ಉಡುಪಿ- ಉಚ್ಚಿಲ ದಸರಾ: ವೈಭವದ ಶೋಭಯಾತ್ರೆಗೆ ಸಾಕ್ಷಿಯಾದ ಭಕ್ತಸಾಗರ

ಪಡುಬಿದ್ರಿ, ಅ.21: ಉಚ್ಚಿಲ ಶ್ರೀಮಹಾಲಕ್ಷ್ಮೀ ದೇವಸ್ಥಾನದಲ್ಲಿ ನಡೆದ ಐದನೇ ವರ್ಷದ ಉಡುಪಿ ಉಚ್ಚಿಲ ದಸರಾ-2026 ಮಹೋತ್ಸವವು ಸೋಮವಾರ ನವದುರ್ಗೆಯರು, ಶಾರದೆ ಮಾತೆಯ ವೈಭವದ ಮೆರವಣಿಗೆಗೆ ಸಾವಿರಾರು ಭಕ್ತರು ಸಾಕ್ಷಿಯಾದರು.

ಮೀನುಗಾರಿಕೆ ಹಾಗೂ ತುಳುನಾಡಿನ ಸಂಸ್ಕೃತಿ, ಪರಂಪರೆಯನ್ನು ಬಿಂಬಿಸುವ ವಿವಿಧ ಟ್ಯಾಬ್ಲೊಗಳು ಶೋಭಾ ಯಾತ್ರೆಯ ಪ್ರಮುಖ ಆಕರ್ಷಣೆಯಾಗಿದ್ದವು. ಬಿರುದಾವಳಿ, ಬಣ್ಣದ ಕೊಡೆಗಳು, ಕೊಂಬು-ಕಹಳೆ, ಡೋಲು, ಬ್ಯಾಂಡ್, ನಾಗಸ್ವರ, ಸ್ಯಾಕ್ಸೋಫೋನ್, ನಾಸಿಕ್ ಬ್ಯಾಂಡ್, ಚೆಂಡೆ, ದೇವರ ಗೊಂಬೆಗಳು, ಕುಣಿತ ಭಜನೆ, ಡಿಜೆ ಭಜನೆ, ಬೇಡರ ನೃತ್ಯ, ಹುಲಿವೇಷ, ತಟ್ಟಿರಾಯ ಹಾಗೂ ಮಹಿಷಮರ್ಧಿನಿ ಪ್ರದರ್ಶನಗಳು ಮೆರವಣಿಗೆಗೆ ವಿಶೇಷ ಮೆರುಗು ನೀಡಿದವು.

ಇದರೊಂದಿಗೆ ಬ್ರೆಜಿಲ್ ನೃತ್ಯ, ಪರಿಸರ ಜಾಗೃತಿ ಟ್ಯಾಬ್ಲೊ, ಶಿವಾಜಿ, ಜಟಾಯು, ರಾವಣ, ಸೀತೆ, ಧನಲಕ್ಷ್ಮೀ ದೇವಿ, ಲಂಕಿಣಿ, ಮಹಿಷಾಸುರ ವಧೆ, ಮತ್ಸ್ಯಕನ್ಯೆ, ಹನುಮಂತ, ರಾಮ-ಲಕ್ಷ್ಮಣ, ಶ್ವೇತಕುಮಾರ ಚರಿತ್ರೆ, ದೇವಿ-ಅಸುರರ ಪ್ರದರ್ಶನ, ನವದುರ್ಗೆಯರು ಹಾಗೂ ಮಕ್ಕಳ ಶಾರದೆ ಸೇರಿದಂತೆ ವೈವಿಧ್ಯಮಯ ಸಾಂಸ್ಕೃತಿಕ ಪ್ರದರ್ಶನಗಳು ಜನರ ಗಮನ ಸೆಳೆದವು.

ಮಹಾಲಕ್ಷ್ಮೀ ದೇವಸ್ಥಾನ, ಬೆಣ್ಣೆಕುದ್ರು, ಬಗ್ವಾಡಿ, ಉಚ್ಚಿಲ ಮಹಾಲಕ್ಷ್ಮೀ, ಮಾಧವ ಮಂಗಲ, ಸದಿಯ ಸಾಹುಕಾರ, ಆನೆ ಹಾಗೂ ವಿವಿಧ ಭಜನಾ ಮಂಡಳಿಗಳ ಪ್ರಸ್ತುತಿಗಳು ಶೋಭಾಯಾತ್ರೆಯ ವೈಭವವನ್ನು ಹೆಚ್ಚಿಸಿದವು. ಶಾರದೆ ಮಾತೆ ಹಾಗೂ ನವದುರ್ಗೆಯರ ವಿಗ್ರಹಗಳೊಂದಿಗೆ ಸಾಗಿದ ಮೆರವಣಿಗೆಯಲ್ಲಿ ಒಟ್ಟು 10 ಟ್ಯಾಬ್ಲೊಗಳು ವಿಶೇಷ ಆಕರ್ಷಣೆಯಾಗಿದ್ದವು.

ವಿಶೇಷ ಕಾರ್ಯಕ್ರಮಗಳು: ಉಚ್ಚಿಲ ಶ್ರೀಮಹಾಲಕ್ಷ್ಮೀ ದೇವಸ್ಥಾನ ದಿಂದ ರಾಷ್ಟ್ರೀಯ ಹೆದ್ದಾರಿ 66ರ ಮೂಲಕ ಎರ್ಮಾಳು, ಉಚ್ಚಿಲ, ಮೂಳೂರು ಮಾರ್ಗವಾಗಿ ಕಾಪು ಬೀಚ್ ದೀಪಸ್ತಂಭದವರೆಗೆ ಶೋಭಾ ಯಾತ್ರೆ ಸಾಗಿತು. ಕಾಪು ದೀಪಸ್ತಂಭದ ಸಮೀಪ ಸಮುದ್ರದಲ್ಲಿ ವಿಶೇಷ ಕಾರ್ಯಕ್ರಮಗಳು ನೆರವೇರಿದವು.

ಧಾರ್ಮಿಕ ಶ್ರದ್ಧೆ, ತುಳುನಾಡಿನ ಸಾಂಸ್ಕೃತಿಕ ಪರಂಪರೆ, ಕಲಾ ವೈವಿಧ್ಯ ಹಾಗೂ ಸಮುದ್ರದ ಮಧ್ಯೆ ನಡೆದ ವಿಶೇಷ ಕಾರ್ಯಕ್ರಮಗಳೊಂದಿಗೆ ಐದನೇ ವರ್ಷದ ಉಡುಪಿ ಉಚ್ಚಿಲ ದಸರಾ ಮಹೋತ್ಸವವು ಭಕ್ತರ ಮನದಲ್ಲಿ ಸ್ಮರಣೀಯ ಅನುಭವ ಮೂಡಿಸಿತು.

ರಾಷ್ಟಿಥಯ ಹೆದ್ದಾರಿ 66ರ ಸನಿಹದದಲ್ಲೇ ನಡೆಯುತ್ತಿರುವ ಉಚ್ಚಿಲ ದಸರಾವನ್ನು ವೀಕ್ಷಿಸಲು ಲಕ್ಷಾಂತರ ಮಂದಿ ಕ್ಷೇತ್ರಕ್ಕೆ ಭೇಟಿ ನೀಡುತ್ತಿದ್ದು ಹೆದ್ದಾರಿಯುದ್ದಕ್ಕೂ ವಾಹನ ದಟ್ಟಣೆ ಹೆಚ್ಚಾಗಿತ್ತು. ಎರ್ಮಾಳು-ಉಚ್ಚಿಲ- ಮೂಳೂರು ನಡುವೆ ವಾಹನ ಸಂಚಾರ ವೃತ್ಯಯದ ಒತ್ತಡವನ್ನು ನಿಯಂತ್ರಿಸಲು ಜಿಲ್ಲಾ ಪೋಲಿಸ್ ಇಲಾಖೆಯಿಂದ ವಿವಿಧ ಠಾಣೆ ಪೊಲೀಸರೊಂದಿಗೆ, ಗೃಹರಕ್ಷಕದಳ ಸಿಬ್ಬಂದಿ ಹಾಗೂ ಸ್ವಯಂ ಸೇವಕರ ಹಗಲು ರಾತ್ರಿ ಕರ್ತವ್ಯಕ್ಕೆ ಭಾರೀ ಮೆಚ್ಚುಗೆ ವ್ಯಕ್ತವಾಗಿದೆ.