‘ನಡಿಗೆ’ ಪಾದರಕ್ಷೆ ಸಂಗ್ರಹ ಸಾಮಾಜಿಕ ಅಭಿಯಾನಕ್ಕೆ ಚಾಲನೆ

ಉಡುಪಿ, ಅ.23: ಮನೆಯಲ್ಲಿ ಬಳಸಿದ ಅಥವಾ ಬಳಕೆಯಾಗದ ಉತ್ತಮ ಗುಣಮಟ್ಟದಲ್ಲಿರುವ ಪಾದರಕ್ಷೆಗಳನ್ನು ಹೊಸ ಪಾದರಕ್ಷೆಗಳಾಗಿ ಪರಿವರ್ತಿ ಸುವ ಮೂಲಕ ಬಡ ಮಕ್ಕಳಿಗೆ ಕೊಡುಗೆಯಾಗಿ ನೀಡುವ ಉದ್ದೇಶದಿಂದ ಹಮ್ಮಿಕೊಳ್ಳಲಾಗಿರುವ ಮೂರು ದಿನಗಳ ‘ನಡಿಗೆ’ ಸಾಮಾಜಿಕ ಅಭಿಯಾನಕ್ಕೆ ಶುಕ್ರವಾರ ಚಾಲನೆ ನೀಡಲಾಯಿತು.

ಉಡುಪಿಯ ಎಂಜಿಎಂ ಕಾಲೇಜಿನ ಆವರಣದಲ್ಲಿ ದಿವಂಗತ ಖಾನ್ ಬಹದ್ದೂರು ಹಾಜಿ ಅಬ್ದುಲ್ಲಾ ಸಾಹೇಬ್ ವೇದಿಕೆಯಲ್ಲಿ ನಡೆದ ಅಭಿಯಾನಕ್ಕೆ ಗಿಡ ನೆಡುವ ಮೂಲಕ ಉಡುಪಿ ಶೋಕಾ ಮಾತಾ ಇಗರ್ಜಿಯ ಧರ್ಮಗುರು ರೆ.ಫಾ. ಡೆನಿಸ್ ಡೇಸಾ ಚಾಲನೆ ನೀಡಿ ಶುಭ ಹಾರೈಸಿದರು.

ಮುಂಬೈ ಗ್ರೀನ್‌ಸೋಲ್‌ನ ಸಹ ಸಂಸ್ಥಾಪಕ ಶ್ರೀಯಾನ್ಸ್ ಭಂಡಾರಿ ಮಾತನಾಡಿ, ಮರುಬಳಕೆಗಾಗಿ ಸಾಕಷ್ಟು ಪಾದರಕ್ಷೆಗಳನ್ನು ಸಂಗ್ರಹಿಸಲಾಗಿದ್ದು, ಇವುಗಳನ್ನು ಸ್ವಚ್ಛಗೊಳಿಸಿ, ಮರುಬಳಕೆ ಮಾಡಿ ಅಗತ್ಯವಿರುವ ಮಕ್ಕಳಿಗೆ ದಾನ ಮಾಡಲಾಗುತ್ತದೆ. ಈ ಅಭಿಯಾನವು 10 ವರ್ಷಗಳಿಂದ ನಡೆದುಕೊಂಡು ಬರುತ್ತಿದೆ. ಒಬ್ಬರಿಗೊಬ್ಬರು ಸಹಾಯ ಮಾಡುವುದು ಮತ್ತು ಪರಸ್ಪರ ಕಾಳಜಿ ವಹಿಸುವುದು ದೇವರ ಅತಿ ದೊಡ್ಡ ಸಂದೇಶವಾಗಿದೆ. ಯುವಜನತೆ ಯಾವುದೇ ನಿರ್ದಿಷ್ಟ ಪದವಿ ಇಲ್ಲದಿದ್ದರೂ, ತಮ್ಮ ಕನಸುಗಳು ಮತ್ತು ಉತ್ಸಾಹವನ್ನು ಕಠಿಣ ಪರಿಶ್ರಮ ಹಾಗೂ ನಿರಂತರತೆ ಯೊಂದಿಗೆ ಬೆನ್ನಟ್ಟಬೇಕು ಎಂದರು.

ಕಾರ್ಯಕ್ರಮದ ಆಯೋಜಕ ಅವಿನಾಶ್ ಕಾಮತ್ ಪ್ರಾಸ್ತಾವಿಕವಾಗಿ ಮಾತನಾಡಿ, ಈ ಅಭಿಯಾನದ ಮೂಲಕ ಸಂಗ್ರಹಿಸಲಾದ ಪಾದರಕ್ಷೆಗಳನ್ನು ಮುಂಬಯಿಯ ’ಗ್ರೀನ್‌ಸೋಲ್ ಫೌಂಡೇಷನ್’ಗೆ ಕಳುಹಿಸಲಾಗುತ್ತದೆ. ಅಲ್ಲಿ ಅವುಗಳನ್ನು ಅಪ್ ಸೈಕ್ಲಿಂಗ್(ಹೊಸ ಬಳಕೆಗೆ ರೂಪಾಂತರ) ಪ್ರಕ್ರಿಯೆ ಮೂಲಕ ಮರುಬಳಕೆಗೆ ಸಿದ್ಧಪಡಿಸಿ ದೇಶಾ ದ್ಯಂತ ಅಗತ್ಯ ಇರುವ ಬಡವರಿಗೆ ಉಚಿತವಾಗಿ ವಿತರಿಸಲಾಗುತ್ತದೆ. ಈಗಾಗಲೇ ನಮಗೆ 6000 ಪಾದರಕ್ಷೆ ಬಂದಿದೆ. ಇನ್ನು ಮೂರು ದಿನ ಸಾರ್ವಜನಿಕರು ತಾವು ಸಂಗ್ರಹಿಸಿದ ಪಾದರಕ್ಷೆಗಳನ್ನು ತಂದು ನಮಗೆ ನೀಡಲಿದ್ದಾರೆ ಎಂದು ತಿಳಿಸಿದರು.

ಹಿರಿಯ ಸಮಾಜ ಸೇವಕ ವಿಶ್ವನಾಥ ಶೆಣೈ, ಜನತಾ ಗ್ರೂಪ್‌ನ ನಿರ್ದೇಶಕ ರಕ್ಷಿತ್ ಕುಂದರ್, ಮಣಿಪಾಲ ಎಚ್‌ಪಿಆರ್ ಗ್ರೂಪ್ ಆಫ್ ಇನ್ಸಿಟ್ಯೂಟ್‌ನ ಚೇಯರ್‌ಮೆನ್ ಹರಿಪ್ರಸಾದ್ ರೈ, ಎಂಜಿಎಂ ಕಾಲೇಜಿನ ಪ್ರಾಂಶುಪಾಲೆ ಡಾ.ಗಾಯತ್ರಿ ಪೈ, ಉಪಪ್ರಾಂಶುಪಾಲ ಡಾ.ಎಂ.ವಿಶ್ವನಾಥ ಪೈ ಶುಭ ಹಾರೈಸಿದರು. ಕಾಲೇಜಿನ ಉಪನ್ಯಾಸಕ ಸುಜಿತ್ ಕೋಟ್ಯಾನ್ ಕಾರ್ಯಕ್ರಮ ನಿರೂಪಿಸಿದರು.

ಉಡುಪಿಯಲ್ಲಿ ವಿಶ್ವದಾಖಲೆ ಗುರಿ

ಉಡುಪಿಯಲ್ಲಿ ಮರುಬಳಕೆಗಾಗಿ ಪಾದರಕ್ಷೆಗಳ ಸಂಗ್ರಹಣೆಯಲ್ಲಿ ಗಿನ್ನೆಸ್ ವಿಶ್ವ ದಾಖಲೆಯನ್ನು ಮುರಿಯುವ ಆಶಯವನ್ನು ಶ್ರೀಯಾನ್ಸ್ ಭಂಡಾರಿ ಈ ಸಂದರ್ಭದಲ್ಲಿ ವ್ಯಕ್ತಪಡಿಸಿದರು.

ಮರುಬಳಕೆಗಾಗಿ ಅಮೆರಿಕದಲ್ಲಿ 16,000 ಪಾದರಕ್ಷೆಗಳನ್ನು ಸಂಗ್ರಹಿಸುವ ಮೂಲಕ ಈ ಹಿಂದೆ ವಿಶ್ವ ದಾಖಲೆ ಮಾಡಲಾಗಿತ್ತು. ಇದೀಗ ಉಡುಪಿ ಯಲ್ಲಿ 20,000 ಪಾದರಕ್ಷೆಗಳು ದಾಟುವ ಗುರಿಯಿದೆ. ಈ ಸಂಖ್ಯೆ ದಾಟಿದರೆ ಉಡುಪಿ ಗಿನ್ನೆಸ್ ವಿಶ್ವದಾಖಲೆಯಲ್ಲಿ ಸ್ಥಾನ ಪಡೆಯಲಿದೆ ಎಂದು ಅವರು ತಿಳಿಸಿದರು.

ಅದೇ ರೀತಿ ಮುಂದಿನ ವರ್ಷ ಕೇವಲ ಪಾದರಕ್ಷೆಗಳನ್ನು ಸಂಗ್ರಹಿಸುವುದಷ್ಟೇ ಅಲ್ಲದೆ, ಸ್ವಯಂಸೇವಕರು ನೇರವಾಗಿ ಗ್ರಾಮಗಳಿಗೆ ತೆರಳಿ ತಮ್ಮ ಸ್ವಂತ ಕೈಗಳಿಂದ ಅಗತ್ಯವಿರುವ ಮಕ್ಕಳಿಗೆ ಪಾದರಕ್ಷೆಗಳನ್ನು ವಿತರಿಸಲಿದ್ದಾರೆ ಎಂದು ಅವರು ಮಾಹಿತಿ ನೀಡಿದರು.