ಮಳೆಗಾಲದಲ್ಲಿ ಶಾಪಗ್ರಸ್ತವಾಗುತ್ತಿರುವ ಮಲೆನಾಡಿನ ರಸ್ತೆಗಳು

ಕಳೆದ ಎರಡು ದಶಕಗಳಿಂದ ಮಲೆನಾಡಿನ ಶೃಂಗೇರಿ, ಮೂಡಿಗೆರೆ,ಚಿಕ್ಕಮಗಳೂರು ವಿಧಾನಸಭಾ ಕ್ಷೇತ್ರದ ಶಾಸಕರಾಗಿ ಬಿಜೆಪಿಯ ಸಿ.ಟಿ.ರವಿ.ಐದು ಬಾರಿ,ಜೀವರಾಜ್ ಮತ್ತು ಕುಮಾರಸ್ವಾಮಿ ಮೂರು ಬಾರಿ. ಎಂ.ಕೆ.ಪ್ರಾಣೇಶ್ ಮತ್ತು ಎಸ್.ಎಲ್.ಬೋಜೇಗೌಡ ವಿಧಾನ ಪರಿಷತ್ ಸದಸ್ಯರಾಗಿ ಎರಡು ಬಾರಿ.ಕಾಂಗ್ರೆಸ್ ಪಕ್ಷದ ಟಿ.ಡಿ.ರಾಜೇಗೌಡರು ಎರಡು ಬಾರಿ,ಹೆಚ್.ಡಿ.ತಮ್ಮಯ್ಯ, ನಯನಾ ಮೋಟಮ್ಮ ಮೊದಲ ಬಾರಿ ಮಲೆನಾಡಿನ ನಾಗರೀಕರನ್ನು ರಾಜ್ಯದ ಜನಪ್ರತಿನಿಧಿಗಳ ಸಭೆಯಲ್ಲಿ ಪ್ರತಿನಿಧಿಸಿದ್ದಾರೆ. ಶೋಭ ಕರಂದ್ಲಾಜೆ, ಸದಾನಂದ ಗೌಡ, ಜಯಪ್ರಕಾಶ್ ಹೆಗ್ಡೆ ಮಲೆನಾಡಿನ ಜನರನ್ನು ಲೋಕಸಭೆಯಲ್ಲಿ ಪ್ರತಿನಿಧಿಸಿದ್ದಾರೆ. ಈಗ ಕೋಟ ಶ್ರೀನಿವಾಸ ಪೂಜಾರಿ ನಮ್ಮನ್ನು ಪ್ರತಿನಿಧಿಸುತ್ತಿದ್ದಾರೆ. ಈ ಎಲ್ಲಾ ಜನಪ್ರತಿನಿಧಿಗಳು ಸರ್ಕಾರದಲ್ಲಿ ಪ್ರಭಾವಿಗಳು ಮತ್ತು ನೀತಿ ರೂಪಿಸುವಂತಹ ಸಾಮರ್ಥ್ಯ ಹೊಂದಿರುವವರು. ಇಂತಹ ಸಮರ್ಥ ಜನಪ್ರತಿನಿಧಿಗಳನ್ನು ಹೊಂದಿರುವ ಮಲೆನಾಡಿನ ಜನ ನತದೃಷ್ಟರು ಎನ್ನದೆ ವಿಧಿಯಿಲ್ಲ.

ಹಲವು ದಶಕಗಳಿಂದ ಕೊಪ್ಪ ಚಿಕ್ಕಮಗಳೂರು, ಶೃಂಗೇರಿ ಜಯಪುರ,ಚಿಕ್ಕಮಗಳೂರು ಮೂಡಿಗೆರೆ ಕೊಟ್ಟಿಗೆಹಾರ ಚಿಕ್ಕಮಗಳೂರು ಕಳಸ ಸಂಪರ್ಕಿಸುವ ರಾಷ್ಟ್ರೀಯ ಹೆದ್ದಾರಿ, ರಾಜ್ಯ ಹೆದ್ದಾರಿ, ಜಿಲ್ಲಾ ಮುಖ್ಯ ರಸ್ತೆಗಳು ಮಳೆಗಾಲದಲ್ಲಿ ಹೊಂಡ ಗುಂಡಿಗಳಿಂದ ತುಂಬಿರುತ್ತದೆ. ಅದರಲ್ಲೂ ಚಿಕ್ಕಮಗಳೂರಿನಿಂದ ಶೃಂಗೇರಿ ಸಂಪರ್ಕಿಸುವ ರಸ್ತೆಯಲ್ಲಿ ವಾಹನ ಚಲಿಸುವಾಗ ರಸ್ತೆಯಲ್ಲಿ ಗುಂಡಿ ಇದಿಯೋ ಗುಂಡಿಯಲ್ಲಿ ರಸ್ತೆ ಇದೆಯೋ ಎಂದು ತಿಳಿಯುವುದು ಕಷ್ಟ.

ಒಂದು ಗಂಟೆಯಲ್ಲಿ ತಲುಪಬೇಕಾದ ದೂರ ಕ್ರಮಿಸಲು ಒಂದೂವರೆ ಎರಡು ಗಂಟೆ ಸಮಯ ಬೇಕು. ವಾಹನದ ಬಿಡಿಭಾಗಗಳ ಜೊತೆಗೆ ವಾಹನದಲ್ಲಿ ಪ್ರಯಾಣಿಸುವ ನಾಗರೀಕರ ಸ್ಪೇರ್ ಪಾರ್ಟ್ಸ್ ಕೂಡ ಹಾಳಾಗುತ್ತಿದೆ. ಸಾಮಾನ್ಯ ನಾಗರೀಕರ ವಾಹನ ಮಾತ್ರವಲ್ಲ ನಮ್ಮ ಗೌರವಾನ್ವಿತ ಜನಪ್ರತಿನಿಧಿಗಳ ಪರಿಸ್ಥಿತಿ ಕೂಡ ಇದಕ್ಕೆ ಭಿನ್ನವಲ್ಲ. ಆದರೆ ಅವರದ್ದು ಸರ್ಕಾರದ ವಾಹನ. ಜನಸಾಮಾನ್ಯರದ್ದು ಸ್ವಂತ ವಾಹನ. ಸಾರ್ವಜನಿಕ ಸಾರಿಗೆ ವಾಹನಗಳ ಡ್ರೈವರ್ ಗಳು ಪ್ರಯಾಣಿಕರ ಜೀವ ಪಣಕ್ಕಿಟ್ಟು ವಾಹನ ಚಲಾಯಿಸಬೇಕಾದ ಪರಿಸ್ಥಿತಿ. ಮಲೆನಾಡಿನ ಜನತೆ ಪ್ರತೀ ವರ್ಷವೂ ಶಾಪಗ್ರಸ್ಥ ಹೊಂಡಗುಂಡಿಗಳ ಅವ್ಯವಸ್ಥೆಯಿಂದ ಹೊರ ಬರಲು ಸಾಧ್ಯವಿಲ್ಲವೇ?

ಮಲೆನಾಡಿನಲ್ಲಿ ಸುರಿಯುತ್ತಿರುವ ವಿಪರೀತ ಮಳೆ ಇದಕ್ಕೆ ಕಾರಣ ಎಂದು ಅಧಿಕಾರಿಗಳು ನೀಡುವ ಮುಖ್ಯ ಕಾರಣ. ಆದರೆ ದಶಕಗಳ ಹಿಂದೆ ಮಲೆನಾಡಿನಲ್ಲಿ ಹೀಗೆ ಮಳೆ ಸುರಿಯುತ್ತಿತ್ತು.ಆದರೆ ಪಿಡಬ್ಲ್ಯುಡಿ ಇಲಾಖೆಯ ಗ್ಯಾಂಗ್ ಮೆನ್ ಮಳೆಗಾಲ ಬೇಸಿಗೆ ಕಾಲದಲ್ಲಿ ರಸ್ತೆಯ ಅಕ್ಕಪಕ್ಕದ ಚರಂಡಿಯಲ್ಲಿ ನೀರು ಹರಿಯುವಂತೆ ಮತ್ತು ರಸ್ತೆ ಬದಿ ಇರುವ ಮರಗಿಡಗಳ ಕಸಿ ಮಾಡಿ ರಸ್ತೆಗೆ ಬೀಳುತ್ತಿರುವ ಮಳೆ ಹನಿಯಿಂದ ರಸ್ತೆಯನ್ನು ರಕ್ಷಿಸುತ್ತಿದ್ದರು. ಸಣ್ಣಪುಟ್ಟ ಪ್ಯಾಚ್ ವರ್ಕ್ ಕೂಡ ನಿರಂತರವಾಗಿ ಮಾಡುತ್ತಿದ್ದರು. ಒಟ್ಟಾರೆ ರಸ್ತೆಯ ಮೇಲ್ವಿಚಾರಣೆ ಕಾಲಕಾಲಕ್ಕೆ ಸರಿಯಾಗಿ ನಡೆಯುತ್ತಿತ್ತು. ಈಗ ಇಲಾಖೆಯಲ್ಲಿ ರಸ್ತೆಯ ಮೇಲ್ವಿಚಾರಣೆ ವರ್ಷವಿಡೀ ಮಾಡುವ ಶಾಶ್ವತ ವ್ಯವಸ್ಥೆ ಇಲ್ಲ. ಇದು ಇಂದು ಮಲೆನಾಡಿನ ರಸ್ತೆ ಶಾಪಗ್ರಸ್ಥವಾಗಲು ಮುಖ್ಯ ಕಾರಣ.

ಕಾಲ ಬಹಳಷ್ಟು ಬದಲಾಗಿದೆ. ಹತ್ತಾರು ಸಂಖ್ಯೆಯಲ್ಲಿ ಓಡಾಡುತ್ತಿದ್ದ ವಾಹನಗಳು ಇಂದು ನಮ್ಮ ಮಲೆನಾಡಿನಲ್ಲಿ ನೂರಾರು ಸಂಖ್ಯೆಯಲ್ಲಿ ಓಡಾಡುತ್ತಿದೆ. ಬಹುತೇಕ ರಸ್ತೆಗಳು ಅದೇ ಉದ್ದ ಅಗಲ ಹೊಂದಿದೆ. ರಸ್ತೆ ತೆರಿಗೆ, ವಾಹನ ತೆರಿಗೆಯಿಂದ ಸಾವಿರಾರು ಕೋಟಿ ಆದಾಯ ಸರ್ಕಾರದ ಬೊಕ್ಕಸಕ್ಕೆ ನಿರಂತರವಾಗಿ ಹರಿದು ಬರುತ್ತಿದೆ. ಸರ್ಕಾರ ಶ್ರೀಮಂತವಾಗುತ್ತಿದೆ. ಆದರೆ ಮಲೆನಾಡಿನ ಜನ ಹೊಂಡ ಗುಂಡಿ ರಸ್ತೆಗಳಿಂದ ಮುಕ್ತಿ ಪಡೆಯುವಲ್ಲಿ ಬಡವಾಗುತ್ತಿದ್ದಾರೆ. ಹಣದ ಕೊರತೆ ಖಂಡಿತ ಅಲ್ಲ. ಜನ ಪ್ರತಿನಿಧಿಗಳ ಮತ್ತು ಅಧಿಕಾರಿಗಳ ಇಚ್ಛಾ ಶಕ್ತಿಯ ಕೊರತೆ ಇದಕ್ಕೆ ಮುಖ್ಯ ಕಾರಣ. ಕಳೆದ ಮಳೆಗಾಲದಲ್ಲಿ ಮುಚ್ಚಲ್ಪಟಿದ್ದ ರಸ್ತೆಗಳ ಬಹುತೇಕ ಹೊಂಡ ಗುಂಡಿಗಳು ಮತ್ತಷ್ಟು ಹದಗೆಟ್ಟಿದ್ದರೆ, ಕೆಲವು ಕಡೆ ರಸ್ತೆ ಚೆನ್ನಾಗಿ ಇದೆ. ಇದು ಹೇಗೆ ಸಾಧ್ಯ. ಕೆಲವು ಕಡೆ ಚೆನ್ನಾಗಿ ಇರಬೇಕೆಂದಾದರೆ ಎಲ್ಲಾ ಕಡೆಯೂ ರಸ್ತೆ ಚೆನ್ನಾಗಿ ಇರಬೇಕು ತಾನೇ?

ರಸ್ತೆ ಹಾಳಾಗಲು ಮುಖ್ಯ ಕಾರಣಗಳಲ್ಲಿ ಮತ್ತೊಂದು ಕಳಪೆ ಕಾಮಗಾರಿ. ಗುಣಮಟ್ಟದ ಟಾರ್ ಹಾಕದಿರುವುದು. ಗುಣಮಟ್ಟ ಹಾಳಾಗಲು ಭ್ರಷ್ಟಾಚಾರ ಮತ್ತು ಕಮಿಷನ್ ನೇರ ಕಾರಣ. ವಾಹನ ಮಾಲೀಕರು ಲಕ್ಷಕ್ಕೂ ಹೆಚ್ಚು ರಸ್ತೆ ತೆರಿಗೆ ಕಟ್ಟುತ್ತಿದ್ದರೂ ಮಲೆನಾಡಿನಲ್ಲಿ ರಸ್ತೆಗಳ ಪರಿಸ್ಥಿತಿ ಅಯೋಮಯ. ಮಲೆನಾಡಿನ ಜನರ ಸಹನೆ ಒಂದು ಶಾಪವಾಗಿ ಪರಿಣಮಿಸಿದೆ.ಹೊಂಡ ಗುಂಡಿಗಳಿಂದ ಹಲವಾರು ಅಪಘಾತಗಳು ಸಂಭವಿಸಿವೆ. ಮಲೆನಾಡಿನ ಜನರ ಸಹನೆಗೂ ಒಂದು ಮಿತಿ ಇದೆ. ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳು ಜನರ ಆಕ್ರೋಶಕ್ಕೆ ತುತ್ತಾಗುವ ಮೊದಲು ಮಲೆನಾಡಿನ ಜನರನ್ನು ಪ್ರತೀ ವರ್ಷವೂ ಕಾಡುತ್ತಿರುವ ರಸ್ತೆ ಹೊಂಡ ಗುಂಡಿಗಳಿಂದ ಪಾರು ಮಾಡಬೇಕು. ಇಲ್ಲದಿದ್ದರೆ ಮುಂದಿನ ದಿನಗಳಲ್ಲಿ ಜನಪ್ರತಿನಿಧಿಗಳು ಮತ್ತು ಅಧಿಕಾರಿಗಳು ಸಂಚರಿಸುವಾಗ ಜನರ ತೀವ್ರ ಪ್ರತಿರೋಧ ಎದುರಿಸಬೇಕಾದೀತು.