ಹಳೆಗನ್ನಡವನ್ನು ಅರಿವಿನ ಓದಾಗಿಸಬೇಕು: ಡಾ.ರವಿರಾಜ ಶೆಟ್ಟಿ

ಉಡುಪಿ, ಸೆ.26: ಹಳೆಗನ್ನಡ ಸಾಹಿತ್ಯಕ್ಕೆ ವಿಶಾಲವಾದ ವ್ಯಾಪ್ತಿಯಿದೆ. ಕೇವಲ ಪಠ್ಯವನ್ನು ಹಿಡಿದು ಕಂಠಪಾಠ ಮಾಡುವುದರಿಂದ ಹಳೆಗನ್ನಡದ ಓದು ಪೂರ್ಣವಾಗುವುದಿಲ್ಲ. ಅದರಲ್ಲಿರುವ ಅರ್ಥವನ್ನು ಮೀರಿ ಅಧ್ಯಯನಶೀಲ ವಾಗಿ ಓದುವ ಅಗತ್ಯವಿದೆ. ಕವಿ ಕೃತಿಯಲ್ಲಿ ನೇರವಾಗಿ ಕಾಣಿಸದಿರುವ ಅಂಶಗಳನ್ನು ಸೂಕ್ಷ್ಮವಾಗಿ ಗ್ರಹಿಸಿ ಹಳೆಗನ್ನಡವನ್ನು ಅರಿವಿನ ಓದಾಗಿಸಬೇಕು ಎಂದು ಕಾಪು ಸರಕಾರಿ ಪ್ರಥಮ ದರ್ಜೆ ಕಾಲೇಜಿನ ಕನ್ನಡ ಪ್ರಾಧ್ಯಾಪಕ ಡಾ. ರವಿರಾಜ ಶೆಟ್ಟಿ ಅಭಿಪ್ರಾಯಪಟ್ಟಿದ್ದಾರೆ.

ತೆಂಕನಿಡಿಯೂರಿನ ಸರಕಾರಿ ಪ್ರಥಮ ದರ್ಜೆ ಕಾಲೇಜು ಹಾಗೂ ಸ್ನಾತಕೋತ್ತರ ಅಧ್ಯಯನ ಕೇಂದ್ರದ ಕನ್ನಡ ವಿಭಾಗ ಹಾಗೂ ಐಕ್ಯೂಎಸಿ ಸಹಯೋಗದಲ್ಲಿ ಆಯೋಜಿಸಲಾಗಿದ್ದ ‘ಕಬ್ಬದುಳುಮೆ ಹಳೆಗನ್ನಡ ಕಾವ್ಯದ ಓದು ಕಮ್ಮಟ’ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡುತಿದ್ದರು.

ಸಾಹಿತ್ಯವನ್ನು ವರ್ತಮಾನದೊಂದಿಗೆ ಮುಖಾಮುಖಿಯಾಗಿಸುವ ಸಾಮರ್ಥ್ಯವನ್ನು ಬೆಳೆಸಿಕೊಳ್ಳಬೇಕು. ಪುರಾಣದ ಕಥೆಗಳಲ್ಲಿರುವ ಪಾತ್ರಗಳನ್ನು ವರ್ತಮಾನದ ಮನುಷ್ಯರೊಂದಿಗೆ ಹೋಲಿಸಿ, ಅವುಗಳ ಆಶಯಗಳನ್ನು ಇಂದಿನ ಬದುಕಿನ ಸಂದರ್ಭದಲ್ಲಿ ಅರ್ಥೈಸಿಕೊಳ್ಳುವ ಬಗೆಯನ್ನು ಅರಿಯ ಬೇಕು. ನಮ್ಮೊಳಗಿನ ‘ಅರಿವಿನ ಕಣ್ಣು’ ತೆರೆದಾಗ ಮಾತ್ರ ಇಂತಹ ಓದು ಸಾಧ್ಯ. ಪಂಪ ಜೈನಧರ್ಮದ ಕವಚವನ್ನು ಬದಿಗೆ ಸರಿಸಿ ಕಾವ್ಯವನ್ನು ರಚಿಸಿದ ಕವಿ. ಕನ್ನಡ ಸಾಹಿತ್ಯ ಲೋಕಕ್ಕೆ ಕವಿರಾಜಮಾರ್ಗ ಉದಾತ್ತವಾದ ಕೊಡುಗೆ ಯನ್ನು ನೀಡಿದೆ ಎಂದು ಅವರು ಹೇಳಿದರು.

ಪ್ರಾಸ್ತಾವಿಕ ನುಡಿಗಳನ್ನಾಡಿದ ಸ್ನಾತಕೋತ್ತರ ವಿಭಾಗದ ಸಂಯೋಜಕರಾದ ರತ್ನಮಾಲ, ‘ಕಬ್ಬದುಳುಮೆ’ ಕಮ್ಮಟದ ಉದ್ದೇಶ ಮತ್ತು ಆಶಯಗಳನ್ನು ವಿವರಿಸಿದರು. ಹಳೆಗನ್ನಡ ಕಾವ್ಯವನ್ನು ಸರಳವಾಗಿ ಓದಿ ಅರ್ಥೈಸಿ ಕೊಳ್ಳುವ ಸಾಮರ್ಥ್ಯವನ್ನು ವಿದ್ಯಾರ್ಥಿಗಳಲ್ಲಿ ಬೆಳೆಸುವುದು ಮತ್ತು ಅವರಲ್ಲಿ ಆತ್ಮ ವಿಶ್ವಾಸವನ್ನು ತುಂಬುವುದು ಕಮ್ಮಟದ ಪ್ರಮುಖ ಆಶಯವಾಗಿದೆ ಎಂದರು.

ಕಾಲೇಜಿನ ಪ್ರಾಂಶುಪಾಲರಾದ ಪ್ರೊ.ನಿತ್ಯಾನಂದ ವಿ ಗಾಂವಕರ ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿದ್ದರು. ಸ್ನಾತಕೋತ್ತರ ವಿಭಾಗದ ಶೈಕ್ಷಣಿಕ ಸಲಹೆಗಾರರಾದ ಪ್ರೊ. ಶ್ರೀಧರ ಭಟ್ ಹಾಗೂ ಕನ್ನಡ ವಿಭಾಗದ ಎಲ್ಲಾ ಉಪನ್ಯಾಸಕರು ಉಪಸ್ಥಿತರಿದ್ದರು.

ಕನ್ನಡ ವಿಭಾಗದ ಮುಖ್ಯಸ್ಥರಾದ ಮಾರುತಿ ಸ್ವಾಗತಿಸಿದರು. ಉಪನ್ಯಾಸಕಿ ಅರ್ಚನಾ ವಂದಿಸಿ ಉಪನ್ಯಾಸಕಿ ಶರಿತಾ ಕಾರ್ಯಕ್ರಮವನ್ನು ನಿರೂಪಿಸಿದರು.