ಕುಂದಾಪುರದಲ್ಲಿ ಗಮನ ಸೆಳೆದ ‘ಯುವ ಸಂಸತ್ತು’ ಸಭೆ; ವಿಧಾನಸಭಾ ಅಧಿವೇಶನದಂತೆ ವಿದ್ಯಾರ್ಥಿಗಳ ಸಿದ್ಧತೆ

ಕುಂದಾಪುರ : ರಾಜ್ಯ ವಿಧಾನಸಭೆಯ ಮಾದರಿಯಲ್ಲೇ ಯುವ ಸಂಸತ್ತನ್ನು ಆಯೋಜಿಸಿ, ವಿದ್ಯಾರ್ಥಿಗಳಲ್ಲಿ ಪ್ರಜಾ ಪ್ರಭುತ್ವದ ಮೌಲ್ಯಗಳು ಹಾಗೂ ಸಂಸದೀಯ ವ್ಯವಸ್ಥೆಯ ಬಗ್ಗೆ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಸರಕಾರದ ನಿರ್ದೇಶನದಂತೆ ಕುಂದಾಪುರ ತಾಲೂಕಿನಲ್ಲಿ ನಡೆದ ‘ಯುವ ಸಂಸತ್ತು’ ಕಾರ್ಯಕ್ರಮ ಮಾದರಿಯಾಗಿ ಮೂಡಿಬಂತು.

ಮೊದಲಿಗೆ ವಿಧಾನಸಭೆ ಮಾದರಿಯಲ್ಲೇ ವಿಧಾನಸಭಾ ಅಧ್ಯಕ್ಷರು ಆಗಮಿಸಿ ಪೀಠ ಏರುತ್ತಾರೆ. ‘ಚರ್ಚೆಯ ಮೂಲಕ ಪರಿಹಾರ, ಸಹಕಾರದ ಮೂಲಕ ಅಭಿವೃದ್ದಿ’ ಆಶಯ ಎಂದು ಸ್ಪೀಕರ್ ಆಶಯ ನುಡಿಗಳನ್ನಾಡಿ ಅಧಿವೇಶನ ಆರಂಭಿ ಸುತ್ತಾರೆ. ಸಂತಾಪ ಸೂಚನೆ, ಪ್ರಶ್ನೋತ್ತರ ವೇಳೆ, ಶೂನ್ಯ ವೇಳೆ, ಗಮನ ಸೆಳೆಯುವ ಪ್ರಶ್ನೆ, ಕೊನೆಯಲ್ಲಿ ವಿದೇಯಕ ಮಂಡನೆ ಇತ್ತು. ಉಪ ಸ್ಪೀಕರ್, ಕಾರ್ಯದರ್ಶಿ, ಮುಖ್ಯಮಂತ್ರಿ, ಉಪಮುಖ್ಯಮಂತ್ರಿಗಳಿಬ್ಬರು, ಗೃಹ ಸಚಿವರು, ವಿರೊಧ ಪಕ್ಷದ ನಾಯಕ, ವಿವಿಧ ಇಲಾಖೆ ಮಂತ್ರಿಗಳು, ಆಡಳಿತ-ವಿರೋಧ ಪಕ್ಷದ ಶಾಸಕರು ಇದ್ದರು. ಪತ್ರಕರ್ತರ ಗ್ಯಾಲರಿ, ಪ್ರೇಕ್ಷಕರ ಗ್ಯಾಲರಿ, ಸದನದ ಬಾವಿ ಎಲ್ಲವನ್ನೂ ಸಿದ್ಧಪಡಿಸಲಾಗಿತ್ತು.

ಪ್ರಶ್ನೋತ್ತರ ವೇಳೆಯ ಚುಕ್ಕಿ ಗುರಿತಿನ ಪ್ರಶ್ನೆಯಲ್ಲಿ ಸೈಬರ್ ಕ್ರೈಮ್, ರೈತರ ಸಮಸ್ಯೆ, ಅಂಕಪಟ್ಟಿ, ಶಿಕ್ಷಣದಲ್ಲಿ ಎಐ ಸಮಸ್ಯೆ, ಸರಕಾರಿ ಶಾಲೆ, ಆಸ್ಪತ್ರೆಗಳ ಕಟ್ಟಡ ಸಮಸ್ಯೆ ಬಗ್ಗೆ ತೀವ್ರ ಚರ್ಚೆ ನಡೆಯಿತು. ಗಮನ ಸೆಳೆಯುವ ಪ್ರಶ್ನೆಯಲ್ಲಿ ಬ್ಯಾಂಕಿಂಗ್ ನೇಮಕಾತಿಯಲ್ಲಿ ಸ್ಥಳೀಯರಿಗೆ ಅವಕಾಶ ಕುರಿತು ಚರ್ಚೆ ನಡೆಯಿತು. ಕುಂದಾಪುರ ಹಾಲಿ ಶಾಸಕ ಎ. ಕಿರಣ್ ಕೊಡ್ಗಿ ಸಹಿತ ಹಲವರು ಪ್ರೇಕ್ಷಕರ ಗ್ಯಾಲರಿಯಲ್ಲಿ ಕುಳಿತು ಸದನ ಕಲಾಪವನ್ನು ವೀಕ್ಷಿಸಿದರು.

ಮೂರು ಪ್ರಮುಖ ಮಸೂದೆಗಳ ಅಂಗೀಕಾರ:

ಕುಂದಾಪುರ ತಾಲೂಕಿನ ಯುವ ಸಂಸತ್ತಿನ ಅಧಿವೇಶನದಲ್ಲಿ ಸಮಾಜಕ್ಕೆ ಪ್ರಸ್ತುತವಾಗಿರುವ 3 ಪ್ರಮುಖ ವಿಷಯಗಳು/ಮಸೂದೆಗಳ ಕುರಿತು ಗಂಭೀರ ಚರ್ಚೆ ನಡೆದು ಮಸೂದೆ ಅಂಗೀಕಾರಗೊಂಡಿತು.

* ಮಾದಕ ದ್ರವ್ಯಗಳು ಮತ್ತು ಸೈಕೋ ಟ್ರೋಪಿಕ್ ಪದಾರ್ಥಗಳ ಕಾಯ್ದೆ-1985 (ಮಸೂದೆ): ಯುವ ಪೀಳಿಗೆಯನ್ನು ಮಾದಕ ದ್ರವ್ಯಗಳ ಜಾಲದಿಂದ ರಕ್ಷಿಸುವ ಮತ್ತು ನಿಷೇಧವನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸುವ ಕುರಿತು ಕರಡು ಮಸೂದೆಯ ಚರ್ಚೆ.

*ಸಾಮಾಜಿಕ ಜಾಲತಾಣಗಳ ಬಳಕೆದಾರರ ವಯೋಮಿತಿ ನಿಯಂತ್ರಣ ಮಸೂದೆ: ಅಪ್ರಾಪ್ತ ವಯಸ್ಕರಲ್ಲಿ ಹೆಚ್ಚುತ್ತಿರುವ ಸೋಶಿಯಲ್ ಮೀಡಿಯಾ ಬಳಕೆಗೆ ಕಾನೂನಾತ್ಮಕ ವಯೋಮಿತಿ ನಿಗದಿಪಡಿಸುವ ಪ್ರಸ್ತಾಪದಲ್ಲಿ ಚರ್ಚೆಯಾಗಿ 16 ವಯೋಮಾನ ಮಿತಿಗೊಳಿಸಲು ಮಂಡಿಸಲಾಯಿತು.

*ಮೋಟಾರು ವಾಹನ ಕಾಯ್ದೆ-1988 ಕಠಿಣ ಮಸೂದೆ: ಚಾಲನಾ ಪರವಾನಗಿ ವಿತರಣೆ ಮತ್ತು ರಸ್ತೆ ಸುರಕ್ಷತೆಯ ನಿಯಮಗಳನ್ನು ಮತ್ತಷ್ಟು ಬಿಗಿಗೊಳಿಸುವ ನಿಬಂಧನೆಗಳ ಚರ್ಚೆಯಾಯಿತು.

ತಾಲೂಕಿನಲ್ಲಿ ಮೂವರು ಅತ್ಯುತ್ತಮ, ಜಿಲ್ಲಾ ಮಟ್ಟಕ್ಕೆ 74 ಮಂದಿ

ಕುಂದಾಪುರ, ಬೈಂದೂರು ತಾಲೂಕು ಒಳಗೊಂಡಂತೆ ಪ್ರೌಢಶಾಲೆ, ಪದವಿಪೂರ್ವ, ಪದವಿ, ಸ್ನಾತಕೋತ್ತರ ವಿಭಾಗದಲ್ಲಿ ನಿಗದಿತ ಅನುಪಾತದ ಆಧಾರದ ಮೇಲೆ ಒಟ್ಟು 74 ವಿದ್ಯಾರ್ಥಿಗಳನ್ನು ಜಿಲ್ಲಾ ಮಟ್ಟದ ಕಾರ್ಯಕ್ರಮಕ್ಕೆ ಕಳುಹಿಸಲು ಆಯ್ಕೆ ಮಾಡಲಾಯಿತು. ಸುಮಾರು 180ಕ್ಕೂ ಅಧಿಕ ವಿದ್ಯಾರ್ಥಿಗಳು ವಿವಿಧ ಶಿಕ್ಷಣ ಸಂಸ್ಥೆಗಳಿಂದ ಆಗಮಿಸಿದ್ದರು.

ತಾಲೂಕಿನಲ್ಲಿ ನಡೆದ ಯುವ ಸಂಸತ್ತು ಕಾರ್ಯಕ್ರಮದಲ್ಲಿ ಅತ್ಯುತ್ತಮ ಚರ್ಚಾ ಸ್ಪರ್ಧೆ ವಿಜೇತರಾಗಿ ಕುಂದಾಪುರ ಡಾ.ಬಿ.ಬಿ ಹೆಗ್ಡೆ ಕಾಲೇಜಿನ ಪ್ರಥಮ ಬಿ.ಕಾಂ ವಿದ್ಯಾರ್ಥಿನಿ ಕೃತಿ ಕೆ. ದೇವಾಡಿಗ, ಮೂಡ್ಲಕಟ್ಟೆ ಎಂಐಟಿ ಕಾಲೇಜಿನ ದ್ವಿತೀಯ ವರ್ಷದ ಇಂಜಿನಿಯರಿಂಗ್ ವಿದ್ಯಾರ್ಥಿನಿ ಸಿಂಚನಾ ಎಸ್. ಮಿರ್ಜಾಕರ್, ಕುಂದಾಪುರ ವಿ.ಕೆ.ಆರಂ. ಆಂಗ್ಲ ಮಾಧ್ಯಮ ಶಾಲೆಯ ಸಮರ್ಥ ಎಸ್. ಶ್ರೀಗಣಿ ಆಯ್ಕೆಯಾದರು.

ಅಂತಾರಾಷ್ಟ್ರೀಯ ಪ್ರಜಾಪ್ರಭುತ್ವ ದಿನಾಚರಣೆ ಅಂಗವಾಗಿ ಪ್ರಜಾಪ್ರಭುತ್ವ ಚಲನಶೀಲತೆಯನ್ನು ಮತ್ತಷ್ಟು ವಿಸ್ತರಿಸುವ ಉದ್ದೇಶ ಮತ್ತು ಯುವ ಸಮುದಾಯಕ್ಕೆ ದೇಶದ ಸಂಸದೀಯ ವ್ಯವಸ್ಥೆ ಪರಿಚಯಿಸಲು ಜಿಲ್ಲೆಯಲ್ಲಿ ಸೆ.15 ರಂದು ಅಂತಾರಾಷ್ಟ್ರೀಯ ಪ್ರಜಾಪ್ರಭುತ್ವ ದಿನಾಚರಣೆ ಆಯೋಜಿಸಿದ್ದು ಇದರ ಅಂಗವಾಗಿ ಅ.16ರಂದು ಕುಂದಾಪುರ-ಬೈಂದೂರು ತಾಲೂಕು ಮಟ್ಟದಲ್ಲಿ ಸರಕಾರದ ಮಾರ್ಗಸೂಚಿಯಂತೆ ‘ಯುವ ಸಂಸತ್ತು’ ಸಭೆ ನಡೆಸಲಾಗಿದೆ.

-ರಮೇಶ್ ಕುಲಾಲ್, ಸಹಾಯಕ ನಿರ್ದೇಶಕರು, ಸಮಾಜ ಕಲ್ಯಾಣ ಇಲಾಖೆ ಕುಂದಾಪುರ.