ಎಸ್ಐಆರ್ ಮೂಲಕ ಪ್ರಜಾಪ್ರಭುತ್ವದ ಮೂಲ ಆಶಯಗಳನ್ನೇ ತಿರುಚುವ ಹುನ್ನಾರ: ಪ್ರೊ.ಶ್ರೀಧರ್
ಉಡುಪಿ, ಜೂ.13: ವಿಶೇಷ ಸಮಗ್ರ ಮತದಾರರ ಪಟ್ಟಿ ಪರಿಷ್ಕರಣೆ (ಎಸ್ಐಆರ್) ಮೂಲಕ ಪ್ರಜಾಪ್ರಭುತ್ವದ ಮೂಲಭೂತ ಆಶಯಗಳನ್ನೇ ತಿರುಚುವ ಹುನ್ನಾರ ನಡೆಯುತ್ತಿದೆ. ಎಸ್ಐಆರ್ ಮುಂದೆ ಅನೇಕ ರೀತಿಯ ಪಲ್ಲಟ ಹಾಗೂ ತಲ್ಲಣಗಳಿಗೆ ಕಾರಣವಾಗಲಿವೆ. ಆದುದರಿಂದ ಇದನ್ನು ಜನರೇ ವಿರೋಧಿಸಬೇಕು ಎಂದು ಎಸ್ಐಆರ್ ಜನಜಾಗೃತಿ ಜಾಥದ ಸಂಚಾಲಕ ಪ್ರೊ.ವಿ.ಎಸ್.ಶ್ರೀಧರ್ ಹೇಳಿದ್ದಾರೆ.
ರಾಜ್ಯದ ಪ್ರಗತಿಪರ ಸಂಘಟನೆಗಳು ಹಾಗೂ ಜಾತ್ಯತೀತ ಪಕ್ಷಗಳ ಒಕ್ಕೂಟ ‘ಎಸ್ಐಆರ್ ವಿರೋಧಿ ಕರ್ನಾಟಕ’ ಇದರ ನೇತೃತ್ವದಲ್ಲಿ ಹಮ್ಮಿಕೊಳ್ಳಲಾಗಿ ರುವ ಎಸ್ಐಆರ್ ಜನಜಾಗೃತಿ ಅಬಿಯಾನದ ಕುರಿತ ಕರಪತ್ರವನ್ನು ಉಡುಪಿ ಪತ್ರಿಕಾ ಭವನದಲ್ಲಿ ಶನಿವಾರ ಕರೆಯಲಾದ ಪತ್ರಿಕಾಗೋಷ್ಠಿಯಲ್ಲಿ ಬಿಡುಗಡೆಗೊಳಿಸಿ ಅವರು ಮಾತನಾಡುತಿದ್ದರು.
ಮತದಾರರ ಪಟ್ಟಿ ಪರಿಷ್ಕರಣೆ ಮಾಡುವುದು ಸರಕಾರದ ಕೆಲವಸವೇ ಹೊರತು ಚುನಾವಣಾ ಆಯೋಗದ ಅಲ್ಲ. ಎಸ್ಐಆರ್ ಎಂಬುದು ಈ ಹಿಂದೆ ಜಾರಿಗೆ ತರಲು ಯತ್ನಿಸಿದ ಎನ್ಆರ್ಸಿ ಸಿಎಎಯ ಮುಂದಿನ ಭಾಗ. ಇದರಿಂದ ಮುಂದೆ ದೇಶದ ಪ್ರಜಾಸತ್ತಾತ್ಮಕ ಸ್ವರೂಪವೇ ತೀವ್ರವಾಗಿ ಬದಲಾಗುವ ಎಲ್ಲ ಅಪಾಯಗಳು ಇವೆ. ಇದು ಕೇವಲ ಚುನವಾಣಾ ಪರಿಷ್ಕರಣೆ ಮಾತ್ರವಲ್ಲ, ಮುಂದೆ ದೊಡ್ಡ ಯೋಜನೆಯ ಭಾಗವಾಗಿ ಬರುತ್ತಿದೆ ಎಂಬುದುನ್ನು ಎಲ್ಲರು ಅರ್ಥ ಮಾಡಿಕೊಳ್ಳಬೇಕಾಗಿದೆ ಎಂದರು.
ಈವರೆಗೆ ಮತದಾರರು ಸರಕಾರವನ್ನು ಆಯ್ಕೆ ಮಾಡುತ್ತಿದ್ದರೆ, ಈಗ ಎಸ್ಐಆರ್ ಬಂದ ನಂತರ ಸರಕಾರ ಮತದಾರರನ್ನು ಆಯ್ಕೆ ಮಾಡುವ ಸ್ಥಿತಿ ಬಂದಿದೆ. ಅನೇಕ ರಾಜ್ಯಗಳಲ್ಲಿ ಚುನಾವಣಾ ಹತ್ತಿರದಲ್ಲಿಯೇ ಇರುವಾಗ ಪರಿಷ್ಕರಣೆ ಮಾಡಲಾಗುತ್ತದೆ. ಆದುದರಿಂದ ಕೋಟ್ಯಂತರ ಮಂದಿ ಮತದಾನದ ಹಕ್ಕಿನಿಂದ ವಂಚಿತರಾದರು. ಇವರ ನೆರವಿಗೆ ನ್ಯಾಯಾಲಯ ಕೂಡ ಬರಲಿಲ್ಲ. ಮತದಾನ ನಿರಾಕರಿಸಿದವರಿಗೆ ದೇಶದಿಂದ ಹೊರ ದಬ್ಬುವ ಆತಂಕ ಎದುರಾಗಿದೆ. ಅವರು ಈ ದೇಶದ ಪ್ರಜೆಗಳಾಗಿ ಮುಂದು ವರೆಯುತ್ತಾರೆಯೇ ಎಂಬುದು ದೊಡ್ಡ ಪ್ರಶ್ನೆ ಯಾಗಿದೆ. ಈ ಬಗ್ಗೆ ಸರಕಾರ, ನ್ಯಾಯಾಲಯ, ಚುನಾವಣಾ ಆಯೋಗ ಮೌನ ವಹಿಸಿದೆ ಎಂದು ಅವರು ತಿಳಿಸಿದರು.
ಸಹಬಾಳ್ವೆ ಉಡುಪಿ ಜಿಲ್ಲಾ ಸಂಚಾಲಕ ಪ್ರೊ.ಫಣಿರಾಜ್ ಮಾತನಾಡಿ, ಇದೇ ಪ್ರಥಮ ಬಾರಿಗೆ ಚುನಾವಣಾ ಆಯೋಗ ಎಸ್ಐಆರ್ ನಡೆಸುತ್ತಿದೆ. ಈ ಹಿಂದಿನ ಚುನಾವಣಾ ಆಯೋಗಗಳು ನಡೆಸಿದ ಎಲ್ಲ ರೀತಿಯ ಪರಿಷ್ಕರಣೆ ಗಿಂತ ವಿಭಿನ್ನವಾಗಿದೆ. ಇದರ ಉದ್ದೇಶ ಮತದಾರರ ಪರಿಷ್ಕರಣೆ ಹೆಸರಿನಲ್ಲಿ ಪೌರತ್ವವನ್ನು ಸಾಬೀತು ಮಾಡುವ ಪ್ರಕ್ರಿಯೆಯಾಗಿದೆ ಎಂದು ಹೇಳಿದರು.
ಪೌರತ್ವ ಪರಿಶೀಲನೆ ಮತ್ತು ಅದನ್ನು ಸಿಂಧುತ್ವಗೊಳಿಸುವ ಅರ್ಹತೆ ಇಲ್ಲದ ಚುನಾವಣಾ ಆಯೋಗದ ಮೂಲಕ ಎನ್ಆರ್ಸಿ ಹಾಗೂ ಸಿಎಎಯನ್ನು ಹಿಂಬಾಗಿಲಿನಿಂದ ಜಾರಿಗೆ ತರುವ ಹುನ್ನಾರವನ್ನು ಕೇಂದ್ರ ಸರಕಾರ ನಡೆಸು ತ್ತಿದೆ. ಇದು ಸಂಪೂರ್ಣ ಅಸಂವಿಧಾನಿಕ ಪ್ರಕ್ರಿಯೆಯಾಗಿದೆ. ಚುನಾವಣಾ ಆಯೋಗಕ್ಕೆ ಈ ಪ್ರಕ್ರಿಯೆ ನಡೆಸಲು ಸಂವಿಧಾನಿಕ ಯಾವುದೇ ಅಧಿಕಾರಕ್ಕೆ ಇಲ್ಲ. ಆದುದರಿಂದ ಈ ಎಸ್ಐಆರ್ ಪ್ರತ್ರಿಯೆಯನ್ನು ಸರಕಾರ ಕೈಬಿಡಬೇಕು ಎಂದು ಅವರು ಆಗ್ರಹಿಸಿದರು.
ಈ ಸಂದರ್ಭದಲ್ಲಿ ದಸಂಸ ರಾಜ್ಯ ಸಂಘಟನಾ ಸಂಚಾಲಕ ಸುಂದರ್ ಮಾಸ್ತರ್, ಕ್ರೈಸ್ತ ಒಕ್ಕೂಟದ ಪ್ರಶಾಂತ್ ಜತ್ತನ್ನ, ಜಿಲ್ಲಾ ಮುಸ್ಲಿಮ್ ಒಕ್ಕೂಟದ ಪ್ರಧಾನ ಕಾರ್ಯದರ್ಶಿ ಇಸ್ಮಾಯಿಲ್ ಹುಸೇನ್ ಕಟಪಾಡಿ, ಪ್ರಮುಖರಾದ ಶ್ಯಾಮ್ರಾಜ್ ಬಿರ್ತಿ, ಇದ್ರೀಸ್ ಹೂಡೆ, ಶಶಿಧರ್ ಗೊಲ್ಲ, ಅಬ್ದುಲ್ ಅಝೀಝ್ ಉದ್ಯಾವರ ಉಪಸ್ಥಿತರಿದ್ದರು.
ಉಡುಪಿಯಲ್ಲಿ ಜಾಥಕ್ಕೆ ಚಾಲನೆ
ರಾಜ್ಯದ ಪ್ರಗತಿಪರ ಸಂಘಟನೆಗಳು ಹಾಗೂ ಜಾತ್ಯತೀತ ಪಕ್ಷಗಳ ಒಕ್ಕೂಟ ‘ಎಸ್ಐಆರ್ ವಿರೋಧಿ ಕರ್ನಾಟಕ’ ಇದರ ನೇತೃತ್ವದಲ್ಲಿ ಜೂ.13ರಿಂದ ಜೂ.18ರವರೆಗೆ ರಾಜ್ಯದ ಒಟ್ಟು ಐದು ಮಾರ್ಗಗಳಲ್ಲಿ ರಾಜ್ಯವ್ಯಾಪಿ ಎಸ್ಐಆರ್ ಕುರಿತ ಜನಜಾಗೃತಿ ಅಭಿಯಾನ ನಡೆಯಲಿದೆ.
ಬೀದರ್, ವಿಜಯಪುರ, ಉತ್ತರ ಕನ್ನಡ, ತುಮಕೂರು ಹಾಗೂ ಉಡುಪಿ ಜಿಲ್ಲೆಗಳಿಂದ ಜಾಥ ಹೊರಡಲಿದೆ. ಉಡುಪಿ ಜಾಥಕ್ಕೆ ಇಂದು ಚಾಲನೆ ನೀಡಲಾಗಿದ್ದು, ಈ ಜಾಥವು ದ.ಕ., ಕೊಡಗು, ಮೈಸೂರು, ಚಾಮರಾಜ ನಗರ ಜಿಲ್ಲೆಯ ಮೂಲಕ ಜೂ.18ರಂದು ಮಂಡ್ಯದಲ್ಲಿ ಸಮಾಪ್ತಿಗೊಳ್ಳಲಿದೆ. ಜೂ.20ರಂದು ಬೆಂಗಳೂರಿನಲ್ಲಿ ಐದು ಕಡೆಗಳ ಜಾಥ ಒಂದಾಗಿ ಎಸ್ಐಆರ್ ವಿರೋಧಿ ಬೃಹತ್ ಪ್ರತಿರೋಧ ಸಮಾವೇಶವನ್ನು ಹಮ್ಮಿಕೊಳ್ಳ ಲಾಗುವುದು ಎಂದು ಪ್ರೊ.ಫಣಿರಾಜ್ ಮಾಹಿತಿ ನೀಡಿದರು.
