ಶಾಜಾದಲ್ಲಿ ಹತ್ಯೆ ಪ್ರಕರಣ: ಹುಟ್ಟೂರಿನಲ್ಲಿ ಅಲ್ವಿನ್ ಪ್ರಕಾಶ್ ಕುಂದರ್ ಅಂತ್ಯಕ್ರಿಯೆ

ಕುಂದಾಪುರ, ಸೆ.25: ಶಾರ್ಜಾದಲ್ಲಿ ಕಳೆದ ಜುಲೈನಲ್ಲಿ ನಿಗೂಢವಾಗಿ ಭೀಕರ ಹತ್ಯೆಯಾದ ಕುಂದಾಪುರದ ಪುರಸಭೆ ವ್ಯಾಪ್ತಿಯ ಹೊನ್ನನಕೇರಿ ನಿವಾಸಿ ಅಲ್ವಿನ್ ಪ್ರಕಾಶ್ ಕುಂದರ್(50) ಅವರ ಪಾರ್ಥಿವ ಶರೀರ ಶುಕ್ರವಾರ ಹುಟ್ಟೂರಿಗೆ ಆಗಮಿಸಿದ್ದು, ಬಳಿಕ ಕುಂದಾಪುರ ಶಾಸ್ತ್ರೀ ವೃತ್ತದ ಬಳಿಯ ಸಿ.ಎಸ್.ಐ ಕೃಪಾ ಚರ್ಚ್‌ನ ಸಮಾಧಿ ಸ್ಥಳದಲ್ಲಿ ಅಂತ್ಯಸಂಸ್ಕಾರ ನೆರವೇರಿಸಲಾಯಿತು.

ಶಾರ್ಜಾದಿಂದ ಪ್ರಾರ್ಥಿವ ಶರೀರ ಸೆ.24ರಂದು ರಾತ್ರಿ ವಿಮಾನದ ಮೂಲಕ ಮಂಗಳೂರಿಗೆ ಆಗಮಿಸಿದ್ದು, 8.45ರ ಸುಮಾರಿಗೆ ಮಂಗಳೂರಿ ನಿಂದ ಅಂಬುಲೆನ್ಸ್ ಮೂಲಕ ಮೃತದೇಹವನ್ನು ಪ್ರಕಾಶ್ ಕುಂದರ್ ಅವರ ಹೊನ್ನನಕೇರಿಯ ನಿವಾಸಕ್ಕೆ ತರಲಾಯಿತು.

ಮೃತದೇಹ ನಿವಾಸಕ್ಕೆ ಬರುತ್ತಲೇ ಮೃತರ ಹಿರಿಯ ಸಹೋದರಿ ಅನಿತಾ, ಕುಟುಂಬಿಕರು, ಸಂಬಂಧಿಗಳು ಸಹಿತ ಹಿತೈಷಿಗಳು ಕಣ್ಣೀರಿಟ್ಟರು. ಮಳೆಯ ನಡುವೆಯೂ ಆಗಮಿಸಿದ ನೂರಾರು ಮಂದಿ ಅಂತಿಮ ನಮನ ಸಲ್ಲಿಸಿದರು. ಗಂಟೆಗಳ ಕಾಲ ನಿವಾಸದಲ್ಲಿ ಅಂತಿಮ ಪೂಜಾ ವಿಧಿ ನಡೆಸಿ ಬಳಿಕ ಚರ್ಚ್‌ಗೆ ಕೊಂಡೊಯ್ಯಲಾಯಿತು.

ಬೆಳಿಗ್ಗೆ 10-11.30ರ ಮಧ್ಯಾವಧಿಯಲ್ಲಿ ಕುಂದಾಪುರ ಶಾಸ್ತ್ರೀ ವೃತ್ತದ ಬಳಿಯ ಸಿ.ಎಸ್.ಐ ಕೃಪಾ ಚರ್ಚ್‌ನ ಸಮಾಧಿ ಸ್ಥಳದಲ್ಲಿ ಆಲ್ವಿನ್ ಅವರ ಅಪ್ಪ- ಅಮ್ಮನ ಸಮಾಧಿ ಪಕ್ಕದಲ್ಲಿಯೇ ಅಂತ್ಯಸಂಸ್ಕಾರ ಮಾಡಲಾಯಿತು. ಸಿ.ಎಸ್.ಐ ಕೃಪಾ ಚರ್ಚ್ ಧರ್ಮಗುರುಗಳಾದ ರೆ.ಫಾ.ಇಮಾನ್ಯವಲ್ ಜಯಕರ್ ನೇತೃತ್ವದಲ್ಲಿ ಏರಿಯಾ ಅಧ್ಯಕ್ಷ ರೆ.ಕಿಶೋರ್ ಕುಮಾರ್, ರೆ. ಎಡ್ವಿನ್ ಜೋಸೆಫ್, ಸಿಎಎಸ್‌ಐ ಡಯಾಸಿಸ್ ಕೋಶಾಧಿಕಾರಿ ಐವಾನ್ ಸೋನ್ಸ್, ರೆ.ಪ್ರವೀಣ್ ಮಾಬೆನ್, ಬಸ್ರೂರು ಎಲಿಜಬೆತ್ ಚರ್ಚ್‌ನ ರೆ. ಫಾ.ರವಿ ಶಶಿಕಲಾ, ರೆ.ಸ್ಟೀವನ್ ಸರ್ವೋತ್ತಮ್ ಮೊದಲಾದವರು ಮನೆ ಹಾಗೂ ಚರ್ಚ್‌ನಲ್ಲಿ ಸಕಲ ವಿಧಿಗಳನ್ನು ನೆರವೇರಿಸಿದರು.

ಈ ಸಂದರ್ಭದಲ್ಲಿ ಉಡುಪಿ-ಚಿಕ್ಕಮಗಳೂರು ಸಂಸದ ಕೋಟ ಶ್ರೀನಿವಾಸ ಪೂಜಾರಿ, ಶಾಸಕ ಎ.ಕಿರಣ್ ಕುಮಾರ್ ಕೊಡ್ಗಿ, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಎಂ.ಎ.ಗಫೂರ್, ಮಾಜಿ ಸಂಸದ ಕೆ.ಜಯಪ್ರಕಾಶ್ ಹೆಗ್ಡೆ, ಕುಂದಾಪುರ ನಗರ ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ವಿನೋದ್ ಕ್ರಾಸ್ತಾ, ಪುರಸಭೆ ಮಾಜಿ ಸದಸ್ಯರಾದ ವಿ.ಪ್ರಭಾಕರ್, ಎಚ್.ನರಸಿಂಹ, ರಾಜೇಶ ಕಾವೇರಿ, ರತ್ನಾಕರ, ಪ್ರಮುಖರಾದ ದಿನೇಶ್ ಹೆಗ್ಡೆ ಮೊಳಹಳ್ಳಿ, ವಿಕಾಸ ಹೆಗ್ಡೆ, ವಿಜಯ್ ಎಸ್.ಪೂಜಾರಿ ಮೊದಲಾದವರು ಭೇಟಿ ನೀಡಿದರು.

ಕುಟುಂಬಕ್ಕೆ ನೆರವಾದ ಎಂ.ಎ.ಗಫೂರ್

ಶುಕ್ರವಾರ ಮುಂಜಾನೆ ಮಂಗಳೂರು ವಿಮಾನ ನಿಲ್ದಾಣಕ್ಕೆ ತೆರಳಿ ಮೃತ ದೇಹವನ್ನು ಕಾನೂನುಬದ್ದವಾಗಿ ಸ್ವೀಕರಿಸುವ ಪ್ರಕ್ರಿಯೆ ವಿಳಂಭವಾಗದಂತೆ ಕರಾವಳಿ ಅಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಎಂ.ಎ.ಗಫೂರ್ ಮೃತರ ಕುಟುಂಬಕ್ಕೆ ನೆರವಾದರು.

ಖುದ್ದು ತಾನೆ ವಿಮಾನ ನಿಲ್ದಾಣಕ್ಕೆ ಮೃತರ ಸಹೋದರ ಅನಿಲ್ ಪ್ರಶಾಂತ್ ಕುಂದರ್, ಆಪ್ತರಾದ ಆಕಾಶ್, ಉದಯ್ ಕುಮಾರ್, ಕೋಟೆ ಗ್ರಾಪಂ ಮಾಜಿ ಅಧ್ಯಕ್ಷೆ ಪ್ರಮೀಳಾ ಜತ್ತನ್ ಮೊದಲಾದವರ ಜೊತೆ ತೆರಳಿ ಪ್ರಕ್ರಿಯೆ ಸುಗಮವಾಗುವಂತೆ ನೋಡಿಕೊಂಡಿದ್ದಲ್ಲದೆ ಮೃತದೇಹದೊಂದಿಗೆ ಕುಂದಾಪುರದ ಆಲ್ವಿನ್ ನಿವಾಸಕ್ಕೂ ಆಗಮಿಸಿ ಮಧ್ಯಾಹ್ನ ಸಂಪೂರ್ಣ ಅಂತಿಮ ಕಾರ್ಯ ಮುಗಿಯುವವರೆಗೂ ಇದ್ದು ಕುಟುಂಬಸ್ಥರಿಗೆ ಧೈರ್ಯ, ಸಾಂತ್ವಾನ ಹೇಳಿದರು.

‘ಸಹೋದರನ ಮೃತದೇಹವನ್ನು ದೇಶಕ್ಕೆ ತರಲು ಸಂಸದರು, ಎಂ.ಎ.ಗಫೂರ್ ಸಹಿತ ಹಲವರು ಸಹಕಾರ ನೀಡಿದರು. ತಂದೆ-ತಾಯಿ ಸಮಾಧಿ ಪಕ್ಕವೇ ಅಂತ್ಯಕ್ರಿಯೆ ಮಾಡಿದ್ದೇವೆ. ತಮ್ಮನ ಹತ್ಯೆ ಮಾಡಿದವರಿಗೆ ಕಠಿಣ ಶಿಕ್ಷೆಯಾಗಬೇಕು. ಈ ಬಗ್ಗೆ ಜಿಲ್ಲಾ ಪೊಲೀಸ್ ಇಲಾಖೆಗೆ ದೂರು ಅರ್ಜಿ ನೀಡಿದ್ದೇವೆ. ನಾಪತ್ತೆಯಾದವರನ್ನು ಕೂಡಲೇ ಪತ್ತೆ ಮಾಡಿ ತನಿಖೆ ನಡೆಸಬೇಕು.

-ಅನಿಲ್ ಪ್ರಶಾಂತ್ ಕುಂದರ್, ಅಲ್ವಿನ್ ಸಹೋದರ

‘ವಿದೇಶಾಂಗ ಮಂತ್ರಿ ಜೈಶಂಕರ್ ಪರಿಶ್ರಮದಿಂದ ಮೃತದೇಹ ಕುಂದಾಪುರಕ್ಕೆ ತರಲು ಸಹಕಾರಿಯಾಗಿದೆ. ಹತ್ಯೆಯ ಹಿಂದಿನ ಕಾರಣಗಳು ಹಾಗೂ ಪತ್ನಿ, ಪುತ್ರ ನಾಪತ್ತೆಯಾಗಿರುವ ಸಂಗತಿಗಳನ್ನು ಗಮನದಲ್ಲಿಟ್ಟು ಕೊಂಡು ಸಮಗ್ರ ತನಿಖೆ ನಡೆಸಲು ಕೇಂದ್ರ ಸರಕಾರವನ್ನು ಒತ್ತಾಯಿಸಲಾಗಿದೆ. ಆರೋಪಿಗಳ ಪತ್ತೆ ಮಾಡಿ ತಪ್ಪಿತಸ್ಥರಿಗೆ ಶಿಕ್ಷೆ ನೀಡಿ ಮೃತರ ಕುಟುಂಬಕ್ಕೆ ನ್ಯಾಯ ದೊರಕಿಸಿದಾಗಲೇ ಪ್ರಕರಣ ತಾತ್ವಿಕವಾಗಿ ಅಂತ್ಯವಾಗಲಿದೆ’

-ಕೋಟ ಶ್ರೀನಿವಾಸ ಪೂಜಾರಿ, ಸಂಸದರು

‘ಅಲ್ವಿನ್ ಅವರ ಭೀಕರ ಹತ್ಯೆಯಾಗಿದ್ದು ಇಂತಹ ಘಟನೆ ಎಲ್ಲಿಯೂ ನಡೆಯಬಾರದು. ಮೇಲ್ನೋಟಕ್ಕೆ ಕಂಡು ಬರುತ್ತಿರುವ ಎಲ್ಲಾ ಸಂಗತಿಗಳ ಬಗ್ಗೆ ಕೂಲಂಕುಷ ತನಿಖೆಯಾಗಬೇಕು. ಈ ಘಟನೆಯು ಮಾನವೀಯತೆ ಮೌಲ್ಯ ಗಳು ಕುಸಿದಿದೆ ಎಂಬುದಕ್ಕೆ ಸಾಕ್ಷಿಯಾಗಿದೆ. ಇಂತಹ ಘಟನೆಗಳು ಮರುಕಳಿಸದಿರಲು ದುಷ್ಕರ್ಮಿಗಳಿಗೆ ಕಾನೂನು ಚೌಕಟ್ಟಿನಲ್ಲಿ ಶಿಕ್ಷೆಗೊಳಪಡಿಸ ಬೇಕು. ನಾಪತ್ತೆಯಾಗಿರುವ ಅಲ್ವಿನ್ ಪತ್ನಿ, ಪುತ್ರನ ಪತ್ತೆಗೆ ಸಂಬಂಧಪಟ್ಟ ಇಲಾಖೆ ಕಾರ್ಯೋನ್ಮುಖರಾಗಬೇಕು’

-ಎಂ.ಎ.ಗಫೂರ್, ಅಧ್ಯಕ್ಷರು, ಕರಾವಳಿ ಅಭಿವೃದ್ಧಿ ಪ್ರಾಧಿಕಾರ