪಾವತಿಸಿದ ಚಂದಾದಾರಿಕೆ ಶ್ರೇಣಿಗಳ ಜೊತೆಗೆ ಕಂಪನಿಯು ಮ್ಯೂಸ್ ನ ಉಚಿತ ಆವೃತ್ತಿಯನ್ನೂ ಪ್ರಾರಂಭಿಸುತ್ತಿದೆ. ಮುಂದಿನ ದಿನಗಳಲ್ಲಿ ಮ್ಯೂಸ್ ಅನ್ನು ತನ್ನ ಸ್ಮಾರ್ಟ್ ಗ್ಲಾಸ್ ವೇದಿಕೆಗೂ ಪರಿಚಯಿಸಲು ಮೆಟಾ ಉದ್ದೇಶಿಸಿದೆ.

ಮೆಟಾ ತನ್ನ ಪ್ರಮುಖ ಜಾಹೀರಾತು ವ್ಯವಹಾರ ಮೀರಿ ಹೊಸ ಆದಾಯದ ಸ್ಟ್ರೀಮ್ಗಳನ್ನು ಉತ್ಪಾದಿಸಲು ಪ್ರಯತ್ನಿಸುತ್ತಿರುವ ಸಂದರ್ಭದಲ್ಲಿ ಈ ಬಿಡುಗಡೆ ಬಂದಿದೆ. AI ಸಂಬಂಧಿತ ಹಾರ್ಡ್ ವೇರ್ ಮತ್ತು ಅಭಿವೃದ್ಧಿಗಾಗಿ ಕಂಪನಿ ಈ ವರ್ಷ 130 ಶತಕೋಟಿ ಮೀರಿ ಖರ್ಚು ಮಾಡುವ ಸಾಧ್ಯತೆಯಿದೆ. ವೈಯಕ್ತಿಕ ಡೇಟಾ ಮತ್ತು ಡಿಜಿಟಲ್ ಖಾತೆಗಳಿಗೆ ಮ್ಯೂಸ್ ನಂತಹ AI ಅಸಿಸ್ಟಂಟ್ ನ ಪ್ರವೇಶ ನೀಡುವುದರಿಂದ ಹೊಸ ಸುರಕ್ಷತೆ ಮತ್ತು ಗೌಪ್ಯತೆಗಳ ಅಪಾಯ ಸೃಷ್ಟಿಯಾಗುತ್ತವೆ ಎಂದು ಮೆಟಾ ಒಪ್ಪಿಕೊಂಡಿದೆ.

ಭದ್ರತಾ ಕ್ರಮಗಳನ್ನು ಬಲಪಡಿಸಲು ಮತ್ತು ದುರುಪಯೋಗ ಅಥವಾ ಅನಪೇಕ್ಷಿತ ಕ್ರಿಯೆಗಳ ಸಾಧ್ಯತೆ ಕಡಿಮೆ ಮಾಡಲು ಈ ವರ್ಷದ ಆರಂಭದಲ್ಲಿ ಬಿಡುಗಡೆ ವಿಳಂಬ ಮಾಡಲಾಗಿದೆ ಎಂದು ಕಂಪನಿ ತಿಳಿಸಿತ್ತು.

ಮ್ಯೂಸ್ ನಂತಹ ಡಿಜಿಟಲ್ ಅಸಿಸ್ಟಂಟ್ ಗಳು ಬಳಕೆದಾರರು ತಮ್ಮ ದೈನಂದಿನ ಜೀವನದಲ್ಲಿ ತಂತ್ರಜ್ಞಾನದ ಜೊತೆಗೆ ಹೇಗೆ ಸಂವಹನ ನಡೆಸುತ್ತಾರೆ ಎಂಬುದನ್ನು ಮರುರೂಪಿಸುವ ಸಾಧ್ಯತೆಯಿದೆ.