ತವಕ್ಕಲ್ನ ‘ಅಲ್ಫಿಯಾ ಅಕಾಡೆಮಿ’ಗೆ ಚಾಲನೆ
ಕಾಪು, ಆ.4: ವಿಶ್ವದಾದ್ಯಂತದ ವಿದ್ಯಾರ್ಥಿಗಳಿಗೆ ವ್ಯವಸ್ಥಿತ ಹಾಗೂ ಅತ್ಯಂತ ಸೂಕ್ತವಾಗಿ ಇಸ್ಲಾಮಿಕ್ ಶಿಕ್ಷಣವನ್ನು ತಲುಪಿಸುವ ಉದ್ದೇಶದಿಂದ ತವಕ್ಕಲ್ ಸಂಸ್ಥೆಯ ಆಶ್ರಯದಲ್ಲಿ ರೂಪುಗೊಂಡಿರುವ ‘ಅಲ್ಫಿಯಾ ಅಕಾಡೆಮಿ’ಗೆ ರವಿವಾರ ಅಧಿಕೃತ ಚಾಲನೆ ನೀಡಲಾಯಿತು.
ಉಚ್ಚಿಲದ ತವಕ್ಕಲ್ ಮುಸ್ಲಿಂ ಯಂಗ್ಮೆನ್ಸ್ ಅಸೋಸಿಯೇಷನ್ ಕಟ್ಟಡದಲ್ಲಿ ಆಯೋಜಿಸಲಾದ ಸಮಾರಂಭದಲ್ಲಿ ಆನ್ಲೈನ್ ಮೂಲಕ ಅಕಾಡೆಮಿಯನ್ನು ಉದ್ಘಾಟಿಸಲಾಯಿತು. ಕಾರ್ಯಕ್ರಮದಲ್ಲಿ ಉಚ್ಚಿಲ ಸಯ್ಯದ್ ಅರಬಿ ಜುಮ್ಮಾ ಮಸೀದಿ ಖತೀಬ್ ಬರುವಾ ಸಅದಿ, ತವಕ್ಕಲ್ ಓವರ್ಸೀಸ್ ಸಂಸ್ಥಾಪಕ ಅಧ್ಯಕ್ಷ ವೈ.ಅಹ್ಮದ್ ಹಾಜಿ, ತವಕ್ಕಲ್ ಉಪಾಧ್ಯಕ್ಷ ಅಬ್ದುಲ್ ರಝಾಕ್ ಶಾಬಾನ್, ತವಕ್ಕಲ್ ಕಾರ್ಯದರ್ಶಿ ಅಬ್ದುಲ್ ರಹ್ಮಾನ್ ಕುಚ್ಚಿಕಾಡ್, ಖಜಾಂಚಿ ಅಹ್ಮದ್ ಗುಲಾಂ ಉಪಸ್ಥಿತರಿದ್ದರು.
ಆನ್ಲೈನ್ ಮೂಲಕ ತವಕ್ಕಲ್ ಓವರ್ಸೀಸ್ ಅಧ್ಯಕ್ಷ ಮೊಹಮ್ಮದ್ ಅಶ್ಫಾಕ್, ತವಕ್ಕಲ್ ಅಧ್ಯಕ್ಷ ಅರ್ಷ ಇಬ್ರಾಹಿಂ, ಲಂಡನ್ ಅಮೇರಿಕನ್ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ.ಕಾಪು ಮೊಹಮ್ಮದ್, ಸಮಾಜ ಸೇವಕ ತನ್ವೀರ್ ಅಹ್ಮದ್ ಮತ್ತು ಅರ್ಷದ್ ಫಾರೂಕಿ ಶುಭ ಹಾರೈಸಿದರು.
ಬಿಲಾಲ್ ಅಬ್ದುಲ್ ರಹ್ಮಾನ್ ಕಿರಾತ್ ಪಠಿಸಿದರು. ಬಿಲಾಲ್ ಮೊಹಮ್ಮದ್ ಸುಲೈಮಾನ್ ಸ್ವಾಗತಿಸಿದರು. ಶಮೀರ್ ಅಹ್ಮದ್ ತವಕ್ಕಲ್ ಹಾಗೂ ಅಲ್ಫಿಯಾ ಅಕಾಡೆಮಿಯ ಕುರಿತು ಪರಿಚಯ ನೀಡಿದರು. ಜಾವೇದ್ ಅಹ್ಮದ್ ಅಕಾಡೆಮಿಯ ಪೋರ್ಟಲ್ ಕಾರ್ಯವಿಧಾನದ ಕುರಿತು ವಿವರಿಸಿದರು. ರೈಫ್ ಅಬ್ದುಲ್ ರಝಾಕ್ ವಿಡಿಯೊ ಬಗ್ಗೆ ವಿವರಣೆ ನೀಡಿದರು. ಇಸ್ಮಾಯಿಲ್ ಝಬೀಹ್ ಕ್ವಿಝ್ ಸ್ಪರ್ಧೆಯ ಕುರಿತು ಮಾಹಿತಿ ನೀಡಿದರು. ಫೈಝಲ್ ಇಸ್ಮಾಯಿಲ್ ಉಮ್ಮರ್ ನಿರೂಪಿಸಿದರು.
ಅಲ್ಫಿಯಾ ಅಕಾಡೆಮಿಯು 10 ಪ್ರಮುಖ ಇಸ್ಲಾಮಿಕ್ ವಿಷಯಗಳನ್ನು ಒಳಗೊಂಡಿರುವ ವ್ಯವಸ್ಥಿತ ಪಠ್ಯಕ್ರಮದ ಮೂಲಕ ‘1,000 ಲೈಟ್ಸ್ ಆಫ್ ಇಸ್ಲಾಮಿಕ್ ನಾಲೇಜ್’ ಪರಿಕಲ್ಪನೆಯನ್ನು ವಿದ್ಯಾರ್ಥಿಗಳಿಗೆ ತಲುಪಿಸುವ ಆನ್ಲೈನ್ ಶಿಕ್ಷಣ ವೇದಿಕೆಯಾಗಿದೆ. ಯಾವುದೇ ವಯೋಮಾನದ ಹಾಗೂ ಯಾವುದೇ ವರ್ಗದ ವಿದ್ಯಾರ್ಥಿಗಳು ಪ್ರವೇಶ ಪಡೆಯಬಹುದಾಗಿದ್ದು, ಪ್ರತಿ ವಿದ್ಯಾರ್ಥಿಗೆ 999ರೂ. ಕೋರ್ಸ್ ಶುಲ್ಕ ನಿಗದಿಪಡಿಸಲಾಗಿದೆ.
ಡಿಸೆಂಬರ್ನಲ್ಲಿ ಕ್ವಿಝ್ ಸ್ಪರ್ಧೆ
ಅಲ್ಫಿಯಾ ಅಕಾಡೆಮಿ ವತಿಯಿಂದ ಕ್ವಿಝ್ ಸ್ಪರ್ಧೆಯನ್ನು ಡಿಸೆಂಬರ್ನಲ್ಲಿ ಏರ್ಪಡಿಸಲಾಗಿದ್ದು, ವಿಜೇತರಿಗೆ ಪ್ರಥಮ ಬಹುಮಾನವಾಗಿ 50 ಸಾವಿರ, ದ್ವಿತೀಯ ಬಹುಮಾನವಾಗಿ 30 ಸಾವಿರ ಹಾಗೂ ತೃತೀಯ ಬಹುಮಾನ ವಾಗಿ 20 ಸಾವಿರ ನಗದು ಬಹುಮಾನ ನೀಡಲಾಗುವುದು ಎಂದು ಸಂಘಟಕರು ತಿಳಿಸಿದ್ದಾರೆ.
