ಕಾರಂತರ ಬರಹ ಸರ್ವಕಾಲಕ್ಕೂ ಪ್ರಸ್ತುತ: ಎ.ಎನ್.ಎಸ್.ಹೆಬ್ಬಾರ್

ಕುಂದಾಪುರ, ಅ.24: ಹೆಂಗರುಳು, ಮಕ್ಕಳ ಮೇಲೆ ಅಪಾರ ಪ್ರೀತಿ ಹೊಂದಿದ್ದ ಡಾ.ಶಿವರಾಮ ಕಾರಂತರು ಜೀವಂತ ದಂತಕಥೆಯಾಗಿ ಒಂದು ಶತಮಾನದ ಆದಿಯಲ್ಲಿ ಜನಿಸಿ ಅಸ್ತಮಿಸಿದ ಸೂರ್ಯನಂತ ವ್ಯಕ್ತಿತ್ವದ ಧೀಮಂತ ವ್ಯಕ್ತಿ. ನಮ್ಮ ದೇಶದಲ್ಲಿ ಕಾರಂತರು ಅನಭಿಷಕ್ತ ಲೋಕಾಯುಕ್ತ. ಅವರ ಬರಹ ಸರ್ವಕಾಲಕ್ಕೂ ಪ್ರಸ್ತುತ. ಶತಮಾನದ ಪುರುಷ. ಸರಳವಾದ ಬರಹ ಅವರದಾಗಿತ್ತು ಎಂದು ಹಿರಿಯ ನ್ಯಾಯವಾದಿ, ಲೇಖಕ, ಸಾಂಸ್ಕೃತಿಕ ಚಿಂತಕ ಎ.ಎಸ್.ಎನ್.ಹೆಬ್ಬಾರ್ ಹೇಳಿದ್ದಾರೆ.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ, ಡಾ.ಶಿವರಾಮ ಕಾರಂತ ಟ್ರಸ್ಟ್ ಉಡುಪಿ, ಡಾ.ಬಿ.ಬಿ.ಹೆಗ್ಡೆ ಪ್ರಥಮ ದರ್ಜೆ ಕಾಲೇಜು ಕುಂದಾಪುರದ ಕನ್ನಡ ವಿಭಾಗದ ಸಂಯುಕ್ತ ಆಶ್ರಯದಲ್ಲಿ ಕಾಲೇಜಿನಲ್ಲಿ ಶನಿವಾರ ಆಯೋಜಿಸಲಾದ ಕಾರಂತರ ಜನ್ಮ ದಿನೋತ್ಸವ ಹಾಗೂ ಪ್ರಶಸ್ತಿ ಪ್ರದಾನ ಸಮಾರಂಭದ ಪ್ರಯುಕ್ತ ನಡೆದ ’ಕಾರಂತರ ಕಥನಗಳ ವರ್ತಮಾನದ ಮರು ಓದು’- ಒಂದು ದಿನದ ರಾಷ್ಟ್ರೀಯ ವಿಚಾರ ಸಂಕಿರಣವನ್ನು ಉದ್ಘಾಟಿಸಿ ಅವರು ಮಾತನಾಡುತಿದ್ದರು.

ಸಾಮಾಜಿಕ ಸಮಸ್ಯೆಗಳು, ಅನ್ಯಾಯದ ವಿರುದ್ಧ ಧ್ವನಿಯೆಂಬ ಕೊಡಲಿ ಎತ್ತುತ್ತಿದ್ದ ಕಡಲ ತೀರದ ಭಾರ್ಗವ ಕಾರಂತರು. ಅವರ ಕಾದಂಬರಿಗಳಲ್ಲಿ ಸಮಾಜವನ್ನು ಒಗ್ಗೂಡಿಸಿಕೊಂಡು ಹೋಗುವ, ತನ್ಮಯತೆ ಸೃಷ್ಟಿಸುವ ಶಕ್ತಿಯಿತ್ತು. ಸಮಾಜವನ್ನು ಅವರು ಆಳವಾದ ನೋಟದಿಂದ ನೋಡುತ್ತಿದ್ದ ರೀತಿಗೆ ಸಾಕ್ಷಿಯೇ ಚೋಮನದುಡಿ. ಕಾರಂತರೆಂಬ ಧೀಮಂತ ವ್ಯಕ್ತಿ ಇಂದಿಗೂ ಇರಬೇಕಿತ್ತು ಎಂದು ಹೆಬ್ಬಾರ್ ಅಭಿಪ್ರಾಯಪಟ್ಟರು.

ಡಾ.ಶಿವರಾಮ ಕಾರಂತ ಟ್ರಸ್ಟ್ ಅಧ್ಯಕ್ಷ ಡಾ.ಗಣನಾಥ ಶೆಟ್ಟಿ ಎಕ್ಕಾರು ಆಶಯ ನುಡಿಗಳನ್ನಾಡಿ, ಯುವ ಸಮೂಹಕ್ಕೆ, ಅದರಲ್ಲೂ ಮುಖ್ಯವಾಗಿ ವಿದ್ಯಾರ್ಥಿಗಳಿಗೆ ಶಿವರಾಮ ಕಾರಂತರನ್ನು ಪರಿಚಯಿಸುವ ಜೊತೆಗೆ ಅವರ ಚಿಂತನೆ ಗಳನ್ನು ತಿಳಿಸುವ ಕಾರ್ಯವನ್ನು ಟ್ರಸ್ಟ್ ಮಾಡುತ್ತಿದೆ. ಕರಾವಳಿ, ಸಹಿತ ಕರ್ನಾಟಕ್ಕೆ ಕಾರಂತರು ಇನ್ನಷ್ಟು ತಿಳಿಯಬೇಕಾಗಿದ ಅನಿವಾರ್ಯತೆಯಿದೆ ಎಂದರು.

ಮಂಗಳೂರು ವಿವಿ ಎಸ್‌ವಿಪಿ ಕನ್ನಡ ಅಧ್ಯಯನ ಸಂಸ್ಥೆ ಅಧ್ಯಕ್ಷ ಡಾ. ಧನಂಜಯ ಕುಂಬ್ಳೆ ದಿಕ್ಸೂಚಿ ಭಾಷಣ ಮಾಡಿ ದರು. ಕುಂದಾಪುರ ಎಜುಕೇಶನ್ ಸೊಸೈಟಿ ಕಾರ್ಯದರ್ಶಿ ಸೀತಾರಾಮ ನಕ್ಕತ್ತಾಯ ಅಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ಕಸಾಪ ಅಧ್ಯಕ್ಷ ನೀಲಾವರ ಸುರೇಂದ್ರ ಅಡಿಗ, ಡಾ. ಬಿ.ಬಿ. ಹೆಗ್ಡೆ ಕಾಲೇಜಿನ ಪ್ರಾಂಶುಪಾಲ ಡಾ.ಕೆ.ಉಮೇಶ್ ಶೆಟ್ಟಿ ಕೊತ್ತಾಡಿ, ಕಾರ್ಯಕ್ರಮ ಸಂಯೋಜಕ ಡಾ.ಚೇತನ್ ಶೆಟ್ಟಿ ಕೋವಾಡಿ ಮೊದಲಾದವರು ಉಪಸ್ಥಿತರಿದ್ದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕಿ ಪೂರ್ಣಿಮಾ ಸ್ವಾಗತಿಸಿದರು. ಕಾಲೇಜಿನ ಕನ್ನಡ ಪ್ರಾಧ್ಯಾ ಪಕಿ ರೇಷ್ಮಾ ಶೆಟ್ಟಿ ನಿರೂಪಿಸಿದರು. ವಿದ್ಯಾರ್ಥಿಗಳಾದ ಮನಿಷಾ, ಆದಿತ್ಯ, ಅಭಿಷೇಕ್ ಆಶಯ ಗೀತೆ ಹಾಡಿದರು. ಟ್ರಸ್ಟ್ ಸದಸ್ಯೆ ಡಾ.ಭಾರತಿ ಮರವಂತೆ ವಂದಿಸಿದರು.

ಕಾರಂತರ ಕಥನಗಳಲ್ಲಿ ಸಾಮಾಜಿಕ ನ್ಯಾಯ ಕುರಿತಾಗಿ ಮೊದಲ ಗೋಷ್ಠಿ ನಡೆಯಿತು. ಬಳಿಕ ಕಾರಂತರ ಕಥನ ಗಳಲ್ಲಿ ಮಹಿಳಾ ದೃಷ್ಟಿಕೋನ, ನಂತರ ಕಾರಂತರ ಕಥನಗಳಲ್ಲಿ ಪ್ರಭುತ್ವ ಮತ್ತು ಪ್ರತಿರೋಧದ ನೆಲೆಗಳ ಕುರಿತಾದ ಗೋಷ್ಠಿ ನಡೆಯಿತು. ಅನಂತರ ಸಮಾನಾಂತರ ಗೋಷ್ಠಿ, ಕರಾವಳಿ ರಂಗಾಯಣ ಕಾರ್ಕಳ ರೆಪರ್ಟರಿ ಕಲಾವಿದ ರಿಂದ ಕಾರಂತ ಕಥನ ನಾಟಕ ಪ್ರದರ್ಶಶನಗೊಂಡಿತು.