ತುಮಕೂರು | ಸನ್ಮಾನದ ಹೆಸರಿನಲ್ಲಿ ಪೌರಕಾರ್ಮಿಕರಿಗೆ ಅವಮಾನ

ತುಮಕೂರು : ನವರಾತ್ರಿಯ ಅಷ್ಟು ದಿನಗಳ ಕಾಲ ದಸರಾ ನಡೆಯುತ್ತಿರುವ ಸರಕಾರಿ ಜೂನಿಯರ್ ಕಾಲೇಜು ಮೈದಾನ ಹಾಗೂ ನಗರವನ್ನು ಸ್ವಚ್ಚವಾಗಿಡಲು ಶ್ರಮಿಸಿದ ಪೌರಾಕಾರ್ಮಿಕರನ್ನು ಸನ್ಮಾನಿಸುವುದಾಗಿ ಕರೆಯಿಸಿ, ಅಪಮಾನಿಸಿರುವ ಘಟನೆ ಅ.20ರಂದು ನಡೆದಿದೆ.

ಅ.20ರಂದು ಮದ್ಯಾಹ್ನ 3:30ಕ್ಕೆ ನಗರಪಾಲಿಕೆಯ ಅಧಿಕಾರಿಗಳು ಸನ್ಮಾನಿಸುವುದಾಗಿ ಹೇಳಿ ಮುಖ್ಯವೇದಿಕೆಯಾದ ಅಮರಶಿಲ್ಪಿ ಜಕಣಾಚಾರಿ ವೇದಿಕೆ ಬಳಿ ಕರೆಯಿಸಿಕೊಂಡಿದ್ದಾರೆ. ಆದರೆ ವೇದಿಕೆಯ ಬಳಿ ಭದ್ರತೆಗಾಗಿ ನೇಮಕಗೊಂಡಿದ್ದ ಎಎಸ್‌ಪಿಯೊಬ್ಬರ ನೇತೃತ್ವದ ಪೊಲೀಸರ ತಂಡ ಪೌರಕಾರ್ಮಿಕರನ್ನು ವೇದಿಕೆಯ ಬಳಿ ಬಿಡಲು ನಿರಾಕರಿಸಿದ್ದಾರೆ. ನಗರಪಾಲಿಕೆಯ ಅಧಿಕಾರಿಗಳು ಪರಿಪರಿಯಾಗಿ ಹೇಳಿದರೂ ಕೇಳದ ಪೊಲೀಸರು ಸನ್ಮಾನಕ್ಕಾಗಿ ಬಂದಿದ್ದ ಸುಮಾರು 50ಕ್ಕೂ ಹೆಚ್ಚು ಪೌರಕಾರ್ಮಿಕರನ್ನು ಹೊರ ಕಳುಹಿಸಿದ್ದಾರೆ. ಅಲ್ಲದೆ ಸನ್ಮಾನಕ್ಕೆಂದು ಕನ್ನಡ ಸಂಸ್ಕೃತಿ ಇಲಾಖೆಯ ಕರೆಯ ಮೇರೆಗೆ ಆಗಮಿಸಿದ್ದ ಪತ್ರಕರ್ತರು ಹಾಗೂ ವಿವಿಧ ಸಮಿತಿಗಳ ಸದಸ್ಯರೊಂದಿಗೂ ಇದೇ ರೀತಿಯ ವರ್ತನೆ ಪೊಲೀಸರಿಂದ ನಡೆದಿದೆ.

ಇದರಿಂದ ಮನನೊಂದ ಪೌರಕಾರ್ಮಿಕರು ಸ್ಥಳದಲ್ಲಿಯೇ ಅಸಮಾಧಾನ ವ್ಯಕ್ತಪಡಿಸಿ, ನಮಗೆ ಸನ್ಮಾನವೂ ಬೇಡ, ದಸರಾವೂ ಬೇಡ ಎಂದು ಮೈದಾನದಿಂದ ಹೊರ ನಡೆದು, ರಾಧಾಕೃಷ್ಣ ರಸ್ತೆಯಲ್ಲಿರುವ ದ್ವಾರದ ಬಳಿ ಪ್ರತಿಭಟನೆಗೆ ಮುಂದಾದಾಗಲೂ ಪೊಲೀಸರು ಬಲವಂತವಾಗಿ ಅಲ್ಲಿಂದು ಹೊರಗೆ ಕಳುಹಿಸಿದ್ದಾರೆ.

ಸುಮಾರು 4.30ರ ಸುಮಾರಿಗೆ ಸ್ಥಳಕ್ಕೆ ಆಗಮಿಸಿದ ಜಿಲ್ಲಾಧಿಕಾರಿಗಳು ಹಾಗೂ ಜಿಲ್ಲಾ ಉಸ್ತುವಾರಿ ಸಚಿವರ ಗಮನಕ್ಕೆ ಪತ್ರಕರ್ತರು ಪೌರಕಾರ್ಮಿಕರಿಗೆ ಆದ ಅವಮಾನದ ಬಗ್ಗೆ ಅಸಮಧಾನ ವ್ಯಕ್ತಪಡಿಸಿದಾಗ ಎಚ್ಚೆತ್ತ ಜಿಲ್ಲಾ ಉಸ್ತುವಾರಿ ಸಚಿವರು, ಗೇಟ್‌ನ ಹೊರಗೆ ನಿಂತಿದ್ದ ಪೌರಕಾರ್ಮಿಕರ ಬಳಿ ಹೋಗಿ, ಅವರನ್ನು ಸಮಾಧಾನ ಪಡಿಸಿ, ಸನ್ಮಾನಕ್ಕೆ ಕರೆ ತಂದಿದ್ದು, ಅಂತಿಮವಾಗಿ ಮುಖ್ಯ ವೇದಿಕೆಯಲ್ಲಿಯೇ ಪೌರಕಾರ್ಮಿಕರಿಗೆ ಅಭಿನಂದಿಸುವ ಕೆಲಸವನ್ನು ಜಿಲ್ಲಾ ಉಸ್ತುವಾರಿ ಸಚಿವರ ಡಾ.ಜಿ.ಪರಮೇಶ್ವರ್ ಮಾಡಿದ್ದಾರೆ.