ಮೀನಿನ ವ್ಯವಹಾರದ ಹಣದೊಂದಿಗೆ ನೌಕರ ಪರಾರಿ; ಪ್ರಕರಣ ದಾಖಲು

ಮಲ್ಪೆ, ಸೆ.21: ಮೀನಿನ ವ್ಯವಹಾರಕ್ಕೆ ಸಂಬಂಧಿಸಿ ಲಕ್ಷಾಂತರ ರೂ. ಹಣವನ್ನು ನೌಕರ ತನ್ನ ವೈಯಕ್ತಿಕ ಬ್ಯಾಂಕ್ ಖಾತೆಗೆ ಜಮಾ ಮಾಡಿ ವಂಚಿಸಿ ಪರಾರಿಯಾಗಿರುವ ಬಗ್ಗೆ ನ್ಯಾಯಾಲಯದ ಖಾಸಗಿ ದೂರಿನಂತೆ ಮಲ್ಪೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಮಣಿಪಾಲ ಪ್ರಗತಿನಗರದ ಜೋನ್ಸನ್ ಎಂಬವರು ಮಲ್ಪೆಯಲ್ಲಿ ರೆಹಬೊತ್ ಸೀಫುಡ್ ಹೆಸರಿನಲ್ಲಿ ಮೀನು ವ್ಯವಹಾರ ನಡೆಸಿಕೊಂಡಿದ್ದು, ಮಲ್ಪೆ ಬಂದರಿನಿಂದ ಮೀನು ಖರೀದಿಸಿ ತಮಿಳುನಾಡಿನ ವಿವಿಧ ಗ್ರಾಹಕರಿಗೆ ಕಳುಹಿಸುತ್ತಿದ್ದರು. ಇವರ ಬಳಿ ಕೆಲಸ ಮಾಡುವ ವಿನು ವಿ.ಎಸ್, ಹಣಕಾಸಿನ ವ್ಯವಹಾರಗಳನ್ನು ನೋಡಿಕೊಳ್ಳುತ್ತಿದ್ದನು.

2025ರ ಆಗಸ್ಟ್ ಮತ್ತು ಸೆಪ್ಟೆಂಬರ್ ತಿಂಗಳಲ್ಲಿ ತಮಿಳುನಾಡು ರಾಜ್ಯದ ಕೋಟಿ ಪಟ್ಟಿನಂನಲ್ಲಿರುವ ಜೆ.ಆರ್.ಜೆ. ಫುಡ್ಸ್ ಇಂಡಿಯಾ ಪ್ರೈ.ಲಿ. ಸಂಸ್ಥೆಗೆ 16 ಲಕ್ಷಕ್ಕೂ ಅಧಿಕ ಮೌಲ್ಯದ ಮೀನು ಕಳುಹಿಸಲಾಗಿದ್ದು, ಸಂಸ್ಥೆಯಿಂದ ಜೋನ್ಸನ್ ಅವರಿಗೆ ಪಾವತಿಯಾಗಬೇಕಿದ್ದ ಹಣದಲ್ಲಿ 10,11,450ರೂ. ಹಣವನ್ನು ವಿನು ತನ್ನ ವೈಯಕ್ತಿಕ ಬ್ಯಾಂಕ್ ಖಾತೆಗೆ ಜಮಾ ಮಾಡಿಕೊಂಡು ಜೋನ್ಸನ್ ಅವರಿಗೆ ಯಾವುದೇ ಮಾಹಿತಿ ನೀಡದೇ ಪರಾರಿಯಾಗಿ ವಂಚನೆ ಮಾಡಿರುವುದಾಗಿ ದೂರಲಾಗಿದೆ.