ಅಪಹಾಸ್ಯಕ್ಕೀಡಾಗಿದ್ದ ಹಾರುವ ಕಾರಿನ ಕನಸಿಗೆ ಮರುಜೀವ: ಟೆಸ್ಲಾ ರೋಡ್ಸ್ಟರ್ ಪ್ರದರ್ಶನ
2018ರಲ್ಲಿ ರಾಕೆಟ್ ಥ್ರಸ್ಟರ್ ಅಳವಡಿಕೆಯ ಪ್ರಸ್ತಾಪ ಮಾಡಿದ್ದ ಮಸ್ಕ್; 2028ರಲ್ಲಿ ಉತ್ಪಾದನೆಗೆ ಬರಲಿದೆ ಮರುವಿನ್ಯಾಸಗೊಳಿಸಿದ ಕಾರು
ಟೆಕ್ಸಾಸ್: ಎಂಟು ವರ್ಷಗಳ ಹಿಂದೆ ಅಪಹಾಸ್ಯಕ್ಕೆ ಕಾರಣವಾಗಿದ್ದ ಹಾರುವ ಕಾರಿನ ಕಲ್ಪನೆಯನ್ನು ಟೆಸ್ಲಾ ಮುಖ್ಯಸ್ಥ ಎಲೋನ್ ಮಸ್ಕ್ ಮತ್ತೊಮ್ಮೆ ಮುನ್ನೆಲೆಗೆ ತಂದಿದ್ದಾರೆ. ಮರುವಿನ್ಯಾಸಗೊಳಿಸಲಾದ ಟೆಸ್ಲಾ ರೋಡ್ಸ್ಟರ್ ಕಾರು ತಲೆಕೆಳಗಾಗಿ ಚಲಿಸಿ, ಗಾಳಿಯಲ್ಲಿ ಹಾರಿದಂತೆ ಪ್ರದರ್ಶನ ನೀಡಿರುವುದು ಈ ಅಸಾಮಾನ್ಯ ತಂತ್ರಜ್ಞಾನದ ಬಗ್ಗೆ ಕುತೂಹಲ ಮೂಡಿಸಿದೆ.
ಟೆಕ್ಸಾಸ್ ನ ಮೆಕ್‌ಗ್ರೆಗರ್‌ನಲ್ಲಿರುವ ಸ್ಪೇಸ್‌ಎಕ್ಸ್ ಕೇಂದ್ರದಲ್ಲಿ ಅಕ್ಟೋಬರ್ 15ರಂದು ನಡೆದ ಪ್ರದರ್ಶನದಲ್ಲಿ, ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರು ಬಾಗಿದ ರ‍್ಯಾಂಪ್ ಮೇಲೆ ಚಲಿಸಿ ತಲೆಕೆಳಗಾಗಿ ಮುಂದುವರಿದಿದೆ. ಬಳಿಕ ಸ್ವಲ್ಪ ಸಮಯ ಗಾಳಿಯಲ್ಲಿ ಹಾರಿದಂತೆ ಕಂಡು, ತನ್ನ ಚಕ್ರಗಳ ಮೇಲೆ ಸುರಕ್ಷಿತವಾಗಿ ಇಳಿದಿದೆ.
ಈ ಪ್ರದರ್ಶನದ ವೀಡಿಯೊವನ್ನು ಮಸ್ಕ್ ಸಾಮಾಜಿಕ ಮಾಧ್ಯಮ 'X'ನಲ್ಲಿ ಹಂಚಿಕೊಂಡು, 'ಭವಿಷ್ಯದಲ್ಲಿ ನಿಜವಾಗಿಯೂ ಹಾರುವ ಕಾರುಗಳು ಇರಲಿವೆ ಎಂಬುದು ಸಾಬೀತಾಗಿದೆ' ಎಂದು ಬರೆದಿದ್ದಾರೆ.
ರೋಗನ್ ಮುಂದೆ ಪ್ರಸ್ತಾಪಿಸಿದ್ದ ಮಸ್ಕ್
2018ರಲ್ಲಿ 'ದಿ ಜೋ ರೋಗನ್ ಎಕ್ಸ್‌ಪೀರಿಯೆನ್ಸ್' ಪಾಡ್‌ಕಾಸ್ಟ್‌ ನಲ್ಲಿ ಭಾಗವಹಿಸಿದ್ದ ಮಸ್ಕ್, ಮುಂದಿನ ತಲೆಮಾರಿನ ರೋಡ್ಸ್ಟರ್ ಕಾರಿಗೆ ಸ್ಪೇಸ್‌ಎಕ್ಸ್ ತಂತ್ರಜ್ಞಾನ ಬಳಸಿ ಅಭಿವೃದ್ಧಿಪಡಿಸಿದ ರಾಕೆಟ್ ಅಥವಾ ಕೋಲ್ಡ್-ಗ್ಯಾಸ್ ಥ್ರಸ್ಟರ್ ಗಳನ್ನು ಅಳವಡಿಸುವ ಸಾಧ್ಯತೆಯ ಬಗ್ಗೆ ಮಾತನಾಡಿದ್ದರು.
'ನಿಮಗೆ ಇದರ ಅಗತ್ಯವೇನು?' ಎಂದು ನಿರೂಪಕ ಜೋ ರೋಗನ್ ನಗುತ್ತಾ ಪ್ರಶ್ನಿಸಿದ್ದರು. 'ನಾವು ಇದಕ್ಕೆ ರಾಕೆಟ್ ಥ್ರಸ್ಟರ್ ಗಳನ್ನು ಅಳವಡಿಸಲಿದ್ದೇವೆ' ಎಂದು ಮಸ್ಕ್ ಉತ್ತರಿಸಿದ್ದರು.
ಆ ಸಮಯದಲ್ಲಿ ಈ ಪ್ರಸ್ತಾಪವು ವೈಜ್ಞಾನಿಕ ಕಾದಂಬರಿಯ ಕಲ್ಪನೆಯಂತೆ ಕಂಡಿತ್ತು. ಆದರೆ, ಮಸ್ಕ್ ಈ ವಿಚಾರವನ್ನು ಅಲ್ಲಿಗೇ ಕೈಬಿಡಲಿಲ್ಲ. 2020ರಲ್ಲಿ ಕಾರು ಉತ್ಸಾಹಿ ಜೇ ಲೆನೊ ಅವರೊಂದಿಗೂ ಈ ತಂತ್ರಜ್ಞಾನದ ಬಗ್ಗೆ ಚರ್ಚಿಸಿದ್ದರು.
ರೋಡ್ಸ್ಟರ್ ನ ಪರವಾನಗಿ ಫಲಕದ ಹಿಂದೆ ಕೋಲ್ಡ್-ಗ್ಯಾಸ್ ಥ್ರಸ್ಟರ್ ಅಳವಡಿಸುವ ಸಾಧ್ಯತೆಯನ್ನು ಅವರು ವಿವರಿಸಿದ್ದರು. ಈ ವ್ಯವಸ್ಥೆಯು ರಾಕೆಟ್ ಇಂಧನವನ್ನು ಸುಡುವ ಬದಲು ಸಂಕುಚಿತ ಅನಿಲವನ್ನು ಬಳಸಿ ಒತ್ತಡವನ್ನು ಸೃಷ್ಟಿಸುತ್ತದೆ. ಮಸ್ಕ್ ತಮಾಷೆ ಮಾಡುತ್ತಿದ್ದಾರೆಯೇ ಎಂಬುದನ್ನು ಗುರುತಿಸುವುದು ಕಷ್ಟ ಎಂದು ಲೆನೊ ಹೇಳಿದ್ದರೂ, ಈ ತಂತ್ರಜ್ಞಾನದ ಬಗ್ಗೆ ಮಸ್ಕ್ ಗಂಭೀರವಾಗಿರುವುದನ್ನು ಸ್ಪಷ್ಟಪಡಿಸಿದ್ದರು.
2028ರಲ್ಲಿ ಉತ್ಪಾದನೆಗೆ
ಮರುವಿನ್ಯಾಸಗೊಳಿಸಲಾದ ರೋಡ್ಸ್ಟರ್ ಕಾರು 2028ರಲ್ಲಿ ಉತ್ಪಾದನೆಗೆ ಬರಲಿದೆ ಎಂದು ಮಸ್ಕ್ ತಿಳಿಸಿದ್ದಾರೆ. ಆದರೆ, ಅಂತಿಮ ಗ್ರಾಹಕ ಮಾದರಿಯಲ್ಲಿ ಥ್ರಸ್ಟರ್ ತಂತ್ರಜ್ಞಾನ ಅಳವಡಿಸಲಾಗುತ್ತದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ನಿಯಂತ್ರಿತ ಪರಿಸರದಲ್ಲಿ ನಡೆದ ಪ್ರದರ್ಶನವು ಕಾರಿನ ಅಸಾಮಾನ್ಯ ಚಲನೆಗಳನ್ನು ತೋರಿಸಿದೆಯೇ ಹೊರತು, ಸಾಮಾನ್ಯ ರಸ್ತೆಗಳಲ್ಲಿ ಕಾರು ಹಾರಲು ಅಥವಾ ಗಾಳಿಯಲ್ಲಿ ತೇಲಲು ಸಾಧ್ಯ ಎಂಬುದನ್ನು ಸಾಬೀತುಪಡಿಸಿಲ್ಲ. ಇಂತಹ ತಂತ್ರಜ್ಞಾನವನ್ನು ಸಾಮಾನ್ಯ ಗ್ರಾಹಕರ ಬಳಕೆಗೆ ಸೂಕ್ತವಾದ ವಾಹನದಲ್ಲಿ ಅಳವಡಿಸುವುದು ಸಾಧ್ಯವೇ ಎಂಬುದೂ ಇನ್ನೂ ನಿರ್ಧಾರವಾಗಿಲ್ಲ.
